1 Koorinti 10
10
Tumunnai auqira afaanna iriranara aaquqirafa.
1Oo Koorinti maqusanaasa qini qikaqaafasaauqa ooqai Mooseefa Isipa maqusaindari maasa Yuda maqannaasa qikeeku qikaaku nifiqee nári maaqai fiqau. Qinee minara qimannimianaura. Misa Isipa maqusaindari sandeemarufanoo namuqaa nári maaqi qimasee Anutufa qufanoo qoonnamu fannoo misa ninaaqiannai aiqamausa ititafufaqa amiqimasee aniree Taatuqee nammari taqamareeqa fiqau.
2Mi qoonnamunaki faqa mi nammarina Taatuqee nammari taqoonara amaana nammari kikiqusidanoo faqa Mooseefa mi nammarinaki misa aiqama ukuqnamaseenoo uqeeraseenoora foora masoofaqa aiqamausa Mooseenaindi kammambiqau. 3-4(Misa miqooqari kaasau maqa maaqaki fimarufanoo Anutufa aiqama kananaana kananaana narana maqasaa quqasoofaqa marasaidaqa neemariqau. Nammariara nidufanoo Anutufa Mooseenara qufanoo oonikiqari nammari qumufaqa naqau.) Qinee Pauroosa minara maaqi qidaqa. Misa aiqamausa innaarunaindaraana moodaa feemu naqau, aiqamausa innaarunaindaraa nammari moodaa naqau. Mi nammarifa innaarunaindaraa oonikiqariara foora qumimarufaqa naqau. Mi oonifa asauku mundirafa misa faqa kukeeqasee nimarufa marinau. 5Misa miqiqa fidaqa sia minara irirai moomoosa uqanna mandoosana marasoofanoo Anutufa qufaqa misa kuqufanoo misa iri fannoo mi aadana maqa maaqanaki furufaramminau.
6-7Mi aiqama ainainausa maasa aaquqimaqimaqarafa maridanoo, maasa faqa mina irisee sia misa naanna raanaura, sia manda nidi mari ainainnara randaanauranoo sia misa naanna reeqa tumunnai auqira afaannara faqa innaaru qianaura. Mooseena akara minara maaqi qimasee qidanoo.
Faiqí anaasee ooqumari fi narana neeneesee nammari moomoo neeneesee mandidi raanauree qimasee findi fiqa idi ree mariqau.
8Qinee Pauroosa miqunara qimannimianaura maasa sia misa naanna ramasee faiqí anaasee narí ummuara narí ummuarianaura. Misa miqimarunara moodaa faasaana (tuenti tiri tauseena) nukudara foora teeqiqau moomoosa uqanna raurukaqau. 9Maasa sia misa naanna reeqa karaambaiqa amanamandee qafaanauranoo. Misa akaqausa miqimarunara sakani fannoo narimarufaqa kuqimariqau. 10Innee sia misa naanna reeqa Anutunara ninunuruaqa. Misa miqi marunara kuqira qangiroo fannoo aniree moomoo narinau.
11Mi aiqama ainainausa akaqausa aaquqima nimaqaaqeera misasaa kambiqanau. Maasa maqee mariasa aaquqimaqimaqaaqeera Anutufa qumee dadaaqufaqa miqooqaraafa moo fannoo akararinau. Maasa taikara aukuana adeedi rainaqa marinara aaqaranara rufiaaqeera aaquqidaqa.
12Faiqí moo fannoo nariara qeeqa afeekaikiranannai kikiqiqa maridee qinafa rufiaa, anee Isaraee maqannaasa naanna ramasee aqufinafaara. 13Aiqama nimanirafa innisaa aqufinafa aiqama maqannaaki maqee maqee kambiqee mari ainainafa maridanoo. Anutufa minara iridanoo narí dadaaqira ufara kai iriannoo. Iridanoo firaa nimanirafa anireenoo inni urinaaqareenoo rafaaqafinafa anirainanoo Anutufa afeeka niminaqa innee amana mi nimariranaki mari inaqa mina uriaaqaree faranoo. Anutufa ititaseenoo fimariaana uqafiqainana fi ruiqakinana finnaranoo.
14Oo qifaaqasaa qini qiqoondiuqa tumunnai auqira afaannara innaaruqiranara nianasaa rufiaaqa. 15Innee Koorinti maqusanaasa ooqeenaasa irirana faqaasa mariafanoo. Inneeqa kai qini ufa irisee oonumafi rainasee iriaqa. 16Maasa aafaqa naidaqa kaafakinaa nammariara Anutunara dufi dufi qimasaidaqa mi kaafanakinaana naidaqa asauku mundirana fidika naida fee qimasaidaqa maasa kaqikaa feemu faqa ruqi ruqimasee naidaqa maasa asauku mundirana amaqi naida qimifaqa naidee qidaqa mi feemuna naidaqa. 17Moodaa feemu kai marina maasa moomoosa ruqi ruqimasee neemarianara moodaara foora maridaqa.
18Qeeburu maqannaasa moo nuqu Isaraee maqannaasa nariqa aandau tatufira oosanara iriaqa. Faiqí anaasee moo fannoo aandau maramaree Anutuna aanaiqiki maru fasiqana amisoofanoo aandau tatufinoo nariara akaqana marasee neemarufanoo aandau akoofa narí aiku asauku faqa muduka nanau. Misa qiqau, maasa Anutuna tatufira qaindasaa qaraana naida qimifaqa naidaqa mina faqa moodaanaki maridee qimariqau.
19Doo qini ufa oosana naqi fee inoo maridanoo fee doo maqee mi ufana koorooianaura. Inni maqusanaasa narana maraseeqa tumunnai auqira afaanna amidee qimasee tatufimariafanoo. Mi tumunannai auqimaria afaannana amana sia anoonau kaqi fifau tumu kai maridanoo. Mi narana tatufirafa faqa sia anoonau, kaqi narana kai maridanoo. 20Sia Yisunara irimaria fasiqauqa mi fifau naranna marasee sia Anutunau amisee dufi dufi qidau, afaannauqa nimisee dufi dufi qidaqa miqidaqa. Innee Yisuna ufa irimariasa afaanna naida nimimaria naranara innee sia mina naaqeera qidaqa qikooqaidanoo.
21Innee karaambaiqa aafaqa naidaqa Yisuna kaafakinaana nammari namasee sia amana quandakina afaanauqa kaafakinaa nammari neefaranoo, innee Yisuna aafaqa naidaqa karaambaiqa qaindasaaqaraa feemu namasee sia quandaki afaannauqa qaindasaaqaraa feemu neefaranoo. 22Innee Yisuna aafaqa namasee quandaki afaanauqa aafaqa namasaifanoo karaambaiqa Yisuna qafamaseenoo rairaiqiannoo. Innee Yisufa inniara rairaiqianifee qimasaida fata fata idee miqidee, innee maasara karaambaiqa uraaqaraidee qida fee miqidee, sia amana karaambaiqa uriqareefaranoo firaa nariranaki aqufifoora.
23Akaqausa minara maaqi qidaqa. Maasa amana aiqama oosana amiqirana faqa mandaikirana faqa minauqa maraanauree qiafaqa qinee Pauroosa minara maaqi qidaqa. Kuqaa aiqama nana ainaina amana maraanaura, sia aiqama ainaina amiqirafa maridanoo. Akaqausa maaqi qidaqa aiqama oosana amana maasa maraanauree qiafaqa qinee minara aiqama oosana sia faiqí anaasee dadaaqimaria oosanafa marifanoo fee qidaqa akaqana kuridirafa maridanoo. 24Sia moo fannoo narí aidi mari ainainna narí iriranaki uriqaranoo mariani aqoonausa nidimari ainaina kai narí iriranaki uriqaranoo mariani.
25Innee Koorinti maqusanaasa aandau maree makeetai fimariana akaqaandau arusee aukusee tumunnai auqira afaannara dufi dufi qimasee makeetaki quqasaafaqa feefauridaqa. Akaqaandau kaqi arusee auku quqasaafa feefauridaqa. Innee Yisuna ufa irimariasa makeetaki keeqafi inneeqa aandau marararee qimasee oonuree sia tumunnai auqira afaannara dufi dufi qinnanara iramasee eerairiaqa kaqi mana mana maraaqa. Aninna karaambaiqa saqarikiananoo aninna aakirafa marina sia minara irisee eerairiaqa, kaqi maraaqa. 26Ooqeenaa tamummaqara fasiqauqa akara minara maaqi qinoo maridanoo.
Maa maqa maaqafa faqa minaki aiqama ainaina marifa faqa karaambaiqaindi kai maridanoo.
27Qinee Pauroosa minara aiqama ainaina kaqi naaqee qidaqa. Inni Koorinti maqusanaasaki Yisunara sia irimariasa moomoo maridaqa. Misakiqari moo fannoo aniara mai aniree qini faqa narana naannee qinana aidinana kaqi mina faqa oonuree mina faqa narana naa. Anee mi naranna aandauna naaneera aneenna aakiranara kaqi kaaqoo oonumafi irinana sia eerairia kaqi naa. 28Anee mi naranna naanee qinanoo moo fasiqa fannoo qimaminoo tumunnai auqira afaanara dufi dufi qira narana maridanoo qinana anee ani qimami fasiqana aakiranara irisee sia naa. 29Sia aninna aakiranarau qidau ani qimami fasiqana aakiranara qidaqa. Innikiqari moo fannoo maa qunnufana irisee maaqi qiannoo, nanaree qinee moona aakiranara iriananoo fee mifa qini ititaqimaqaannoo fee. 30Doo qinee qeeqa naranara Anutunara dufi dufi qimaseeqa nanaree moo fannoo aniree qini narana aandaura qaoo qiannoo fee.
31Qinee Pauroosa minara maaqi qidaqa Innee narana nammari aiqama ainaina neemarianara sia fee naanauree, naanauree, nana ainaina innaree, Anutuna amooqira ufa kambiqee marimau kai fuaqa. 32Inni marirafa kaqi mana manifaqa nindafamaseeqa Yuda maqannaasee aanaamuru fee Yisuna ufa iri mariasee inni niqafamasee noori runifaara. Innee minara irisee mi oosannara eerairiaqa. 33Innee qini daanna raaqa sia qinee qeeqa didirana qeeqa qifaaqa amiqi amiqiranara iridaqa aiqamausara iriseeqa misa nidiranamau fidaqa, aiqamausa innaaruna asumu maraaqeera miqidaqa.
Právě zvoleno:
1 Koorinti 10: bjr
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017 Wycliffe Bible Translators, Inc. All rights reserved.