Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወተንሥኡ ኵሎሙ በምልኦሙ ወወሰድዎ ኀበ ጲላጦስ። ወአኀዙ ያስተዋድይዎ ወይቤሉ ረከብናሁ ለዝንቱ እንዘ ያዐልዎሙ ለሕዝብነ ወይከልኦሙ ኢየሀቡ ጸባሕተ ለቄሳር ወይሬሲ ርእሶ ክርስቶስሃ ንጉሠ እስራኤል። ወሐተቶ ጲላጦስ ወተስእሎ ወይቤሎ አንተኑ ንጉሦሙ ለአይሁድ ወአውሥአ እግዚእ ኢየሱስ ወይቤሎ አንተ ትብል ከመ አነ ውእቱ። ወይቤሎሙ ጲላጦስ ለሊቃነ ካህናት ወለሕዝብ አልቦ ዘረከብኩ አበሳ ላዕለ ዝንቱ ብእሲ። ወዐውየዉ ወይቤሉ የሀውኮሙ ለሕዝብ ወይሜህር በኵሉ ይሁዳ እኂዞ እምገሊላ እስከ ዝየ። ወሰሚዖ ጲላጦስ እንዘ ይብሉ ገሊላ ተስእለ ገሊላውያነ ለእመ ገሊላዊ ብእሲሁ። ወአእሚሮ ከመ እምኵናነ ሄሮድስ ውእቱ ፈነዎ ኀበ ሄሮድስ እስመ ሀሎ ውእቱ በኢየሩሳሌም በውእቱ መዋዕል። ወሶበ ርእዮ ሄሮድስ ለእግዚእ ኢየሱስ ተፈሥሐ ፈድፋደ እስመ ይፈቅድ ይርአዮ እምጕንዱይ መዋዕል እስመ ይሰምዕ ነገሮ ወይሴፎ ይርአይ ተአምረ በኀቤሁ ዘይገብር። ወሐተቶ በብዙኅ ነገር ወአልቦ ዘተሰጥዎ አሐተ ቃለ። ወይቀውሙ ሊቃነ ካህናት ወጸሐፍት ወብዙኀ ያስተዋድይዎ። ወአስተኣከዮ ሄሮድስ ወተሣለቁ ላዕሌሁ ወዓልያኒሁ ወአልበስዎ ልብሰ ቀይሐ ወፈነዎ ኀበ ጲላጦስ። ወይእተ አሚረ ተኳነኑ ሄሮድስ ወጲላጦስ እስመ ጋእዝ ቦሙ እምቅድም። ወጸውዖሙ ጲላጦስ ለሊቃነ ካህናት ወለመኳንንተ ሕዝብ። ወይቤሎሙ አምጻእክምዎ ኀቤየ ለዝንቱ ብእሲ ከመ ዐላዌ ሕዝብ ወናሁ አነ ሐተትክዎ በቅድሜክሙ ወአልቦ ዘረከብኩ ሎቱ ጌጋየ ለዝንቱ ብእሲ እምዘአንትሙ አስተዋደይክምዎ። ወኀበ ሄሮድስኒ ፈነውኩክሙ ወውእቱኒ ፈነዎ ኀቤነ ወናሁ አልቦ ዘገብረ በዘይመውት። አቅሥፎኬ ወእኅድጎ።

ወቦ ልማድ በበዐል ያሕዩ ሎሙ አሐደ እምነ ሙቁሓን። ወዐውየዉ ኵሎሙ ኅቡረ በምልኦሙ ወይቤሉ አእትቶ ወስቅሎ ለዝ ወአሕዩ ለነ በርባንሃ። ወውእቱሰ በርባን ዘገብረ ሀከከ በውስተ ሀገር ወበቀቲለ ነፍስ ተሞቅሐ። ወፈቂዶ ጲላጦስ ያሕይዎ ለእግዚእ ኢየሱስ ካዕበ ይቤሎሙ ትፈቅዱኑ አሕይዎ ለክሙ ለኢየሱስ። ወዐውየዉ ወይቤሉ ስቅሎ ስቅሎ። ወይቤሎሙ ጲላጦስ በሣልስ ምንተ እኩየ ገብረ ናሁ አልቦ ዘረከብኩ ላዕሌሁ በዘይመውት እቅሥፎኬ እንከሰ ወአሕይዎ። ወዐውየዉ በዐቢይ ቃል ወሰአሉ ወይቤሉ ይስቅልዎ ወኀየለ ቃሎሙ ወቃለ ሊቃነ ካህናት። ወኰነኖ ጲላጦስ ከመ ይኩኖሙ ስእለቶሙ፤ ወአሕየወ ሎሙ ዘሰአልዎ ዘበቀቲለ ነፍስ ወበገቢረ ሁከት ተሞቅሐ ወኢየሱስሃ መጠዎሙ ለፈቃዶሙ።

ወሶበ ወሰድዎ አኀዝዎ ለስምዖን ቀሬናዊ እትወቶ እምሐቅል ወአጾርዎ መስቀሎ ይትልዎ ለእግዚእ ኢየሱስ። ወተለውዎ ብዙኃን ሕዝብ ወአንስትኒ ይበክያሁ ወያስቈቅዋሁ። ወተመይጦን እግዚእ ኢየሱስ ወይቤሎን አዋልደ ኢየሩሳሌም ኢትብክያኒ ኪያየሰ አላ ብክያ ላዕለ ርእስክን ወላዕለ ውሉድክን። እስመ ይመጽእ መዋዕል አመ ይብሉ ብፁዓት መካናት ወከርሥኒ እንተ ኢወለደት ወአጥባትኒ እለ ኢሐፀና። ይእተ አሚረ ይብልዎሙ ለአድባር ደቁ ላዕሌነ ወለአውግርኒ ድፍኑነ። በዝ ዕፅ ርጡብ እመ ከመዝ ዘገብሩ እፎኑመ ይከውን በይቡስ።

ወወሰዱ ካልኣነ ክልኤተ ፈያተ ይስቅሉ ምስሌሁ። ወበጺሖሙ ብሔረ ዘስሙ ቀራንዮ በህየ ሰቀልዎ ወእልክተኒ ክልኤተ ፈያተ አሐደ በየማኑ ወአሐደ በፀጋሙ ሰቀሉ። ወይቤ እግዚእ ኢየሱስ አባ ስረይ ሎሙ እስመ በዘኢየእምሩ ይገብሩ ወተዓፀዉ ዲበ አልባሲሁ ወተካፈሉ። ወይቀውሙ ሕዝብ ወይሬእዩ ወመላእክትኒ ይዘንጕጕዎ ወይብልዎ ዘባዕደ ያድኅን ርእሶ ለያድኅን እመሰ ክርስቶስ ውእቱ ወኅሩዩ ለእግዚአብሔር። ወይሣለቁ ላዕሌሁ ሐራ ወይቀርቡ ወአምጽኡ ሎቱ ብሒአ ይስተይ። ወይቤልዎ እመሰ ንጉሦሙ አንተ ለአይሁድ አድኅን ርእሰከ። ወጸሐፉ መጽሐፈ ላዕሌሁ ወጽሕፈቱ በሮማይስጥ ወበጽርእ ወበዕብራይስጥ ዘይብል ዝንቱ ውእቱ ንጉሦሙ ለአይሁድ።

ወአሐዱ ፈያታዊ እምእለ ተሰቅሉ ምስሌሁ ፀረፈ ወይቤሎ እመሰ አንተ ክርስቶስ አድኅን ርእሰከ ወኪያነሂ። ወአውሥአ ካልኡ ወገሠጾ ወይቤሎ ኢትፈርሆኑ ለእግዚአብሔር አምላክከ አንተ እንዘ ውስተ ዝንቱ ኵነኔ ሀለውከ። ወለነሰ ዘበርቱዕ ረከበነ ዘይደልወነ ወበከመ ምግባሪነ ተፈደይነ ወዝንቱሰ አልቦ እኩይ ዘገብረ ወኢምንትኒ። ወይቤሎ ለእግዚእ ኢየሱስ ተዘከረኒ እግዚኦ አመ ትመጽእ በመንግሥትከ። ወአውሥአ እግዚእ ኢየሱስ ወይቤሎ አማን እብለከ እመን ፈድፋደ ከመ ዮም ትሄሉ ምስሌየ ውስተ ገነት።

ወቀቲሮ ጊዜ ስሱ ሰዓት ሞተ ፀሐይ ወጸልመ ኵሉ ዓለም እስከ ጊዜ ተሱዓት ሰዓት። ወጸልመ ፀሐይ ወተሰጠ መንጦላዕተ ምኵራብ እማእከሉ እምላዕሉ እስከ ታሕቱ። ወሶቤሃ ጸርሐ እግዚእ ኢየሱስ በዐቢይ ቃል ወይቤ አባ ውስተ እዴከ አመሐፅን ነፍስየ ወዘንተ ብሂሎ መጠወ ነፍሶ። ወርእዮ መስፍነ ምእት ዘኮነ አእኰቶ ለእግዚአብሔር ወይቤ አማን ጻድቅ ውእቱ ዝብእሲ። ወኵሎሙ ሕዝብ እለ ኮኑ ጉቡኣነ ሶበ ርእዩ ዘኮነ ጐድኡ እንግድዓቲሆሙ ወተሠውጡ ወአተዉ አብያቲሆሙ። ወይቀውሙ ኵሎሙ እለ የአምርዎ እምርኁቅ ወአንስትኒ እለ ተለዋሁ እምገሊላ ርእያ ዘንተ።

ወመጽአ ብእሲ ዘስሙ ዮሴፍ ባዕል ብእሲ ኄር ወጻድቅ ወጠቢብ። ወውእቱሰ ኢሀሎ ውስተ ምክሮሙ ወምግባሮሙ ለአይሁድ ወሀገሩ አርማትያስ ዘእምሀገረ ይሁዳ ወኮነ ይሴፈዋ ውእቱኒ ለመንግሥተ እግዚአብሔር። ወሖረ ኀበ ጲላጦስ ወሰአለ ሥጋሁ ለእግዚእ ኢየሱስ። ወአውረደ ሥጋሁ ወገነዞ በሰንዱናት ወቀበሮ ውስተ መቃብር ዘአውቀረ ዘአልቦ ዘተቀብረ ውስቴቱ ወአንኰርኰረ እብነ ዐቢየ ወአንበረ ውስተ አፈ መቃብር ወኀለፈ። ወዐርብ ውእቱ ዕለት አሜሁ ለጸቢሐ ሰንበት። ወተለዋሁ ክልኤቲ አንስት እለ መጽኣ እምገሊላ ወርእያ መቃብሮ ወዘከመ ተወድየ ሥጋሁ። ወአተዋ ወአስተዳለዋ አፈዋተ ወኀደጋ በሰንበት ሐዊረ እስመ ከማሁ ሕጎሙ።

Gwranda ar ወንጌል ዘሉቃስ 23