Gola - 2019 LIB (NT) Drama

Gola New Testament Translation and Literacy Project © Bible Society in Liberia, 2019.

Nààŋ e fààŋ anyuùŋ kpùuŋ zimgbe naŋ wa dèènè koɓɛ̀ guùŋ wo Jisɛ̀ kɔɔ àŋ gè nyàwè nyàwè aŋ dàwi, wo Jisɛ̀ naŋ fè anyùùŋ màŋjɛ̀wɛ̀uŋ nyàŋ jiɛ̀ e gòo wààŋ, “Yɛ̀mɛìŋ nyɛ̀iŋ bi diɛŋ e nyaàiŋ dè e sòi jùwìà e gbɔ̀ù aŋ Fɛlosiì nyaŋ. Mìŋ sɔ̀à e kàà e keì jàà fɛ̀ɛ̀ sùà nyiŋ nɛ̀. E je nyiŋ ɗeweɛ̀ lii àŋ zuwà nyùùŋ. E nɛ̀ɛŋ gbiŋ yaà ko nyɛɛnɛŋ lɛ̀, è do nàŋ fòlò ke fòolà, e kìlà anyùùŋ do nàŋ nyìmè e nɛ̀ɛŋ gbiŋ yaà ke gbùnuo sùà lɛ janyai. Sèè è nɔ̀ŋ yɛi, e nɛ̀ɛŋ gbiŋ mùŋ naŋ woò ke nyìwìɛ sùà lɛ anyùùŋ do niŋ nàŋ kòmò maŋ gɔɛɛ janjai, e kìlà e nɛ̀ɛŋ gbiŋ nìŋ naŋ woò maŋ wɛwɛɛ sùà ko saaŋ zɔ̀nù lɛ̀, ànyùùŋ do nàŋ jòwò ke saaàŋ dìmɛ̀ aŋ kpààŋ aŋ ɓààyè ebò bi.


“Tɔ̀ miŋ woòiŋ dàwiim nyàŋ, ɓɔ̀ nìŋ dùàŋ ànyùùŋ nyaŋ jiwe kè kpùnaŋ mɔɛ̀ŋ nyaŋ, kɛɛ eɓìèmàŋjɛ̀wɛ̀ tii, aŋ fè ɓɛìŋ ɓɛ̀nɛ̀ŋ nyɛ̀nɛ̀ŋ è nɛ̀ŋ bà gbiŋ è do tii nìàŋ. Tɔ̀ miŋ tɔɔ̀iŋ kɛ̀ ɓòò nìŋ kuwa naŋ dùàŋ. Dùaìŋ wo Dayà, wo yèɔ pɔɔpɔ̀ɔ̀ wɔŋ nyiiŋ nɔɔ̀ŋ, e kìlà wò kuwa e gààaŋ wèè weiŋ gbìàŋ ko jàhamaŋ. Hààwe nìim, wo Dayà nàŋ yaà wo nyùnɔ̀ɔŋ nìŋ kuwa naŋ dùàŋ wɔ!”
“Àŋ maàŋ aŋ dùùm nyɛ̀ɛ̀ nɔɔnɔŋ wèè e kàpàà tìyèe. Yɛi nɔŋ è yaà wo Dayà fè nyɛɛnɛ̀ŋ wèè wò bà guùŋ pɛɛ. E ɗì duum nɛ̀ pɛɛ ko ɗì muìŋ è yaà kpɛ̀nɛŋ niŋ. E jùù ɓɔ̀ è nyɛ̀nɛ̀iŋ, nìŋ kuwa sɔ̀ngɔ e nìàŋ aŋ duùm nyɛɛ̀ zimgbe.


“Tɔ̀ miŋ woòiŋ e tɔɔɓaà kɛ̀, anyùùŋ nyaŋ naŋ wòò ko fɛɛ̀feìŋ anyùùŋ nyààŋ àŋ yaà aŋ bàimbà nyaŋ, miàim wo Jɔ̀àfèlàà Nyuùŋ Kpùnɔɔ̀ŋ do wa nàwèè nàŋ wòò ko fɛ̀ɛ̀fèìŋ aŋ màìkà Dayà nyaŋ kɛ̀ àŋ yaà anyùùŋ màŋjɛ̀wɛ̀im. Kɛɛ anyùùŋ nyaŋ naŋ wòò ko fɛ̀ɛ̀fèìŋ anyùùŋ nyààŋ aŋ nyimààìm nyaŋ, miàim wo Jɔ̀àfèlàà Nyuùŋ kpùnɔɔ̀ŋ do wa nàwèè nàŋ woò mìàŋ miŋ nyimààŋ nyiìŋ ko fɛ̀ɛ̀fèìŋ aŋ màìkà Dayà nyaŋ.”
“Wo nyùnɔ̀ɔŋ gbiŋ naŋ wòò e keì naanààŋ wèè miàim wo Jɔ̀àfèlàà Nyuùŋ Kpùnɔɔ̀ŋ wɔ, wo Dayà wòuŋ ɓɛ̀nɛ̀ŋ jùùyà hakɛ̀. Kɛɛ wo nyùnɔ̀ɔŋ gbiŋ naŋ wòò e keì naanààŋ e nyaàiŋ dè wo Jìnàŋ Nɛɛmaàŋ wɔ, wo Dayà naàuŋ jùùyè hakɛ̀.
“Sèè anyùùŋ aiŋ kùwà e kìlà aiŋ hìàŋ ko sààŋ zòòlò aŋ Juùù nyaŋ ɔ̀ɔ̀ aŋ kana yaà anyùùŋ gbèègbèè fuɔŋ nyàŋ fɛɛ̀feìŋ wèè aiŋ gbaì, ɓɔ̀ nìŋ sɛɛ̀ jii wèè è ɗeweɛ̀ nìŋ do nàŋ gbaì wèè nyɛ̀iŋ bi lɛ̀ ɔ̀ɔ̀ wèè e nɛ̀ɛŋ nìŋ do nàŋ woò lɛ̀. Esaɓù kɛ̀ wo Jìnàŋ Nɛɛmaàŋ doiŋ nàŋ woò e teenga lii sùà kɛ̀ kiìŋ nìŋ do nàŋ woò.”

Wo felaa bà e faaàŋ sùà naŋ wòò wo Jisɛ̀ wààŋ, “Kààmɔɔŋ, wòò wo wùìya miɔ̀ŋ wo kiɛ̀im e jeim nɛ̀ɛ̀ŋ dààa wo dèda wiɔ̀ naŋ wi juuyè lɛ.”
Wo Jisɛ̀ nauŋ woò wààŋ, “Dàwi miɔ̀ŋ, ɓòò naim kìɛ̀ŋ e gààaŋ wèè ka nɔ̀ŋ wo nyuùŋ bànè keì sùà ɔ̀ɔ̀ wo nyuùŋ gòònò maŋ nɛ̀ŋ èdàà wèè nyɛ̀iŋ tìyèe e fèemàŋ?” Wo Jisɛ̀ naŋ ɓɛìŋ wòò e faaàŋ wààŋ, “Yɛ̀mɛìŋ nyiŋ bi diɛŋ wèè niŋ go nàŋ nyɛ̀nɛ̀ŋ e wànàŋ manɛ̀ŋ maŋ gbiŋ. Esaɓù kɛ̀ e bàne zimgbe kɛ̀ɛ̀nɛŋ nàŋ naàŋ jòèyè wɔ̀ŋ nyiiŋ mɔɔ̀ŋ. Miŋ gò kpɛɛ̀ŋ kɛ̀ diè mùŋ naŋ banè.”
Kpeiŋ wo Jisɛ̀ naŋ nyiŋ wòò ke kàɓanè yɛɛ̀ wààŋ, “Wo felaa bà yaào wa wò kuwa e diì bàne e yèɛ hewa nyɛ̀nɛ̀ŋ manɛ̀ŋ wuiyeuŋ màŋ banè zimgbe. Wo kenàaŋ naŋ wòò ke jiiuŋ nɛɛ̀ŋ sùà wààŋ, ‘Kiìŋ mìŋ naŋ ɓɛ̀nɛ̀ŋ nyɛ̀nɛŋ? Miŋ kuwà kò nɛ̀nɛ̀ŋ gbee wèè kao gbìàŋ mànɛ̀ŋ jè ɓù maŋ gbiŋ mìŋ kuwa màŋ.’ Eɓìèmàŋjɛ̀wɛ̀ tii, wò naŋ woò wààŋ, ‘Tɛɛ̀ mìŋ do nàŋ nyɛ̀nɛ̀ŋ, mìŋ do nàŋ gɔ̀ɛ̀ maŋ kɛnyiim màŋ ka nyɛ̀lɛ̀ maŋ gbeegbèè miŋ, ko yèi mìŋ do nàŋ gbìɛ̀ŋ e kpàli komaŋ mɛ̀ yèè manɛ̀ŋ gbànaim màŋ gbiŋ lɛ̀. Kpeiŋ kɛ̀ mìŋ do nàŋ wòò koɓɛ̀ miàŋ biì mìàŋ, “Kenàŋ fùà fenɔ̀ɔŋ! Mùŋ kuwa manɛ̀ŋ siaŋ màŋ gbiŋ mùŋ manaŋ màŋ wèè maŋ doa jika. Nyɛnɛ̀ŋ ke nyɛɛkɛŋ mɔɛ̀ŋ wɔŋ nyiiŋ gèe mɔɔ̀ŋ sùà, jè, tià yèè muŋ jikà muàŋ bi.” ’ Kpeiŋ wo Dayà nauŋ woò wààŋ, ‘Mùŋ yaà wo nyuùŋ zùwo! Wɔŋ dùùm guùŋ wɛɛ̀ŋ mùŋ do nàŋ fɔ̀! Mùŋ naŋ gongò ke jii mɔɛ̀ŋ sùà kɛ̀ mùŋ do nàŋ jìkà manɛ̀ŋ maŋ gbiŋ mùŋ naŋ bànè hàa wèè muàŋ bi màŋ? Màŋ do nàŋ nɔ̀ŋ wèè wo nyuùŋ joo bà.’ ”
Wo Jisɛ̀ naŋ jìwè nyààŋ wò naŋ woò wààŋ, “Yɛi è do nàŋ nɔ̀ŋ wèè anyùùŋ nyaŋ naŋ gbònò e bàne wèè nyiŋ bi nyàŋ, kɛɛ aŋ gò banè wò Dayà fɛɛ̀feìŋ.”


Kpeiŋ wo Jisɛ̀ naŋ wòò anyùùŋ màŋjɛ̀wɛ̀ nyaŋ wààŋ, “Weètii tɔ̀ miŋ woòiŋ tɛɛ̀, ɓɔ̀ nìŋ gongò è kèè è nɛ̀ŋjeɛ̀ nìŋ do nàŋ jè lɛ wèè naŋ nɔ̀ŋ wɔ̀ŋ nyiiŋ gèeɔ̀, ɔ̀ɔ̀ kiìŋ màŋ dèè nìŋ do nàŋ gɔ̀àì maŋ kpùnaiŋ màŋ. E ɗeweɛ̀ nìŋ nyɛnɛŋ wɔŋ nyiiŋ gèe nɔɔ̀ŋ lɛ, è yaà sɛmɛmaŋ e nìàŋ e nɛ̀ŋjeɛ̀, e kìlà ke kpùnaàŋ kuwa sɛmɛmaŋ e nìàŋ maŋ dèè. Yɛ̀mɛìŋ aŋ wòì nyaŋ, aŋ fè nyùàŋ lè kuù kòmàŋ ɔ̀ɔ̀ aŋ kpàà màŋ nɛ̀ŋjè ɓù. Aŋ kuwà màŋ saaŋ bàànè mànɛ̀ŋ hàa ɔ̀ɔ̀ màŋ kɛiŋ ko yèi àŋ gbiɛŋ maŋ nɛ̀ŋje. Yɛi nɔŋ è yaà wo Dayà gɔɔyɛ̀ nyiìŋ. Nìŋ kuwa sɛmɛmaŋ e nìàŋ aŋ wòì nyaŋ. Weètii wo Dayà doiŋ nàŋ kìɛ̀ŋ e nɛ̀ɛŋ gbiŋ nìŋ naŋ kpɛɛ̀ŋ weè niŋ lɛ̀. Wo nyùùŋ gbiŋ ɓɛ̀nɛ̀ŋ nɔ̀ŋ ke jii sɛ̀ɛ sùà wèè wo pɛɛ hàà ke ɗɔ̀ɔ̀ guùŋ maŋ ɗɔ̀ɔ̀ nyiiŋ gèeuŋ màŋ diɛŋ? Sèè mùŋ go kɛ̀ɛ̀nɛ̀ŋ e gààŋ wèè maŋ yɛ̀mɛ̀ manɛ̀ŋ jɔa diɛŋ, kɛ̀ wèè kiìŋ mùŋ sɛɛ̀ jii wèè manɛ̀ŋ gbànaŋ màŋ gbiŋ? Yɛ̀mɛìŋ e ɗeweɛ̀ maŋ kuù jàà fɛ̀ɛ̀ maŋ banàŋ yɛi le. Maŋ fè tomo ɔ̀ɔ̀ maŋ bànè màŋ dèè wèè miiŋ bi. Kɛɛ tɔ̀ miŋ woòiŋ kɛ̀, wo Kanaà Salemaŋ naŋ wa pɛɛ banè e mààŋ nyààŋ, kɛɛ wo kuwà wa pɛɛ màŋ deè kpàa màŋ do nyɛ̀nɛ̀ŋ sìàŋ maŋ nìàŋ màŋ kuùfɛ̀ɛ̀ mɛɛ̀ŋ bà gbiŋ. Wo Dayà nàŋ kpaa maŋ dɛɛ ɓou màŋ gbiŋ ke fòungàa. Jòòpɛɛ màŋ yaà nàaŋ kià kɛɛ màŋ miŋ ɓɛ̀nɛ̀ŋ kɛ̀ɛ maŋ miŋ gbìàŋ ko hmɔ̀ɔ̀ŋ nàwèè maŋ hèwà. Wo Dayà ngèè ɓɛ̀nɛ̀ŋ nyɛ̀nɛ̀ŋ e gbee niŋ e weèum. Wèè kiìŋ mùŋ kuwa yɛi e hààwe jɔa tòloò?
“Weètii ɓɔ̀ nìŋ gongò è teenga gbiŋ wèè è nɛ̀ɛŋ nìŋ do nàŋ jè ɔ̀ɔ̀ nìŋ do nàŋ tìè lɛ. Anyùùŋ nyaŋ nɔŋ gongà maŋ keì mɛɛ̀ŋ e teenga gbiŋ nyàŋ nàŋ yaà anyùùŋ nyaŋ fè àŋ Juùù nyaŋ e ɗuunyaŋ lɛɛ̀. Wo Dèdaiŋ nɔɔ̀ŋ ko àìjɛnɛ̀ŋ nyìmàŋ kɛ̀ nìŋ naŋ kpɛɛ̀ŋ wèè mànɛ̀ŋ mɛɛ̀ŋ. Kɛɛ eɓìèmàŋjɛ̀wɛ̀ e keì ɗewe gbiŋ, nyɛ̀nɛìŋ e tòmò Dayàa tiiŋ jiɛ̀ màànààŋ wò manaŋ lɛ̀. Kpeiŋ kɛ̀, wòiŋ kìɛ̀ŋ manɛ̀ŋ mɛɛ̀ŋ.


“E jùù ɓɔ̀ è nyɛ̀nɛ̀iŋ, nyɛ̀iŋ nààŋ nyùùŋ nyaŋ yaà mààŋ aŋ ɓaawaa nyàŋ. Wo Dèdaiŋ nɔɔ̀ŋ ko àìjɛnɛ̀ŋ manaŋ woiŋ kìɛ̀ŋ e Kanaà. Mààaìŋ manɛ̀ŋ siwèiŋ màŋ gbiŋ niŋ kiɛ̀ŋ e nɛɛnɛɛ̀ŋ koɓɛ̀ anyuùŋ pɔ̀ɔ nyàŋ. Bàneìŋ maŋ ɓùù sùlò nɛɛnɛŋ hàa wèè nyɛ̀iŋ bi maŋ yè maŋ naàŋ pɔɔpɔ̀ɔ̀ maŋ. Sèè nìŋ nyɛnɛŋ tii, è do nàŋ nɔ̀ŋ mààŋ nìŋ yaà bàànè maŋ pɔsɛ̀ hàa wèè nyɛ̀iŋ bi, maŋ yè maŋ e nɛɛnɛŋ naàŋ jùò sùà maŋ, e kìlà wo Dayà doiŋ nàŋ kìɛ̀ŋ e sùlò ko àìjɛnɛ̀ŋ e yèɛ doo nàŋ nɔ̀ŋ e teenga gbiŋ. Kuuŋ, wo nyuùŋ wùa naàŋ hnè wèè wo niŋ wùà, e kìlà aŋ gbiimiŋ naàŋ nìŋ pɔɔpɔ̀ɔ̀. Esaɓù kɛ̀ maŋ jiiŋ màŋ do nàŋ nɔ̀ŋ koɓɛ̀i e sùlò bàneiŋ nɛ̀ yaà lɛ e teenga gbiŋ.

“Nɔ̀iŋ bànèbaneiŋ e teenga gbiŋ wèè niŋ nyɛ̀nɛ̀ŋ e tòmò Dayàa, màànààŋ anyùùŋ àŋ kpaa maŋ deè tòòmo nyiŋ màŋ wèè aŋ nyɛ̀nɛ̀ŋ e tòmo nyiŋ nɛ̀ maŋ gɔɛ, e kìlà aŋ bànèbànè maŋ laumpò nyiŋ màŋ wèè aŋ sìà dùùm. Nɔ̀iŋ mààŋ aŋ ɓɔìjɔ̀à aŋ yè nyaŋ yaà fùlìè wo kana nyiŋ nɔɔ̀ŋ wèè wo kɛɛ̀ maŋjɛ̀wɛ e yìwìà wɔŋ ɗàà ke nyɛɛ̀ gbìaàŋ diɛŋ. Sèè wò hnàŋ wò kpulo wɔ̀ŋ gbemgbeeɔ̀, àŋ do nàŋ yèwè dìì aŋ wuŋ yilè fiò. E zɔlɔ̀ do nàŋ nɔ̀ŋ aŋ ɓɔìjɔ̀à nyiiŋ sèè wo kana nyiŋ nɔɔ̀ŋ wò hnàŋ wo nyiŋ mɛ̀ɛ̀ŋ fɛɛ̀ wòwò yèè àŋ yaà bànèbane nyiŋ! Miŋ woòiŋ e tɔɔɓaaà, wò do nàŋ gè wɔŋ kumàuŋ nɔɔ̀ŋ, wo nyiŋ nyɛ̀nɛ̀ŋ aŋ jɛ̀ì wɔŋ gbɛ̀gbɛ̀ɔ kɔɔ, yèè wo nyiŋ gòònò e nɛ̀ŋje fèemàŋ. E zɔlɔ̀ do nyiŋ nàŋ nɔ̀ŋ sèè wò kɛɛ̀ maŋjɛ̀wɛ wo nyiŋ mɛɛ̀ŋ àŋ yaà bànèbane nyiŋ, sèè pɛɛ wò hnàŋ wɔŋ duùm hàì tɛɛ ɔ̀ɔ̀ e teenga joo bà sùà. Sèè wo kɛ̀ɛ̀nɛ̀ŋ saaàŋ wo weè nyìmàŋ e teengaà wo nyuùŋ wùaà wò hnàŋ lɛ, wo naàŋ weè nyimèè wèè wò nyuùŋ wùaà wo gɔ̀ɛ̀ɛ̀ kè saauŋ nɛɛ̀ŋ. Weètii, nyɛ̀iŋ pɛɛ nɔ̀iŋ e bànèbaneiŋ, esaɓù kɛ̀ niŋ nyimààŋ è teengaà miàim wo Jɔ̀àfèlàà Nyuùŋ Kpùnɔɔ̀ŋ do nàŋ hnè lɛ.”


Wo Pììlɛ naŋ dàwè wo Jisɛ̀ wààŋ, “Kanaà, mùŋ naŋ wòò ke kàɓanè yɛɛ̀ weè wi nɔŋ, ɔ̀ɔ̀ wèè anyùùŋ nyaŋ gbiŋ?”
Wo Kanaà naŋ fasàì wààŋ, “Ɓòò ngèè nàŋ yaà wo ɓɔ̀ìjɔ̀à tɔ̀ɔ̀nyaàaŋ wo yèɔ kuwa e jiikɛ̀ɛ wɔ̀? Wuŋ nàŋ yaà wo yèɔ wo kààmɔɔŋ nyiŋ nɔɔ̀ŋ do nàŋ sèèlè aŋ ɓɔìjɔ̀à gbànaŋ nyàŋ feìŋ wèè wo kiɛ̀ŋ e nɛ̀ŋje nyiŋ nɛ̀ e teengaà diɛŋ. E zɔlɔ̀ do nàŋ nɔ̀ŋ wo ɓɔìjɔ̀à wii sèè wo kààmɔɔuŋ nɔɔ̀ŋ wò hnàŋ wouŋ mɛɛ̀ŋ wò yaà nyìnìè e tòmouŋ nɛ̀ ko gbooì. Miŋ woòiŋ e tɔɔɓaaà, wo ɓɔìjɔ̀àa naŋ jilɛ̀ŋ e teenga gbiŋ wɔ̀, wo kààmɔɔuŋ nɔɔ̀ŋ douŋ naŋ sèèlè e bàneuŋ nɛ̀ gbiŋ feìŋ. Kɛɛ sèè wo ɓɔìjɔ̀à wii wo wòò ke jiiuŋ nɛɛ̀ŋ sùà wààŋ, ‘Wo kààmɔɔŋ miɔ̀ŋ yaà dɔɔnɔŋ wèè wo kɛ̀ɛ̀ maŋjɛ̀wɛ,’ yèè wo tɔ̀ɔ̀tù ɓùlà aŋ ɓɔìjɔ̀à dàwiuŋ nyàŋ, kpeiŋ wuŋ yaà anyùùŋ aŋ jènɛ̀ŋ yèè aŋ tìyà maŋ mùàŋ koɓɛ̀ guùŋ e jèèsùà maŋ mùàŋ maŋ mauŋ kùwà. Sèè è kaaìŋ yɛi, wo kààmɔ̀ɔ̀ŋ wo ɓɔìjɔ̀àa do nàŋ hnè ke ɗɔ̀ɔ̀ guùŋ e teengaà wo ɓɔìjɔ̀àa naàuŋ nɔ̀ŋ yɛ̀ɛ̀mɛ̀ dòmaŋ yèè e teengaà wo nyimààŋ lɛ. Wo ɓɔìjɔ̀à wɛɛ̀ do nàŋ kɔ̀ e keì nyìnga dìì yèè auŋ gbìàŋ koɓɛ̀ aŋ ɓɔìjɔ̀à gò kɛ̀ɛ̀nɛ̀ŋ tɔ̀ɔ̀nyaàŋ nyaŋ.
“Wo ɓɔìjɔ̀àa wo yèɔ naŋ nyìmè e yèɛ wo kààmɔɔuŋ nɔɔ̀ŋ manaŋ wo nyɛ̀nɛ̀ŋ lɛ, kɛɛ wo gò bànèbànè wuŋ bi wèè wo niŋ nyɛ̀nɛ̀ŋ, àŋ douŋ nàŋ ɓùlò sɛmɛ. Kɛɛ wo ɓɔìjɔ̀àa wo yèɔ nyimààŋ è nɛ̀ɛŋ wò kààmɔɔuŋ nɔɔ̀ŋ wò manaŋ wo nyɛ̀nɛ̀ŋ lɛ, àŋ douŋ nàŋ ɓùlò tòloò sèè wò nyɛnɛŋ e keì ɓàa. Sèè mààŋ wo Dayà naŋ nɔ̀ŋ e kpùùmaŋ ko nɛ̀ɛ̀ŋ muìŋ, wò doum nàŋ yɛ̀mɛ̀ dòmaŋ wèè mauŋ jɔ̀ɔ̀lɔ̀ dìì tɛ̀ɛ̀. Yèè sèè mààŋ wò naum ngèè kpuumò sɛmɛ, wò doum nàŋ yɛ̀mɛ̀ dòmaŋ wèè mauŋ ngèè jɔ̀ɔ̀lɔ̀ dìì e sɛmɛmaŋ mɔ̀ɛ̀ gbiŋ sùà.


“Mìŋ naŋ hnè wèè ka sìà anyùùŋ nyaŋ e ɗuunyaàŋ e hmɔ̀ɔ̀ŋ, e kìlà kà weè mànàŋ wèè e hmɔ̀ɔ̀ŋ bi e niŋ naàŋ nɔ̀ŋ diɛŋ tɛ! Mìŋ yaà hinie wèè ka kà e gùà keì nyìnga dìì. Mìŋ do nàŋ kɔ̀ e keì nyìnga zimgbe dìì e jèèsùà e keì bi e jùà jɛ̀wɛ̀. Ɓɔ̀ nìŋ gongò kɛ̀ mìŋ naŋ hnè wèè ka hìàŋ ke jii fàa koɓɛ̀ anyùùŋ nyaŋ e ɗuunyaàŋ, mìŋ naŋ hnè wèè ka hìàŋ e tɛɛ gòòno. E yìwìà nàaŋ ke kpòò anyùùŋ nɔɔnɔŋ do nàŋ gòònò tɛɛ, àŋ taai do nàŋ mààŋ fàà guùŋ yèè àŋ tìyèe aŋ mààŋ fàà guùŋ. Aŋ dèda do nàŋ wùɔ̀ŋ aŋ jɔ̀àfelaa nyiŋ nyàŋ, aŋ jɔ̀àfelaa aŋ gììyà aŋ dèda nyiŋ nyàŋ maŋhɛɛ, aŋ yèye nyàŋ yèè aŋ jɔ̀àjɔùŋ nyaŋ do nàŋ nyɛ̀nɛ̀ŋ e kèì guùŋ bi, aŋ nemaaŋ do nàŋ wùɔ̀ŋ aŋ jàwèjɔ̀à nyiŋ nyàŋ, aŋ jàwèjɔ̀à aŋ gììyà aŋ nemaaŋ nyiŋ nyàŋ maŋhɛɛ.”


Wo Jisɛ̀ naŋ ɓɛìŋ wòò anyùùŋ nyaŋ wààŋ, “Sèè nìŋ yɛmɛ̀ ko fùùiŋ kuwià e yìwìà ko jèè gɔɛɛ, nìŋ woà nààŋ maŋ gɔ̀à maŋ yaà hinie maŋ sɔ̀à, yèè màŋ sɔɔ. Yèè sèè wɔŋ fòìɔ yiwià wɔŋ fùɔ̀ŋ kɔ̀ɔ̀ wɔ̀ŋ dèìŋ, nìŋ woà nààŋ, e wuuŋ nɛ̀ do nàŋ gàŋ, yɛi nɔŋ zà è kaaìŋ. Nyɛ̀iŋ nààŋ nyuùŋ jàà fɛ̀ɛ̀ keì nyɛɛ̀ŋ! Nìŋ nyɛnɛŋ maŋ nɔnɔŋ tùaŋ wèè naŋ nyìmàŋ kɛ̀ kiìŋ nàŋ do nàŋ kaaìŋ e kìlà naŋ niŋ woò, sèè nìŋ yɛmɛ̀ maŋ keì maŋ e ɗuunyaàŋ yaà ke nyiliɛ̀ ko fùùiŋ yèè naŋ miŋ gɔ̀ì sùà, kɛɛ niŋ nyimààŋ è fàsàì màŋ tɔ̀ɔ̀màŋsèì keì maŋ yaà nàaŋ kaaiŋ màŋ è teenga lɛɛ̀ sùà.”


Wo Jisɛ̀ naŋ ɓɛìŋ woò wààŋ, “Wèè kiìŋ niŋ fè gbaì wèè nyɛ̀iŋ bi wèè naŋ nyɛ̀nɛ̀ŋ è kèì tɔ̀ɔ̀nyaàaŋ? Sèè wo nyùùŋ wò mɔnɔŋ wèè woum gbìàŋ ke sàwà wèè e nànàaŋ mùŋ nauŋ jàà lɛ, kàmè ɗewe niŋ banè e keì bi sùà fiò e teengaà nìŋ yaà kɔ̀ɔ̀yɛ̀ ko sààŋ sàwài lɛ̀. Sèè mùŋ go niŋ nyɛ̀nɛ̀ŋ, wo nyùnɔ̀ɔŋ doum nàŋ fè koɓɛ̀ wo nyuùŋ gbàì sàwàa, kɛ̀ wo nyuùŋ gbàì sàwàa wòum kìlà koɓɛ̀ wo pòìsiàa. Kpeiŋ wo pòìsiàa doum nàŋ gbìɛ̀ŋ ko sààŋ nyìwì. Miŋ woòum e tɔɔɓaaà, mùŋ do nàŋ nɔ̀ŋ ko sààŋ nyìwìi e jèèsùà maŋ pààwà e kpàŋ ke kàpàà guùŋ dìàmaàŋ mùŋ kuwa kpàŋ lɛ.”

Gwranda ar Luù 12