Kaba for CAR - ACATBA; 2020  Drama (NT)

Marə dingaw kə̂ ria nan Lajar, rɔɛ̂ toe. Nee Betani, bbe tə̂ kə̂ Mari de kə ngokɔɛ̂n Martə disije tə̂. Mari le â ungu yambo gɔl Əbbə-dəwje tə̂ ngaâ bɔru gɔlɛ̂ kə biin-dɔɛ̂ le. Lajar kə̂ ngokɔn Mari le â rɔɛ̂ toe. Ngakɔn-nannɛ̂ ulaje arəje Jeju nan: «Əbbə-dəwje, rɔ nami le toe.» Jeju oo tar le a, pa nan: «Rɔ-to lə Lajar to rɔ-to kə̂ nâ koy nɛ̂n ang. A to nɛ̂n-kɔsu gaji Lubba. Ddəwe tə̂ bba dəwje a kɔsuje gaji Ngonn lə Lubba.»
Jeju ndiki Martə de kə ngokɔɛ̂n kə̂ dɛnɛ̂n ddəm Lajar ddəm. Noo nan rɔ Lajar toe, a n̂-təl n̂-nayn ndɔ joo lo tə̂ kə̂ nee tə̂ le bbay. Goe tə̂ a, n̂-pa narə njê-njaje goe tə̂ nan: «Maji karə n-təlje jawje nangə tə̂ kə̂ Jude.» Njê-njaje goe tə̂ le ilɛ̂je tə̂ nan: «Nje-nɛ̂n-tɔju, bbasinɛn bbay â Jiipije kə̂ nu sangəje ddəw ta tilai kə ər tɔli, a ə-ndiki ta təl kaw bbay wa?» Jeju ilade tə̂ nan: «Kə əndɔɔ ndərəng lo-kul, gɔl kar ee dɔku gire joo ang wa? Bbo dəw nja karâ a, nâ tuka gɔlɛ̂ ang, mba lo arɛ kəmɛ̂ tə̂ yərərə. A bbo dəw nja til tə̂ a, nâ tuka gɔlɛ̂, mba lo ndul kəmɛ̂ tə̂.» Go tar tə̂ kə̂ Jeju pa baann a, təl pa arəde nan: «Namje Lajar tibbi mban. A mâ kaw ndole.» Njê-njaje goe tə̂ ilɛ̂je tə̂ nan: «Əbbə-dəwje, bbo n̂-tibbi a, nâ kaji.» Jeju aw pa tar yo lə Lajar le, a njê-njaje goe tə̂ le əjəje to, tar bbi kə̂ baa â naw pa. Yeenn ngaâ Jeju pa arəde kə ddaka nan: «Lajar oy mban. A rɔm nəələm nya mbase, mba mee nunn ang. Baann bba â kooje məse tə̂ səm. A jawje rɔ Lajar tə̂ le.» Yeenn ngaâ Toma kə̂ daw bbarɛ̂ nan «Ndunga» pa arə kəsə njê-njaje go Jeju tə̂ nan: «Jeje kara, jawje ta joyje kə Jeju tɔ.»

Jeju tee Betani a, oo nan dila niinn Lajar buwa-yo tə̂ dda ndɔ sɔ ngaa. Betani le to ngɔsi baa kə Jerujalɛm asə nɛ̂n kə̂ kilometere mota. Mba yeenn bba, Jiipije nya ddeeje rɔ Martə de kə Mari tə̂, ta wul məde go yo tə̂ lə ngokɔnde le. Martə oo nan Jeju aw ddee ngaâ in aw tila kəmɛ̂. A Mari nayn aw isi kə̂y. Martə pa arə Jeju nan: «Əbbə-dəwje, bbo ee nəənn kete a, ngokɔnʼm a koy ang. A bbasinɛn nəənn njaa kara, m-gərə to nɛ̂n tɔyn kə̂ ə-duju Lubba a, nâ kari.» Jeju pa arɛ̂ nan: «Ngokɔin kə̂ oy le a ndol.» Martə ilɛ̂ tə̂ nan: «M-gərə to ddutu ndɔ a, nâ ndol ndɔ kin tə̂ lə dəwje kə̂ oyje.» Jeju pa arɛ̂ nan: «M-to ndol lə dəwje kə̂ oyje ddəm m-to təbbə ddəm. Dəw kə̂ unn məɛ̂ arəm a, le noy kara nâ kisi kəm baa. Dəw kə̂ isi kəm baa ngaâ unn məɛ̂ arəm, a koy ndɔ kâra ang. Oo məi tə̂ kə tar nəənn wa?» Martə ilɛ̂ tə̂ nan: «Baann njaa, Əbbə-dəwje, moo məm tə̂ to ə-to Mesi, Ngonn lə Lubba, ne kə̂ n̂-ddee dɔ nangə tə̂ le.»

Go tar tə̂ənn a, Martə aw bbar ngokɔɛ̂n Mari ngaâ pa arɛ̂ hɔy baa nan: «Nje-nɛ̂n-tɔju le ee nəənn, naw bbari.» Mari oo tar le a, in taar kə ngɔru ngaâ aw rɔ Jeju tə̂ le. Mba Jeju nayn andə mə bbe tə̂ le ang bbay. N̂-nayn lo tə̂ kə̂ Martə ingɛ̂ tə̂ le. Jiipije kə̂ isije kə Mari mə kəy tə̂ aw wulje məɛ̂ le ooje Mari kə̂ tee kə ngɔru le a, dɔruje goe. Dəjəje to naw kə ta buwa-yo tə̂ ta nɔn. Mari le aw tee lo tə̂ kə̂ Jeju ee tə̂ le ngaâ ooe a, oso nɔn gɔlɛ̂ tə̂ pa arɛ̂ nan: «Əbbə-dəwje, bbo le to ee nəənn a, ngokɔnʼm a koy ang.» Jeju oo Mari kə Jiipije kə̂ ddeeje saa kə̂ daw nɔnje le a, ɔru singɛ̂ ddəm rɔɛ̂ nəəle ang ddəm. N̂-dujude nan: «Ilɛ̂je dda wa?» Dəwje le ilɛ̂je tə̂ nan: «Əbbə-dəwje, ə-ddee oo.» Jeju uru dɔ nɔn tə̂. Yeenn ngaâ Jiipije paje nan: «Ooje! N̂-ndiki Lajar nya.» A marɛ̂je paje nan: «Ne kə̂ n̂-dda narə kəm nje-kəm-tɔ təəyn le, nasə ta dda karə Lajar nayn kəm baa ang wa?»

Ndoo dda Jeju le bbay ngaâ aw buwa-yo tə̂ le. To marə buja kə̂ dutu tɛɛ̂ kə tɔkə ər. Jeju pa arəde nan: «Ɔruje ər le kə ddang.» Martə kɔn-nann nje-gotoje le pa arə Jeju nan: «Əbbə-dəwje, naw nətə ngaa, mba ndɔ sɔ laa ngaâ â nəənn.» A Jeju ilɛ̂ tə̂ nan: «M-pa mari kete m-pa nan: Bbo oo məi tə̂ a, â koo piti lə Lubba.» Yeenn ngaâ dɔru ər le kə ddang. A Jeju unn kəmɛ̂ aa lo kə darâ ngaâ pa nan: «Bɔy, mari wooyo mba ilam tar tə̂ mban. M-gərə to aw ilam tar tə̂ kə ndɔ tɔyn njaa. A maw pa tar nəənn mba dəwje kə̂ gukumje nəənn. Baann bba karə dooje məde tə̂ to əi â ulam.» Go tar tə̂ənn a, nuru əkii kə taar nan: «Lajar ə-tee.» Lajar kə̂ oy le tee, gɔlɛ̂je kə jiaje tokə tɔ kə ta-kubbu ddəm kəmɛ̂ tokə kiri kə ta-kubbu ddəm. Yeenn ngaâ Jeju pa nan: «Ə-tuteje bbo inyɛ̂je arəje naw.»
Marə Jiipije nya kə̂ ddeeje rɔ Mari tə̂ ngaâ ooje nɛ̂n kə̂ Jeju dda le ooje məde tə̂ kə Jeju. A marɛ̂je horode tə̂ aw ingaje Parijinyɛje, ɔruje gəl nɛ̂n kə̂ Jeju dda le arəde. Yeenn ngaâ mbayje lə njê-poloje Lubba kə Parijinyɛje bbarje kəsə njê-gangəje sariya ləde ngaâ paje nan: «Ddi â ja ddaje wa? Dingaw nəənn dda nɛ̂n-mɔrije nya. Bbo jinyɛ̂je jarə naw nɛ̂n bbay bbay a, dəwje tɔyn a kooje məde tə̂ saa ngaâ njê-kɔn-bbeje kə̂ Rɔm a kinje, dâ tujuje kəy-polo Lubba ləje ddəm dâ karə gəlje tunga ddəm.» Marə dəw kâra horode tə̂, kə̂ ria nan Kayipi, n̂-to tɔkə nje-polo Lubba bbalɛ̂ tə̂ənn, n̂-pa narəde nan: «Ə-gərəje nɛ̂n kâra ang. Uwaje dɔse ooje bba. To maji nya karə dəw kâra be oy mba kəsə dəwje. Baann bba karə gəlje tɔyn njaa tunga ang.» Tar kə̂ Kayipi pa le to tar kə̂ in məɛ̂ tə̂ njaa ang. Mba bbalɛ̂ tə̂ənn, n̂-to tɔkə nje-polo Lubba. To tar yo kə̂ Jeju a koy ɔju dɔ gəl-dəwje kə̂ toje to Jiipije â nila mbəre. Nâ koy mbade kə karəde baa ang. Nâ koy mba mbɔn ngann lə Lubba kə̂ sarɛnje naan kâra kâra, karə n̂-ddeeje to dəwje kə̂ kâra baa.
Ndɔɛ̂ tə̂ənn njaa, njê-kɔnje dɔ Jiipije unnje ndude ta karə n̂-tɔl Jeju. Mba yeenn bba, Jeju nja horo Jiipije tə̂ dɔ kəmde tə̂ tɔyn ang ngaa. A naw nangə tə̂ kə̂ to ngɔsi baa kə dɔ dila-lo, bbe tə̂ kə̂ daw bbar nan Eparayim ngaâ n̂-nayn tə̂ənn kə njê-njaje goe tə̂.
Ndɔ kusu Pakə lə Jiipije ddee ngɔsi baa ngaa arə dəwje nya awje Jerujalɛm ta karə nɛ̂n-polo Lubba, mba toko nɛ̂n-yərəw ləde kete bba karə ndɔ le asə. Daw sangəje Jeju. Kar kə̂ deeje kəy-polo Lubba tə̂ a, n̂-paje darə naan nan: «Kəjə ləse tokə baânn wa? Nâ ddee kusu tə̂ le ang wa?» Kete njaa kara, mbayje lə njê-poloje Lubba kə Parijinyɛje unnje ndu nan, dəw kə̂ oo lo kə̂ Jeju ee tə̂ a, pa arəde arə duwɛ̂je.

Gwranda ar Jan 11