Yala - 1979 BSNIG (NT) Non Drama

Iji̍sɔ̄ɔsi yɛ ē yɛ i̍ngi̍ngɔ̍ɔ ma̍, o̍ ma̍ ɔngrɔ̄ɔ opriyī ɔha̍. Ɔngrɔ̄ɔ ɔla̍ā priyī i̍ngɔ̍ɔ bū lipi̍pu̍. A̍chi̍kpo̍ yī Iji̍sɔ̄ɔsi che ɔ̍ ikpo̍ hīka, “Ɔngūlɛ̄lā be̍e! Lɛlā ɔdwɔ̄bi̍ yī ɔ̄nyɛ ohu̍ nīi ɔngrɔ̄ɔ nūma̍ priyī i̍ngɔ̍ɔ bū lipi̍pu̍ ma̍/? Lɛlā ɔdwɔ̄bi̍ yī anu̍ ɔlɔjā kɛ̄ɛ iyī āchɛ nīi ma ɔ̍ ma̍?”
Iji̍sɔ̄ɔsi hīya aa̍ ɔkɔ hīka, “Ala̍ ma̍ ko̍ō! Riyī opōpu yī ɔngrɔ̄ɔ nūma̍ i̍ lā ku lɛlā ɔdwɔ̄bi̍ yī nū kɛ̄ɛ iyī āchɛ nīi ma ɔ̍ ma̍ ni̍. O̍ de priyī hɛ̄ɛbɛ nīi āchɛ ge̍ē ma̍ wɔhu̍ yī u̍ku̍rɔ̍ yī Ɔwɔ la ibi̍īyē yī nū. Yɛ̄grāa nīi yɛnɔ e̍e che ma̍ we̍ ma̍, alɔ ā ya̍ u̍ku̍rɔ̍ yī ɔ̄chɛ nīi de u tɛ̄rɔ̄ ma̍. Otu̍ ge̍ē bī u̍ma̍ama. Yɛ̄grāa ɔla̍ā, ɔ̄chɔ̄chɛ i̍ chī ge̍ē ya̍ u̍ku̍rɔ̍ mɛ ni̍. Yɛ̄grāa nīi n e̍e hɔ̄ ma̍ yɛchɛ ma̍, ami re̍ka ɔla̍ ɔmyɛ̍ma̍ de yɛchɛ wa̍a̍ a̍nɛ.”
Iji̍sɔ̄ɔsi kɛlā nūma̍ ɔpɔ̄ɔpɛ̄ ma̍, o̍ ta̍ arɛ gblāa la ajɛ. O̍ de ɔ̍ ngrāa wa̍a̍, de a̍ru̍ ɔla̍ā re̍tū ɔngrɔ̄ɔ ɔla̍ā la īkprī. O̍ da ɔngrɔ̄ɔ ɔla̍ā ka ɔ̍lɔ ge̍ pīya ge̍ na eyī la U̍bu̍yēenyi yī Isilo̍ōm. Ochi̍chi̍ yī riyī ɔla̍ā re̍ka, “Ode Tɛ̄rɔ̄.” Ɔngrɔ̄ɔ ɔla̍ā pīya gānyɔ̄ ge̍ de eyī na. O̍ ku̍chē wā abɔ̍ɔ de myɛ̍ma̍ bāa ɔchra̍da̍da̍ ma̍.
Aɛ̍nɛ̍ yī nū ba̍la āchɛ wa̍a̍ nīi ma̍ ɔngrɔ̄ɔ ɔla̍ā nīi o̍ ē hɔ̄ abɔ̍ɔ bɔjā i̍ngi̍ngɔ̍ɔ ma̍ chikpo̍ bɛ̍ɛ̄nɛ̄ hīka, i̍ ɔngrɔ̄ɔ nūma̍ ɔ̍lɔ ē hɔ̄ aa̍ ē bɔjā a̍ni̍?
Āchɛ ɛha̍ ka ɔ̍lɔ - ɔ̍lɔ nɛ. Āchɛ ɛha̍ ta̍ahu̍ ka ɔ̍lɔ i̍ ɔ̍lɔ ni̍. Ɔngrɔ̄ɔ nūma̍ ɔ̍lɔ gbla ɔ̍lɔ i̍ngɔ̍ɔ ji.
Ɔngrɔ̄ɔ ɔlɔjā koko̍o de wa̍ ka ɔ̍lɔ - anu̍ nɛ.
Āchɛ ɛla̍ā che ɔ̍ ikpo̍ hīka, “Kana̍ nīi a chī chōo̍chē de myɛ̍ma̍ ma̍?”
Ɔngrɔ̄ɔ ɔla̍ā de koko̍o de wa̍ hīka, ɔngrɔ̄ɔ ɔha̍ nīi - ɔ̍lɔ re̍ka Iji̍sɔ̄ɔsi ma̍ ɔ̍lɔ ngrāa a̍ru̍ de re̍tū anu̍ la īkprī, ka de anu̍ hīka anɔ̍lɔ ge̍ ga u̍bu̍yēenyi yī Isilo̍ōm ge̍ na eyī. Anɔ̍lɔ wā ge̍ pīya gānyɔ̄, de eyī na ɔpɔ̄ɔpɛ̄ ma̍, aa̍ nīi anɔ̍lɔ de myɛ̍ma̍ a̍nɛ.
E̍ che ɔ̍ ikpo̍ ka Iji̍sɔ̄ɔsi ɔ̍lɔma̍ ɔ̍lɔ kɔ̍ɔ̄?
O̍ ka de wa̍ ka anɔ̍lɔ i̍ jo̍ōkū ni̍.

Bū la ɛbɛ ɔla̍ā, e̍ bī ɔngrɔ̄ɔ ɔla̍ā nīi priyī o̍bū ma̍ pīya ga ɛbɛ yī Āchɛ yī Ifa̍rasīi. I̍chi̍chɛ ɔla̍ā nīi Iji̍sɔ̄ɔsi ya̍ a̍ru̍ de lwāa ɔngrɔ̄ɔ ɔla̍ā īkprī ma̍ - Ɔ̄chī Ɔmyɛ̍nyɛ̍ nɛ. Āchɛ yī Ifa̍rasīi ɛla̍ā gba̍a che ɔngrɔ̄ɔ ɔla̍ā ikpo̍ yī ɔjā nīi ya̍ nīi o̍ de myɛ̍ma̍ mɛ ma̍. O̍ koko̍o de wa̍ hīka ɔ̍lɔ ya̍ a̍ru̍ re̍tū anu̍ la īkprī, anɔ̍lɔ na eyī ma̍ nīi anɔ̍lɔ de myɛ̍ma̍ ke̍e̍ hɔ̄ ma̍ a̍nɛ.
Āchɛ yī Ifa̍rasīi ɛha̍ ka bɛ̍ɛ̄nɛ̄ hīka, ɔ̄chɛ nīi - ɔ̍lɔ yɛ̍ɛ̄lā nūma̍ ma̍ ɔ̍lɔ i̍ ɔ̄chɛ yī Ɔwɔ ni̍. Wu̍chē oji̍ nɛ, ɔ̍lɔ i̍ de otūlichō de lihɔ yī Ɔ̄chī Ɔmyɛ̍nyɛ̍ ni̍.
Ibiha̍ ma̍ ka hīka, kana̍ nīi ɔ̄chɛ ɔyɛ̍ɛ̄lā ɔdwɔ̄bi̍ ɔ̍lɔ ge̍ē ya̍ u̍ku̍rɔ̍ ɔlɛbɛ̍bi̍ ita nūma̍ wa̍a̍ mɛ ma̍? Bū la ɛbɛ ɔla̍ā, e̍ de iyī wā kɔ̄ ɛpa.
Bɛ̍ɛ̄nɛ̄, Āchɛ yī Ifa̍rasīi ɛla̍ā gba̍a che ɔngrɔ̄ɔ ɔla̍ā ikpo̍ hīka, “O̍ re̍ka a ka ɔ̍lɔ ya̍ nīi aɔ̍lɔ de myɛ̍ma̍ a̍nɛ? Bɛ̍ɛ̄nɛ̄ ma̍, awɔ ɔlɔjā gbɛri̍ya̍ ka ɔ̍lɔ - ɔ̄nyɛ nɛ?”
Ɔngrɔ̄ɔ ɔla̍ā ka de wa̍ hīka ɔ̍lɔ - ɔ̄chɛ ɔkɛrɔ̄ yī Ɔwɔ nɛ.
Alɛhu̍ yī Iju̍u i̍ chikpo̍ ge̍ē chɛ̄ ka ɔ̍lɔ priyī o̍bū ni̍, kpɛɛ nīi e̍ tɛ̄rɔ̄ ge̍ hī āchɛ nīi ma ɔ̍ ma̍ ɛra̍. E̍ che wa̍ ikpo̍ ka ɔyi̍ ɛ̍lɛ ɔ̍lɔ hɔ̄ ma̍ a̍nɛ? Ɛ̍lɛ chī ka hīka ɔ̍lɔ priyī i̍ngɔ̍ɔ bū lipi̍pu̍ ma̍, kana̍ nīi ɔ̍lɔ chī de myɛ̍ma̍ hɔ̄ ma̍ ma̍?
Āchɛ nīi ma ɔngrɔ̄ɔ ɔla̍ā ma̍ hīya aa̍ ɔkɔ hīka, “Alɔ jo̍ōkū hwɔhi hwɔhi hīka ɔyi̍ yī alɔ hɔ̄ ma̍ a̍nɛ. Alɔ gba̍a jo̍ōkū hīka o̍ priyī bū lipi̍pu̍. Ɔjā nīi hu̍ o̍bū nīi o̍ de myɛ̍ma̍ u̍ma̍ama ma̍, ɔla̍ā alɔ i̍ jo̍ōkū ni̍! Alɔ i̍ je̍ ɔ̄chɛ nīi ya̍ nīi o̍ de myɛ̍ma̍ ma̍ ni̍! Anu̍ ɔlɔjā nīi ala̍ ge̍ē che ɔ̍ ikpo̍ a̍nɛ. Wu̍chē oji̍ nɛ, o̍ de jɛ̄ ɔngrɔ̄ɔ lɛbɛ ge̍ē hīyɔkɔ yī lɛlā la abɔ̄ yī nū mɛ mɛ̍.” Ɔjā nīi ohu̍ nīi āchɛ yī nū ka i̍ngɔ̍ɔ ma̍ - e̍ yɛ ē tūuhwi yī alɛhu̍ yī Iju̍u. Wu̍chē oji̍ nɛ, alɛhu̍ wa̍a̍ de mɔ̄miya lɔ̄lā mɛ̍ hīka, ɔ̄chɛ nīi - ɔ̍lɔ ge̍ ka hīka Iji̍sɔ̄ɔsi ɔ̍lɔ - Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍ nɛ, ɛ̍lɛ ge̍ē de ɔlɔjā wu̍ligbo̍ hī ɔgbādu yī u̍nu̍ ogrēeyī. Anu̍ - ohu̍ nīi āchɛ nīi ma ɔ̍ ma̍ ka hīka ɛ̍lɛ ge̍ che ɔ̍lɔ ɔlɔjā ikpo̍, ma̍ ɔ̍lɔ de jɛ̄ ɔngrɔ̄ɔ wɔ̄bɔ̄bɔ̄ yī ɔ̍lɔ mɛ̍ a̍nɛ.
Bū la ɛbɛ ɔla̍ā, āchɛ ɛla̍ā gba̍a hī ɔngrɔ̄ɔ ɔla̍ā nīi priyī o̍bū ma̍ ɛra̍ o̍mgbo̍mɛpa ge̍ da ɔ̍ hīka, “Choko̍o u̍ma̍ama de alɔ ma̍ la iyɔ̄bū yī Ɔwɔ gɛ hīka lɛlā lēchi̍ lēchi̍ nīi a ge̍ē ka a̍nɛ. Alɔ ma̍ jo̍ōkū hīka ɔ̄chɛ ɔla̍ā - ɔ̄chɛ ɔyɛ̍ɛ̄lā ɔdwɔ̄bi̍ nɛ.”
Ɔngrɔ̄ɔ ɔla̍ā hīya aa̍ ɔkɔ hīka, “Ami i̍ jo̍ōkū yī ɔla̍ā ni̍. O̍ ge̍ - ɔ̄chɛ ɔyɛ̍ɛ̄lā ɔdwɔ̄bi̍ kɛ̄ɛ ɔ̄chɛ ɔnɛ̄ɛhɛhi oo, ɔjā ūkpo̍he nīi ami jo̍ōkū a̍nɛ! N priyī o̍bū; u̍ma̍ama, n chī de myɛ̍ma̍ ke̍e̍ mɛ̍!”
Āchɛ ɛla̍ā gba̍a che ɔ̍ ikpo̍ hīka oji̍ nīi ɔ̄chɛ ɔ̍lɔma̍ ɔ̍lɔ ya̍ ma̍? Kana̍ nīi ɔ̄chɛ ɔ̍lɔma̍ ɔ̍lɔ ya̍ o̍bū nīi ɔ̍lɔ de myɛ̍ma̍ hɔ̄ ma̍ ma̍?
Ɔngrɔ̄ɔ ɔla̍ā hīya aa̍ ɔkɔ hīka, “Je̍ka n de koko̍o de ala̍ mɛ̍! Ala̍ i̍ chī chikpo̍ ge̍ē po̍ ni̍. Oji̍ - ohu̍ nīi ala̍ gba̍a chikpo̍ ge̍ē po̍ ma̍? Kɛ̄ɛ ala̍ titi chikpo̍ ge̍ē de ē pīya a̍chi̍kpo̍ yī nū?”
Āchɛ ɛla̍ā pra̍a anu̍ ɛcha̍ de ɔ̍ hīka, “Awɔ ɔlɔjā nīi - a̍chi̍kpo̍ yī ɔngrɔ̄ɔ ɔ̍lɔma̍. Alɔ ma̍ - a̍chi̍kpo̍ yī Imo̍sīisi nɛ. Imo̍sīisi nīi alɔ jo̍ōkū nīi Ɔwɔ kɛlā tāa anu̍ a̍nɛ. Iyī anu̍ ɔngrɔ̄ɔ ɔla̍ā ma̍, alɔ u̍tu je̍ aba̍ nīi o̍ bū.”
Ɔngrɔ̄ɔ ɔla̍ā gba̍a hīya aa̍ ɔkɔ hīka, “Wo̍o̍, lɛlā ɔlɛbɛ̍bi̍ iyi̍ hɔ̄ ma̍ i̍ngɔ̍ɔ! Ɔ̄chɛ nīi ya̍ nīi n de myɛ̍ma̍ hɔ̄ ma̍ ma̍, ala̍ chōo̍chē ka ala̍ ɔ̍lɔ je̍ aba̍ nīi ɔ̍lɔ bōbū? Ɔjā ūkpo̍he nīi alɔ wa̍a̍ jo̍ōkū ma̍, Ɔwɔ i̍ ē darɔ̄ku lɛlā yī ɔ̄chɛ nīi ē yɛ̍ɛ̄lā ɔdwɔ̄bi̍ ma̍ ni̍. Āchɛ nīi ē de otūlichō de ɔ̍ ē yɛ̍ɛ̄lā nīi o̍ chikpo̍ ma̍, aa̍ nīi o̍ darɔ̄ku lɛlā yī wā a̍nɛ. Bū la abɔ̄ nīi yɛchɛ wu̍tu ma̍, ɔ̄nyɛ po̍ hīka ɔ̄chɛ ɔha̍ ɔ̍lɔ ya̍ nīi ɔ̄chɛ opriyī bū lipi̍pu̍ ɔ̍lɔ de myɛ̍ma̍ je̍ ma̍? Ɔ̍chi̍kpa̍kpa̍ ɔngrɔ̄ɔ nūma̍ bū la abɔ̄ yī Ɔwɔ, nɛ̄ni̍ o̍ i̍ ge̍ ya̍ ɔjɔ̄jā i̍ngɔ̍ɔ ē mɛ ni̍.”
Āchɛ ɛla̍ā da ɔngrɔ̄ɔ ɔla̍ā bɛ̍ɛ̄nɛ̄ hīka, “Awɔ nīi e̍ ma wɔ, bī wɔ jɛ̄ la lɛlā ɔdwɔ̄bi̍ la iyē ma̍ chōo̍chē chikpo̍ ge̍ē ngū alɔ nūma̍ lɛlā a̍nɛ?” Bū la ɛbɛ ɔla̍ā, e̍ de ɔngrɔ̄ɔ ɔla̍ā wu̍ligbo̍ hī ɔgbādu yī u̍nu̍ ogrēeyī.

Bɛ̍ɛ̄nɛ̄, Iji̍sɔ̄ɔsi wā ge̍ po̍ hīka ɛ̍lɛ de ɔngrɔ̄ɔ ɔla̍ā wu̍ligbo̍. O̍ ma̍ ɔ̄ ma̍, o̍ che ɔ̍ ikpo̍ hīka, “Ma̍ u ma̍! A chɛ̄ku Ɔyi̍ yī Ɔngrɔ̄ɔ bɛ̍ɛ̄nɛ̄ ni̍?”
Ɔngrɔ̄ɔ ɔla̍ā che Iji̍sɔ̄ɔsi ikpo̍ hīka, “Ka de u gɛ, a̍dā! Anu̍ - ɔ̄nyɛ nɛ, hɛ̄ɛbɛ nīi n ā chɛ̄ku ɔ̍.”
Iji̍sɔ̄ɔsi koko̍o de ɔ̍ bɛ̍ɛ̄nɛ̄ hīka, “A ma̍ ɔlɔjā mɛ̍! Ami nīi rɛ ma̍ ē kɛlā ba̍la awɔ ma̍ nɛ.”
Ɔngrɔ̄ɔ ɔla̍ā ka bɛ̍ɛ̄nɛ̄ hīka anɔ̍lɔ chɛ̄, Ādā. O̍ de ūnōowu tū ajɛ ya̍ otūlichō de Iji̍sɔ̄ɔsi.
Iji̍sɔ̄ɔsi wā ge̍ ka bɛ̍ɛ̄nɛ̄ hīka, “Ala̍ ma̍ ko̍ō! N wā la yɛchɛ nūma̍ ge̍ē hlɛ̍ɛ̄pɔ̄; hɛ̄ɛbɛ nīi epriyī ge̍ē de ē myɛ̍ma̍, hɛ̄ɛbɛ nīi āchɛ nīi ē myɛ̍ma̍ ma̍ ge̍ē de ē priyī!”
Āchɛ yī Ifa̍rasīi ɛha̍ gblāa abɔ̍ɔ plɛ̍ɛ̄lā nūma̍ nīi o̍ ka ma̍. E̍ che ɔ̍ ikpo̍ hīka aa̍ titi ɔ̍lɔ gba̍a priyī kpa̍a?
Iji̍sɔ̄ɔsi hīya aa̍ ɔkɔ hīka, “O̍ ge̍ re̍ka ala̍ priyī nɛ, ala̍ i̍ ge̍ gblɛfiyɛ ni̍. Wu̍chē lɔkɔ nīi ala̍ chī ka hīka ala̍ ɔ̍lɔ ē myɛ̍ma̍ ma̍, o̍ re̍ka ala̍ tū lɛfiyɛ yī lɛlā ɔdwɔ̄bi̍ we̍.”

Gwranda ar Ijɔ̍ɔn 9