If you have would like a copy of this version please contact info@davarpartners.org

Text: Dhimal New Testament, CC-BY-SA-4.0, The Love Fellowship. Audio: Dhimal New Testament Audio Bible, CC-BY-SA-4.0, Davar Partners International, The Love Fellowship, 2022

Dhimal New Testament

Dhimal New Testament, by The Love Fellowship is licensed under Creative Commons Attribution-ShareAlike 4.0 License.

येसु द्‍याङको बारका जेरगेलाइहेङ तिङहि जाइ इन्ता हिघाहि, ओदोङ भाअ्सिङ वा इम्बालाइहेङ सिक्स्या पिलि तिकार भारि हानितेङ योम्हि, कालाउ चात्यागेलाइ वाकोता लोहि। कालाउ येसु ओबालाइहेङ सिक्स्या पिकाताङ एसा दोअ्हि:
धन्य ताइमिहेङ आत्मिकि रुपता गरिब सम्झिकालाइ, हाइपालिपानु परमेस्वरको सासन इम्बालाइको दोङ हि।
धन्य सोक पाकालाइ, हाइपालिपानु परमेस्वर दोङ इम्बालाइहेङ सान्ति प्यावा।
धन्य मोनोइ जेङकालाइ, हाइपालिपानु परमेस्वर दोङ इम्बालाइ दोफा ताइको बाचा पुरा पावा।
धन्य नेलाइ जाइ म्हितुकालाइ हाइपालिपानु परमेस्वर दोङ नेलाइहेङ जुउराका प्यावा।
धन्य इम्बालाइ, जाइ दायापाकालाइ, हाइपालिपानु परमेस्वर दोङ इम्बालाइ ह्रुता ताइको दाया तिङपावा।
धन्य मनता सुद्द हिकालाइ, हाइपालिपानु इम्बालाइ परमेस्वरहेङ तिनावा।
धन्य इम्बालाइ जाइ दोङ मिलिपाकालाइ, हाइपालिपानु इम्बालाइ दोङ परमेस्वरको सान्तान दोअ्न्हावा।
धन्य धार्मिक जिबन जियाइका कारन साताइन्हाकालाइ, हाइपालिपानु परमेस्वरको सासन इम्बालाइको दोङ हि।
धन्य नेलाइ, जेलाउ द्‍याङगेलाइ दोङ काङको भाअ्सिङ नेलाइहेङ मन्दा-माताकावा, कालाउ साताइयावा, कालाउ नेलाइको बिरोधता मारेम्का काथागेलाइ दोअ्तावा, हाइपालिपानु नेलाइ काङको चात्या दोङ। एन्सालाउ नेलाइ लेङचासु कालाउ आनान्द जेङसु, हाइपालिपानु नेलाइको भाअ्सिङ स्वर्गता बारका इनाम ताअ्का हि। हेन्जाङ सोमोइ लाम्फाको परमेस्वरको बक्तागेलाइहेङ द्‍याङगेलाइ एन्साङ दोङ साताइका हिघाखे।


नेलाइ इदोइ सुमिङको द्‍याङगेलाइको भाअ्सिङ देसे भाइका जेङसु। कालाउ देसे ताइको ताइका पिलि लाअ्हे पानु, कालाउ हिदोइ आमेनेहोइ ताइका बानाइलि? इङकोते आरोङ काम दोङ मालागिका जेङतेङ बाहार थाइगिल्न्हाङ कालाउ द्‍याङगेलाइ ताइको पाइतालाहोइ याङगिल्लावा।
नेलाइ चाहि इदोइ सुमिङको भाअ्सिङ फाइसालामका भाइका जेङसु। जेदोङ सहर तिकार ह्रुता ताअ्का हि, इङको सहर म्होनालि मादावा। द्‍याङगेलाइ गेसा जोलाइतेङ पाथि लिता मातुखे, वाते चेरादानि ह्रुता ताअ्खे, कालाउ साअ्ता हिका झाराङहेङ फाइसालामका पिखे। नेलाइको फाइसालामका द्‍याङगेलाइको आगाता एसा थाअ्साइताको, कालाउ ओबालाइ नेलाइको रेम्का काम तिनाको, कालाउ स्वर्गता हिका नेलाइको परमेस्वर आबाको महिमा जेनाको।

मोसाको व्यवस्था कालाउ परमेस्वरको बक्तागेलाइ लेखेका काथा का माअ्पालि लोघा दोअ्तेङ मासोचिसु। भरु का माअ्पालि माको कालाउ पुरा पालि लोघा। हाइपालिपानु जातिङ भारि का नेलाइहेङ दोअ्खा, आकास कालाउ प्रिथिबि माअ्तेङ मान्हेपा धाउ परमेस्वरको व्यवस्थाको गोताङ काथा, इता थेकापा कि म्हुइका खान्तेङ म्हुइका काथागेलाइ बुङ प्रभावता ह्यावा जेलाउ थेकापा गोताङ आगमबानिगेलाइ पुरा माजेनावा। ओदोङ भाअ्सिङ जाइ व्यवस्थाको म्हुइका खान्तेङ म्हुइका आग्यागेलाइहेङ उल्ङगन पाखे, कालाउ आरुगेलाइहेङ इन्सिकाङ धिरपाका द्‍याङ परमेस्वरको सासनता झाराङ खान्तेङ आतुइका जेनावा। कालाउ जाइ दोङ व्यवस्था केम्खे, कालाउ आरुगेलाइहेङ बुङ धिरपाखे, वा चाहि परमेस्वरको सासनता झाराङ खान्तेङ बार्का जेनावा। ओदोङ भाअ्सिङ का नेलाइहेङ दोअ्खा, कि जेसापा नाअ् व्यवस्थाको आग्यागेलाइहेङ, व्यवस्था धिरपाका द्‍याङगेलाइ कालाउ फारिसिगेलाइ खान्तेङ रेम्फा माकेम्नुते नेलाइ परमेस्वरको सासनता दुल्लि मानिङस्वाना।

नेलाइ हिङका हिसुना, कि परमेस्वर दोङ केलाइको पुर्खागेलाइहेङ दोअ्का हिघाहि, कि मारा मापासु कालाउ जाइ मारा पावा वासेहेङ यहुदि आदालातता न्याय प्यावा। कालाउ का नेलाइहेङ दोअ्खा, जाइ ताइको ओने दोफा चेर ताम्पाखे, वासेहेङ परमेस्वर दोङ न्याय पावा। कालाउ हासु बुङ ताइको ओनेहेङ तुस्स दोनु वा दोङ यहुदि माहासभाता जोबाफ पिलि गोयावा। ताइको ओनेहेङ मुर्ख दोअ्खे पानु झन नरकको मेता परियावा।
ओदोङ भाअ्सिङ जेसापा नाअ् परमेस्वरहेङ भेति मुन्दिरता चढाइलि खान्तेङ लाम्फा इन्ता नासेहेङ फोम ल्वाङ, कि आधिमि द्‍याङ नादोङ पाका हान्तिता चेर ताम्पाहि, दोअ्का थाहा गिहि पानु, कालाउ ताइको भेति मुन्दिरको आगाता ताअ्तेङ, कालाउ लाम्फा उङको द्‍याङ दोफा मिलिसु, कालाउ न्हुसो लोतेङ भेति मुन्दिरता चढाइ।
आदालतता हानिलाउ दामाताङ नाङको झागारिया दोफा मिलिसु, माकुनुते नाङको झागारिया नासेहेङ न्यायधिसकोता सुम्पि प्यावा कालाउ न्यायधिस सिपालाइको जिम्माता सुम्पि प्यावा, कालाउ नासेहेङ चाहि झ्यालखानाता ह्वातावा। जातिङ भारि का नेलाइहेङ दोअ्खा, कि जेलाउ थेकापा नाअ् गोताङ जरिमाना मातिरियाना जेदोङ रिन नाअ् तिरिलि गोइका हिना एन्सालाउ थेकापा नाअ् इङको झ्यालखानासो ओल्लेलि माद्वाना।

नेलाइ इसिका दोअ्का हिङका हिसुना, कि परमेस्वर आग्याता एसा दोअ्का हिघाहि, नाअ् कासिबिरि मापा। का नेलाइहेङ दोअ्खा, हासु बुङ हिदोइ बुङ बेजानहेङ मारेम्का बिचारहोइ खाङखे पानु वा लाम्फा दोङ ताइको मनहोइ वा दोफा कासिबिरि पाखे। जेसापा नाङको दाम्पाहा मिसियाँ नासेहेङ पाप पालि लागाइनु इङकोहेङ ओल्हापातेङ थाइगिल्पि। नाङको गोताङ जिउ नरकता थाइगिल्लि खान्तेङते भरु परमेस्वरको सासनता जिउको एनोङ भाग मान्थुनु नाङको भाअ्सिङ हेन्जा रेम्का जेनावा। नाङको दाम पाहा खुर नासेहेङ पाप पालि लागाइनु इङको खुर पोतेङ थाइगिल। हाइपालिपानु नाङको गोताङ जिउ नरकता हानिलि खान्तेङ भरु नाङको एनोङ भाग थाइगिल्नु नाङको भाअ्सिङ रेम्का जेनावा।

हासु बुङ ताइको बे हेङ लाखे वासेहेङ खाति पोका पात्तारा लेखे प्याको दोअ्का हि। कालाउ का नेलाइहेङ दोअ्खा, जाइ कासिबिरि बाहेक ताइको बे हेङ लाअ्कानाङ वासेहेङ कासिबिरि पालि लागाइखे, कालाउ जाइ दोङ लाअ्पिका उङको बेबालहेङ बिहु पाखे वा बुङ कासिबिरि पावा।

नेलाइ हिङका हिसुना, कि परमेस्वर दोङ केलाइको पुर्खागेलाइहेङ दोअ्का हिघाहि, कि बाचा मातोरिसु कालाउ परमेस्वरहेङ पाका बाचा पुरा पासु। का नेलाइहेङ जातिङको दोअ्खा, केरा मा-माचासु, कालाउ स्वर्गको मिङता केरा माचा, हाइपालिपानु इङको स्वर्गते परमेस्वरको सिङहासन हि। ना ते प्रिथिबिको केरा चालि, हाइपालिपानु परमेस्वर दोङ इङको ह्रुता ताइको पाइताला ताअ्खे, ना ते यरुसेलेमको सहरको केरा चालि, इङकोते परमेस्वरको सहरदोङ जाइ माहाराजा हि। ताइको पुरिङको केरा माचा, हाइपालिपानु नाअ् एनोङ पुसुङहेङ ना ते जे:का, ना ते दा:का बानाइलि द्वाना। कालाउ नाङको काथा एइनु-एइ जेनाको, कालाउ माकुनु-माको जेनाको, हाइपालिपानु इङको खान्तेङ हेन्जा चाहि साइतानको काथा दोङ हि।

नाअ् हिङका हिना, कि व्यवस्थाता एसापा लेखेका हि, कि मिसियाँको बद्लिता मिसियाँ, कालाउ तासिङको बद्लिता तासिङ। कालाउ का नेलाइहेङ दोअ्खा, नेलाइ हिदोइ बुङ दुस्ट द्‍याङगेलाइ दोफा बद्ला माह्रुसु। जेसापा हासु बुङ नाङको दाम्पाहा गाला चाउरिहि पानु, केपाहाको गाला बुङ धोपि। जेसापा हिदोइ बुङ द्‍याङ नासेहेङ मुद्दा चालाइतेङ आदालातता नाङको लोखन चुम्पुलि खाङखे पानु वासेहेङ नाङको कोट बुङ पि। कालाउ सिपाइ नासेहेङ जोबरजोस्ति आधा-कोस हानिलि लागाइखे पानु, वाको दोफा न्हे-कोस हानिपि। नाङको दोफा ह्रेकालाइहेङ पि, कालाउ नाङको दोफा रिन ह्रेकालाइहेङ बुङ रिन पि।

नेलाइ एसा दोअ्का हिङका हिसुना, कि व्यवस्थाता एसापा लेखेका हि, कि ताइको देरागेलाइहेङ प्रेम पासु, कालाउ सतुरुहेङ चाहि खाङलि माकिसु। कालाउ का नेलाइहेङ दोअ्खा, ताइको सतुरुगेलाइहेङ प्रेम पासु कालाउ नेलाइहेङ साताइकागेलाइको भाअ्सिङ प्रार्थाना पासु, एन्सा पाहे पानु नेलाइ स्वर्गता हिका आबा परमेस्वरको सान्तान जेङस्वाना, हाइपालिपानु परमेस्वर बुङ दुस्ट कालाउ आसल न्हेमि द्‍याङगेलाइ ह्रुता सान्हे ओल्ला पापिखे, धर्मि कालाउ आधर्मि न्हेमिकोङ भाअ्सिङ वाइ लोपापिखे। हाइपालिपानु जेसापा नाअ् ताइमिहेङ प्रेम पाकाहेङ खिनिङ प्रेम पाखेना पानु, परमेस्वर नासेहेङ इनाम माप्यावा। इन्सिकाते पोत ल्होपाकालाइ बुङ पाखे। जेसापा नेलाइ ताइको दादा-ओनेगेलाइहेङ खिनिङ स्‍वागत पासुना पानु, इङको खान्तेङ हिदोइ बुङ बारका काम पाका मान्थु सुन्हा। इन्सिकाते गैर-यहुदिगेलाइ बुङ पाखे, जाइ परमेस्वरको आग्या माकेम्खे। ओदोङ भाअ्सिङ जेलाउ बुङ नेलाइ आसल पासु, जेसाङ स्वर्गता हिका नेलाइको आबा परमेस्वर बुङ आसल पाखे।

Gwranda ar मति 5