Avar - 2008 Edition (Non-Drama - NT)

Avar - 2008 Edition (Drama - NT)

Гьеб заманаялда, пуланаб шамат къоялъ, цо хурзабахъан унев вукӏана Гӏиса. Гьесул муридал ракъун рукӏана. Ретӏун тӏоралгун, ролъул мугьал квине лъугьана гьел. Гьеб бихьарал фарисеяз Гӏисада абуна:
– Балагье, Мусал къануналъ шамат къоялъ гьабизе гьукъараб иш гьабулеб буго дур муридаз.
Гӏисаца гьезда абуна:
– Унго, цӏаличӏебищ нужеца, живгоги цадахъ рукӏаралги ракъун хутӏидал, Давудица щиб гьабурабали? Аллагьасул рокъове жанивеги лъугьун, Давудица кванана гӏицӏго кашишзабаз гурони, я гьес, я гьесда цадахъ рукӏараз кваназе гьукъараб чед. Яги Къануналда цӏаличӏебищ нужеца, шамат къоялъ гьабизе гьукъараб иш кашишзабаз шамат къоялъ Мукъадасаб Рокъоб гьабуниги, гьезие хӏакъ букӏунарилан? Дица нужеда абулеб буго: гьале гьаниб бугебаб гӏемерго тӏадегӏанаб буго гьеб Мукъадасаб Рукъалдаса. «Нужер къурбанал рокьун гьечӏо дие, нужедаго гьоркьоб гурхӏел-рахӏму бокьун буго», – ян абурал рагӏабазул магӏна бичӏчӏулебани, гӏайибго гьечӏезда гӏайиб чӏвалароан нужеца. Шамат къоялъул ихтияр Гӏадамил Лъимадухъ буго.

Гьениса вахъун ун гьезул синагогаялъуве лъугьана Гӏиса. Гьенив вукӏана цояб квер бакъварав чиги. Гӏисаде гӏайиб гӏунтӏизабизе бокьун, гьесда гьикъана шамат къоялъ гӏадамал сахлъизаризе къануналъ изну кьолебищилан.
Гӏисаца гьезда абуна:
– Жиндирго цохӏо бугеб чахъу шамат къоялъ гъваридаб гвандинибе бортани, квер бегьун къватӏибе бахъиларищ гьелъул бетӏергьанас гьеб? Чахъдадаса чи кигӏан хириявха вугев! Гьединлъидал къануналъ изну кьола шамат къоялъги чиясе лъикӏлъи гьабизе.
Квер бакъварав чиясда Гӏисаца абула квер гӏебеде битӏейилан. Гьес квер гӏебеде битӏула, ва гьебсагӏат гьеб сахлъун, добцояб квер гӏадин, лъугьуна. Къватӏире рахъун фарисеял данделъула Гӏиса тӏагӏинавизе тадбиралъе ургъизе. Гьебги лъан, Гӏиса гьениса нахъе уна.

Гьесда хадуб гӏемераб халкъ бачӏуна. Киналго унтарал гьес сахлъизарула. Жиндир хӏакъалъулъ лъиданиги бицунгейиланги лъазабулаан. Гьеб гьедин ккана, Ишая аварагасда Аллагьас абурал гьадинал рагӏаби ритӏухълъизе: «Гьале гьав вуго дица тӏаса вищарав дир рагьтӏател. Гьав дие вокьула, дир ракӏги бохун буго гьасдаса. Дица гьасулъ дирго Рухӏ лъолеб буго. Дир амру лъазабила гьас халкъазда. Гьав дагӏбадизе лъугьинаро, ахӏдезе лъугьинаро, къватӏахъ лъиданиги гьасул гьаракьги рагӏиларо. Бекараб муцӏидул чӏорцин тӏун рехиларо, гӏодобе кьурараб чирахъул билтаялда хутӏараб загӏипаб цӏагицин свинабиларо. Гьедин букӏина ритӏухълъиялъул къо гьас дуниялалде рещтӏинабизегӏан. Гьасул цӏаралда базабила халкъаз жидерго анищги хьулги».

Гьебмехалъ Гӏисахъе вачун вачӏана жундуз ккурав цо чи. Бецлъунги вукӏана гьев, мацӏги лъалеб букӏинчӏо. Гӏисаца сахлъизавун, гьесда кӏалъазеги кӏвана, беразда канлъиги бихьана. Гьелда гӏажаиблъун-хӏикмалъун тӏолабго халкъалъ абулеб букӏана:
– Давудил Вас Масихӏцин гурищ гьав? – абун.
Амма гьеб рагӏидал, фарисеяз абуна:
– Жундузул хан Беэлзебулил кумекалдалъун гурони, тӏокӏаб сундалъунниги гуро гьав чияс жундул рачахъулел ругел.
Гьезул пикрабиги лъан, Гӏисаца гьезда абуна:
– Цо пуланаб ханлъиялда жаниб кьал ккани, гьеб ханлъи биххула. Цо пуланаб шагьаралда яги хъизаналда жаниб кьал ккани, гьелги риххичӏого хутӏуларо. Илбисалъ жибго илбис бачахъулеб бугони, жиндаго жаниб кьал букӏине ккола гьелъул. Биххичӏого хутӏилищ гьебмехалъ гьелъул ханлъи? Дица жундул Беэлзебулил кумекалдалъун рачахъулел ратани, нужер умматалъул гӏадамаз лъил кумекалдалъунха гьел рачахъулел? Гьеле гьел гӏадамаз нуж мекъи рукӏин чӏезабила гури. Амма дица жундул Аллагьасул Рухӏалъул къуваталдалъун рачахъулел ругелъул, Аллагьасул Парччахӏлъи нужеде гӏагарлъун букӏин бичӏчӏула гьелдасан. Цо къуватав чиясул рокъове лъугьун, гьесул боцӏи-рикъзи бикъизе лъида кӏвелеб, цин гьев вухь-вухьун рехун хадуб гурони. Гьебмехалъ кӏвела гьесул рукъ бикъизе.
Дунгун цадахъ гьечӏев чи, гьев вуго дида дандечӏарав чи. Дида цадахъ хӏалухъен бакӏаруларес гьеб рахъ-рахъалде щущазабила. Гьединлъидал дица нужеда абулеб буго: киналниги мунагьалги ва иманалда лъурал бугьтаналги тӏасалъугьун тезе руго Бетӏергьанас. Амма Илагьияб Рухӏалда лъураб бугьтаналда тӏасалъугьине гьечӏо. Гӏадамил Лъимада дандечӏун рагӏи абурав чиясдаса Аллагь тӏасалъугьина, амма Илагьияб Рухӏалда дандечӏун рагӏи абурав чиясе тӏасалъугьин букӏине гьечӏо. Пихъ лъикӏаб бугин абулес гъветӏги лъикӏаб бугин абе, яги гъветӏ турараб бугин абулес пихъги турараб бугин абе. Пихъихъ балагьунин гъветӏ лъалеб. Гӏай нуж чӏегӏераб борхьил наслу! Нужго квешалги рукӏун, лъикӏал рагӏаби кӏалалъ абизе кин нужеда кӏолеб? Ракӏалда бугеб гурони кӏалалъ бицунарелъул. Лъикӏав чияс лъикӏаб хазинаялъул гъансиниса къватӏибе лъикӏлъи бахъула, квешав чиясин абуни квешаб хазинаялъул гъансиниса къватӏибе квешлъи бахъула. Гьале дица нужеда абулеб буго: къиямасеб къоялъ инсанас жаваб кьезе буго лъикӏлъиялъе гурони жиндир кӏалдиса къватӏибе бачӏараб щибаб рагӏиялъул. Щайгурелъул, Аллагьас мун витӏаравлъунги рикӏкӏина дур рагӏабазухъ балагьун, дуе тамихӏги гьабила дур рагӏабазухъ балагьун.

Гьебмехалъ цо-цо диниял гӏалимзабаз ва фарисеяз Гӏисада абуна:
– Я, Мугӏалим! Дуца цо гӏаламат бихьизабизе бокьилаан нижее.
Гӏисаца гьезие жавабалъе абуна:
– Квешлъиги хъахӏбалъиги гӏемерлъараб умматалъин гӏаламат тӏалаб гьабулеб. Юнус аварагасул гӏаламат гурони, цогидаб гӏаламат гьаб умматалъе букӏине гьечӏо. Юнус аварагас ччугӏил чохьониб бана лъабго къоги лъабго сордоги, гьелда релълъун Гӏадамил Лъимацаги ракьул чохьониб базе буго лъабго къоги лъабго сордоги. Ниневиялъул халкъги бахъина къиямасеб къоялъ гьаб умматалда цадахъ ва гьезги гӏайиб чӏвала гьазда, Юнус аварагасухъ гӏенеккун гьел Аллагьасде руссиндал. Гьале гьанив вугевав гӏемерго тӏадегӏанав вуго Юнус аварагасдаса. Гьаб умматалда цадахъ яхъина къиямасеб къоялъ Къилбаялъул парччахӏги. Гьелъ гӏайиб чӏвала гьазда, гьей дуниялалъул рагӏалдаса яхъарай ячӏиндал Сулайман аварагасул гӏакъилаб рагӏухъ гӏенеккизе. Гьале гьанив вугевав гӏемерго тӏадегӏанав вуго Сулайман аварагасдаса.

Инсанасул чорхолъа бачахъараб хъубаб жен ракъдалал авлахъазда терелеб-женжедулеб букӏуна, жиндиего рахӏат-хӏалхьи балагьулаго. Амма рахӏат-хӏалхьи батуларо женалда. Гьелъ абула: «Рачӏа, дун цебе дунго букӏараб рокъобе тӏадбуссина», – ян. Тӏадбуссун щведал, гьелда рукъ батула лъухьун, къачӏан, чӏобого. Женалъ жиндасаги гӏасияб анкьго женги бачуна жиндаго цадахъ гьеб рокъобе. Рахъун гьенир чӏола гьел. Гьебмехалъ дов чи цебе букӏаралдасаги квешаб хӏалалде ккола. Гьедин ккезе буго гьаб квешаб умматалъеги.

Халкъалдехун кӏалъалев Гӏиса вугев мехалъ, гьесда кӏалъазе бокьун, къватӏир чӏун рукӏана гьесул эбелги вацалги. Доле дур эбелги вацалги, дуда кӏалъазе бокьун, дора къватӏир чӏун ругилан абуна гьесда цояс. Гьесие жавабалъе Гӏисаца абуна:
– Дир эбел щий кколей? Дир вацал щал кколел?
Квер битӏун жиндирго муридалги рихьизарун, гьес абуна:
– Гьале дир эбелги дир вацалги. Щайгурелъул, Зобалазда вугев дир Инсул амру тӏубазе гьабулев чи щив вукӏаниги, гьев ккола дие вацги, яцги, эбелги.

Gwranda ar Матфейица бицараб Рохалил хабар 12