℗ Audio 2018 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

巴比倫 王 暗拉非 、 以拉撒 王 亞略 、 以攔 王 基大老瑪 、 戈印 王 提達 這四個王聯合， 㧯 所多瑪 王 比拉 、 蛾摩拉 王 比沙 、 押瑪 王 示納 、 洗扁 王 善以別 、 比拉 王 (又安到 瑣珥 王) 這五個王相㓾。 五王个軍隊在 西訂 山壢會合； 西訂 山壢就係 鹽海 。 佢等識被 基大老瑪 管十二年，到第十三年佢等就造反。
第十四年 基大老瑪 㧯佢同盟國个王帶領軍隊，在 亞斯他錄‧加寧 打贏 利乏音 人，在 哈麥 打贏 蘇西 人，在 基列亭 平原打贏 以米 人， 在 以東 山區打贏 何利 人，一直打到接近曠野个 伊勒‧巴蘭 。 然後佢等又倒轉 安‧密巴 (就係 加低斯 )，佔領 亞瑪力 人全部个土地，打贏住在 哈洗遜‧他瑪 个 亞摩利 人。
所以， 所多瑪 王、 蛾摩拉 王、 押瑪 王、 洗扁 王㧯 比拉 王 (就係 瑣珥 王) 个軍隊全部出來，在 西訂 山壢擺陣㧯佢等相㓾； 就係㧯 以攔 王 基大老瑪 、 戈印 王 提達 、 巴比倫 王 暗拉非 、 以拉撒 王 亞略 相㓾；恁樣，五個王㧯四個王相㓾。 西訂 山壢有當多石油窟。 所多瑪 王㧯 蛾摩拉 王打輸逃走个時，跌落窟肚；其他三個王走到山頂去。 四個王就將 所多瑪 、 蛾摩拉 所有个財產㧯糧食搶淨淨。 該時， 亞伯蘭 个姪仔 羅得 住在 所多瑪 ；佢等也將佢捉去，搶走佢个財產。
有一個逃出來个人來㧯 希伯來 人 亞伯蘭 報告。該時， 亞伯蘭 住在 亞摩利 人 幔利 佢个橡樹附近。 幔利 㧯佢个兄弟 以實各 並 亞乃 全部係㧯 亞伯蘭 結盟个。 亞伯蘭 一聽到厥姪仔被人捉去，就召集家族中精練个壯丁三百一十八人，去追該四個王，一直追到 但 。 佢在該位將壯丁分做幾隊，在暗晡時進攻，打到敵人拚命逃走。佢繼續追到 大馬士革 北片个 何巴 ， 將被人搶走个財產全部搶轉來，又救轉佢个姪仔 羅得 㧯佢所有个財產，還有婦女並其他个人。

亞伯蘭 打贏 基大老瑪 並㧯佢同盟个王轉來个時， 所多瑪 王到 沙微 山壢 (就係 王 山壢) 迎接佢。 至高上帝个祭司 撒冷 王 麥基洗德 也帶等餅㧯酒出來迎接 亞伯蘭 ， 祝福佢，講：「願至高个上帝、天地个創造者，賜福給 亞伯蘭 ！ 願使你打贏敵人个至高上帝得到頌讚！」 亞伯蘭 將搶轉來个戰利品中拿出十分之一送給 麥基洗德 。
所多瑪 王對 亞伯蘭 講：「將𠊎个人民還給𠊎，戰利品你做你拿去！」
亞伯蘭 對 所多瑪 王講：「𠊎對上主 — 至高个上帝、天地个創造者發誓： 𠊎絕對毋拿你个東西，就係一條線、一條鞋帶𠊎也無愛，免得你後來講：『𠊎俾 亞伯蘭 發財。』 𠊎个僕人所食个，算係已經還𠊎，其他个東西𠊎無愛；總係㧯𠊎共下來个 亞乃 、 以實各 㧯 幔利 所應該得个，分給佢等。」

Gwranda ar 創世記 14