Matyu 9
9
Yeso Fa Mashok Lo' Cala
1Yeso lang ta kwang i ham, pis ta fit ti yes ashwa ames. 2Unai shini ɗufali si kolus maɗufal nin ima lo' ames shokus, yis raki si lapan hai. Myan ima Yeso ɗing ngga' ima si fa mulut ta, unai lak maɗufal ima lo' ames shokusi ni, “A al amen, jakaka! Si shwa mafwashi ama ya.”
3Unai shini som kofiti si anggut hai si lak ɗiyai ames si ni, “Maɗufal mai ma findel i ale'!”
4Yeso shang ambe' ames, nyus, “A ɓurti mi hu ambe' mafwashi ta mulwat amu ya? 5Anggi ɓin mbwesh ya, ima si ni, ‘Si shwa mafwashi ama ya,’ ahun si ni, ‘Luka fit, ha wa ya?’ 6I wa kofsu ɓa hu shangi nyai, Al i Maɗufal mati mbaitat i shwaiti mafwashi ya na naya.” Unai lak maɗufal ima lo' ames shokusi ni, “Luka fit, zana lapan ama, ha wa wur.”
7Maɗufali luk fit wis wur. 8Myan ima suɓut i ɗufal si ɗing aɗeng mai, si shok na fwai, si ha' asum i DeeƁwe fit, yis ima fa ɗufal musut i mbaitat mai.
Yeso Lai Matyu
9Ta ta'i, myan ima Yeso cu wei ti ɗa'at, ɗing maɗufal nin ma asum Matyu, yis amun ta kyel i mati cef i wufen, nyus, “Kolafai asuni,” unai Matyu luk fit kolfai asussi.
10Myan ima Yeso yis cwai ti cwa i mukon ta wur i Matyu, som hyang i mat ti cef i wufen hu ima si laiyus ii “som mufwashi” si yes si cu tikul hu fe i ro ames. 11Myan ima Farisiyawa si ɗing aɗeng, mai, si lak fe i ro amesi si ni, “Ami kin makofiti amu ma cwai ma woi hu som i mati cef i wufen hu som mufwashi ya?”
12Ti hal ti mai unai Yeso nyus, “Som ima si ti cala si wai kyel i mamanda kwa, a som mwatan. 13Ɓu hu mas ambe' ami mai aɗengi ma laki ya, ‘I ɓwet ti gu'ti ashur, a tor ti kuna kwa.’ I yes ɓa i lai a som munderei kwa, a mufwashani.”#9:13 Ɗing huni hwak: Hos 6:6.
Ka'ti Fo ya tasi Cwa Hai
14Mwen nin, fe i ro i Jwon si yes si lul ta Yeso, si ni, “Ami kin nin hu Farisiyawa ni kaa' fo ya tasi cwa hai, ɗak fe i ro ama si kaa' fo ya tasi cwa hai kwa ya?”
15Yeso nyus, “Ma wa mas si ni, mwalmwat i zalang makunggo si kikyau ti mulwat myan ima sin tikul haa? Myan ma yes ima si wa zan ti zalangi ya ta kyel ames, ɗak si ka' fo ya tasi cwa hai.
16“Maɗufal zan ɓalang i fagin mamwayi, u tor tasi hai i fagin mawili kwa. Ɓalang mamwayi ma wa nggi' ti fagini ya, gwyaki u ɓin ima ai rafat. 17Maɗufal shwai ham i manggɓu'#9:17 ham i manggɓu' Si mas rukul i shwaiti ham i manggɓu'. Rukul mamwai ma ɓwayan ya, mawili shwakus. Nasi shu ham mamwai ta taɗasus ɓurti shok ames. ta wii i rukul mawili kwa. Na masi andi, hami na can u taɗas rukuli ya, u wis ya, rukuli hwak u rafatus. Wayou, maɗufali ma wa shwaiti ham i manggɓu' ta rukul mamwai wi.”
Al Mumoti hu Mbor Mumwatan
18Yis saa ti laksus findel mai, mbai nin yes shu i mafwaran ta wei yusti ni, “Al asun ti motut mumwash ati. Ya ha zanut fit, ɓa ti humkyel mushet.” 19Yeso luk fit kolfai asussi, fe i ro ames hwak si kolfai asussi.
20Unai mbor nin tima mwatan i waya i wash, tima ti kofti asuti wilyal hure mulang apil, ti yes ta takfai ames, ti ngge' fo i fagin ames. 21Ti lak ta mulut amet nyai, “Na i ngge' fo i fagin ames kyek i wa njeng.”
22Unai Yeso hatat ɗingut fo, nyut, “A al asun, jakak shi! Fati mulut amesh fash cala.” Si myani, mbori ti wis cala.
23Myan ima Yeso lang ta wur i mbai nin, ɗing som i fu' ti njungkulet i shaat, hu ɗufal hyang sin bom. 24Unai ni, “Hun wa nati. Ali ti mot kwa, tima raki.” Si musasus. 25Suɓut i ɗufali si rangya ta saikyel, yis lang ta ka' ra i ali, unai ti luk fit. 26Findel mai nggu' ta'i shak.
Yeso fa Manzyau hu Mandu' Cala
27Myan ima Yeso lang ya ta kyeli, manzyau shini apilal si kolfai asussi sin lai ti njeng nyai, “Gu'a nin ashur, a Al i Devid!”
28Myani, tuu langus ta wii wur, unai manzyauwauwi si yes kyel ames. Yeso nyus, “Hu fa mulut nyai, i ndok ɓa i fu cala haa?”
Sin si ni, “Hei, a Deembai.”
29Unai ngge' shishat ames nyus, “Ɓa u tehu hai ta ngga' ima hu fa mulut ta.” 30Unai shishat ames si maɓu ya. Ɗak Yeso dulus mwal fwet nyus, “Ka hu ɓwet ɗeng u hal findel mai kwa.” 31Shak ta andi, si rangya si but findeli ta si ta'i hai shak.
32Myan ima sin mulangya ndai, shini sin yes ti maɗufal nin ma rin mafwashi ta kyel i Yeso. 33Yeso re' rin mafwashii ya, unai maɗufali lang findel. Suɓut i ɗufal si shok na fwai si ni, “Mai aɗengi, a ɗama mamwai na Isar'ila.”
34Shak ta andi, Farisiyawa si ni, “A ti njeng i makai i rin mafwashi, re' ti rin mai ya.”
Som i Ro Si Yus Ndyong
35Yeso at ta shak ashwaha mbayai hu muyayi, yis kofiti ta mareha ames, yis lak ti Muro Maɗesi i kaitat i DeeƁwe, yis fati som cala ima si ti mwatanan akat-akat hu han i lo'. 36Myan ima ɗing suɓut i ɗufal, ɗing shum asussi, ɓurti si yus kaciwa' bum, fota tutwai kaciwa' maɗingsus. 37Unai lak fe i ro ames ni, “Karat tima hyang, ɗak som roi si yus ndyong. 38Fwal hun Deembai i karat, u tuku som ro wa ya ɓa si masus karat.”
Právě zvoleno:
Matyu 9: AlisIRonNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Wycliffe Bible Translators, Inc. and © The Nigeria Bible Translation Trust 2018
