Yoohanee 12

Beetani maqusai anaasee moo fannoo Yisuna aikusaa amiqira afundimaru fadameena adia amaqoo ufafa.

(Mat 26:6-13; Mak 14:3-9)

1Mi ainnaaqarara qoomaqafa Yeerusaree maqusai adeedi reenoo dinni qisauku taikasee dinni ani moodaa faasaana aiqaqainanoo mi qoomaqafa kambiqarara imarufanoo Yisufa Beetani maqusai oonuranau. Yisufa Rasarusana kuqiranakinaana findifu maqusanaki aniranau. 2Yisufa aniroofaqa (Rasarusana mara findifunara iriseeqa mina akiaqara qoomaqa firaana suqasee naida amiqau.) Maratafa qoomaqa sakeeqaida nimimarufanoo Rasarusafa Yisuna faqa ooqumarifi narana nanau.

(Misa oosana maaqimminoo marinau. Misa qaindasaa fifandirifiqa nisaataa saunarasaida niku uqusaida neemarusa marida miqimandee neemariqau.) 3Neemarufanoo Rasarusana asookifa Mariafa Yisuna anoona amarafa fadameena taqu firaana firaa feefauru aqusaida mareemaruna qumareenoo amiqira afundimaru fadameena mina auqu narada fadameena Yisuna aikumau adia amaqanau. Adia amaqaseenoo narí akiaqa asausi kisaaqa qumareenoo minannai utitiqanau. Miqimasoofanoo afunda firaafa misa maru maqanaki qumbiqanau. 4Yisuna faiqi namukiqari moo fannoo mina auqu Yudasifa Keerioota maqannaafa Yisuna ueeqaaninna fasiqafa marinau. Mi fasiqafa Yudasifa amiqira afudimaru fadameena moomoo qafamaseenoo maaqi qinau. 5Maa fadameenna firaa feefauru mareemaria fadameenafa. Nanaree fifau adieenee. Saina marinana qumiasana faqaana amiseenana moomoo munnimma 300 maraaqaana. Maraseenana kudi fasiqa anaaseeuqa kaqi nimiaqaana. (Mi aukuanna Yuda maqannaasa Mooseena ufa qaindusidaqa kudi fasiqauqa aiqama ainaina dadaaqiqa nimimariqau.) 6Yudasifa sia kudi fasiqara irimarufa kaqi fifau ufa marunara miqi qinau. Mifa ummuarimarufa marinau Yisuna faiqi namu pausakinaana kaqi ummuarimarufa mifa maridanoo miqi qinau.

7Yisufa mina iriseenoo narí maaqi qimasee qimaminau. Marianara sia miqi qia. Saina miqiani. Afundi fadameenna ataa kaqi marina qinee kuquananoo qini qifaaqai akuqimaqaani. 8Anee kudi fasiqa anaaseeuqara qianandee. Kudi fasiqa aanaaseeuqa naaru naaru inniki marifaranoo. Qinee sia kisaaqasaa marianaura qusasaa taikaanaura. Saina fadameena adiaqimaqaani.

Rasarusana arirara tipundaaru ufafa.

9Yisufa Beetani maqusai animarufaqa Yeerusaree maqusaindari moomoosa qafarara ooqu fiqau. Kuqiranakiqari findifuna Rasarusana faqa qafararee qimasee ooqu fiqau. 10-11Faiqí anaasee moomoosa Yeerusareendari Yisunasaa atooqaidaqa moomoo ooqu fiqau. Miqiufaqa amaana maqasaa rakisimarusa oommasee qiqau. Rasarusafa kuqiranakiqari findifunara irisee misa Yisunasaa atooqarara ooqu fimarifaqa saina Rasarusana faqa aruanauree qimasee deedaqiqau.

Yisufa Karaambaiqa iundee toonkisaa Yeerusaree maqusai keeqoo ufafa.

(Mat 21:1-11; Mak 11:1-11; Ruk 19:28-40)

12Faiqí anaasee ainnaaqarara oomaqara maqusa maqusaindari Yeerusaree maqusai suqusee mariusa Yisufa aanai urufaqa afiqarara moomoosa ooqu fiqau. 13Ooqu afiqarara ooqu fidaqa koopeena amanee fooqaana moomoo ateekamaree ooqu fiqau. (Misa nariqa qimiriqa Yisunara maaqi qiqau. Ooqai Anutuna asauku mundirafa kambiqanoo marifa uridanoo. Mifa maasa qiqa karaambaiqaikirara uridanoo.) Misa ooqu fidaqa maaqi qimasee firaa kari faaqariqau. Anutuna amooqia mina auqu uqeeraa. Anutufa qufanoo kambiqarafa uridanoo, Anutufa mina amiqi amiqiani, Anutufa Isaraee maqannaa Karaambaiqa amiqi amiqiani.

14Yisufa doonki moo maqee innooqee marunnasaa paqurimasee minasaa akaramafi ooqumari finoo Yeerusareenni ooru finau. Miqiuna ooqai tamummaqara fasiqa akara rumaqoomau ooru finau. 15Yeerusaree maqusa moo auqu Sioona maqusee qimarinau. Minara ooqeenaa tamummaqara fasiqafa maaqi qimasee akara rinau.

Innee Sioona maqusanaasa sia rufiaaqa. Inni karaambaiqa innee iannai uridanoommi, doonkisaa ooqu marifi uridanoo.

16Yisuna faiqi namu faiqí anaasee qambaana Yisuna faqa ooru fiqau. Misa tamummaqara fasiqa akara iridaqa anoonara sia iridaqa fiqau. Kasooqaqee Yisufa kuqiranakiqari findifufaqa misa oonumafi iriseeqa qiqau. Maasa ooqai akara rumaqoomau Yisuna faqa Yeerusareenni ooru fiqiafana.

17Yisufa Rasarusana aaroofanoo findifuna qafeeusa Yeerusaree maqusaki suqiqa marusa Rasarusanara qimannimiqau. 18Faiqí anaasee moomoo mi ufana iriseeqa maaqi qiqau. Firaa ainaina auqeemarina ooqu afiqamaree uruaqee qimasee ooqu afiqee uriqau. 19Farisai amaana ufa qimarusa oomasee maaqi qiqau. Qafaa doo maasa kadiqaidaqa faiqí anaasee minnikai quandaidaqa.

Kirisa maqannaasa Yisuna qafararee qu ufafa.

20Yeerusareenni ainaaqarara qoomaqara suqimarusaki Kirisa maqannaasa nianai nári maqusaindari anusa faqa miqoo Yuda maqannaasa faqa animariqau. Misa faqa Anutuna qoomaqa sakasee namasee Anutuna amooqiraree qimasee animariqau. 21Kirisa maqannaasa aniree Firipina irammiriqa qiqau. Oo maa fasiqa, Yisuna qafararee qidaqa amanee maasa qifiqee finaqa qafaanauree. Firipifa Beetasaida maqusaindaraafa Kariree maqa maaqakinaafa marufa.

22Firipifa Anduruna paqurimasee misandiri Yisufuqoo oonuree Kirisa maqannaasara qimamiqau. 23Yisufa misara iriseenoo qimanniminoo qinau. Anutufa faiqí nimaaku qini duqu firaaqoo uqeerara aukuana doo animaridanoo. Sia maa maqee imariasa imariandeefau maseenoofau qini duqu uqeeraannoofau. Qini firaa aupurara kuqiranannai qini duqu uqeerainanoo areenaannoo. 24Qinee anoona ufa inni qimannimidaqa. Nandi asumu naríara kaqi maridanoo aaduma maridanoo. (Yisufa narí kuqiranara qidanoo nandi asumu kikiqa usinau.) Mifa maqaki ummaqusaifanoo putaa inanoo moomoo kambiqaannoo sia nariraa mariannoo. 25Yafasiqa anaasee fee maaqoo narí mariranara rimarifa nandi asumuara foora sia kafaa kambiqaannoo mifa narí marirana kukupaannoo. Yafasiqa anaasee fee maaqoo maa maqanasaa narí mariranara akooqainafa maqaki ummaqusainanoo narí marirana afeediiseenoo naaru marirana maraannoo. 26Innee Kirisa maqannaasa qimannimia. Yafasiqa anaasee fee qini ainainira faiqikiraree qimaseenoo aufadeemarifa mifa narí maaqoo marirana quqasee qini faqa finafa qinee fuannannai mifa faqa miqoo oonu marida qini dadaaqiannoo. Yafasiqa anaasee fee qini duqu uqeeraannoo mina auqu faqa qini qikoofa uqeeraannoo.

Yisufa narí kuquaninna ufana qimannimu ufafa.

27Yisufa Yeerusareenni oorufidanoo narí aaqa marusa qimanniminau. Maqee qini daundura fifau faafau inoo marifaqa nana ufee qianauree. Qinee naqimasee qeeqa qikoonara qiana qini kuqiranara qaoo qiannoo fee. Qinee firaa aupurarana marasee maa marunandee fuka kuquanauree qimasee qumuafanausa maridaqa doo qusasaa maridaqa naqimasee qaoo qiraree sia qaoo qianaura. 28Miqi qimasee narí aaqa marusa qimannimiseenoo Yisufa quandafinoo narí akoonara Anutunara innaaru qinoo qinau. Oo qipoo, aneenna auqu amooqirana uqeeraa. Miqi qimasoofanoo Anutuna ufa inaarunaindari quminoo qinau. Doo qinee qeeqa duqu amooqirana uqeereeqa doo kafaa uqeeraanauree qinau.

29Miqi qimasoofaqa faiqí anaasee moomoo Yisuna faqa Yeerusareenni ooru fimarusa mi ufana iriseeqa qiqau. Innaarunai qiifoo qufaqa akaqausa qiqau. Qangiroo moo fannoo mina faqa ufa qidanoommi.

30Yisufa misa ufa iriseenoo qimanniminoo qinau. Sia qiniarau qidaqinoo inniara qidaqinoo. 31Doo maqee Anutufa maa maqa maaqanakinaasa qini darifandinnanara narí aanooqira ufa nimiannoo. Doo maqee maa maqa maaqanaki uriqararafa Sadannafa taikaannoo. 32Qini daruseeqa auniriranasaa quqaseeqa maqaki rakiqasee uqeeraqisaifaqa maqasaa aiqamatinaindaraasa suqu moodaaqoo qeeqa daaqa quqaanaura. 33Miqimasee Yisufa narí kuquaninna oosana qimanniminau.

34Qimannimufaqa misa qiqau. Maasa sanda akarakinaa ufa asauku mundiranara naaru naaru mariannoo fee qidaqa. Anee faiqí nimaaku aunirira saqarisaa kuqiraree qimariannana, naqi fee qidanee miqi qidanee. Faiqí nimaakuara anee qianafa yafee mifa maridanoo fee.

35Miqi qimasoofanoo Yisufa mina iriseenoo qinau. Kaaqa qarafa inniki qusasaa mariannoo. Kaaqa qarafa mariqoo mi kaaqa qaranasaa kai mariaqa. Miqimmasee marifanoo asukuna fannoo sia rafaaqafuannoo. Asukunaki nimarifa sia aana qafaidanoo kaqimbidanoo. 36Kaaqa qarafa mariqoo innee minara riqa anoonee qimasee mi mau fuaqa miqiqa innee kaaqa qaranafaqaasa mariaqa.

Yuda maqannaa faiqí firaasa Yisunara sia Anutuna faiqi fee qu ufafa.

Miqi qinoo qimannimiseenoo naríara moosaa finau. Miqoo oonu kukeeqanau. 37Yisufa oosana oosana firaa ainaina faiqí anaasee nifusaa auqeemarinau. Sia misa minara oonumafi iriqau. 38Ooqai Anutuna tamummaqara fasiqa moo auqu Eesaia mifa misa oosanara akara rumaqoofa maridanoo. Mifa maaqi qimasee akara rinau.

Oo karaambaiqa, yafee moo fannoo maasa ufa irinoofeeinau sia moo fannoo. Karaambaiqa narí afeeka yau yausee uqannifiqoofaqee anoonee qidee. Sia moo fannoo kuqaa fee qinau.

39Miqi qimasee ooqai akara rumaqoofa marufaqa umimmaqidaqa sia Yisunara anoonee qiqau. Eesaiaafa misara kaifaa maaqi qimasee akara rumaqoofa maridanoo.

40Anutufa misa nifu dimbaqaifaqa maridaqa. Mifa misa nitikura ititaquqaifaqa mariaqeera. Misa nifu sia qafaaqeera misa naaqoo sia iriaqeera. Qinee unnannai faqa sia quandafifaqa sia amiqimannisaaqeera.

41Eesaiaafa sia fifaufau maa ufana qimasee akara rumaqoofau maridanoofau. Mifa ooqaindari Yisufa sia kambiqooqoo afu pisipasamafinoo Yisuna afeeka eeraarirana qafaidanoo akara rimarufa maridanoo.

42Kuqaa moomoosa Anutuna tamummaqarausa ufamau fidaqa Yisunara sia iriqau. Miqidaqa Yuda maqannaa uriqararausa akaqausa moomoosa Anutuna tamumaqarausa ufamau fidaqa Yisunara sia iriqau. Miqidaqa Yuda maqannaa uriqararausa akaqausa kukeeqasee Yisunara iri mariqau. Farisai amaana ufa qimarusa amaana maqakiqari maasa diqiqamasaifaqa sia kaifaa keeqaanauroo qimasaida qumeeree mariqau. 43Misa sia Anutuna afusaa eedoo qiranara rimariqau. Faiqí nifusaa eedoo qiranara kai kaaqa rimarunara Yisunara kukeeqee mariqau.

Taikara aukuana Yisuna ufa fannoo faiqí anaasee rainanimaqara ufa qimariannoo.

44Yisufa kafaa moo kari faiqí anaasee qimanniminoo qinau. Yafasiqa anaasee qini saqarikidanoo fee. Mifa sia qini kai, qini diqiqamaqoona mina faqa saqarikidanoo. 45Yafasiqa anaasee fee qini qiqafaidanoo fee mifa qini diqiqamaqoona mina faqa qafaidanoo. 46Qinee kaaqa qarausa maa maqa maaqanaki animaridaqa. Qiniki mariasa sia asukunaki mariaqeera animaridaqa. 47Yafee moo fannoo qini ufa irisee sia auqainnana sia qinee qeeqa ufa amianaura. Sia qinee doori runira ufa nimiraree qimasee qumuafanausa maridaqa. Qinee faiqí anaasee Anutuna nifairiranakinaana qumarasee asumu marirana nimianeera qumuafanausa maridaqa. 48Yafee moo fannoo qini minnisainafa qinee ufa qimarunnana minnisainaqa sia qeeqa ufa mina amianaura. Kasoo taikara faasaana Anutufa qini dookinaa ufa maqee qimannimimarunnana maraseenoo minannoo naruannoo. 49Qinee sia qeeqa iriranannai ufa qimannimidaqa qini diqiqamaqoona qini qikoona uqaqifiqoo ainaina kai qimannimidaqa uqannifiqaidaqa. 50Qinee qeeqa qikoona ufa iridaqa mina ufa fannoo kai naaru naaru marirana nimidanoo. Qinee minara iridaqa qeeqa qikoona ufa kai qimannimidaqa.

Právě zvoleno:

Yoohanee 12: bjr

Zvýraznění

Sdílet

Kopírovat