Luke 7
7
1ယ့ၣ်ရှူးစံးကတိၤတၢ်တလိၣ်အံၤခဲလုၤလိဘၠီၣ်ထီဖူၣ်ထီခၠၢဝံၤဝဲနဲၢ်, အဝဲဒၣ်လဲၤလိ ဝ့ၢ်ကပ့းရနီၢ်လိ. 2ဘၠီၣ်ရိမ့ၤသုၣ်ဖွိတကယၤအခွိၣ်လိ ဝ့ၢ်အဝဲနံၤအပူၤတဂၤအိၣ်လါတၢ်ခ့တၢ်ပှၤလိ အအဲၣ်ဝဲဒွိၣ်မးတဂၤလိ. တၢ်ခ့တၢ်ပှၤ ပွိၤခွါတဂၤနဲၢ်, သါတမါနီတုၤနီၢ်လိဘူးကသ့းဘၣ်အသးလိ. 3သူးခွိၣ်နၢ်ဟူဘၣ်ဃးယ့ၣ်ရှူးအဂ့ၢ်နဲၢ်, အဝဲဒၣ်မၢလီၤဘၠီၣ်ယူဒၤအသးပှၢ်တနီၤလိ အအိၣ်ဒ်သိး အကမၢအဝဲဒၣ်ဟဲဘျီးမၤဟါမၢ်အခ့အပှၤတဂၤနဲၢ်အဂီၢ်လိ. 4အဝဲဒၣ်ဟဲလိယ့ၣ်ရှူးအအိၣ်, ဘျီးဃ့ကညးအီၤသပှၢ်ပှၢ်ဘျီး စံး, ‘သူးခွိၣ်တဂၤအံၤ ကြၢးနီၢ်ဝဲလိ နတၢ်မၤစၢၤလိ. 5အဝဲဒၣ်အဲၣ်အပှၤကလုာ်ဘျီးအဝဲအနီၢ်ကစၢ်ဒၣ်ဝဲ သူၣ်ထီၣ်ဘူၣ်ဘျီၣ်လိ အမဲၢ်တၢ်ဘါလီၢ်တဖျၢၣ်လိ ပဂီၢ်လိ. 6လိတၢ်နံၤအဃိ, ယ့ၣ်ရှူးလဲၤလါ အဝဲဝီၤလိ. ဖဲအဝဲဒၣ်ဘူးထီၣ်လါဟံၣ်အဝဲနံၤနဲၢ်, သူးခွိၣ်ဆှၢလီၤအမံဖီၣ်တလိၣ်လိအအိၣ် ဒ်သိးအကစံးဘၣ်အီၤ, ‘ကစၢ်ဧၢ, တဘၣ်မၤတံၤတၤနသးတဂ့ၤ, ယတကြၢးယဲလိ နကဟဲနုလိ ယဟံၣ်ပူၤအဂီၢ်ဘၣ်. 7ယတဆိကမိၣ်နဲၢ်နဲၢ်ယသးလိ ယကြၢးယဲဘၣ်ယဲလိ ယကဟဲလိနအိၣ်လိ. ယနီၢ်ကစၢ်ဒၣ်ယဲဘၣ်. ထဲမၢလီၤနကလုၢ်ဘျီးယခ့ယပှၤကသါမါထီၣ်ဂ့ၤဝဲဒၣ်လိ. 8ယဲဒၣ်နဲၢ်နဲၢ် ယမဲၢ်ဘၠီၣ်တဂၤလိ အဘၣ်တၢ်ပၤလီၤယၤလိ သူးခွိၣ်အလီၢ်အလၤဒွိၣ်နဲၢ်ယၤတလိၣ်အဖီလၤ, ဘျီးယအိၣ်လါသုၣ်ဖွိလိယဖီလၤတလိၣ်လိ. ယစံးဘၣ်အဝဲတဂၤနဲၢ်, ‘လဲၤတကဲၢ်’ ဘျီး အဝဲဒၣ်လဲၤဝဲလိ. ဘျီး အဂၤတဂၤနဲၢ်, ‘ဟဲတကဲၢ်.’ ဘျီး အဝဲဒၣ်ဟဲဝဲလိ. ဘျီး ယစံးဘၣ် ယကုၢ်ယပှၤ, ‘မၤတၢ်အဝဲအံၤတကဲၢ်’ဘျီး အဝဲဒၣ်မၤဝဲလိ. 9ယ့ၣ်ရှူးကမၢကမၣ်ဝဲဖဲ အနၢ်ဟူဘၣ်တၢ်ကတိၤအဝဲအံၤလိ. အဝဲဒၣ်ဃၣ်တရံးအသးဘျီး စံးဘၣ်ဘၠီၣ်ထီဖူၣ်ထီခၠၢလိ အပိၤအခံတလိၣ်, ‘တၢ်နၤဒ်အံၤ အသိးနဲၢ် ယတထ့ၣ်နိၤဝဲ နီတဘျီဘၣ်. ယစံးဘၣ်သု, လိ ဘၠီၣ်အံၣ်စရ့လးဖွိအကျၣ်ဒၣ်လဲာ်, ယတထ့ၣ်ဘၣ်.’ 10ဘၠီၣ်ဆှၢတၢ်ကစီၣ်တလိၣ်က့ၤဂ့ၤဝဲလိ သူးခွိၣ်အဟံၣ်, ဘျီး ထ့ၣ်ဘၣ်ဝဲလိ အဝဲဒၣ်အခ့ အပှၤအသါမါထီၣ်ဂ့ၤလ့နဲၢ်လိ. 11တၢ်နံၤဝံၤအလီၢ်ခံ တကဲၢ်ဖိနဲၢ်, ယ့ၣ်ရှူးလဲၤဝဲလိ ဝ့ၢ်တဖျၢၣ်လိ အဘၣ်တၢ်ကိးအမံၤလိ နၤအံၣ် ဘျီး အခ့အပှၤတလိၣ် ဘျီး ဘၠီၣ်ထီဖူၣ်ထီခၠၢ လဲၤပကိးအီၤလိ. 12အဝဲဒၣ် လဲၤတုၤလိ ဝ့ၢ်အကျဲၣ်ခၢၣ်သးနဲၢ် ဘၠီၣ်တဖူၣ်လိ အလဲၤခူၣ်လီၤဘၠီၣ်သံ ဟဲဟးထီၣ်ဝဲဒၣ်လိ. ဘၠီၣ်လိ အသံတဂၤနဲၢ် မဲၢ်ဝဲ ဘၠီၣ်မ့ၣ်ပှၢ်လိ အမဲၢ်မုၣ်ကမဲတဂၤ အဖွိခွါ အိၣ်ဝဲတဂၤဧိၤနဲၢ်လိ. ဘျီး ဘၠီၣ်ထီဖူၣ်ထီခၠၢ လိဝ့ၢ်အဝဲနံၤအပူၤ အိၣ်ဝဲလါ မုၣ်ကမဲတဂၤနဲၢ်လိ. 13ကစၢ်ထ့ၣ်ဘၠီၣ်မ့ၣ်ပှၢ်အဝဲနဲၢ် အဝဲဒၣ်အသးပူၤ ပှၤလါတၢ်သးဘၣ်ဃဲၤဘၣ်အီၤ, ဘျီးစံးဘၣ် ဘၠီၣ်မ့ၣ်ပှၢ်နဲၢ်, ‘တဘၣ်ဟီၣ်တဂ့ၤ.’ 14တုၤနုၤတဘျီ အဝဲဒၣ် လဲၤဂီၤဘျီး ထိးဘၣ်အီၤဘျီး ဘၠီၣ်လိ အစိၤတၢ်တလိၣ် အိၣ်ကတီၢ်ဝဲလိ.
ယ့ၣ်ရှူးစံးဝဲ, ‘ပွိၤခွါသးစၢ်ဧိ, ယစံးဘၣ်နၤ ဂ့ၤထ့တကဲၢ်.’ 15ဘၠီၣ်သံတဂၤနဲၢ် ဆ့နီၤဝဲဘျီးကတိၤထီၣ်တၢ်, ဘျီးယ့ၣ်ရှူးဟ့လီၤဂ့ၤအီၤလိ အမွိၢ်အစုၣ်ပူၤနဲၢ်လိ. 16ဘၠီၣ်ကိးဂၤဒ့းပှဲၤလါ တၢ်ပျံၤတၢ်ဖုးဘျီး စံးထီၣ်ပတြၢၤကစၢ်ယွၤဘျီး စံးဝဲ, ‘ဝံဖးဒွိၣ်တဂၤ ဟဲဖျိထီၣ်လိ ပကဆူးပကတ့ၤပူၤလ့. ဘျီးကစၢ်ယွၤဟဲဝဲဒ်သိး အကအုၣ်က့ၤခီၣ်က့ၤ ဘၠီၣ်ထီဖူၣ်ထီခၠၢလ့.’ 17တၢ်ကစီၣ်ဘၣ်ဃးလါ ယ့ၣ်ရှူးတမံၤအံၤ ဟူထီၣ်သါလီၤထီပၤ ကီၤယူဒၤထီဘ့ၣ်ဘျီး လိတၢ်လီၢ်အိၣ်ဝဲ အကပိၤကပၤဝးတရံးနဲၢ်လိ. 18ဘၠီၣ်ဘျၢတၢ်စီၤယိၤဟၣ် အခ့အပှၤတလိၣ်စံးဘၣ်ဝဲ, ဘၣ်ဃးလါ တၢ်ဂ့ၢ်တၢ်ကျိၤတလိၣ်အံၤခဲလုၤလိ. အဝဲဒၣ် ကိးဝီၤအဝဲဝီၤ အကျၣ်ခံဂၤလိအအိၣ်, 19ဘျီးခၠၢအီၤလိ ကစၢ်အအိၣ်ဒ်သိး အကသ့းကွၢ်အီၤ, ‘နမဲၢ်ဘၠီၣ်တဂၤလိ စီၤယိၤဟၣ်စံးလိ အကဟဲနဲၢ်ဧါ.မဲၢ်တမဲၢ်ဘၣ်ဘျီး မဲၢ်ပဘၣ်အိၣ်ခိးကွိၤသး ဘၠီၣ်တဂၤဒၣ်ဒ်ဧါ. 20အဝဲဝီၤဟဲလိ ယ့ၣ်ရှူးအအိၣ်နဲၢ်စံးဝဲ, ဘၠီၣ်ဘျၢတၢ်စီၤယိၤဟၣ် ခၠၢလီၤဘၠီၣ်ဒ်သိး အကသ့းကွၢ် နမဲၢ်ဘၠီၣ်တဂၤလိ အဝဲဒၣ်စံးလိ အကဟဲနဲၢ်ဧါ. မဲၢ်တမဲၢ်ဘၣ်ဘျီး မဲၢ်ပကဘၣ်အိၣ်ခိးကိၤသး ဘၠီၣ်အဂၤဒၣ်ဒံဧါ. 21ဖဲနံၤ အဆၢကတီၢ် ယ့ၣ်ရှူးမၤဟါမၢ်ဂ့ၤ ဘၠီၣ်အိၣ်ဘျၢသးလိအအိၣ်လါတၢ်ဆူးတၢ်ဆါတလိၣ်. ဘၠီၣ်လိ အတူၢ်ဘၣ်တၢ်နးတၢ်ဖှီၣ်တလိၣ်, ဘၠီၣ်လိ တၢ်နါအိၣ်လိ အလိၤတလိၣ်လါ ဒွိးထံၣ်ထီၣ်ဂ့ၤ ဘၠီၣ်အမံၤဘျိၣ်အါဂၤလိ. 22အဝဲဒၣ် စံးဆၢဂ့ၤစီၤယိၤဟၣ် အဘၠီၣ်ဆှၢတၢ်ကစီၣ်တလိၣ်, ‘က့ၤဘျီး စံးဘၣ်စီၤယိၤဟၣ် တၢ်လိသုထ့ၣ်ဘၣ်ဘျီး နၢ်ဟူဘၣ်ပၤစၢၤ သုဝဲနဲၢ်တကဲၢ်. ဘၠီၣ်မံၤဘျိၣ်တလိၣ်,ထံၣ်ထီၣ်က့ၤတၢ် ဘၠီၣ်ခီၣ်ဒ့ဟးဂီၤတလိၣ် ဟးထီၣ်ဂ့ၤဝဲသ့း ဘၠီၣ်လိၤတဂ့ၤတလိၣ် ဘၣ်တၢ် မၤကခၠီၣ်ထီၣ်ဂ့ၤအီၤ, ဘၠီၣ်နၢ်တအၢၣ်တလိၣ် နၢ်ဟူထီၣ်ဂ့ၤတၢ်, ဘၠီၣ်သံတလိၣ် ဘၣ်တၢ် ဒုးဂ့ၤထ့ ဂ့ၤအီၤ ဘျီး တၢ်သးခုကစီၣ် ဘၣ်တၢ်ဟီတရါလီၤနဲၢ် ဘၠီၣ်ဖှီၣ်ဖွိယၤဖွိတလိၣ်လိ. 23ဘၠီၣ်လိအသးတကဒံကဒါလိ ယဂ့ၢ်တလိၣ်နဲၢ်, ဘၣ်ဆိၣ်ဂ့ၤဝဲထဲလဲၣ်ခိလဲၣ်. ’ 24စီၤယိၤဟၣ် အဘၠီၣ်စိၤတၢ်သးခုကစီၣ်တလိၣ် ဟးထီၣ်ဝံၤ အလီၢ်ခံနဲၢ် ယ့ၣ်ရှူးကတိၤတၢ်လါ ဘၠီၣ်ထီဖူၣ်ထီခၠၢ ဘၣ်ဃး စီၤယိၤဟၣ်အဂ့ၢ်ဘျီး စံးဝဲ, ‘သုဟးထီၣ်လိ ပှၢ်လၤကျၣ် လိ စီၤယိၤဟၣ်အအိၣ်နဲၢ် သုအိၣ်ခိးကိၤသးလိ သုကထ့ၣ်ဘၣ်တၢ်မနီၢ်လဲၢ်. တပိၤတဘိၣ် ဟူဝဲလိ ကလံၤကျၣ်နဲၢ်ဧါ. 25သူဟးထီၣ်လိ သုကထ့ၣ်ဘၣ်တၢ်မနီၢ်တမံၤအဂီၢ်လဲၣ်. ပှၤကညီလိ အကူးသွိး တၢ်ကတြ့ၣ်ကတြိၣ်တဂၤဧါ. သပှၢ်ကတၢၢ် ဘၠီၣ်လိ အကူအသိးဒ့းန့ၤအသိးဘျီး အိၣ်မူလိတၢ်မူၤတၢ်လၤအပူၤတလိၣ်နဲၢ် ဘၣ်တၢ်ထ့ၣ်အီၤလိ နူၢ်ပူၤစီၤပူၤလိ. 26စံးဘၣ်ယၤတကဲၢ်. သုဟးထီၣ်လိ သုကထ့ၣ်မနီၢ်တမံၤအဂီၢ်န့ၢ်လဲၣ်. ဝံတဂၤဧါ. မဲၢ်လိ. ယစံးဘၣ်သု လိသုထ့ၣ်ဘၣ်ဘၠီၣ်လိ အဒွိၣ်နဲၢ် ဝံတဂၤ တကဲၢ်လိ. 27စီၤယိၤဟၣ်မဲၢ် ဘၠီၣ်တဂၤလိ တၢ်ကွ့းအသး ဒ့းအ့ၤ, ကစၢ်ယွၤစံးဝဲ အဝဲအံၤမဲၢ် ယဘၠီၣ်ဆှၢတၢ်ကစီၣ်လိ ယဆှၢလီၤအီၤလိ နမံၤညါ ဒ်သိး အကအိးဟိထီၣ်ပၤစၢၤကျဲၣ်လိနဂီၢ်လိ.’ 28ယ့ၣ်ရှူးစံးသီတဘျီဝဲ, ‘ယစံးဘၣ်သု စီၤယိၤဟၣ်ဒွိၣ်နဲၢ်ဘၠီၣ်လိ အအိၣ်ဖျဲၣ်ထီၣ်ပၤစၢၤဝဲ တဂၤလၢ်လၢ်လိ. လၢၤဘျီး, ဘၠီၣ်လိ အပံတံကတၢၢ် လိကစၢ်ယွၤ အဘီအမုၢ်အပူၤနဲၣ် ဒွိၣ်နဲၢ်အီၤတကဲၢ်လိ. 29ဘၠီၣ်ထီဖူၣ်ထီခၠၢခဲလုၤ, ဘျီးဘၠီၣ်ဃ့သွဲတလိၣ်နဲၢ် နၢ်ဟူဘၣ် အဝဲ အတၢ်စံးတၢ်ကတိၤလိ. အဝဲဝီၤ မဲၢ်ဘၠီၣ်တလိၣ်လိ အစူၤပၤစၢၤ ကစၢ်ယွၤ အတၢ်မါလွိၤ အတီအလိၤတလိၣ်ဘျီး ဘၣ်တၢ်ဘျၢပၤစၢၤအီၤလိ စီၤယိၤဟၣ်နဲၢ်လိ. 30မဲၢ်မဲၢ် ဘၠီၣ်ဖၤရံၤရှဲလါ သရၣ်သိၣ်လိသီလိ ဘၠီၣ် တၢ်သွိၣ်တၢ်သီတလိၣ် တကနၣ်ဟူၤ ကစၢ်ယွၤအတၢ်ရဲၣ်တၢ်ကျဲၤလိ အဝဲဝီၤ အနီၢ်ကစၢ်ဒၣ်ဝဲ အဂီၢ်ဘၣ်. ဘျီးတတူၢ်လိာ်စီၤယိၤဟၣ်အတၢ်ဘျၢအီၤလိ ထံဘၣ်လိ. 31ခဲနဲအံၤ ယကထိၣ်သတြီၤ ဘၠီၣ်ထီဖူၣ်ထီခၠၢလိ မုၢ်မဆါတနံၤအံၤ တလိၣ်လိ မနီၢ်တမံၤလဲၣ်. အဝဲဝီၤ လီၤဂၢ်လါ တၢ်မနီၢ်တမံၤလဲၣ် 32အဝဲဝီၤ လီၤဂၤလါ ဘၠီၣ်ဖွိသၣ်တလိၣ်လိ အဆ့နီၤလိ ဘၠီၣ်ဆါတၢ်လီၢ်အပူၤနဲၢ်လိ. အဝဲတဖူၣ် ကိးထီၣ်နီအကလုၢ်လိ အဂၤတဖူၣ်အအိၣ် အူတၢ်ဖျီအတၢ်သးဝံၣ်လိသုဂီၢ်, လၢၤဘျီး သုတကါကလံၣ်ဘီၣ်တိၤ. ပသးဝံၣ်တၢ်သ့းအတၢ်သးဝံၣ်လၢၤဘျီး သုတဟီၣ်တယၢၤဘၣ်. 33ဘၠီၣ်ဘျၢတၢ်စီၤယိၤဟၣ်ဟဲဝဲ ဘျီး အဝဲဒၣ် ဒုၣ်တၢ်အီၣ်ဘျီး တအိ စပံးထံဘၣ်. ဘျီးသုစံးသုဝဲ တၢ်နါအိၣ်လိ အဝဲအပူၤလိ. 34ပှၤကညီဖွိခွါဟဲဝဲ အီၣ်တၢ်ဘျီး အီတၢ်လါ သုစံး, ကွၢ်ဘၠီၣ်တဂၤအံၤတကဲၢ်. အဝဲမဲၢ် ဘၠီၣ်အီၣ်လုၢ်ကိတၢလါ ဘၠီၣ်အိစပံးထံ, ဘၠီၣ်ဃ့သွဲလါ ဘၠီၣ်တၢ်ဒဲးဘးဖွိတလိၣ် အမံဖီၣ်လိ. 35လၢၤဘျီး ကစၢ်ယွၤ အတၢ်ကူၣ်ဘၣ်ကူၢ်သ့နဲၢ် ဘၣ်တၢ်ပၤဖျါထီၣ်အီၤလိ အမဲၢ်ဝဲ တီဝဲလိ ဘၠီၣ်တဂၤလၢ်လၢ်လိ အတူၢ်လိာ်အီၤနဲၢ်လိ.’ 36ဘၠီၣ်ဖၤရံၤရှဲတဂၤကွဲယ့ၣ်ရှူးဒ်သိးအကအီၣ်ဟါတၢ်အီၣ်လါအီၤလိ. ယ့ၣ်ရှူးလဲၤလိ အဝဲဒၣ်အဟံၣ်ဘျီးဆ့ၣ်နီၤဒ်သိး အကအီၣ်တၢ်လိ. 37ဖဲဝ့ၢ်အဝဲနံၤအပူၤဘၠီၣ်မ့ၣ်ပှၢ်အိၣ်ဝဲဒၣ်တဂၤ, လိအအိၣ်မူလိတၢ်ဒဲးဘးအပူၤနဲၢ်လိ. အဝဲဒၣ်နၢ်ဟူလိ ယ့ၣ်ရှူးအီၣ်တၢ်လိဘၠီၣ်ဖၤရံၤရှဲတဂၤနဲၣ်အဟံၣ်အဃိဘျီး ဟဲစိၤဝဲပလီလၢၢ်ဝၣ်တဖျၢၣ်လိ အပှဲၤလါထံနၢမူ. 38ဘျီးဆ့ထၢၣ်လိ ယ့ၣ်ရှူးအလီၢ်ခံဖဲအခီၣ်ထ့း ဟီၣ်ဝဲ, ဘျီးမၤဘၣ်စိၣ်ယ့ၣ်ရှူးအခီၣ်ဒ့လိ အဝဲဒၣ်အမံၤထ့းလိ. တၢ်နံၤဝံၤဘျီး ထွါကွံၤယ့ၣ်ရှူးအခီၣ်ဒ့လိ အဝဲဒၣ်အခွိၣ်သူ, နၢမူဝဲ, ဘျီးလူလီၤထံနၢမူနဲၢ်လိအလိၤလိ. 39ဘၠီၣ်ဖၤရံၤရှဲလိ အကွဲယ့ၣ်ရှူးတဂၤ ထ့ၣ်တၢ်တမံၤအံၤနဲၢ်, အဝဲဒၣ်ဆိကမိၣ်ဝဲလိ အသးပူၤ, ‘ဘၠီၣ်တဂၤအံၤမဲၢ်မဲၢ်ဝဲဒၣ်ဝံတဂၤနဲၢ်, အဝဲဒၣ်ကသံညါဘၠီၣ်မ့ၣ်ပှၢ်လိ အထွိးအီၤတဂၤအံၤမဲၢ်မတဂၤလဲၣ်နဲၢ်လိ. ဘၠီၣ်မ့ၣ်ပှၤတဂၤဒၣ် အိၣ်မူပၤစၢၤဝဲလ့ တၢ်ဒဲးဘးအတၢ်အိၣ်မူဒ်လဲၣ်တကလုာ်နဲၢ်အဝဲဒၣ်ကသံညါဝဲလိ.’ 40ယ့ၣ်ရှူးကတိၤထီၣ်တၢ်ဘျီးစံးဘၣ်ဝဲ, ‘စီၤရှံမိၣ်ဧၢ ယသးအိၣ်စံးဘၣ်နၤတၢ်တမံၤလိ.’ အဝဲစံးဝဲ, ‘မဲၢ်, သရၣ်ဧၢ,စံးဘၣ်ယၤတကဲၢ်.’ 41ယ့ၣ်ရှူးကတိၤထီၣ်တၢ်ဘျီး စံးဝဲ, ‘ဘၠီၣ်အိၣ်ဝဲဒၣ်ခံဂၤလိ အကမၢ်အိၣ်လိအကဘၣ်လွိးဂ့ၤဘၠီၣ်ဟ့လိၢ်စ့ၣ်တဂၤလိ. ဘၠီၣ်တဂၤနဲၢ် အကမၢ်အိၣ်စ့ၣ်ဒန့ၤရံယဲၢ်ပီၢ်1ဘျီး အဂၤတဂၤနဲၢ် အကမၢ်အိၣ်ဒန့ၤရံယဲၢ်ဆ့လိ. 42အဝဲတီၤလွိဂ့ၤ အကမၢ်လိ အအိၣ်တန့ၢ်နီတဂၤဘၣ်. လိတၢ်နံၤအဃိ အဝဲဒၣ်ပျၢ်ကွံၤဝဲခံဂၤလူၤအကမၢ်လိ. မဲၢ်မဲၢ် ဒ့းန့ၤဘျီး ဖဲလဲၣ်တဂၤကအဲၣ်အီၤဒွိၣ်ဒၣ်တၢ်တကဲၢ်လဲၣ်.’ 43စီၤရှံမိၣ်စံးဆၢဝဲ, ‘ယဆိကမိၣ်, ကမဲၢ်ဘၠီၣ်လိအဝဲပျၢ်ကွံၤအကမၢ်အအၣ်ကတၢၢ်တဂၤလိ.’ 44တုၤနုၤတဘျီ ယ့ၣ်ရှူးဃၣ်ဝီၤအသးလိ ဘၠီၣ်မ့ၣ်ပှၢ်အအိၣ်ဘျီး စံးဘၣ်စီၤရှံမိၣ်, ‘နထ့ၣ်နီၢ်ကီၢ်ဘၠီၣ်မ့ၣ်ပှၢ်တဂၤအံၤဧါ. ယဟဲနုလိ နဟံၣ်ဘျီး နတဟ့ယၤထံလိယခီၣ်ဒ့အဂီၢ်နီဆံးကိၤဘၣ် မဲၢ်မဲၢ် အဝဲဒၣ်သ့းကွံၤယခီၣ်ဒ့လိ အမံၤထံ, ဘျီးထွါသူထီၣ်ဂ့ၤဝဲလိ အခွိၣ်သူလိ.’ 45နတတူၢ်လွိၤခီၣ်ဆၢ ယၤလိ တၢ်နၢမူနီတဘီၣ်ဘၣ်. မဲၢ်မဲၢ်အဝဲဒၣ်နဲၢ်, စးထီၣ်လိယဟဲနုလီၤလ့ၤလ့ၤ တအိၣ်ကတီၢ်အတၢ်နၢမူလိ ယခီၣ်ဘၣ်. 46နတဖူယခွိၣ်လိ သွိနီဆံကိၤဘၣ်. မဲၢ်မဲၢ် အဝဲဒၣ် လူလီၤသွိနၢမူလိ ယခီၣ်ဒ့တလိၣ်အလိၤလိ. 47လိတၢ်နံၤအဃိ ယစံးဘၣ်နၤ,တၢ်အဲၣ်အဒွိၣ်အအါလိ အဝဲဒၣ် ပၤဖျါပၤစၢၤဝဲအံၤ, ဟ့တၢ်အုၣ်အသးလိ အဝဲအတၢ်ဒဲးဘး ဘၣ်တၢ်ပျၢ်ကွံၤအီၤလ့နဲၢ်လိ. မဲၢ်မဲၢ်ဘၠီၣ်လိ အတၢ်ဒဲးဘး ဘၣ်တၢ်ပျၢ်ကွံၤအီၤလ့နဲၢ်လိ. မဲၢ်မဲၢ် ဘၠီၣ်လိ အတၢ်ဒဲးဘးဘၣ်တၢ်ပျၢ်ကွံၤဒၣ်အီၤထဲ ပံတံဖိ တဂၤနဲၢ်, ပၤဖျါတၢ်အဲၣ်ပံတံဖွိဧိၤလိ. 48တၢ်န့ၤဝံၤဘျီး ယ့ၣ်ရှူးစံးဘၣ် ဘၠီၣ်မ့ၣ်ပှၢ်တဂၤနဲၢ်, ‘နတၢ်ဒဲးဘးတလိၣ်ဘၣ်တၢ်ပျၢ်ကွံၤအီလ့.’ 49ဘၠီၣ်လိ အဆ့နီၤတခၢၣ်ဟူၤလိ တၢ်အီၣ်အစီၢ်နီၤခွိၣ်တလိၣ်စံးလွိၤအသးပကိးပကိး, ‘ဘၠီၣ်လိ အပျၢ်ကွံၤဒၣ်လဲာ် တၢ်ဒဲးဘးတဂၤအံၤမဲၢ်မတဂၤလဲၣ်.’ 50လၢၤဘျီး ယ့ၣ်ရှူးစံးဘၣ်ဘၠီၣ်မ့ၣ်ပှၢ်တဂၤနဲၢ်, ‘နတၢ်စူၤတၢ်နၤ အုၣ်က့ၤခီၣ်က့ၤနၤလ့. က့ၤက့ၤနၤလိ တၢ်သူၣ်မူၤသးမူၤအပူၤတကဲၢ်.’
Právě zvoleno:
Luke 7: ktpv-rv
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
