Luka 22
22
Judas Cu Han Ɓa Si For Yeso
(Mat 26:1-5; Mak 14:1-2; Jwn 11:45-53)
1Myan i Got i Folok Ma kaciwa' Yisti, ima si layani ii Got i Pissihai yes nggas, 2unai mbayai i kocokak hu som kofiti si anggut hai si ka' far ti ngga' ima ɓa si for Yeso ta, ɓurti si myanat ti ɗufal fo.
3Unai Shatan lang ta Judas wi, ima si laiyus ii Iskaryot, andek ta saa ti fe i ro amesi hure mulang apil. 4Unai Judas wa findel mbayai i kocokak, hu mbayai i som i fwang ti Wur i DeeƁwe, si lak ngga' ima ma wa fasus Yeso ta ra. 5Si pipel na mulwat fwet si ɓetti nyai si wa fa sus cef. 6Yis ɓwet ɓa u fas Yeso, unai far fisel tima ɓa u fas Yeso ta ra ames, myani ɗufal sin ta kyeli kwa.
Yeso Kin si Cu Cwa i Pissihai
(Mat 26:17-25; Mak 14:12-21; Jwn 1:21-30)
7Mwen ti Got i Folok ma kaciwa' Yisti ru, a mwen ti for tutwi i kuna i Got i Pissihai. 8Unai Yeso ro Pita hu Jwon ni, “Ɓu hu ɗi kan cwa i cwai ɓurti Got i Pissihai.”
9Unai si lulus si ni, “Ha ɓweti ɓa ni wa ni ɗak ti kyeli a ta leya?”
10Yis nyus, “Hu lang ta ashwai, hu wa shwai hu maɗufal nin yis ti ɗya i ham, kol hun fai asussi wa ta wur ima langta. 11Hu lak dee mawuri nyai, ‘Makofiti lak ni, “Anggi ahomi ma wa cwai ti cwa i Got i Pissihai ta hu fe i ro ames ya?” ’ 12Ma wa kofsu ti ahom ta wur i fit nin, ima si ɗak ti. A ta te'i hu wa ɗak sikan ti ɗamami ta.”
13Unai si wa si wis ɗamam tasi ngga' ima Yeso lakus ta, unai si ɗak ti cwa i Got i Pissihai ta kyeli.
Cwa i Dala i Deembai
(Mat 26:26-30; Mak 14:22)
14Myan si mas, unai Yeso te amun akul hu fe muro ames ɓa si cu cwai. 15Unai lakus ni, “I ma cwai ti mulut ya ɓa i cu Got i Pissihai amai akul hu hun ɗak i lang woti shum! 16Ɓurti i laksu, i wa muhum cwai ti got mai kwa, ɗak mangga i aɗeng mai wis hya ta kaitat i DeeƁwe.”
17Unai ha' cunjo i ham i manggɓu', palang ni, “Mat hun hu kaar ɗiyaiyi. 18I laksu nyai, nasi mwashi wa wei, i wa muhum woti ham i manggɓu' akul hu hun kwa, na kaitat i DeeƁwe yes tawe.”
19Unai ha' folok palang DeeƁwe, nggyal fas ni, “Mai a lo' amen ima i fa ɓursu. Maas huni ati ɓurti mbe'i ti yin.”
20“A andi hwak, takfai ti cwa i mango, zan cunjoi, ni, ‘Moti cunjoi, a dakwa mamwai i wash amen ima i shuya ɓursu.’ 21Shak ta andi, maɗufal ima ma wa cwai ti han amen, u mai ni ma tikul, ni ma cwai na kyel andek. 22Al i Maɗufal mayus wa wa, fota ngga' ima DeeƁwe lak ta, shak ta andi mwe i maɗufal ima cu han amen.”
23Unai si fur luli ta ɗiyai nyai, “Awe ma wa masti mai i maɗengi na saa kanti ya?”
Uɓet Tasi Mbaitat
24Unai uɓet ti lang ta saa ti fe i ro ames nyai, awe ma wa mute i mbai na saa yusti ya. 25Unai Yeso nyus, “Kaya i ramam si masi fota a sin siti mupwet i ɗufal ta ra ames. Ɗak mbayai ima si ti kunggwal i kaitat, si lai haisus ii som i ɗing ti shum i ɗufal.” 26Ka hun hu te andi kwa. Amui mai, mbai u te fota mavaati, makaitat na saa yuti u te fota yere. 27Awe ɓin mbaitat ya? A maɗufal ima te amun cwai ti cwa, ahun a yere ma masti ro ya? A maɗufal ima te amun ta kyel i cwai ti cwa kwani? Unai i na saa yuti fota yere ma kolsu cwa.
28“A hun hu te akul hu yin ti njeng tasi shak shum ima i wo. 29Fota ngga' ima Deen fan kaitat ta, yin hwak i fu kaitat ti, 30ɓurti hu cu, hu wo akul hu yin na kaitat amen. Hu wa mute tasi kunggwal, hu wa tot ti gung hure mulang apil i Isar'ila ɓur.
Yeso Lak Ɓwinggil i Pita
(Mat 26:31-35; Mak 14:27-31; Jwn 13:36-38)
31“Siman, Siman! Shatan lul ɓa u mba ha, u cinjaka ya. 32I fwal DeeƁwe ɓursa, Siman, ɓurti kan fati mwawei a sa ti fur. Myan ima ha humkyel, ha ha' shuna fit ha fas njeng.”
33Siman matussi ni, “A Deembai, i fa haisun ɓa i wa mano' akul hu ha, na a mot ku mot akul hu ha!”
34Yeso nyus, “I laksa, Pita, ha wa ɓwingil sa ataat nyai ha shangun kwa, ɗak korong tutol.”
Mala i Cef, Rukul hu Awal
35Unai Yeso lul fe muro ames ni, “Myan ima i ro hu kaciwa' cef, hu rukul, hu cwa, hu kpakasak, hu dun ɗama haa?”
Si ni, “Ni dun ɗama kwa.”
36Unai nyus, “Mwashi maɗufal ima mati mala i cef u zan, ta rukuli hwak. Na ha mati awal kwa, ha juwil fagin asa ya ha juwil ti andek. 37I laksu, a kpang findel mai u hya na hai yunti, ‘Si futus hu som i masti mafwashi.’#22:37 Ɗing huni hwak: Ish 53:12. Angga'i nai aɗeng ima si worong na hai yunti a kpang u hya. Hei andi, aɗeng ima si worong na hai yunti ma hya mwashi.”
38Unai fe i ro ames si ni, “Ɗingai, a Deembai, awal mii a apil.”
Unai yis nyus, “Ndok andi.”
Yeso Fwal DeeƁwe ta Fwere i Yitat i Mbar
(Mat 26:36-46; Mak 14:32-42)
39Unai Yeso lang ya ta ngga' ima mana ti masani ta, ɗu ta Fwere i Yitat i Mbar, fe i ro ames si wa tifai. 40Myan ima ru ta kyeli, lakus ni, “Fwal hun DeeƁwe ɓurti kandok hu fur ta amba wi.”
41Unai yis her ta wei ti sin ndyong, unai shui mafwaran fwal DeeƁwe ni, 42“A Dee, na ha ɓwet, ha'a yun cunjo ti shum moti ya. Shak ta andi, a ti ɓweti amen kwa, hona ɓa u te a ɓweti ama.”
43Unai malu' ta fit pwak ya ta kyeli ɓursus fas njeng. 44Ɓurti ma hal ti kinggat i shum hyang, hum fwal ti DeeƁwe fwet, taa fota wash yis ndyaf ta fisha.
45Myan ima luk fit ta fwal ti DeeƁwe, unai humkyel ta kyel i fe i ro ames, wisus sin yus ɗarak, lo' ames nungus ɓurti kikyawat na mulwat. 46Unai lulus ni, “Ami kin hu yu ɗarak ya? Luk hun fit hu fwal DeeƁwe ɓurti kandok hu fur ta amba wi.”
Si Ka' Yeso
(Mat 26:47-56; Mak 14:43-47; Jwn 18:2-11)
47Yis saa ti findel, ɗufal si pwakus hai. A Judas Iskarioti andek ta saa ti hure mulang apili, yis ta wei kofsus fisel. Unai hyer ta nggas ti Yeso ɓa wo kapak ames ti to'. 48Unai Yeso lulus ni, “Judas, a ha hama fati Al i Maɗufal ti woti kapak haa?”
49Myan ima fe i ro i Yeso si ɗing aɗeng ima ma wa mufur, si ni, “A Deembai, ɓa ni mas ro ti awal aminin haa?” 50Unai andek ta saa yusti fet mwal ti ucwa ti yere i mbai i makocok ya.
51Yeso matussi ni, “Hona! Ka hu hum maas ti mai kwa!” Unai ngge' mwal ti maɗufali, fas cala.
52Unai Yeso lak mbayai i kocokak, hu mbayai i som i ɗing ti Wur i DeeƁwe, hu kaya, ima si yes ɓursus, nyus, “Ami kin hu yes ka' sun ti awal i ɓwol ta gundulal i yitat, fota yin a asher ya? 53Ngang ima akul hu hun ta wii Wur i DeeƁwe, ami kin hu ka' sun. Mwashi a myan amu hu i kaitat i maɓing.”
Pita Ɓwinggil Shang ti Yeso
(Mat 26:57-58; Mak 14:53-54; Jwn 18:12-18)
54Unai si ka'us, si watus ta wur i makocok mbai. Pita kolfai ta maleng. 55Myan ima si lu' man ta taya i wuri sin hali akul, Pita hwak te amun ta saa yusti. 56Yamwan nin tima ti mii yere ti ɗing Pita amun ta fo i man, ti ɗingus fo ɗak ti ni, “Maɗufal mai hwak ma akul hu Yeso!”
57Pita ɓwingil nyut, “Halshii! Yin i shangus kwa.”
58Takfai ti andi, maɗufal nin ɗingus ni, “Ha hwak a andek ta saa yusti.”
Unai Pita matussi ni, “Halai! Ayin kwa.”
59Takfai ti shitam andek nin yes ɓweng sai ni, “A awei, maɗufal mai ma akul hu Yeso, ɓurti yis a ma Galili.”
60Pita matussi ni, “Halai! I shang aɗeng ima ha laki kwa fweng!”
Myani yis saa ti findel, unai korong tutol. 61Deembai hatat tifai ɗing Pita fo. Unai Pita mbe' findel ima Deembai lakus ni, “Ha wa ɓwingil sa ataat nyai ha shangun kwa, ɗak korong tutol.” 62Unai lang ya ta saikyel kawa fwet.
Si Mas Yeso Gbaf Hai
(Mat 26:67-68; Mak 14:65)
63Som ima si fas ro i ɗing ti Yeso, si lang masus gbaf hai si ndashus. 64Si vos shishat ya, si nyus, “Laka nin findel i mashit! Awe paha ya?” 65Si lakus findelal i gbaf hai hyang.
Yeso ta Wei i Suɓut i Kaya
(Mat 26:59-66; Mak 14:55-64; Jwn 18:19-24)
66Ti ɓwai i mwen, Suɓut i Kaya si shwai, hu mbaiyai i kocokak, hu som kofiti si anggut hai, unai si yes ti Yeso ta mabel ames. 67Si lulus nyai, “Laka nin, a ha ha mii Kristi haa?”
Yeso matussi ni, “Na i laku, hu wa fati mwawei kwa. 68Na i lulu lul, hu wa laksun ti kwa. 69Nasi mwashi yes wei, Al i Maɗufal ma wa mute ta ra i ucwa i DeeƁwe mambaitat.”
70Unai shak asussi si lulus nyai, “A ha mai, ha mii Al i DeeƁwe haa?”
Unai matussi ni, “Hu lak kiga', ayin.”
71Unai si ni, “Anggi findeli hu ɓweti hu hali hwak ya? Ka hali ta fo ames ndai.”
Právě zvoleno:
Luka 22: AlisIRonNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Wycliffe Bible Translators, Inc. and © The Nigeria Bible Translation Trust 2018
