Kejadian 10
10
1Nuh elce deiamuk mapu, sik si ara Sem ap, Ham ap, Yapet ap, weik mekwen ceprobukba, aminyan talak sikce deiamik mapu ap, anang arye, deiamik ninye ap ati, ayupu sekeipsine.
Yapet birye, deiamuk ninye ati, nyabuk yupu
2Yapet elce deiamuk mapu si ara, ani. Gomer ap, Magog ap, Madai ap, Yawan ap, Tubal ap, Mesek ap, Tiras ap ulamik. 3Gomer birye deiamuk mapu sik si ara, ani. Askenas ap, Ripat ap, Togarma ap, ulamik. 4Yafet el mi Yapan birye deiamuk mapu ara, Elisa ap, Tarsis ap, Kitim ap, Dodanim ap deiamukba, amapu nirya sik babye, mapu weik delilamikce, ninye weik ulamik.
5Aninye ara, sik weik laut mekwen kup-kup ulamikce, weik mek lia yo bobuka mekwen deice balamik nang ulamik. Ulamikce, sik mutuku yuk-yuk, sik yala yuk-yuk, sik yupu yuk-yuk bokdobikce, yuk-yuk binuka ulamik.
Ham birye, deiamuk ninye ati, nyabuk yupu
6Nuh el mi Ham birye deiamuk mapu si ara, ani. Kus ap, Misraim ap, Put ap, Kanaan ap ulamik. 7Ham el mi Kus birye deiamuk mapu si ara, ani. Seba ap, Hawila ap, Sabta ap, Rama ap, Sabteka ap ulamik. Kus el mi Rama birye deiamuk mapu sik si ara, ani. Seba ap, Dedan ap ulamdik. 8Ham el mi Kus birye deibuk mi Nimrod bira, nepnin balamukce, mikip weik ninye olana deiyoknye ulamuk.
9Tonda, Allah el si Yahweh dilamukba, yata bai tam kam ning weik ulamuk ning do nirya, buru kalikna weik kelnye ulamukba, atalak ulamik ninye nirya arye, Nimrod, el winilamuk ning ati kekelamik. Ati anoutamak ulamik nang arye, yuk nang ton Nimrod winilamuk touk winilamikba, anang ati nyalamik, “Allah dilamukce, Nimrod mikip weik ap, bai kalikna weik kelnye ulamuk touk winilulume,” nyalamik.
10Nimrod bira, mikip weiknye ulamuka anya arye, el taleamuk mutuku weik uamuk. El taleamuk mutuku noutamak deiyok koubuka, minopce ninye asik domuk, asik si ara, ani. Babel mutuku ap, Erek mutuku ap, Akad mutuku ap, Calne mutuku ap, ara Sinear mutuku noutamak domukce, taleamuk. 11Sinear mutuku noutamak ulamuka ani, yuk mutuku Asyur mutuku noutamak biyukce, yuk asik ton domuk. Amutuku si ara, Niniwe mutuku ap, Rehobot-Ir mutuku ap, Cala mutuku ap, Resen mutuku ap domuk. 12Resen mutuku ara, Niniwe mutuku dana tam, Cala mutuku dana tam noutam sukumak dobuk mutuku, weik asik dobukce, el si ara, Resen mutuku nyabuk.
13-14Ham el mi Misraim birye deiamuk ninye, sik yala ara, Ludim ap, Anamim ap, Lehabim ap, Naftuhim ap, Patrusim ap, Kasluhim ap, Kaftorim ap, yala ninye deiamuk. Aninye nirya, sik apu bira Misraim ulamuk. Kasluhim ninye arye, bokuka Pilistin yala ninye ton deiamik. 15Ham el mi Kanaan birye, minopce deibuk mi si ara, Sidon ulamuk. Asukum noutam ara, yuk yala nang ton deiamuk nang ara, sik yala si ani. Het ap, 16Yebusi ap, Amori ap, Girgasi ap, 17Hewi ap, Arki ap, Sini ap ulamik. 18Arwadi ap, Semari ap, Hamati ap, ayala ninye ton deiamuk.
19Aminyan yuk talak noutamak ara, Kanaan birye deiamuk ninye, ayala-yala nirya ara, bokdobikce mutuku dana-dana tam binuka ulamikce, sik tam ara, Sidon mutuku bukni ansinibuka Gerar mutuku, Gerar mutuku bukni Gasa mutuku ansinibuka, asukum noutam ara, Sodom mutuku ap, Gomora mutuku ap, Adma mutuku ap, Zeboim mutuku ap ansinipdongobuk bukni, sirya ara, Lasa mutuku uwamuk. Amutuku-amutuku noutamak ara, sik Kanaan birye deiamuk yala nang ulamik. 20Anyapmasin nang nirya ara, Ham birye deiamuk nang, sik mutuku ap, sik yala ap, sik yupu ap yuk-yuk ulamik touk akunum nyapne.
Nuh el mi Sem birye, deiamuk nang ati, nyabuk yupu
21Nuh el mi Sem ton mapu weik deiamuk. Sem el du koproba si ara, Yafet ulamuk. Tonda, Sem birye deibuk mi, elce deibuk mi ton, el si ara Eber. Eber birye deiamuk nang nirya ara, sik apu bira, Sem ulamuk. 22Sem birye deiamuk mapu sik si ara, ani. Elam ap, Asyur ap, Arpasad ap, Lud ap, Aram ap ulamik. 23Sem el mi Aram birye deiamuk mapu, sik si ara, ani. Us ap, Hul ap, Geter ap, Mesek ap deiamuk. 24El mi Arpasad birye deiamuk mi el si ara, Sela. Sela birye, el mi Eber deibuk.
25Eber birye, mapu bitinye deibuk. Sik si ara, Peleg ap, Yoktan ap ulamrik. Peleg el si nyabuka deiyok ara, ninye lipsisikuka bokolina ati nyamuk. Ara, el deibuk tam ara, Allah arye, ninye tukwak nang nirya bokukapna arye, yuk-yuk wilibuka sik mutuku yuk-yuk binuka ulamik talak ati, el si ara, Peleg nyabuk. 26Eber el mi Yoktan birye, mapu pia weik deiamuk. Sik si ara, ani. Almodad ap, Selep ap, Hasar-Mawet ap, Jera ap, 27Adoram ap, Usal ap Dikla ap, 28Obal ap, Abimael ap, Seba ap, 29Opir ap, Hawila ap, Yobab ap ulamik. Anang nirya ara, sik ni koproba Yoktan ulamuk.
30Eber birye, deiamuk mapu, sik ulamik mutuku ara, Mesa mutuku bukni ansinibuka, Separ mutuku otam bukni, anoutam ulamik. Ara, keting panalyangan tam bukni, mutuku kuna weik uamuk mutuku noutamak ulamik. 31Anang si nirya nyapmasina ara, Sem birye, deiamuk nang, sik mutuku ap, sik yala ap, sik yupu ap, yuk-yuk winilamik touk akunum nyapmane. 32Ayupu nirya nyapmasina ara, weik mekwen akunum ceprobukopura, Nuh birye, deiamukba, el mapu ton, sikce deiamikba, dadeipdanin balamik nang arye, bokuka yala yuk-yuk wilibuka deipnin balamik touk, nyapmane. Aninye sik yala arye, deiyok kouamikba, bokukabikce, tukwak mutuku im sirya, mutuku sirya nirya binuka ulamik. Ninye tukwak nang nirya, sik apu yapu ara, aninye uka.
Právě zvoleno:
Kejadian 10: EIPA
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023, Wycliffe Bible Translators, Inc. All rights reserved.