Yohaannisi 3
3
Niqodimoosi akkima dekandekatti Yesuusi kapopa aane
1Feresaatoppa nama takka Niqodimoosi kiinaane ca. Isha nefo saara orra a Yihuta. 2namoose halkeette Yesuusi kapopa aane ka ishi kide, “Kollissampayto, a Waaqa isha olli kinnaado maliiyyi nama takka nefo wossin orra qawwanna a atti koonitta, koda ettaninno in co. Semmalla atti akkima kollissampayta Waaqa kapa de'e koddite in upna.”
3Yesuusi ka ishi kide, “Anti dukaatannen ke kiini, nama haka lammatta dalado maliiyyi, mankisteeta Waaqa akkeeta ettaninni in co.”
4Niqodimoosi ka isha kaassade ka kide, “Ka kuli nama, oto kero kammaayye, atta delatta ettansha? Hela lammatta'e, karitta aayyaassoti karopa ooreeta ka delatta i'ettansha?”
5Yesuusi ka oorshe ka kide, “Anti dukaatannen ke kiini, nama haka pisha isho Hapura Qulqulloota oppa dalado maliiyyi, mankisteeta Waaqa oppopa kalta ettaninni in co. 6A namoppa delade nama a hapuroppa deladeew hapura. 7Semmalla qootan ke kide, ‘Lammatta dalatta ishin parpaaccisni malla, oppa in qawwaawan.’ 8Uruuritta qinda ishi aako opa uruurini, akka nessaadi dakayni, ma aysha akkima de'e ka ayshopa akkima anno a upto. Nama hapuroppa delade nefo akkimose minaaw.” 9Niqodimoosi ka isha kaassade ka kide, “Sede atta koddeeta ettanissa?”
10Yesuusi ka ishi oorshe ka kide, “Atti a kollissampayta Isira'eeli'iy, a sede a upto? 11Anti dukaatannen ke kiini, ino waan upna'en haasawanninna ka wa an akkine maakkumminna, ishina xoori maakkuminno a teyyanni a kittan. 12Oton wa piita ishina lellooyye, a amanni a kittaneey, otoon wa moonta ishina lellooyye, atta amantaneew? 13Innasene a nama moonte xata lekkade maliiyyi, a moontopa fayyade takka nefo in co. 14Akka Muuse koommaytoppa maaka opeela kiishe ka moonte xata ra'ishe mina'e, inna a nama asseew opeela kideeta ka moonte xata raa'eta ishootta faani. #dikoota 21:9 15Sede nefo wa malla asse koddita nama isha amanno piisa akka caatta parapara akkado malla. 16Nama isha amanno piisa, akka in pannin ka caatta para para akkado'e Waaqa qoota akata piita jaalade malla innaadi takkan daashe. 17Wa malla Waaqa, innaadi piita qaropa erke; akka piita innaadin dinto malla diishe akka piita qara' farato mallan. 18Nama isha amanno qara'e, in faratamto; nama isha amanni in kinnin xoori, qoota inna Waaqa takkane in amannin malla, xattaaw qara' faratamte. 19Firteetose nefo, sede: La'ayta piita qaropa de'e, orra xoori qoota kodaaysho neeqi malla, la'ayta kapaayye tukkanta jaalade. 20Nama wa neeqa koono piisa, la'ayta needdini ka akka kodoose xaadi neeqan akkaannini'i, la'aytoppopa deeni in kinnin. 21Nama wa dukaata kodde koono oori, la'aytoppopa sookni. Wa malla la'aytoppopa sookna nefo, wa kode akka ajaja Waaqa qara kodamen, akka fayya akkaadan malla.”
Yohaannisise pishaan orra jaqqino akkima qoota Yesuusi desa maakkume
22Sekkammaayye Yesuusi tamaarewwaadi olli piita Yihuta opa aane ka eyye pishaan orra jaqqni ka lamayteeta jare. 23Sitiiyyi Yohaannisi Saleemi kapaayye pora takka Henooni kidammo a pisha kuttaya oppa caane oppaayye, pishaan orra jaqniw, orra ka eyyepa anni ka jaqqammi. 24Sitiiyyi Yohaannisi ata in hidamme. #Maati 14:3; Maari 6:17; Luqa 3:19-20
25Sitiiyyi, qoota taanteta jaqqaysumaati desa, otanta tamaarewwa Yohaannisi isho orra Yihuta#3:25 mataaffasene ollopa marramma demo orra yihuta lamayyta kiini oppa'e, shiishsha ka xa'en. 26Tamaarewwa Yohaannisi ka, Yohaannisi kapopa aanen ka ishi kidene, “Kollissampayto, namase a kirra Yurtaanoositi afa disiti ollin kittan, atti ka qootaadi desa maakkumte, ha pishaanne orra jaqqini. Orra piisa ka isha kapopa anni!”
27Yohaannisi ka ishootta oorshe ka kide, “A Waaqa nama daasho mali, nama we takkan nefo qapnaatta ettaninni in co. 28Akkiman ishina kide, ‘Anti isha turannen erkame diisheey, anti an Kiristoosin.’ Ishina mattaayshina a maakkiyyaayyo. #Yoha 1:20 29Nama haantota qapo, ishan hemampayta; nama hemattoota kodde, hemampayta kapa'e qa'anni ka nessaadi dakkaysanni ka nessaadi a dakkaysannon xasoonni; semmalla xasoottiyyo nefo sedeew; amma oori i'immakaade. 30Isha opeela kuttatta isha parpaaccisni, anti opa xata shakkatta ana parpaaccisni.
31“A illi xata deeno, piisa qaropa qapa; apiita qara de'e a piita ka wa piita'ew haasawanni; amoonte xata deeno piisa qaropeela qapa. 32Isha wa akke ka dakaye'e maakkummi, ma xoori nama maakkumaadi teyyanno takka nefo in co. 33Nama maakkumaadi teyyanno xoori, akkima Waaqa dukaallayta kodde upnaanni. 34Waaqa oto hapuraadi daannooyye, qoota qudadesaaw daanni in kinnin malla, nama a Waaqa erke qaaleta Waaqa'e haasawanni. 35Aappa innaadi jaalanni ka we piisa harkaadippa daashe. #Maati 11:27; Luqa 10:22 36Nama inna Waaqa amanno, caatta parapara'e qapa; nama a inna Waaqa amanni in kinnin xoori, miira Waaqa'e isha qara caada diisheey, caatta in akkado.”
Právě zvoleno:
Yohaannisi 3: MaQu
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
