Matie 19
19
Zezu -bhulɛ 'sueplɛweli "ne 'ylimebhabhaleweli
(Malke 10.1-12; Luke 16.18)
1Zezu "kɛ bhulɛ- "bhuɔ ne, 'ɔ 'bha- Galile "ne 'ɔ yi -lɔ Zude -glɔ "me 'na Zludɛ keyi me. 2'Nyakpa 'na -zakpɛ "yitɛ -gɛlelo, "bhle 'ye 'ɔ -yamaloa -lɔ.
3"Ne Faliziɛnya 'nyiɔ- Zezu yɔko -se 'wa "kɔ "me 'bea-. Ŋwɛnɛɛ: «-see 'ɛ "mɔ "me -ko "ne -see 'ɛ kɛ "me -ko 'nyɔkpɔ yi bhɔ 'ɔnɛɛ 'ŋɔnɔ 'na lo -sɛ?» 4Zezu nɛɛ: «'A "ne bhɔ Lagɔbɔgo "me 'na -ɛ kɛleɔ- "bhle -wɛ "me -zɛle? 'Ɛ nɛɛ: "Kucidɛku, Lagɔ 'wlɛ- 'widi -nyɛ 'ŋɔnɔ "bhaa. 5"Ne Lagɔ yi -lɔ no nɛɛ: -Ɛwɛza 'widi "kɛ -lɔ 'ɔ 'to "ne 'ɔ "nɔ yɔko 'bha-. "Ne 'ɔnɛɛ 'ŋɔnɔ "bhaa 'wa "kɛ -lɔ "ku 'glile-, "ne 'wa "kɛ -lɔ -bholo -kpee yle. 6'Ɛ kɛ -da soɔ -ko, 'wa "ne -la "sɔ -yle, -mɔ, 'nyɔkpɔ -bholo 'wa "zo -lɔ. Zaa, -ye Lagɔ "zoa- -bholo -wɛ, 'nyɔkpɔ te -kɛ 'yli "me -seselia!» 7"Ne "ɛ "Faliziɛnya yu -lɔ lo 'yɔbhɔ- nɛɛ: «sɔɔbɛɛza Moyize -no bhɔ -gbɔ 'nyɔkpɔ kɛ 'ɔnɛɛ 'ŋɔnɔ 'na lo -sɛ ne, 'ɔ 'piɔ losɛbɔgɔ keyi 'a?» 8"Ne Zezu yua -lɔ bhulɛle- nɛɛ: «'anyɛɛ 'dle 'kɛkɛle -wɛ 'na 'tɔ "me 'ye Moyize -no -lɔ -gbɔ 'a -sɛ 'anyɛɛ 'ŋwenea 'na lo, -mɔ, "kucidɛku 'ɛ "ne 'awɔ sɔbhɔ -ko. 9'E bhulɛle 'anye nɛɛ: 'Nyɔkpɔ kɛ 'ɔnɛɛ 'ŋɔnɔ 'na lo -sɛ, 'ɛ "mɔ -kɛ -wa "ne kwɔkwɔlesɛ -kɛ -wɛ 'waa, "ne 'ɔ kɛ 'ŋɔnɔ 'na -vinɔ -kwɔ, gbo 'ye 'ɔ zlɛ -lɔ.»
Zezu -bhulɛ -wa -plɛ 'suɛ -wɛ 'na weli
10"Ne Zezu 'na gɛlenya yu -lɔ bhulɛle- nɛɛ: «'Widi -nyɛ 'ŋɔnɔ "bhaa 'glɛme, soɔ -li kɛ ylɛle ne, lɔbhɔ 'na dɛku 'widi te -la 'ŋɔnɔ 'kwɔ.» 11"Ne Zezu yua -lɔ bhulɛle- nɛɛ: «'Wayi 'klekle 'wa "ne welicibhɛ -wɛ "me 'no-, -mɔ, -ye Lagɔ 'je- 'bhɛloɛ kɔ -wɛ, 'wa 'no- -lɔ "me 12'Nyakpa 'na -bedia "ne 'bhɛle- "ne 'wa "kɛ 'ŋwenea 'kwɔ, sɔbhɔ 'wa -gwɛloa -lɔ zɛ, 'wanɛɛ -wawɛ -ko lɔbhɔ "ne 'nyakpa 'soa "ɛ soɔ. "Ne -bedia -ko lɔbhɔ 'wayigɛsɛ 'wa "ne 'yɔbhɔ -gbɔ 'wa "kɛ 'ŋwenea 'kwɔ Lagɔ 'na 'Kamalezikpɛ 'na 'ylime. -Ɔ kɛ no -gbɔ 'ɔ 'yi "me 'no, 'ɔ 'no "me!»
Zezu 'pɔ- yua 'ŋu
(Malke 10.13-16; Luke 18.15-17)
13"Ne 'nyakpa yu -lɔ yua -nɛme, -se 'ɔ "koa 'kwlɛ 'wli 'piɛ, -se 'ɔ "kɛ bhubhɔ-, -mɔ, 'ɔnɛɛ gɛlenya "ne "ku 'ŋunu-. 14-Mɔ, Zezu nɛɛ: «'A 'tale- yua 'yi -se 'wa "kɛ -ame lo yili-, -mɔ, 'a 'toa 'yliku 'titi, "naa-, -wa -ko sɛgbɛɛ yua -wɛ, 'waa- 'bhe- -lɔ Lagɔ 'na 'Kamalezikpɛ.» 15'Ɔ "koa sɔ 'wli 'piɛ "bhuɔ ne, 'ɔ 'bha- "ɛ doɔ, "ne 'ɔ yi -lɔ me.
Zezu "ne lɛkɛlenyɔ
(Malke 10.17-31; Luke 18.18-30; 13.30)
16"Ne 'nyɔkpɔ -bholo yi -lɔ Zezu yɔko 'nyiɔ-, "ne 'ɔ yu -lɔ bhulɛle- nɛɛ: «Sloanyɔ, -ɛ 'nɛne 'na -ye 'e "kɛ bhɔ no "ne 'e "kɛ zikpɛ 'na -ɛ -ka "kubhiɛ -wɛ yle 'a?» 17"Ne Zezu yu -lɔ bhulɛle- nɛɛ: «Sɔɔbɛɛza -e 'yɔbhɔle bhɔ -ame -ɛ 'nɛne -wɛ 'na weli "ku lo 'a? Lagɔ -bholo -kpee 'nɛne -lɔ. Zaa, -e "kɛ -no -gbɔ -e "kɛ zikpɛ 'na -ɛ -ka "kubhiɛ -wɛ yle, "zo Lagɔ 'na gbagbɛ 'plome.» 18"Ne 'ɔ yi -lɔ Zezu lo 'yɔbhɔ nɛɛ: «Gbagbɛ 'na -sɔɔnɛ bhɔ?» Zezu nɛɛ: «Te -kɛ 'nyɔkpɔ 'lɔbhɔ. Te -kɛ gbo zlɛ. Te -kɛ 'wi 'yli. Te -kɛ "fu -eluyu gbo 'wlime "gbli. 19"Zo -e 'to -nyɛ -e "nɔ "bhaa 'plome. -Se wamale- -eluyu -see -e -wa -eyi -wɛ.»
20'Ɔ 'no- lɛ "ɛ weli -wɛ "me ne, "ne "ɛ 'teyigbɔ -wɛ yu -lɔ bhulɛle- nɛɛ: «-ɛwɛ 'klekle 'e -no, zaa, -ɛ -to -da "bhle 'a?» 21"Ne Zezu yu -lɔ bhulɛle- nɛɛ: «-E "kɛ -no -gbɔ -e "kɛ Lagɔ 'na -ye 'ɔ 'yɔbhɔ 'klekle -wɛ no ne, me -se "pɔ -neɛ' -li 'klekle 'pɔlo "ku, -se 'je 'ɛnɛɛ 'dlasi -wɛ 'nyɛzenya kɔ, -se -e "kɛ -kɛ "nɔgɔ "me 'na -klɔgbɔ yle. Yi -se 'gɛle- -ame!» 22"Ɛ 'teyigbɔ -wɛ "kɛ "ɛ weli -wɛ "me 'no ne, "klo 'ɔ -nyɛne -lɔ, "ne 'ɔ yi -lɔ me. "Naa-, 'ɔnɛɛ -li -zu nɛ kpɛnyee zɛ.
23"Ne Zezu yi -lɔ 'ɔnɛɛ gɛlenya bhulɛle- nɛɛ: «Gbɛklɛklɛ 'ye 'e bhulɛle lɛ 'anye. -Klɔgbɔnyɔ "kɛ Lagɔ 'na 'Kamalezikpɛ "me plɛ 'ɛ 'tɛ- -kɛ "me kpɛnyee. 24'E bhulɛle "kusɔ 'anye nɛɛ: Samo "kɛ 'mneyi 'na -gwe "me plɛ ne, 'ɛ ne "me 'tɛ-, -mɔ, -klɔgbɔnyɔ "kɛ Lagɔ 'na 'kamalezipkɛ "me plɛ 'ɛ 'tɛ- "me "ne 'ɛ -zi "ku.» 25Gɛlenya "kɛ "ɛ weli -wɛ "me 'no ne, 'ɛ -nyoa "ne 'wa yi -lɔ sɛne lɛ- nɛɛ: «Zaa, lɔbhɔ 'na dɛku -ɔ 'cɛ bhɔ 'nu 'po 'a?» 26"Ne Zezu yua -lɔ "ku 'wolo- 'vlee, "ne 'ɔ yua -lɔ bhulɛle- nɛɛ: «'Nyakpa 'na dɛku, 'ɛ "ne 'bhɛle-, -mɔ, Lagɔ 'bhɛle- -li 'klekle.»
27"Ne Piɛle yi -lɔ Zezu bhulɛle- nɛɛ: «-E -gɛ 'yli, -anye -a 'bha- -anyɛɛ -li 'klekle yɔko "ne -a yi -lɔ -eyi gɛle-! Zaa, -anyɛɛ dɛku -see 'ɛ "kɛ bhɔ "me ko 'a?» 28"Ne Zezu yua -lɔ bhulɛle- nɛɛ: «Gbɛklɛklɛ 'ye 'e bhulɛle lɛ 'anye, -zle zikpɛ -lele kɛ 'ce -yi, lɔbhɔ 'Nyɔkpɔ Yowli "kɛ 'ce -lɔ 'ɔnɛɛ 'leyli -gbɔglo "ku 'gli. "Ne 'anye -wa -gɛle -ame -wɛ, 'a "kɛ 'ce -lɔ -gbɔglo kogbɔ "sɔ "ku 'gli, "ne 'a "kɛ 'ce -lɔ Izlayɛle 'na -gligbɛwli kogbɔ "sɔ 'gbobhlele-. 29"Ne -wa 'bha- 'wanɛɛ -bhudu, "nowlia, "nɔyoa, 'to, "nɔ, yua "ne 'lɛɛ yɔko 'neɛ za -wɛ, 'wanɛɛ yi 'ce lɔbhɔ 'ple kpɛnyee, "ne 'wa yi 'ce 'lelee zikpɛ 'na -ɛ -ka "kubhiɛ -wɛ yle. 30-Ɛwɛza, -wa -gɛ 'yuku -wɛ 'na 'kwleyia "kɛ 'ce -lɔ 'be bhiɛle-, "ne -wa -bhiɛle 'be -wɛ 'na 'kwleyia "kɛ 'ce -lɔ 'yuku 'gɛle-.»
Právě zvoleno:
Matie 19: btg
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 (Active), Wycliffe Bible Translators, Inc. All rights reserved.
