Zapotec, Yareni - WBT Version (NT) Drama

Attili lani kwe yiesi lo yu‑niha, chi do benne anke tisaha nna len Tata Do Yebáha‑ba doe nna la tisaha‑ba nuha anke Diosi. Lee nuha chi doe len Tata Do Yebáha attili lani kwe yiesi lo yu‑niha. Labie bixuin Tata Do Yebáha kini benie iyá tte nu se'e. Ganna ttixka anúba benneha do, la'ania nna iyába nu chi ukaha, labí uka nuha ganna ttixka. Len benne anke tisaha tee elha nabani geri'i ttu dia lii nna benne anke elha nabaniha, benneha nuha anke xiani ge ka benne. Xianiha nuha rudanie lhe'e chulhaha nna chulhaha labí udaana loe.
Udo ttu benne biyú udhelha Tata Do Yebáha. Benneha utta lábie Juan. Labie bisiabie kini utixxi'e ge benne anke xianiha kini anáchu de nu utixxi'a Juan‑ni nna iyába ka benne tsia leke ge benne anka xianiha. Laa Juan‑niga nuha uke xianiha. ¡Ko'o! Suna bitaba benneha kini utixxi'e ge benne anka xianiha, delába xiani nu gwalíga udanie ge iyá ka benne ki tte dákanie nuxa anka Tata Do Yebáha. Benne anka xianiha, benneha nuha chi bisiabie yiesi lo yu‑ni.
Chiba do benneha yiesi lo yu‑ni nna labie bixuin Tata Do Yebáha kini benie yiesi lo yu‑ni, ttaka ka benne se'e yiesi lo yu‑ni labí chi ankabiakanie benneha. Len ka benne geeha‑ba bisiabie, ttaka ka benne geeha nna labí belabike bie. Ttaka iyába ka benne belabike bie lhe gwa ugía leke gebie lhe, ka benneha nuha begwebie ke lo neda kini akake xi'in Tata Do Yebáha. Ka benneha bisinke ukake xi'in Tata Do Yebáha, labí aníha chi ankake tti ulikeha, nigaba kumu de aníha uka le ka benne se'e yiesi lo yu‑ni akake, sinuki kumu Tata Do Yebáha‑ba bedá lebie ukake xi'inie.
Benne anke tisaha beyake ttu benne attiba ri'i nna udoe lenri'i. Uka xxatte benne si'i lasi lhe bele'ebie nu anka gwalí lhe. Ri'i bilenri'i nu xxeni ra leeha, delába nu xxeni ra lebie nu bete Tata geeha kumu de anke Xi'in ttu túbiru ge benneha. Juan‑ni nna utixxi'ana ge benne anke tisaha lhe unnena idisa, rana:
―Ge benne‑ni nuha rinnea tti ria: “Benne delola dabie danalhe netiha, benneha xxenirula ra lebie tti neti, kumu benneha chila doe tti neti.”
Kumu de labie anke benne tee iyá nu tse gebie, de nuha nna iyábari'i redí baari'i nu tse geeha, nu labí rudú siie rutebie geri'i. Kumu bia bennabi bete Tata Do Yebáha lenri'i, lasi ná Moisés‑niba bodha'ane nuha, ttaka elha si'i lasi geeha lhe nu anka gwalíha lhe, Jesucristuha‑ba bele'enie ri'i nuha. Tata Do Yebáha lanú nu chi bilenna benneha. Sunruba benne anke ttu túbiru Xi'inieha, delába benne due lenieha, benneha‑ruba nuha chi bele'enie ri'i Tata geeha.


Aní bekabi Juan‑ni ge ka bixxudiha lhe ge ka levita‑ni lhe. Ka nuná udákana lhe'esi Jerusalén‑ni, udhelha ka nu loni ge ka nu Israel‑ni kana kini ugíakana gwannaba tisakana Juan‑ni, rákane:
―Lu nna, ¿nú ankalu?
Lee nna labí bedhea lebie, sinuki lhixxa rába utixxi'abie, ree:
―Neti labí ankaa Cristu benne chi ga'anani Tata Do Yebáha idhelhe.
Lakana nna bedennaba tisakana, rákana:
―¿Núla ankalu ganna? ¿Si lu nuná Elías ak?
Lee nna bekabie, ree:
―¡Labí neti!
Nianna redeakane:
―¿Si lu nuná profeta benne chi ga'anna isiaha ak?
Lee nna bedekabie ree:
―¡Labí neti!
Nianna rákane:
―¿Núla nuná ankalu ganna, kini anáchu ri'itu kixxi'entu ka benne udhelhake ri'ituha? Lu nna, ¿si lagwa gwagixxi'a gelu?
Juan‑ni nna bekabie ree:
―Neti ankaa benne rekia lo yu bisiha, rinnea idisa attiba ra profeta Isaías‑ni: “Gwalolixxa neda kini dha benne anke Xxanari'iha.”
Ka nu ugía gwennaba tisaha selakana lhe'e ka nu tee lákani fariseo. Nianna tti unnaba tisakane, rákane:
―Ki ganna labí ankalu Cristu lhe nigaba Elías lhe nigaba profeta nu chi ga'anna isiaha lhe, ¿beakala nna rugadilu ka benne inda ganna?
Juan‑ni nna bekabie gekani, ree:
―Neti tti rugadia ka benne inda, suna indaba rixúti. Ttaka lagwi gebale reki ttu benne. Benneha labí ankabienlee. Labie nuha delola dabie danalhe neti. Benneha labí elha ralhaa idhasia lo ka gwaracha geeha.
Iyá nuní uka lhe'esi Betania daka attu ladu yoo Jordán ata reki Juan‑ni rugadie ka benne inda.

Utteyú dilaha bilani Juan‑ni Jesús‑ni dabie ata dueha, nianna tti ree:
―Ne benne anka neru to udhelha Tata Do Yebáha chi daa naa kini kuabie ka tulha ge ka benne se'e yiesi lo yu‑ni. Ge benne‑ni nuha rinnea, tti ria: “Benne dabie delola danalhane netiha, benneha xxeniru ra lebie tti neti, kumu chila do benneha tti neti.” Nigaba neti ttuha labí chi yua nuxa anke, ttaka daya rugadia ka benne leni inda kini anáchu ka benne Israel‑ni nna uinbiake bie.
Rigixxi'agaba Juan‑ni ree:
―Biláti Espíritu ge Tata Do Yebáha ugwadie dabie yebáha attiba radi ttu becha, bisiabie betedhobie ikie. Neti ttuha labí chi yua nuxa anke, ttaka Tata Do Yebáha benne udhelhe neti kini ugadia ka benne leni inda, benneha ree neti: “Benne ilenlu chadi Espíritu kia‑ni nna etedhobie ikie, benneha nuha ugadie ka benne Espíritu kiaha.” Neti chi bilátie nna rigixxi'aya deki labie anke Xi'in Tata Do Yebáha.

Beyeki sáha nna dedhú Juan‑ni niha attu libe len chupa ka benne rudhetinieha. Tti bilánie Jesús‑ni rekie niha, nianna ree:
―¡Ne benne anke neru to udhelha Tata Do Yebáha reki naa!
Tti biyienin ixpa ka benne rudhetinieha nu reeha, nianna tti diake danalhake Jesús‑ni. Tti bodeki lo Jesús‑ni nna bilánie danalhake bie, nianna ree ke:
―¿Bí regilale?
Lake nna bekabike, ráke bie:
―Rabí, ¿gála reya'anlu? (“Rabí” dienna innána maestru.)
Labie nna ree ka benneha:
―Gwaltá gwalulanni.
Nianna ugíake gwalannike ata doeha. Kumu chiba anka ttiba retin ttapa nuha, laxkala niha‑ba use'eke lenbie axtaba ulha sáha. Benne labie Andrés betsi Simón Pedro‑ni, delo chupake biyienkanie nu ra Juan‑ni, benneha nuha ugíabie gwanalhe Jesús‑ni. Andrés‑ni nuha lade'a tte gwatilee betsie Pedro‑ni, nna ree benneha:
―Chi gwaxxakatu Mesías‑ni. (“Mesías” dienna innána Cristu benne chi ga'anani Tata Do Yebáha idhelhe.)
Nianna tti chebie Simón‑ni ata du Jesús‑ni. Tti bilani Jesús‑ni Simón‑ni, nianna rabie na:
―Lu lálu Simón xi'in Jonás, ttaka nnanna eyatta lálu Cefas. (“Cefas” dienna innána Pedro.)

Beyeki sáha bebeki le Jesús‑ni tsiabie daka Galilea, nianna beti'e Felipe‑ni nna ree benneha:
―Utá, betenalha neti.
Felipe‑ni anke benne lhe'esi Betsaida, delába lhe'esi ge Andrés‑ni lhe ge Pedro‑ni lhe. Felipe‑ni nna beti'ana attu benne lábie Natanael nna rana benneha:
―Chi gwaxxakatu Jesús ge Nazaret‑ni, xi'in biyú José‑ni. Ge Jesús‑ni nuha unne Moisés‑ni lo bia bennabiha lhe ge benne‑nigaba nuha unne ka profeta ge Tata Do Yebáha lhe.
Nianna ra Natanael‑ni Felipe‑ni:
―¿Lhe'esi Nazaret‑ni, si gwaria tsa ttu benne unie ttu nu tse?
Nianna ra Felipe‑ni benneha:
―Utáruga, belanni.
Tti bilani Jesús‑ni Natanael‑ni chi diabie ata dueha, nianna ree:
―Ne ttu benne gwalíga anke nu Israel daa nii, Benne‑ni labí gwen lasi rinnebie.
Natanael‑ni nna ree Jesús‑ni:
―¿Gála benbialu neti xa tata?
Jesús‑ni nna bekabie gebie, ree:
―Attili lani gaxi Felipe‑na lu, neti chila biláti lu tti relu xan ya higuha.
Natanael‑ni nna ree Jesús‑ni:
―Maestru, lúligaba ankalu Xi'ini Tata Do Yebáha lhe lu ankalu benne rinnabialu ka benne Israel‑ni lhe.
Jesús‑ni nna bekabie ree Natanael‑ni:
―¿Si de xpeya lu chi biláti lu relu xan ya higuha, si de nuha nna ria lelu kia? Adírula xxeni anka ka nu si ilenlu tti ka nuní.
Lhe rágaba Jesús‑ni:
―Netiru ria, debá nnanna lhe nu si daa lhe ilenle iyali yebáha nna ilágabinle ka anjeli ge Tata Do Yebáha tsapi chadike xaliekia, neti benne daya yebáha.

Gwranda ar San Juan 1