Yoohanee 8

Anaasee moo fannoo ummuarimaruna paquru ufafa.

[ 1-2Oorifa aaqanai kaqimma ooru faiqeenoo iqaqoofanoo Yisufa Yeerusaree firaa amaana maqaki kaifaa ooquree keeqafufaqa faiqí anaasee moomoosa suqufufaqa mina fiqu fiqumma marufanoo ooqumarifi Anutuna ufa qimannimimarinau. 3Mooseena sandufa akoofasauqa faqa Farisai amaana ufa qimarusa faqa anaasee moo fasiqa qummuari marufaqa aaqee oonu qafamasee qumaree doo maree aniqau. Yisufa maruqoo mini quqaseeqa maaqi qimasee qimamiqau.

4Oo ufasaa rakisira maa anaaseefa qummuari marifaqa maasa qafamasee qumaree anidaqa. 5Mooseena sandufa miqiasara oonisamu kai nariqa nini iqa kuqa narusaaqee qinoo maridanoo. Anee minara nana ufee qidanee.

6Misa mi ufanannai puteera foora fufidaqa qiqau. Yisufa aruanifeera qimasaida miqi marufanoo Yisufa narí iriseenoo fifau kummaramafufanoo asaukunnoo maqa akara rinau. 7Mifa maqa fifau akara rimarufaqa misa fuki faaki qidaqa mi anaaseena oonisamu aruanauree sia fee aruanauree ritidaqa ireemariqau. Kaqikaaqoo marikinoo Yisufa findifi qimanniminau. Yafee inniki moo fannoo numoo siainafa mifa kai oonisamu indaaru aunaa atufinoo maa anaaseena aruannoo fee. 8-9Yisufa miqi qimaseenoo kafaa kummaramafinoo maqa akara rimarufaqa doo misa moodaa kai qaara kai idaqa nári aaqaranara nisaurusee findimeeqaida doo fifainimariqau. Faiqí firaasa naaree fufaqa kafaa miqoo oorudupirausa fufaqa kumaaraa inaaqianna doo fifiqau. Misa fifufanoo mi anaaseefa kai miqoo kikiqinoo marinau. 10Yisufa findifinoo mi anaaseena irammirinau, misa yai fee fifee. Sia fee moo fannoo ani kuqira ufa amianinafa maridanoo fee. Aiqama fifee.

11Mi anaaseefa qinau. Oo rakisira sia kuqira ufa moo fannoo qimimarifa maridanoo. Yisufa iriseenoo qinau. Doo qinee faqa sia kuqira ufa ani amianaura. Doo fua, sia kafaa manda oosana maraa.]

Yisufa maa maqa maaqanaki qoomara foora qu ufafa.

12Moo kari Yisufa Yeerusaree amaana maqaki faiqí anaasee maaqi qimasee qimanniminau. Qinee maqasaaqaraasa qooma maridaqa. Yafasiqa aanaaseesa qini faqa finausa misa kaqi marira qooma mareefaranoo sia uqanna asukunaki fifaranoo.

13Farisai amaana ufa qimarusa mina iriseeqa qimamiqa qiqau. Anee aneennara kai ufa qidana aneenna auqu uqeeree mariananoo. Miqianna ufafa sia anoonaikidanoo. Fifau ufa kai qimariananoo.

14Yisufa mina iriseenoo qinau. Kuqaa qinee qeeqaraa ufa qidaqa. Qinee miqi qidaqa anoona ufa kai qidaqa. Qinee qeeqa kambiqafi aniafannanara iridaqa qeeqa fuannanara iridaqa. Innee sia qinee kambiqaafannanara irimariafanoo. 15Innee faiqí faiqi ufa irisee dapi iriranannai faiqí anaasee rainannimaqee mariafanoo. Sia qinee moo fasiqa aanaaseera rainannimaqee marunausa maridaqa. 16Qinee akaqausara rainannimaqaidaqau andeeqasee rainannisaunaiqini. Sia qeeqaraafau maridaqau ufa nimidaqau. Qeeqa qikoofa qini diqiqamaqoona faqa maridaqa dadaaqi marifaqa ufa qimannimidaqa. 17Inni sandufa akara ufa moo maaqimminoo maridanoo. Qaara fasiqa moo ainaina nári nifunnai qafamasee munu kooroo qimasaifaqa aiqamausa minara anoona ufa fee qifaranoo. 18Qinee qeeqaraa ufa qidaqa qini qikoofa qini diqiqoofa mifa faqa qini dadaaqifaqa anoona ufa tia qimannimidaqa.

19Miqi qimasoofaqa Farisai amaana ufa qimarusa maaqi qimasee irammiriqau. Ani akoofa yai fee maridanoo ani dadaaqidanoo fee qufanoo Yisufa qinau. Innee qiniara faqa qini qikoonara faqa sia irimariafanoo. Innee qiniara irifau qini qikoonara faqa irini. Innee sia maaqandara irimariafanoo.

20Yisufa maa ufausa Yeerusaree firaa amaana maqaki qimannimimarinau. Mi amaana maqanaki oosirafa moo marinau. Amaana maqaki quqee maru munnimma difaanifa minaki marufanoo mi oosiranaki Yisufa maridanoo mi ufausa qimanniminau. Misa Yisuna qumaraanee qimasee sia qumaraqau. Sia mina kuqira aukuana adeedi ranoo marunara Anutufa qumee rafaaqafusoofaqa sia qumaraqau.

Yisufa qinau, qinee fuanannai innee sia fifaranoo qimaqoo ufafa.

21Moo kari Yisufa maaqi qimasee Yuda maqannaa uriqararausa qimanniminau. Qinee moosaa fuanaqa qiniara randainaisia inneeqa mandainainaki kuqifaranoo. Qinee fuannaqoo innee sia amana fifaranoo.

22Yuda maqannaasa uriqararausa mi ufana iriseeqa narí qimami narí qimami qiqau. Mifa maasara sia narí innai fuaqeera qidaqinoo. Maasa sia mina ufa iridaqa. Mifa narí fee narí aruannoo fee miqi qidanoo fee.

23Yisufa iriseenoo qimanniminau. Innee maindaraasa mariafanoo qinee mirindaraasa maridaqa. Innee maa maqanasaaqaraasa mariafanoo qinee sia maa maqanasaaqaraasau maridau. 24Qinee minara qunnana innee inneeqa mandainainaki kuqifaranoo. Innee sia qinee marunnanara anoonee qimariafanoo minara kuqaa innee inneeqa mandainainaki kuridifaranoo.

25Misa uriqararausa mina iriseeqa qiqau. Anee yafee maridanee qufanoo Yisufa qinau. Indaaru qimannimiafanausa misa kai maridaqa. 26Qinee moomoo ainainara inniara qimannimianaura. Qini diqiqamaqoofa mifa anoona ufa kai qimarifa mifinaindaraana kai inni maa maqanasaa mariasa qimannimidaqa.

27Yisufa narí akoona aufakiana qimannimimarufaqa siamma irimariqau. Minara Yisufa kaifaa maaqi qimasee qimanniminau. 28Kasooqaqee innee qini faiqí nimaaku uqeereeqee aunirira saqarisaa quqaqisaseeqa mikamuqoo qinee mariaafannanara irifaranoo. Qini qikoofa qimaqimiqoo ufana kai inni qimannimidaqa. Mikari innee minara faqa amiqimasee irifaranoo. 29Qini diqiqoofa qini faqa maridanoo. Qinee mina aidira oosanamau kai fidaqa minara sia minniqisaifaqau qeeqaraafau maridaqau. Mifa qini faqa maridanoo. 30Faiqí anaasee moomoosa mi ufana iriseeqa Oo kuqaa mifa Anutuna asauku mundira fee qimasee minasaa mundiqau.

Rumbarausara faqa idukirausara faqa qimaqoo ufafa.

31Yisufa minara iriseenoo qimanniminau. Innee qini ufa qimannimunnana irisee mi mau maqee maqee fifaqa kuqaa qini faiqi namu marifaranoo. 32Innee kuqaa anoona ufa kai irifaranoo. Anoona ufa fannoo inniqa mandainainakiqari inni idukuannoo.

33Misa mi ufana iriseeqa qiqau. Maasa Abarahaamana ati maridaqa, sia moona rumbaranaki maridaqa. Nanaree anee maasara idukuaqee qidanee.

34Miqi qufanoo Yisufa kafaa qimanniminoo qinau. Qinee kuqaa anoona ufa inni qimannimidaqa. Faiqí moo fannoo mandoosana maree marifa mi manda oosanafa mina rumbaqaifa maridanoo. 35Faiqí moo fannoo moona ainaina iinoo oosana oosana ainaina narindiara foora iinoo. Kasooqaqee doo ainaini taikaseenoo mi aiqama ainainna narí amiseenoo doo kaqisamu fuannoo. Mi ainainna faqaana faiqi fannoo sia amana taikaannoo kaqi narí akoona amaaku mariannoo kaqi narí akoona amaaqa maqa finoo mina qumiasana maraseenoo sia ainainira faiqi naanna reenoo taikaannoo, kaqi miqoo mariannoo. 36Qinee Anutuna amaaku maridaqa. Qinee inniqa manda oosanakiqari idukusaanaqa innee kuqaa idukiqa marifaranoo. 37Innee Abarahaamana ati mariafaqa qinee minara iridaqa sia innee mina aanna reemariafaqa, qini ufa sia marararee qidaqa qini dariraree qimariafanoo. Abarahaamafa sia miqi marufa minara innee sia Abarahaamana faiqi namu uqanna mariafanoo. 38Qini qikoofa qini uqaqifiqoona kai inni qimannimidaqa. Innee mina minniseeqa inneeqa nikoona moo Sadannana ufa irimariafanoo. 39Misa mi ufana iriseeqa maaqi qiqau. Maasa qikoofa Abarahaamafa maridanoo. Yisufa minara qinau. Innee Abarahaamana faiqi namu maridaqau mina ufamau fini. 40Qinee qeeqa qikoonasaaqaraa ufa kai inni qimannimimarunaqa innee quandafiqa qini darirara qimariafanoo Abarahaamafa sia mi oosanna maranau. 41Innee inneeqa nikoona uqanna oosana maraidaqa miqi mariafanoo. Misa mi ufana iriseeqa qiqau. Maasa sia qummuara faiqifau maridaqau. Maasa moodaa fasiqa faiqi Anutufa narí uqanna maasa qikoofa maridanoo.

42Yisufa misa ufa iriseenoo maaqi qimasee qimanniminau. Anutufa inni nikoofa marinaqau kuqaa innee qiniara rini. Qinee Anutufinaindari maaqoo qumumaridaqa. Qinee sia qeeqafau qumiqau mifa diqiqoofaqa qumiqiafana. 43Innee naqaa fee ifaqee sia qini ufa oosana iridee. Innee qini ufa iriafanoo nikooqaidanoo miqidaqa sia irimariafanoo. 44Afaanna nikoofa Sadannafa maridanoo. Innee mina faiqi namu maridaqa mina aanna ree mariafanoo. Ooqaindari faiqí kuqannarimarufa maridanoo. Sia anoonufakifau mapukinoo maridanoofau. Anoona ufa sia uqanna minaki marifa maridanoo. Mifa unna ufa qinoo narí oosanamau kai fidanoo. Mifa unna ufa qimarifa maridanoo unna ufa qimariasa nikoofa maridanoo. 45Qinee kuqaa anoona ufa kai qimannimi marunnanara innee sia irimariafanoo. 46Qini manda oosana moodaa maridanoo fee sia fee maridanoo. Innee qafee qiqa qimaqimiaqa. Qinee kuqaa anoona ufa kai inni qimannimunaqa naqi fee ifaqee innee sia minara anoonee qidee. 47Anutufa dadaaqifaqa mina faiqi namu araamuqmaakaiki mariasa kai Anutuna ufa irifaranoo. Innee sia Anutunaindaraasau mariafanoofau sia qini ufa irimariafanoo.

Yisufa Abarahaamanara qimannimu ufafa.

48Yuda maqannaa uriqararausa Yisuna ufa iriseeqa aqiqa qiqau. Anee manda Samaria maqannaa mariananoo afaanna moo ani aunduraki marifa mariananoo. Maasa kuqaa fee qidee, sia fee.

49Yisufa iriseenoo qinau. Afaanna sia qiniki maridanoo. Qinee qeeqa qikoona auqu uqeeraidaqa innee qini duqu maqasaa quqeemariafanoo. 50Qinee sia qeeqa duqu uqeeraranara randaidaqa. Moo fannoo qini duqu uqeerarafa maridanoo. Innee qini duqu maqasaa quqeemariafanoo Anutufa kai qini dadaaqinoo inni rafaaqa fuannoo. 51Yafasiqa anaasee fee qini dookinaa ufa irisee marainafa mifa sia kuquannoo naaru mariannoo.

52Yuda maqannaa uriqararausa mi ufana iriseeqa qiqau. Doo maasa ani oosana iriseeqa anee kuqaa afaanna faqaafa mariananoo, Abarahaamafa maasa qikoofa doo ooqai kuqinau. Anutuna tamummaqara fasiqauqa doo kuqiqau. Anee naqi fee masee maa ufana qidanee qini ufa irimariasa sia kuqifaree qidanee. 53Maasa qikoofa Abarahaamafa kuqinau. Anee mina uriqarara fee maridanee qidanee. Anutuna tamummaqara fasiqauqa maqasaa fasiqauqa kuqufufana anee aneennaraa naqira fasiqee maridee qidanee. 54Miqi qimasoofanoo Yisufa qimanniminau. Qinee qeeqa duqu fifau uqeerasaana sia anoonaikiannoo, fifau mariannoo. Qini qikoofa Anutufa qini duqu uqeeraidanoo dadaaqidanoo, innee unna qimasee minara maasa Anutunee qimariafanoo. 55Innee ooqaindari sia mina auqu irimariafanoo. Qinee mina auqu iridaqa. Qinee minara sia iridau inni naanna reemarunausa unna ufa qimarunausee qini. Qinee qeeqa qikoonara iridaqa mina ufamau fimarunausa maridaqa. 56Inni nikoofa Abarahaamafa ooqai kaqi maridanoo qinee maqee marunnanara kaaqa qafaaqaa imarufa marinau. Doo qiqafamaseenoo asasinau. 57Yuda maqannaa uriqararausa mi ufana iriseeqa maaqi qiqau. Anee kumaaraa mariananoo. Anee naqimasee Abarahaamana qafanee inau, ooqai mariufa maridanoo. 58Yisufa minara maaqi qimasee qimanniminoo qinau. Abarahaamafa sia kambiqoo aukuanna qinee maa marunausa mikamuqoo mariqiafana. 59Yuda maqannaasa mina iriseeqa oo maa fasiqafa nariara Yaawee fee qidaqinoo qimasee aanoomasee oonisamu qumaree aruaneerufanoo mifa kukeeqakinoo amaana maqakiqari raudamaki moosaa finau.

Právě zvoleno:

Yoohanee 8: bjr

Zvýraznění

Sdílet

Kopírovat