Ilagano Ipya

Ɨpo aBhafalisaayo bhahʉmvwa ɨntumi ɨzya Yeesu huje ahubhoozya na hubhaaje abhasundwe abhinji tee hunʼshile ʉYoohani ʉMwozi. Ɨnongwa ɨzyɨ lyoli hwa huje ʉYeesu ʉmwene saga ahamʼmwoziizye ʉmuntu nka weeka, leelo abhasundwe bhaakwe bha bhahabhozyaga abhantu. Hu habhaazyo ʉYeesu lwa waamanya huje ɨnongwa ɨzyo zinyampɨɨne, ahasogola mu mukowa ʉgwɨ Yudeeya peeka na bhasundwe bhaakwe, ahaweela hu mukowa ʉgwɨ Galilaaya. Hu habhaazyo lwa bhabhala hu Galilaaya, ʉYeesu na bhasundwe bhaakwe bhahanziwaaga ashilile hu mukowa ʉgwɨ Samaliya. Ɨpo bhahafiha pi‑ibooma limo lya bhahali bhahulikwizya Sikaali. Ibooma ɨlyo lyahali mu mukowa ʉgwɨ Samaliya, nantele lyahali mu pɨɨpɨ nʉ nʼgʉnda ʉgwo ʉYaakobo ahamʼpiiye ʉmwana waakwe, ʉYoosefu. Ɨpo pa pɨɨpo pahali ni‑ilɨndɨ lyɨ mɨnzɨ lya lyahabaniilwe nʉ Yaakobo. ɄYeesu ahakhala panshɨnjɨ yi‑ilɨndɨ ɨlyo huje atʉʉye, hu nongwa yɨ lisu wɨ nshʉʉla. Hu habhaazyo ɨho, yahali mu saala nʼtanda ɨshi pasanya.
Ɨpo ʉnʼshɨ ʉmo ʉNʼsamaliya ahafiha atape amɨnzɨ mwi‑ilɨndɨ liila. ɄYeesu lwa wanʼnola, ahamʼmʉʉzya ahaga, “Ɨlaabha amɨnzɨ ɨmwele.” Hu habhaazyo ɨho, abhasundwe bhaakwe bhahali bhabhalile hwi‑ibooma akale ɨshalye. Ɨpo ʉnʼshɨ ʉNʼsamaliya ʉla ahamʼmwamula ʉYeesu ahaga, “Aawe ʉli Nʼnyahuudi, anɨ ɨndi nʼshɨ Nʼsamaliya. Ʉbhajiiye wɨlɨ hundaabhe amɨnzɨ anɨ?” Ʉnʼshɨ ʉyo ahayanjile ɨsho, pɨpo aBhayahuudi na Bhasamaliya saga bhahali palishimo. ɄYeesu ahamʼmwamula ahaga, “Nkashele wamanyaga ɨho ʉNgʉlʉbhɨ ahwanza ahupeele na huje yʉ naanu ʉyo ahulaabha amɨnzɨ aga‑amwele, wɨnzaga hundaabhe anɨ, nanɨ nɨnzaga hupeele amɨnzɨ agɨ wʉʉmi ʉwa wiila na wiila.” Ʉnʼshɨ ʉla ahamʼmwamula ʉYeesu ahaga, “Wee Mwɨnɨ, aawe saga ʉli nɨ shɨlɨɨlo ɨsha‑atapile amɨnzɨ, nantele ilɨndɨ ɨli litali tee. Ɨshi ʉbhala hugaaje hwoshi amɨnzɨ ɨgo agɨ wʉʉmi? Ʉmaama weetu ʉYaakobo yʉʉyo ya‑ahatipiiye ilɨndɨ ɨli ɨlyɨ mɨnzɨ, wope ahali amwela amɨnzɨ gaakwe peeka na bhaana bhaakwe nɨ vyʉma vyakwe. Wɨlɨ, aawe ʉhwilola aje ʉli nʼgoosi tee ashile ʉmaama weetu ʉYaakobo?” Ɨpo ʉYeesu ahamʼmwamula ahaga, “Ʉmuntu wowonti wa‑amwela amɨnzɨ ga gafuma mwi‑ilɨndɨ ɨli, ahayibha nɨ nyoota nantele. Leelo ʉmuntu wa‑amwela amɨnzɨ ɨgo anɨ ɨhumʼpeela, saga ahayikhatwa nɨ nyoota nantele dumu. Amɨnzɨ ɨgo anɨ ɨhumʼpeela, gahayibha nanshi ɨmbwiwi ɨyɨ mɨnzɨ muuhati yaakwe ɨyo saga ɨhwʉma nka lumo na humʼpeele ʉwʉʉmi ʉwa wiila.” Ɨpo ʉnʼshɨ ʉla ahamʼmʉʉzya ʉYeesu ahaga, “Wee Mwɨnɨ, ɨlaabha ʉmpeele amɨnzɨ ɨgo gʉ‑ʉyanga huje ɨngandi abhe nɨ nyoota, nantele ɨngandi ahwɨnze atape amɨnzɨ mwi‑ilɨndɨ ɨli!”
ɄYeesu ahamʼmwamula ahaga, “Bhala, ʉnʼkwizye ʉnʼnume waaho, ʉyɨnze nawo ɨpa.” Ʉnʼshɨ ʉla ahamʼmwamula ahaga, “Anɨ saga ɨndi nʉ nʼnume.” ɄYeesu ahamʼmʉʉzya ahaga, “Ʉyanjile lyoli huje saga ʉli nʉ nʼnume! Ɨnjanjile ɨsho, pɨpo ʉyegwilwe na bhalume bhasaanu afishe ɨshi, nantele wope wʉ‑ʉkhala nawo ɨshi, saga nʼnume waaho, ɨpo wayanga ɨlyoli.” Ʉnʼshɨ ʉla ahamʼmwamula ʉYeesu ahaga, “Wee Mwɨnɨ, ɨshi naamanya huje aawe ʉli nʼkuwi. Abhamaama bheetu bhahamʼpuutaga ʉNgʉlʉbhɨ pi‑igamba ɨli ɨlyɨ Geliziimu, leelo amwɨ muBhayahuudi muyiga hwi‑ibooma ɨlyɨ Yelusaleemu hwa hukhondɨɨye abhantu humʼpuute ʉNgʉlʉbhɨ.” ɄYeesu ahamʼmwamula ahaga, “Wee nʼshɨ, ʉyɨɨtɨshe zyɨ‑ɨhubhʉʉzya. Ahabhaazyo hahwɨnza ɨho saga mwahayihumʼpuuta ʉDaada ʉNgʉlʉbhɨ pi‑igamba ɨli awe mu nyumba ɨmfinjile ɨya Ngʉlʉbhɨ hu Yelusaleemu. Amwɨ muBhasamaliya muhumʼpuuta ʉNgʉlʉbhɨ wa saga mumʼmɨɨnye, leelo atɨ tiBhayahuudi tihumʼpuuta ʉNgʉlʉbhɨ wa timʼmɨɨnye. Ɨnjanjile ɨsho, pɨpo ʉfyʉli wahayishilila huliitɨ tiBhayahuudi. Ahabhaazyo hahwɨnza nantele hafishile, ɨho abhantu bha bhahumʼpuuta ʉNgʉlʉbhɨ hu lyoli, bhahayihumʼpuuta ʉDaada nanshi ɨsho ʉMʼpepo waakwe sha‑ahubhalongozya humʼpuute ʉmwene sha‑ali wɨ lyoli. ɄDaada ʉNgʉlʉbhɨ ahubhanza abhantu bha bhahumʼpuuta hwi‑idala ɨlyo. ɄNgʉlʉbhɨ yʉ Mʼpepo, abhantu bha bhahumʼpuuta bhakhondɨɨye humʼpuute hu Mʼpepo na hu lyoli.” Ʉnʼshɨ ʉla ahamʼmwamula ʉYeesu ahaga, “Ɨmɨɨnye huje ʉMʼfyʉli ahayɨnza, ʉyo bhahunʼkwizya Kilisiti. Nantele lwa wɨnza ahayihutimamila ɨnongwa zyonti ɨzyɨ kʉndwe wa Ngʉlʉbhɨ.” Ɨpo ʉYeesu ahamʼmwamula ahaga, “Anɨ wɨ‑ɨyanga naawe nɨ Kilisiti.”
Ahabhaazyo ɨho, abhasundwe bha Yeesu bhahaweela. Lwa bhaafiha, bhahaswiga tee hunʼnole ʉYeesu ali ayanje nʉ nʼshɨ. Leelo nʉʉmo ʉnʼsundwe nkʉ‑ʉmo wa‑ahamʼmʉzɨlɨzɨɨzye ʉYeesu huje, “Ʉhwanza yeenu hwa mwene?” Awe aje, “Yeenu ʉyanga nawo?”
Ɨpo ʉnʼshɨ ʉla ahayileha ɨnsonta yaakwe ɨyɨ mɨnzɨ papaala, ahaweela hwi‑ibooma. Lwa waafiha, ahabhabhʉʉzya abhantu ahaga, “Bhaya! Saali munʼnole ʉmuntu wa‑ambʉzɨɨzye ɨnongwa zyonti zya nahabhombaga. Wɨlɨ, ʉmuntu ʉyo abhajiiye abhe yʉ Mʼfyʉli ʉyo tihunʼsʉʉbhɨla huje ahwɨnza?” Ɨshi abhantu lwa bhʉmvwa ɨgo, bhahafuma mwi‑ibooma liila na‑abhale ʉhwo ʉYeesu hwa‑ahali.
Hu habhaazyo hɨnɨɨho abhantu bhaala lwa bhasɨɨle afishe, abhasundwe bhaakwe bhahali bhahunʼkʉndɨɨlɨzya bhahagaga, “Wee Mʼmanyizyi, tihulaabha ʉlye ɨshalye.” Leelo ʉmwene ahabhaamula ahaga, “Anɨ ɨndi nɨ shalye ɨsho amwɨ saga mushimɨɨnye.” Ɨpo abhasundwe bhaakwe bhahanda abhʉzɨlɨzanye bheene bhahaga, “Wɨlɨ, huli ʉmuntu wa‑anʼnetɨɨye ɨshalye lwa saga tahalɨɨho?” ɄYeesu ahabhaamula ahaga, “Ɨshalye shaanɨ anɨ hugabhombe ɨgo agagɨɨne ʉDaada ʉNgʉlʉbhɨ wa‑ahansonteleziizye na huyimalɨɨzye ɨmbombo yaakwe. Amwɨ muyanga huje, ‘Gasagɨɨye ameezi ganɨ lwene afishe hu habhaazyo aha‑ayabhile.’ Leelo anɨ ɨhubhabhʉʉzya huje enyaaji shinza abhantu ɨbha ɨbho saga Bhayahuudi! Abheene bhali nzɨɨla ahwɨtɨshe ɨnongwa zya Ngʉlʉbhɨ nanshi ɨsho ɨviyabho vili nzɨɨla hu nongwa ya‑ayabhilwe. Wope wa‑avuna aposheela ʉmʼposheelo hu mbombo ya‑abhomba. Abhʉngaanya ɨviyabho mu shanga shaakwe ɨvyo avunile hu nongwa yɨ wʉʉmi ʉwa wiila. Ɨpo ʉla wa‑avyala nʉ‑ʉyo wa‑avuna, bhonti bhahayisha peeka. Huli nɨ njango ɨmo ɨyo ɨyiga, ‘Ʉmuntu ʉmo avyala ɨmbeyu nʉ wamwabho avuna.’ Ɨnjango ɨyo yɨ lyoli. Nahabhasonteleziizye amwɨ mu nʼgʉnda avune ɨviyabho ɨvyo saga mwahatotile. Abhantu abhanjɨ bhahabhombile ɨmbombo yonti ɨhome, namwɨ muhuzyaga ɨzya pa mwanya.”

ABhasamaliya abhinji abha hwi‑ibooma liila ɨlyɨ Sikaali, bhahamʼmwɨtɨha ʉYeesu hu simishizi wa bhahʉmvwɨzye afume hwa nʼshɨ ʉla. Ahajile, “Ʉmuntu ʉnʉ ambʉzɨɨzye ɨnongwa zyonti zya nahabhombaga.” Ɨpo aBhasamaliya bhaala bhahafishile pa‑ahali ʉYeesu, bhahanʼnaabha tee huje akhale peeka nabho. Ɨpo ahakhala nabho ɨnsiku zibhɨɨlɨ. Hu habhaazyo ɨho, abhantu abhinji tee bhahamʼmwɨtɨha ʉYeesu hu nongwa ya gaala ga‑ahayangaga. Bhahamʼmʉʉzya ʉnʼshɨ ʉla bhahaga, “Ɨshi tihwɨtɨha, saga hu nongwa yɨ mazwi ɨgo ʉtibhʉzɨɨzye lwene, leelo pɨpo tʉmvwɨzye tɨɨtɨ ɨgo ayanga. Ɨshi, taamanya huje lyoli ʉmuntu ʉnʉ ya yʉʉyo Mʼfyʉli wɨ nsi.”


Ɨnsiku zibhɨɨlɨ lwa zyashila, ʉYeesu na bhasundwe bhaakwe bhahasogola mwi‑ibooma ɨlyɨ Sikaali na‑abhale hu mukowa ʉgwɨ Galilaaya. ɄYeesu ahali ayanjile hwa bhasundwe bhaakwe huje ʉnʼkuwi saga atinihwa pi‑ibooma lyakwe. ɄYeesu lwa waafiha hu Galilaaya, abhantu abha mukowa ʉgwo bhahamʼmwambɨɨlɨla shinza lwene. Bhahamʼmwambɨlɨɨye, pɨpo bhope bhahabhalile hu shikulukulu ɨshɨ Paasaka hwi‑ibooma ɨlyɨ Yelusaleemu. Ɨshi lwa bhahali ʉhwo, bhahagalolile gonti ɨgo ahagabhombile huula.
Ɨpo ʉYeesu ahabhala nantele hwi‑ibooma ɨlyɨ Kaana lya lili hu Galilaaya. Mwi‑ibooma ɨlyo ahagalulɨɨnye amɨnzɨ abhe divaayi. Ʉhwo ahalɨɨho ʉnʼnongozi ʉmo ʉwɨ silikaali ʉyo ahafumile mwi‑ibooma ɨlyɨ Kapelenawumu ʉyo ʉmwana waakwe ʉnʼsahaala ahali mʼminu. Ʉnʼnongozi ʉyo ahʉmvwɨzye huje ʉYeesu ayɨnzɨle hu Galilaaya afume mu mukowa ʉgwɨ Yudeeya. Ahabhala hwa Yeesu hunʼnaabhe tee huje abhale hwi‑ibooma ɨlyɨ Kapelenawumu amʼponie ʉmwana waakwe wa‑ahapalamiiye afwe. ɄYeesu ahamʼmwamula ʉnʼnongozi ʉla ahaga, “Mubhantu amwɨ, wɨlɨ, saga mubhajiiye hunɨɨtɨshe sinta alole ɨvimanyishizyo na mayele amagoosi?” Ʉnʼnongozi ʉla ahamʼmwamula ʉYeesu ahaga, “Wee Mwɨnɨ, ɨhulaabha saali ʉmʼponie ʉmwana waanɨ sha‑asɨɨle afwe.” Leelo ʉYeesu ahamʼmwamula nantele ahaga, “Aawe bhalaga hu khaaya, ʉmwana waaho aponile.” Ʉmuntu ʉla ahɨɨtɨha izwi ɨlyo ʉYeesu lya‑amʼmʉzɨɨzye, ɨpo ahanda abhale hu khaaya.
Ʉnʼnongozi ʉla lwa‑ali mwi‑idala aweele hu khaaya, ahakhomaana na bhabhomvi bhaakwe, bhahamʼmʉʉzya bhahaga, “Ʉmwana waaho aponile.” Ɨpo ahabhabhʉzɨɨlɨzya abhabhomvi bhaakwe ahaga, “Aponile ahwande ndi?” Abheene bhahamʼmwamula bhahaga, “Aponile ahwande igaamo pasanya mu saala ɨyɨ pʉnga (7) ɨshi.” Ɨpo ʉyise wa nʼsahaala ʉla ahamanya huje ʉmwana waakwe ahaponile ahwande mu habhaazyo hahaala lwene ɨho ʉYeesu ahamʼmʉzɨɨzye huje, “Ʉmwana waaho aponile.” Ɨpo ʉnʼnongozi ʉla peeka na bha mu nyumba yaakwe yonti bhahamʼmwɨtɨha ʉYeesu. Ɨshi shahali shimanyishizyo sha bhɨɨlɨ ɨsho ʉYeesu ahabhombile hu Galilaaya, hu habhaazyo ɨho afumile hu Yudeeya.

Gwranda ar Yoohani 4