Ojibwe - 2012 Edition (Syllabic) (NT - Drama)

ᐐᐸ ᑭᑭᔐᑉ ᐁᐊᓇᒥᐁᑮᔑᑲᓂᓂᒃ, ᐃᑴᐗᒃ ᑮᐃᔖᐗᒃ ᓇᐃᓂᑏᐎᑲᒥᑯᕽ ᐁᐃᔑᐎᑑᐙᒡ ᑕᑯᓭᒀᓇᓐ ᑳᑮ ᑾᔮᒋᑑᐙᒡ᙮ ᐅᑮᒥᑲᐙᐙᓐ ᐊᓯᓃᓐ ᐁᑮᒫᒋ ᑎᑎᐱᓂᑳᓱᓂᒡ ᐃᐃᒫ ᑳᑮ ᑭᐸᐱᓂᐸᓐ ᑳᐅᒋ ᐲᑎᑳᓂᐗᕽ ᓇᐃᓂᑏᐎᑲᒥᑯᕽ᙮ ᒦᑕᔥ ᑳᐃᔑ ᐲᑎᑫᐙᒡ, ᑳᐐᓐ ᑕᔥ ᐅᑮᒥᑲᓰᓈᐙ ᐅᐐᔭᐎᓂ ᑳᑎᐯᒋᑫᓂᒡ ᒋᓴᓲᓐ᙮ ᒣᒀ ᑕᔥ ᐁᓃᐸᐎᐙᒡ ᐃᐃᒫ ᐁᒫᒪᑳᑌᑕᒧᐙᒡ ᐅᐅ ᑳᑮᐃᔑᓭᓂᒃ, ᒦᑕᔥ ᑫᑕᑐ ᓃᔑᓐ 2 ᐃᓂᓂᐗᐞ ᐁᐙᓭᔮᓂᑭᓐ ᐅᑭᑭᔥᑭᑲᓂᓂ ᑳᑮᐅᒋ ᐐᒋ ᑳᐸᐎᑖᑯᐙᒡ᙮ ᐁᒨᔥᑭᓀᔥᑳᑯᐙᒡ ᑕᔥ ᓭᑭᓯᐎᓐ ᐃᑭ ᐃᑴᐗᒃ ᒦ ᐃ ᑳᑮᐊᓂᒥᑯᑖᐙᒡ ᒥᑕᑲᒥᒃ᙮ ᒦᔥ ᐅᐅ ᑳᐃᑯᐙᒡ ᐃᓂ ᐃᓂᓂᐗᐞ: ᐌᑯᓀᓐ ᐌᒋ ᓇᓈᑕᐙᐸᒣᒃ ᑳᐱᒫᑎᓯᒡ ᐃᐃᒫ ᒣᑴᔭᐄ ᑳᐃᔑᐊᔮᓂᒡ ᑳᓂᐳᓂᒡ? ᑳᐐᓐ ᐅᐅᒫ ᐊᔮᓰ᙮ ᐋᔕ ᑮᑮᐌ ᐱᒫᑎᓯ᙮ ᑳᐐᓐ ᐃᓇ ᑭᒫᒥᑲᐎᓰᒻ ᑳᑮᐃᓂᓀᑭᐸᓐ ᒣᒀ ᑮᐐᒌᐌᒃ ᐌᑎ ᑳᓬᐊᓬᐄᕽ Galilee ? ᐃᓂᓂ ᐅᑯᓯᓴᓐ ᑕᔑ ᐸᑭᑎᓂᒫᐗᓐ ᐁᔑ ᐊᔮᓂᒡ ᒋᐅᓇᔓᐙᓂᑯᓂᒡ ᑳᒪᒋᑑᑕᒥᓂᒡ ᐃᓂᓂᐗᐞ, ᒋᐊᑯᓴᑲᐅᓐᒡ ᑲᔦ᙮ ᓂᓱ ᑮᔑᒃ 3 ᑕᔥ ᐃᔑᓭᓂᒃ ᒋᑮᐌ ᐱᒫᑎᓯᒡ᙮
ᒦᑕᔥ ᐃᑴᐗᒃ ᑳᑮᒫᒥᑲᐎᐙᒡ ᑳᐃᑭᑐᓂᐸᓐ ᒋᓴᓲᓐ᙮ ᒦᔥ ᐃᐃᒫ ᐃᑭ ᐃᑴᐗᒃ ᑳᐅᒋ ᑮᐌᐙᒡ ᓇᐃᓂᑏᐎᑲᒥᑯᕽ ᐁᑮᐊᐎ ᐐᑕᒪᐙᐙᒡ ᑳᒥᑖᔑ ᐯᔑᑯᓂᒡ 11 ᑭᑭᓄᐊᒪᐙᑲᓇᐞ ᑲᑭᓇ ᑫᑰᓐ ᑳᑮᐃᔑ ᐙᐸᑕᒧᐙᒡ᙮ ᐃᐃ ᑲᔦ ᑲᑭᓇ ᑯᑕᒃ ᐅᑮᐐᑕᒪᐙᐙᐞ᙮ ᒦᐗᒃ ᑕᔥ ᐅᑯ ᐃᑴᐗᒃ ᑳᑮᐃᔖᐙᒡ ᒣᕒᐃ ᒫᑲᑕᓬᐊᐎᑴ Mary Magdalene , ᒍᐋᓇ Joanna , ᐊᐊ ᑲᔦ ᒣᕒᐃ Mary ᐅᒫᒫᓐ ᒌᒥᔅ James ; ᐃᐃ ᑕᔥ ᑲᔦ ᑯᑕᒃ ᐃᑴᐗᐞ ᑳᑮᐐᒌᐎᑯᐙᒡ ᐅᑮᐐᑕᒪᐙᐙᐞ ᐃᔑᓂᔕᐙᑲᓇᐞ ᑳᑮᐃᓈᐱᔑᓄᐙᒡ᙮ ᐃᑭ ᑕᔥ ᐃᔑᓂᔕᐙᑲᓇᒃ ᑳᐐᓐ ᐅᑮ ᑌᐺᑕᐙᓯᐙᐙᐞ ᐃᐃ ᐃᑴᐗᐞ ᐋᓃᔥ ᐅᑮ ᑲᑮᐹᓯᑕᐙᐙᐞ᙮ ᐲᑕᕒ Peter ᑕᔥ ᑮᐸᓯᑸ, ᐁᑮᐊᐸᑑᒡ ᓇᐃᓂᑏᐎᑲᒥᑯᕽ᙮ ᐊᐲ ᐌᑎ ᑳᐅᑎᑕᕽ ᑮᓇᐗᑭᑖ ᐁᑮᐃᓈᐱᒡ᙮ ᒦᔥ ᑳᑮᐙᐸᑕᕽ ᐁᑕ ᓇᐃᓂᑫᐎ ᐃᔒᑭᓅᓐ ᐁᐊᑌᓂᑭᓐ᙮ ᑮᒫᒪᑳᑌᑕᒻ ᐋᓃᓐ ᑳᑮᐃᔑᓭᓂᒃ᙮


ᐃᐃᐌ ᑕᔥ ᐯᔑᑾᓐ ᐁᑮᔑᑲᒃ, ᓃᔑᓐ 2 ᒋᓴᔅ ᐅᑭᑭᓄᐊᒪᐙᑲᓇᐞ ᑮᐃᔖᐗᐞ ᐃᒣᔭᔅ Emmaus ᐁᔑᓂᑳᑌᓂᒃ ᐊᔮᐎᓐ᙮ ᑫᑳ ᒫᐐᓐ ᓃᔣᓱ 7 ᑎᐸᐃᑲᓐ mile ᑮᐊᐲᒑᓂ ᒉᕒᐆᓴᓬᐊᒥᕽ Jerusalem ᐅᒋ᙮ ᑮᑲᑲᓅᓂᑎᐗᐞ ᐁᐸᐱᒧᓭᓂᒡ ᐁᑮ ᑕᔑᑕᒥᓂᒡ ᑲᑭᓇ ᑫᑰᓐ ᑳᑮᐃᔑᓭᓂᒃ᙮ ᒣᒀ ᑕᔥ ᐁᑲᑲᓅᓂᑎᓂᒡ ᐁᑕᔑᑕᒫᑎᓂᒡ ᐅᓄᐌᓂᐗᓐ, ᒋᓴᔅ ᐅᑮᐱ ᐊᑎᒫᐞ, ᐁᑮᐊᓂ ᐐᑕᐊᑑᒫᒡ᙮ ᐅᑮᐙᐸᒥᑰᐞ, ᑳᐐᓐ ᑕᔥ ᐅᑮᐅᒋ ᓂᓯᑕᐎᓈᑯᓰᐞ᙮ ᒦᑕᔥ ᒋᓴᔅ ᑳᐃᔑ ᑲᑴᒋᒫᒡ: ᐌᑯᓀᓐ ᐃᐃ ᑳᐱᒥ ᑕᔑᑕᒫᑎᔦᒃ ᐁᐱᒧᓭᔦᒃ?
ᒦᔥ ᑳᐃᔑ ᑭᐱᒌᓂᒡ ᐁᑮᒫᓀᑕᒧᐎᓈᑯᓯᓂᒡ᙮ ᐃᓂ ᐯᔑᒃ ᑲᓬᐄᔭᐸᔅ Cleopas ᐁᔑᓂᑳᓱᓂᒡ ᐅᑮᐃᔑ ᑲᑴᒋᒥᑰᓐ: ᒦ ᓇ ᑮᓐ ᐁᑕ ᐁᐸᐯᔑᑰᔭᓐ ᐁᐱ ᑮᔫᑌᔭᓐ ᒉᕒᐆᓴᓬᐊᒥᕽ Jerusalem , ᐁᑭᑫᑕᓯᐗᓐ ᑕᔥ ᐅᓄᐌᓂᐗᓐ ᑳᐱ ᐃᓇᑲᒥᑲᒃ ᓅᑯᒻ ᑳᐱ ᑲᑮᔑᑲᑭᓐ, ᐅᑮᐃᑰᓐ᙮
ᐌᑯᓀᓇᓐ ᑳᐃᑕᒪᓐ, ᐅᑮᐃᓈᓐ?
ᒦᑕᔥ ᑳᐃᔑ ᓇᑴᑕᑰᒡ: ᐃᐃᐌᓂ ᐋᓃᓐ ᑳᑮ ᑑᑕᐎᓐᒡ ᒋᓴᔅ ᓈᓴᕒᐃᑎᕽ Nazareth ᑳᐅᒌᒡ᙮ ᑮᑎᓄᐎ ᑲᑲᓅᑕᒪᐙᒡ ᑭᔐᒪᓂᑑᓐ᙮ ᐋᐱᒋ ᑮᒪᔥᑲᐎᑮᔗ, ᑮᒪᔥᑲᐎᒋᑫ ᑲᔦ ᐁᓈᓴᒦᓂᒡ ᑭᔐᒪᓂᑑᓐ, ᐃᐃ ᑲᔦ ᑲᑭᓇ ᐯᒫᑎᓯᓂᒡ᙮ ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᑎᐯᓂᒥᔭᒥᑣ ᐅᑮᐃᔑ ᐸᑭᑎᓈᐙᓐ ᒋᐅᓇᔓᐙᓂᒥᓐᒡ ᒋᓂᓯᒥᓐᒡ᙮ ᒦᑕᔥ ᑳᑮᐊᑯᓴᑲᐙᐙᒡ᙮ ᒦ ᓴ ᐃ ᑳᐃᔑ ᐸᑯᓭᓂᒧᔮᑭᐸᓐ ᐐᓐ ᒋᑮ ᐱᒫᒋᐋᐸᓐ ᐃᔅᕒᐃᔭᓬᐊᐞ Israel ᙮ ᐅᐅ ᑕᔥ ᑲᑭᓇ ᑳᑮᐃᔑᓭᒃ, ᒦ ᐃ ᐋᔕ ᓂᓱᑮᔑᒃ ᑳᑮᐃᓇᑲᒥᑲᑭᐸᓐ᙮ ᐋᓂᑕ ᑕᔥ ᑲᔦ ᐃᑴᐗᒃ ᑳᐐᒌᐎᔭᒥᑣ ᓂᑮᒫᒪᑳᑌᑕᒥᐃᑯᓈᓂᒃ᙮ ᐐᐸ ᑭᑭᔐᑉ ᑮᐃᔖᐗᒃ ᓇᐃᓂᑏᐎᑲᒥᑯᕽ᙮ ᑳᐐᓐ ᑕᔥ ᐅᑮᒥᑲᓰᓈᐙ ᐅᐐᔭᐎᓂ᙮ ᒦᔥ ᐁᐱᑮᐌᐙᒡ ᑳᐃᑭᑐᐙᒡ ᐁᑮᐙᐸᒫᐙᒡ ᐄᓴᓐ ᐁᒐᓬᐊᐞ, ᐁᑮᐃᑯᐙᒡ ᐁᐱᒫᑎᓯᓂᒡ ᒋᓴᓲᓐ᙮ ᐋᓂᑕ ᑕᔥ ᑲᔦ ᑳᐐᒌᐎᔭᒥᑣ ᑮᐃᔖᐗᒃ ᓇᐃᓂᑏᐎᑲᒥᑯᕽ᙮ ᒦᑕᔥ ᑳᑮᒥᑲᒧᐙᒡ ᒪᔮ ᐁᑮᐃᔑᓈᑾᓂᓂᒃ ᑳᑮᐃᑭᑐᓂᒡ ᐃᑴᐗᐞ, ᑳᐐᓐ ᑕᔥ ᐐᓐ ᐅᑮᐅᒋ ᐙᐸᒫᓯᐙᐙᓐ, ᐅᑮᐃᑰᓐ᙮
ᒦᑕᔥ ᒋᓴᔅ ᑳᐃᓈᒡ: ᐋᓃᓐ ᐁᐲᒋ ᑲᑮᐹᑎᓯᔦᒃ᙮ ᐁᑕᑕᐌ ᑭᐸᐯᒌᒻ ᑭᑌᐃᐙᕽ ᒋᑌᐺᑕᒣᒃ ᑲᑭᓇ ᑳᑮᐱ ᐃᑭᑐᐙᒡ ᑫᓅᑕᒪᐙᐙᒡ ᑭᔐᒪᓂᑑᓐ᙮ ᑳᐐᓐ ᐃᓇ ᐅᒋᑕ ᐱᓇᒫ X ᐅᐅᓇᑫ ᒋᑮᐃᔑ ᑲᒀᑕᑭᑑᐸᓐ, ᒋᑮᐊᓂᔑ ᐲᑎᑫᐸᓐ ᑕᔥ ᐅᑭᒋ ᐃᓀᑖᑯᓯᐎᓂᕽ? ᒦᑕᔥ ᒋᓴᔅ ᐊᐗᔑᒣ ᑳᐊᓃᔑ ᐐᑕᒪᐙᒡ ᐐᓐ ᐁᑮ ᑕᔑᒥᓐᒡ ᐃᐃᒫ ᒥᓯᐌ ᑭᒋᐅᔑᐲᐃᑫᐎᓂᕽ᙮ ᐃᐃᒫ ᐁᑮᐅᒋ ᒫᒌ ᑕᔑᒥᓐᒡ ᒨᓯᓲᓐ ᐁᔑᐲᐃᑫᓂᒡ ᐲᓂᔥ ᑲᑭᓇ ᑳᑮᐃᔑᐲᐃᑫᓂᒡ ᑫᓅᑕᒪᐙᓂᒡ ᑭᔐᒪᓂᑑᓐ᙮
ᐋᔕ ᐁᐊᓂ ᐯᔓᓈᑾᓂᓂᒃ ᐃᐃᒫ ᐊᔮᐎᓂᕽ ᑳᐃᔖᐙᒡ, ᒋᓴᔅ ᐅᑮᐃᔑᓈᑯᑑᓐ ᑖᐱᔥᑰ ᑫᔮᐱ ᐙᓴ ᐁᐐᐊᓂ ᐃᔖᒡ᙮ ᐅᑮᑲᑴ ᑲᔥᑭᒫᐙᓐ ᑕᔥ ᐁᑮᐃᓈᐙᒡ: ᒦ ᐅᒫ ᐃᔑᓂᐹᓐ ᑳᐐᐃᔑ ᓂᐹᔮᕽ᙮ ᐋᔕ ᐄᑐᒃ ᐊᓂ ᐊᐲᒋᓈᑯᔑᓐ, ᐋᔕ ᑲᔦ ᑫᑳ ᑕᑎᐱᑲᓐ, ᐅᑮᐃᓈᐙᓐ᙮ ᒦᔥ ᒋᓴᔅ ᑳᐃᔑ ᐲᑎᑫᒡ ᒋᐐᒋ ᑲᐯᔑᒫᒡ᙮ ᒋᓴᔅ ᑕᔥ ᑮᐅᓇᐱ ᐁᐐᐐᑑᐸᒫᒡ᙮ ᐅᑮᐅᑖᐱᓈᓐ ᐸᑴᔑᑲᓇᓐ ᑲᔦ ᑕᔥ ᐁᑮᓇᓈᑯᒧᒡ᙮ ᐅᑮ ᐸᑴᐱᓈᓐ ᑕᔥ ᐸᑴᔑᑲᓇᓐ ᐁᑮᐊᓂ ᐊᔕᒫᒡ᙮ ᒦᑕᔥ ᑳᑮ ᐹᑳᐱᐃᑣ ᐁᑮᓂᓯᑕᐎᓇᐙᐙᒡ᙮ ᒋᓴᔅ ᑕᔥ ᑮᐅᒋ ᐊᑯᓈᑯᓯ᙮ ᒦᑕᔥ ᑳᐊᔨᑎᐙᒡ: ᑳᐐᓐ ᐃᓇ ᑖᐱᔥᑰ ᐃᔥᑯᑌ ᑳᐱᔅᑲᓀᒃ ᑭᑮᐅᒋ ᐃᓇᒪᒋᐅᓰᒥᓐ ᑭᑌᐃᓈᕽ ᒣᒀ ᐃᐃ ᑳᐱ ᑲᑲᓅᓂᓇᕽ ᒦᑲᓈᕽ ᑲᔦ ᑕᔥ ᑳᐱ ᐐᑕᒪᐎᓇᕽ ᐁᑭᑑᒪᑲᓂᓂᒃ ᑭᒋᐅᔑᐲᐃᑲᓐ?
ᔐᒫᒃ ᑕᔥ ᑮᐗᓂᔥᑳᐗᒃ ᒉᕒᐆᓴᓬᐊᒥᕽ Jerusalem ᐁᑮᐃᔑ ᑮᐌᐙᒡ᙮ ᒦᑕᔥ ᐃᐃᒫ ᑳᐃᔑ ᒥᑲᐙᐙᒡ ᒥᑖᔑ ᐯᔑᒃ 11 ᑭᑭᓄᐊᒪᐙᑲᓇᐞ, ᐃᐃ ᑲᔦ ᑯᑕᒃ ᐊᐎᔭᐞ ᐁᒫᐗᒋᐃᑎᓂᒡ᙮ ᒦᔥ ᑳᐃᑭᑐᓂᒡ: ᑌᐺ ᑳᑎᐯᒋᑫᒡ ᑮᑮᐌ ᐱᒫᑎᓯ᙮ ᐅᑮᓈᑯᓰᑕᐙᓐ ᑕᔥ ᓵᐃᒪᓅᓐ Simon !
ᐃᑭ ᑕᔥ ᑳᔑ ᓃᔑᐙᒡ ᑮᐐᑕᒫᑫᐗᒃ ᐋᓃᓐ ᑳᑮ ᐊᔨᔑᓭᓂᒃ ᒣᒀ ᐁᐱᒧᓭᐙᒡ ᒦᑲᓈᕽ, ᐋᓃᓐ ᑲᔦ ᑳᐃᔑ ᓂᓯᑕᐎᓇᐙᐙᒡ ᑳᑎᐯᒋᑫᓂᒡ ᐊᐲ ᑳᐸᑴᓈᓂᒡ ᐸᑴᔑᑲᓇᓐ᙮


ᒣᒀ ᑕᔥ ᐃᐃ ᓃᔑᓐ 2 ᐁᐙᐐᑕᒫᑫᓂᒡ ᐅᐅᐌᓂ ᑫᑕᑐ ᑳᑎᐯᒋᑫᒡ ᐐᓐ ᑮᐅᒋ ᓃᐸᐎ ᐃᐃᒫ ᒣᑴᔭᐄ ᐁᔑ ᐊᔮᓂᒡ ᐁᑮᒫᒪᐎ ᐃᓈᒡ: ᐱᓵᓀᑕᒧᐎᓐ ᑭᑲ ᐐᒌᐎᑯᒻ!
ᑮᑭᒋ ᓭᑭᓯᐗᐞ ᒌᐸᔾ ᓂᐙᐸᒫᓈᓐ ᐁᐃᓀᑕᒥᓂᒡ᙮ ᒦᑕᔥ ᒋᓴᔅ ᑳᐃᓈᒡ: ᐌᑯᓀᓐ ᐌᒋ ᒥᑯᔥᑳᑌᑕᒣᒃ? ᐌᑯᓀᓐ ᑲᔦ ᐌᒋ ᐋᓉᑕᒣᒃ ᑭᑎᓀᑕᒧᐎᓂᐙᕽ? ᐃᓇᔥᑫ ᐙᐸᑕᒧᒃ ᓂᓂᒌᓐ, ᓂᓯᑕᓐ ᑲᔦ᙮ ᓃᓐ ᐅᔕ ᐱᑯ ᓃᓐ᙮ ᐃᓇᔥᑫ ᓵᒥᓂᔑᒃ᙮ ᑳᐐᓐ ᐄᑐᒃ ᒌᐸᔾ ᐐᔮᓯᐎᓰ, ᑳᐐᓐ ᑲᔦ ᐅᑲᓂᐎᓰ ᐃᐃᐌ ᓃᓐ ᑳᔑ ᐙᐸᒥᔦᒃ᙮
ᐅᐅ ᑕᔥ ᑳᐃᔥᒀ ᐃᑭᑐᒡ, ᒦ ᐃ ᑳᐃᔑ ᐙᐸᑕᐋᒡ ᐅᓂᒌᓐ, ᐅᓯᑕᓐ ᑲᔦ᙮ ᑳᐐᓐ ᑫᔮᐱ ᑮᑌᐺᑕᓰᐗᐞ ᑳᐊᐲᒋ ᒥᓉᑕᒥᓂᒡ ᑲᔦ ᑕᔥ ᑳᐊᐲᒋ ᒫᒪᑳᑌᑕᒥᓂᒡ᙮ ᒦᔥ ᐅᐅ ᒋᓴᔅ ᑳᐃᓈᒡ: ᑭᑕᔮᒻ ᐃᓇ ᑫᑰᓐ ᑫᒦᒋᔮᓐ? ᐅᑮᒦᓈᐙᓐ ᑕᔥ ᑮᑰᔭᓐ ᐋᔕ ᑳᑮ ᑮᔑᓱᓂᒡ᙮ ᒦᑕᔥ ᐃᐃ ᑳᑮᐅᑖᐱᓈᒡ ᐁᑮᐊᒸᒡ ᒣᒀ ᐁᑲᓇᐙᐸᒥᑯᒡ ᐅᑭᑭᓄᐊᒪᐙᑲᓇᐞ᙮
ᒦᑕᔥ ᐅᐅ ᑳᐃᓈᒡ: ᒦ ᓴ ᐅᐌ ᑳᑮᐐᑕᒪᐎᓂᓇᑰᒃ ᒣᒀ ᑳᐱ ᐐᒌᐎᓂᓇᑰᒃ᙮ ᑲᑭᓇ ᑫᑰᓐ ᑳᐅᔑᐲᐃᑳᑌᒃ ᐁᑕᔑᒥᑰᔮᓐ ᐃᐃᒫ ᐅᑑᓇᔓᐌᐎᓂᕽ ᒨᓯᔅ Moses ᐃᑭ ᑲᔦ ᐅᑑᔑᐲᐃᑲᓂᐙᕽ ᐃᑭ ᑫᓅᑕᒪᐙᐙᒡ ᑭᔐᒪᓂᑑᓐ, ᐃᐃᒫ ᑲᔦ ᒪᓯᓇᐃᑲᓂᕽ ᓂᑲᒧᓇᓐ, ᓂᑕᔑᒥᑰ᙮
ᒦᑕᔥ ᑳᑮᒦᓈᒡ ᒋᓂᓯᑐᑕᒥᓂᒡ ᑭᒋᐅᔑᐲᐃᑫᐎᓇᓐ᙮ ᒦᔥ ᑳᐊᓂ ᐃᓈᒡ: ᒦᑕᔥ ᐅᐅ ᐁᔑᐲᐃᑳᑌᒃ, ᐁᑮᐃᔑᓈᑾᒃ ᑭᔐᒪᓂᑑ ᑳᑮᐅᓈᐸᒫᒡ ᒋᑮ ᑲᒀᑕᑭᑑᓂᒡ ᑲᔦ ᑕᔥ ᓂᐳᐎᓂᕽ ᒋᐅᒋ ᑮᐌ ᐱᒫᑎᓯᓂᒡ ᓂᓱ ᑮᔑᒃ 3 ᐃᔑᓭᓂᒃ᙮ ᑴᑳᑎᓯᐎᓐ, ᐃᐃ ᑲᔦ ᐊᐎᔭ ᑳᐴᓀᑕᒪᐎᓐᒡ ᐅᒪᒋᑑᑕᒧᐎᓇᓐ ᒋᑲᑮᒀᑌᓂᒃ ᐅᐐᓱᐎᓂᕽ ᐅᒋ ᒋᐐᑕᒪᐎᑣ ᑲᑭᓇ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ ᐃᐃᒫ ᒉᕒᐆᓴᓬᐊᒥᕽ Jerusalem ᒋᐅᒋ ᒫᒌ ᑲᑮᒀᑌᒃ᙮ ᑮᓇᐙ ᑕᔥ ᑭᐙᐸᑖᓈᐙᓐ ᐅᓄᐌᓂᐗᓐ᙮ ᓃᓐ ᐃᑕᔥ ᐃᑯ ᑭᑲ ᐲᒋᓂᔕᐊᒪᐎᓂᓂᒻ ᓅᔅ ᑳᑮᐊᔓᑕᒫᑫᒡ᙮ ᐃᐃᒫ ᑕᔥ ᑭᒋ ᐆᑌᓈᕽ ᑭᑲ ᑕᔑ ᐲᐅᒻ ᐹᓂᒫ ᑮᐱ ᐅᑎᓯᑯᔦᒃ ᐃᐃ ᒪᔥᑲᐎᓰᐎᓐ ᐃᔥᐱᒥᕽ ᑳᐐᐱ ᐅᒌᒪᑲᒃ᙮


ᒦᑕᔥ ᐃᐃᒫ ᑭᒋ ᐆᑌᓈᕽ ᑳᐅᒋ ᒫᒋ ᐐᒌᐙᒡ ᐲᓂᔥ ᐌᑎ ᐁᐊᓂ ᐅᑎᑕᒧᐙᒡ ᐯᑕᓃᕽ Bethany ᙮ ᒦᑕᔥ ᐃᐃᒫ ᑳᑮᐅᐱᓂᑫᑖᒡ ᑴᑴᑭᓂᒃ ᐁᑮ ᔕᐌᓂᒫᒡ᙮ ᒣᒀ ᑕᔥ ᐁᔕᐌᓂᒫᒡ, ᐅᑮᐅᒋ ᓇᑲᓈᐞ ᐁᑮᐅᐱᔥᑳᒡ ᑭᒋᑮᔑᑯᕽ ᐁᐃᔑᐎᓂᓐᒡ᙮ ᒦᑕᔥ ᑳᐃᔑ ᐊᓇᒥᐁᑕᐙᐙᒡ, ᒉᕒᐆᓴᓬᐊᒥᕽ Jerusalem ᐁᑮᐊᓂ ᐃᔑ ᑮᐌᐙᒡ ᐁᑮᒧᔥᑭᓀᔥᑳᑯᐙᒡ ᑭᒋ ᒥᓉᑕᒧᐎᓐ᙮ ᐃᐃᒫ ᑕᔥ ᒨᔕᒃ ᑮᐊᔮᐗᒃ ᑭᒋᐊᓇᒥᐁᐎᑲᒥᑯᕽ ᐁᓇᓈᑯᒫᐙᒡ ᑭᔐᒪᓂᑑᓐ᙮

Gwranda ar ᓬᐅᒃ 24