Iruka 7
7
Haga 7
Iesui Timoehãite Raꞌyn Surara Eropat Hat
Mateu 8.5-13 Piat Ewy
1Karãpe Iesui ihay kahu raꞌyn miitꞌin iꞌatu rakaria pe hawyi toto raꞌyn tawa Kawanaum kape. 2Miꞌi turan toineꞌen wẽtup ok surara akag Humanu miitꞌin mimotypotno. Toineꞌen toꞌyat pe wẽtup ok semiit imikyꞌe kahato maꞌato miꞌi ti iꞌahuu sese. Ikuꞌuro teran moityꞌi. 3Miꞌi hawyi karãpe surara akag tikuap taꞌyn Iesui minug wakuap etiat sehay pote toipoꞌoro Iuteu ywania akag koꞌi Iesui kape ẽtup hamo. -Atikyꞌesat tuut wyti aru uhewowi uhemiit iꞌahuu rakat moehãite hamo e. Waku miꞌi tã ehẽtup Iesui pe e. 4Miꞌi hawyi tuwat raꞌyn Iesui kape hawyi taꞌatupuẽti raꞌyn hawyi taꞌatuhenoi raꞌyn kat hamo tuwat Iesui kapiat hap hawyi mio tã iꞌatuꞌe -Pyno waku etipowyro mekewat surara akag katupono waku rakat. Miitꞌin mimotypot wo toineꞌen iꞌatuꞌe. 5Kat pote miꞌi ti aiꞌywania powyro kahato hat iꞌatuꞌe. Tutunug naꞌyn aiwat aiwoꞌomuꞌe hap yat koro iꞌatuꞌe. 6Miꞌi hawyi Iesui toto raꞌyn iꞌatuwywo maꞌato karãpe yt pya i raꞌyn toꞌyat kai hawyi surara akag Humanu tiꞌatupoꞌoro raꞌyn towyriaꞌin tehay enoi Iesui piat hamo. Mio tã e -Uikaꞌiwat yt eremoherep sese teiꞌo uhewowi katupono uhewaku hap wyti yt putꞌok e i uiꞌyat piat ereke hamo e. 7Maꞌato waku wẽtup ehay wo yn pykai etimowaku kuap kahato raꞌyn uhemiit hat e. 8Iꞌewyte uito ti areineꞌen miitꞌin poꞌoro kuap kahato hat. Kat pote uito surara akag sese areineꞌen. Miꞌi pote uhesuraraꞌin uiꞌe hap upi yn tukupteꞌen. Miꞌi pote areꞌe wẽtup ok pe ereto ro meiũpe pyi are pote toto hawyi areꞌe wẽtup ok pe eriot ro areꞌe pote meremo tuut. Iꞌewyte areꞌe etunug no uimikyꞌesat are uipotpap nug hat pe hawyi meremo tutunug. 9Mio tã e hawyi Iesui tuwanetup kahato raꞌyn hawyi tuwemorem miitꞌin sem kape hawyi toꞌe -Pyno areꞌe ehepe meiẽ toineꞌen yt Isareu ywania hin i pykai iwato kahato uimohey hepiat hap e. 10Hawyi surara akag wyriaꞌin teꞌeraꞌaipok iraꞌyn taꞌatuꞌyat kape. Miꞌi turan mekewat surara akag semiit ihãite iraꞌyn.
Iesui Timoieineꞌen Iraꞌyn Hiwu Mepyt Ihainia
11Miꞌi hawyi Iesui toineꞌen porapꞌi itotiat hawyi toto raꞌyn wẽtup tawa Naꞌĩ e hap kape temiitꞌin wywo. Iꞌewyte miitꞌin sem tuwat iwywo. 12Karãpe yt pya i raꞌyn tawa eꞌokenꞌypy tote putꞌok iꞌatuꞌe hamuat turan tõꞌẽ raꞌyn mekewat hiwu mepyt wẽtup ok takat syp hamo. Miꞌi turan tuwat typyꞌi kahato tawa piaria ity upi. 13Miꞌi hawyi Iesui tehaꞌat hawyi toimohaty kahato topyꞌa pe hawyi toikyꞌe kahato hawyi toꞌe -Yt erewak teiꞌo mana e 14Hawyi tokosap taꞌyn hewowi hawyi totemig naꞌyn heiam hereto turan hawyi teꞌeropyhuꞌat raꞌyn hereto haria hawyi Iesui toꞌe -Pyno epoĩꞌam no kurum e. 15Miꞌi hawyi kurum taꞌapyk iraꞌyn hawyi ihay iraꞌyn. Miꞌi hawyi Iesui tum iraꞌyn ity pe. 16Miꞌi pote torannia miitꞌin teꞌerokenꞌẽ kahato raꞌyn hawyi teꞌerehum kahato raꞌyn Tupana kape. Miꞌi hawyi mio tã iꞌatuꞌe -Taꞌi Tupana ehay moherep hat koro wyti tuwemoherep taꞌyn urupyꞌasetpe iꞌatuꞌe. Tupana ti tuut raꞌyn temiitꞌin ehakyeraꞌat hamo iꞌatuꞌe.
Mateu 11.2-19 Piat Ewy
17Miꞌi tã hap Iesui minug koꞌi wyti tuwesytpok taꞌyn torannia ywania puo raꞌyn iꞌewyte torannia mekewat yi Iuteu eꞌyi totiat tawa koꞌi puo.
18Iꞌewyte Iuwãu woꞌosetꞌok hat potmuꞌeria henoi henoi kahato raꞌyn miꞌi hap koꞌi etiat hawyi Iuwãu tiꞌatukay kay raꞌyn typy ok iꞌatupyꞌaset pyi. 19Miꞌiria ti toiꞌatupoꞌoro raꞌyn tokaꞌiwat Iesui piat apo iꞌatuꞌe hamo. -Urukaꞌiwat apo En tuut hamuat wyti e hap taꞌyn apo En iꞌatuꞌe sio poꞌog wẽtup ok te uruhekatup iꞌatuꞌe hamo. 20Hawyi tuwat raꞌyn aiũpe Iesui ieineꞌen hap kape. Putꞌok iꞌatuꞌe hawyi teꞌeroꞌe -Urumuꞌe hat Iuwãu woꞌosetꞌok hat wyti urupoꞌoro ewowi apo uruꞌe epiat hamo iꞌatuꞌe. Mio tã e wyti urumuꞌe Iuwãu -Urukaꞌiwat apo En tuut wyti aru urukaꞌiwat e hap taꞌyn apo En sio poꞌog wẽtup ok te uruhekatup hap kuap hamo iꞌatuꞌe. 21Miꞌi turan Iesui tiꞌatumoehãite kahato miitꞌin iꞌahuu rakaria hoꞌopot haria iꞌewyte maꞌãu saꞌag ipiit piat rakaria iꞌewyte yt ihapytig i rakaria. 22Miꞌi hawyi Iesui tiꞌatuwesat raꞌyn Iuwãu potmuꞌeria -Eweiꞌaipok i ro hawyi ewehenoi ro Iuwãu me aikotã eiꞌakasa hap koꞌi iꞌewyte eimikuap koꞌi katupono mio yt ihapytig i rakaria iꞌatuhapytig i raꞌyn iꞌewyte ipy kĩꞌã rakaria ikohewyry kuap taꞌyn iꞌewyte hepihi pihi rakaria epihi tokãꞌã raꞌyn iꞌewyte yt hewaure kaꞌa i rakaria ikuap taꞌyn sehay iꞌewyte ikuꞌuro rakaria tuwenoꞌẽ raꞌyn guꞌuro pyi iꞌewyte putꞌok e raꞌyn ihakyꞌeꞌi rakaria ete Tupana topyhuꞌat morekuatno hap ete. Pyno ewehenoi ro ihay se rakat Tupana ehay ihakyꞌeꞌi rakaria pe. 23Uwe iwepiit kahato yt uimohey pykai i miꞌi hat wyti wemoeso hat neꞌi toineꞌen
Iesui Henoi Iuwãu Ieineꞌen Hap Etiat
Mateu 11.7-15 Piat Ewy
24Miꞌi hawyi karãpe Iuwãu potmuꞌeria teꞌeraꞌaipok iraꞌyn hawyi iꞌatusaipe kai Iesui henoi raꞌyn miitꞌin me Iuwãu etiat. Pyno karãpe eweiwat yahig wato kapiat turan wyti aru eweipuẽti raꞌyn Iuwãu. Itote ti aru eweiꞌakasa raꞌyn aikotã Iuwãu toineꞌen hap sio ywutu potiat Pinawa yhop ewy kowoꞌi kowoꞌi hap ewy sio yt hap e. 25Kat kapiat eiꞌakasa hamo eweiwat sio mekewat miit esokpe iwepainug hap kapiat eiꞌakasa hamo sio mekewat hekat rakaria morekuaria yat piaria wepainug hap ikahuria kahato rakat ewywuat kapiat eiꞌakasa hamo. 26Pyno ewehenoi ro kat kapiat eweiꞌakasa hamo eiwewat hap sio Tupana ehay moherep hat wẽtup ok kapiat eiꞌakasa hamo yn. Taꞌi atikuap wyti eweiꞌakasa Tupana ehay moherep hat kai poꞌog nakat. 27Kat pote Iuwãu wyti saꞌawyꞌi wuat miwan Tupana ehay piat toꞌe hap ewywuat raꞌyn. Miꞌi raꞌyn ti meiũ uhehay moherep hat e hap ewy raꞌyn. Katupono saꞌawyꞌi Tupana toꞌe -Atipoꞌoro aru yian me ehewowi ipuꞌap moherep hãpyk hamuat e hap ewy raꞌyn e. E Isaia miwan me 40.3 pe. 28Miꞌi hawyi Iesui henoi poꞌog -Pyno areꞌe ehepe Iuwãu wyti poꞌog torannia saꞌawyꞌi wuaria wemoherep haria kawiat maꞌato poꞌog kurin nakat wyti toineꞌen aikope Tupana toineꞌen morekuatno hap tote iwatoꞌin nakaria kai. 29Mio tã e hap torannia mekewat saꞌup poreraꞌat haria ikuap. Miꞌiria ti imohey ihay Tupana kaipywiat hat. Miꞌi hawyi teꞌeresetꞌok taꞌyn Iuwãu po wo. 30Maꞌato woꞌonapin haria iꞌewyte wanꞌi wanꞌi e haria yt teꞌeresetꞌok teran hin i Iuwãu po wo katupono yt taꞌatumohey hin i Tupana ehay taꞌatuewowiat haype. 31Miꞌi tupono ahenoi koran wuaria miitꞌin etiat. Uwe ewywuat tukupteꞌen miꞌiria.
32Pyno miꞌiria wyti aikotã hirokaria apyk puo tukupteꞌen oken note rakaria iꞌatuehay pirik iraniaꞌin kape rakaria ewy aikotã pypy watoꞌe woꞌokyiꞌat eꞌat piat turan maꞌato yt hehairu teran hin i haria ewy. Iꞌewyte watepy pypy e hap wywo woꞌosyp turan maꞌato miꞌi turan yt teꞌerewak hin i hap ewywuaria e. 33Miꞌi turan Iuwãu woꞌosetꞌok hat tuwemosyꞌat kahato hawyi yt kat i hin i tutuꞌu. Iꞌewyte yt teꞌyꞌu hin i sapo hy wo. Miꞌi pote wyti eweiꞌe tope -Iuwãu wyti ahiag ipiit piat rakat eweiꞌe neꞌi. 34Taꞌi ihainia saꞌyru wyti tenuk iꞌewyte tuwesapoꞌu eweiꞌe neꞌi. -Eiwehaꞌat ro mekewat miit ienuk wato hat kape iꞌewyte sapo hy u wato kahato hat kape eweiꞌe. Iꞌewyte towyꞌinug mekewaria miitꞌin kaipywiat saꞌup poreraꞌat haria iꞌewyte iraniaꞌin yt nakuap i nug haria wywo toineꞌen eweiꞌe. 35Miꞌi tupono uwe ikyꞌesat Tupana kaipywiat weꞌeg hap miꞌi hat wyti imohey sese hat toineꞌen hawyi imepytꞌin wo kahato tukupteꞌen.
Haryporia Yt Naku I Rakat Hakyeraꞌat Hap Toipuẽti
36Miꞌi turan wẽtup ok woꞌonapin hat tiwenka raꞌyn Iesui toꞌyat kape tenuk iwywuat hamo hawyi Iesui toto raꞌyn iꞌyat kape hawyi taꞌapyk taꞌyn tenuk hamo yparakai ywyt pe. 37Miꞌi turan mekewat tawa pe toineꞌen haryporia miitꞌin mikuap yt naku i kahato rakat. Miꞌi ti ikuap Iesui toineꞌen woꞌonapin hat yat pe tenuk hamo hap. Miꞌi hawyi totat raꞌyn mohag hy ikamhigse kahato rakat Arapatu kawiat heiam rakat. 38Miꞌi hawyi haryporia tokosap yt pya hin i Iesui ape kai hawyi tuwak kahato hawyi toimoꞌapuk Iesui pyꞌokpe koꞌi teha hy wo hawyi toitip taꞌasap wo hawyi tohig Iesui pyꞌokpe hawyi toiꞌokpun naꞌyn mohag hy ikamhigse kahato rakat Iesui pyꞌokpe ete. 39Miꞌi hap kape woꞌonapin hat tehaꞌat hawyi mio tã e tuwanetup hawe -Sio meiẽ miit Tupana ehay moherep hat pote ren toikuap uwe meiẽ haryporia hap. Katupono uwe hemig meiẽwat miit miꞌi hat wyti iꞌaparap kahato hatno toineꞌen e tuwanetup hawe. 40Miꞌi hawyi Iesui tikuap woꞌonapin hat wanetup hap hawyi toꞌe woꞌonapin hat pe -Pyno toineꞌen wyti wẽtup uiꞌe epiat hap e Mio tã e pote -Ehenoi ro uimuꞌe hat e Simau. 41Miꞌi hawyi Iesui toꞌe Simau me -Toineꞌen typy ok miit weteweru taꞌatumipuru tineiru upiat haria. Maꞌato wẽtup ok wyti ipuru iꞌatuepiat hat toineꞌen. Wẽtup ok wyti tuwetuweru 500 a parata kapiat. Maꞌato wẽtup ok wyti 50 a parata kapiat yn. 42Maꞌato ti yt wẽtup ok i meimuẽwat typy ok takaria haꞌup nug kuap taꞌatumipuru tineiru koꞌi. Miꞌi pote mekewat tineiru kaꞌiwat tiwaure raꞌyn typy ok weteweru tepiat hap koꞌi hawyi uweĩ tineiru puru hat poꞌog ikyꞌe hatno toineꞌen apo are. 43Miꞌi hawyi Simau tiwesat -Taꞌi mekewat poꞌog weteweru wato hat. Mio tã e pote Iesui toꞌe -Taꞌi uiwesat hãpyk kahato e Iesui Simau me. 44Miꞌi hawyi Iesui tuwemorem naꞌyn haryporia kape hawyi toꞌe Simau me -Erahaꞌat ro meiũwat haryporia minug uhetiat kape. Karãpe areke eꞌyat pe turan yt etum i uhepe yꞌy uipysei epiat hamo. Maꞌato meiũwat haryporia wyti uipysei teha hy wo hawyi uipy toitip taꞌasap wo. 45Maꞌato en wyti yt karãpe uiꞌãpysig hin i putꞌok are eꞌyat piat turan. Maꞌato meiũwat haryporia wyti hig motꞌi kahato uipy areke meiũpe turan e. 46Pyno iꞌewyte en yt etopag hin i ikap uiꞌakag ete aheko ewy maꞌato meiũwat haryporia wyti tiꞌokpun mohag hy ikamhigse rakat uipyꞌokpe ete. 47Pyno atimoherep epe mekewat haryporia timoherep wyti iwato kahato woꞌokyꞌe hat. Maꞌato uwe imohãpyk kurin kat yn iꞌaparap hap miꞌi hat wyti imoherep kurin yn woꞌokyꞌe hap. 48Miꞌi hawyi Iesui toꞌe haryporia pe -Pyno eminug saꞌag koꞌi atiwuare yne raꞌyn. 49Mio tã e hawyi mekewat yparakai ywyt piat apyk haria apo iꞌatuꞌe raꞌyn toꞌope -Uweĩ pyno meiẽ aiminug saꞌag moweityk kuap hat apo iꞌatuꞌe toꞌope. 50Maꞌato Iesui toꞌe haryporia pe -Uimohey epiat hap ehakyeraꞌat raꞌyn. Pyno waku ereto ro ewepiit hap wywo e.
Právě zvoleno:
Iruka 7: mav
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Wycliffe Bible Translators, Inc. All rights reserved.
