Luka 15
15
Kaani si Tutwi Tima ti Fot
1Mwen nin ndai, som i mati cef i wufen hu “som mufwashani” si yes ɓa si hal aɗeng ima Yeso ma laki. 2Unai Farisiyawa hu som i kofti anggut si rumung nyai, “Maɗufal mai zan haisus i mwes i som mufwashani sin cwai ti cwa akul.”
3Unai Yeso lakus kaani mai, 4“Na ɗeng amu yis ti tutwai ndik andek, ɗak nin andek ti fotut ta saa. Ma wa honti hure karfu' tau karfu'i, u wa far ti tima ti foti yes myan ima wis sut hoo? 5Na wisut, ma wa jakak u ha' ta si jakala, 6u wa ti wur. Ɗak lai myayus hu som i mute akul u nyus, ‘Yehun hu von masti jakak, ɓurti i wis tutwi tima ti fot.’ 7I laksu, si wa jakak ta fit tasi maɗufal andek ma mafwashi ima fwal shwaiya, ɓin som muɗesi hure karfu' ta karfu'i ima si far shwaiya kwa.
Kaani Si Cef ima Fot
8“Ahun na mbor nin yit ti cef i ugbwirik mupeli hure, ɗak andek fot ta saa, ti wa hol ti man ti fyal wuri ya ti far yes myan ima ti wisi kwa haa? 9Na ti wisi, ti wa lai ti myayut i mute akul ti nyus, ‘Yehun hu von masti jakak, ɓurti i wis cef amen ima fot.’ 10I laksu ma wa mute ii ɗama i jakak i som lu' i DeeƁwe myan ima ma mafwashi andek hatat.”
Kaani Si Al ima Fot
11Yeso cu wei ti findel ni, “Ai maɗufal nin yis ti fe apil muryai. 12Al mavaati lak dees ni, ‘A dee, i ɓweti ɓa ha fan kop amen na saa ti sufat ama.’ Unai dee hi kar fe ames sufati ya.
13“Takfai ti mukonan vaat, al mavaati suɓut ɗam ames shak lang wis ashwa nin ta maleng. Ta kyeli, for sufat amesi ya si roi gbya' akul hu fe i se. 14Takfai tima for sifati ya shak, unai hwem manjengi ndak ta ashwai shak, unai lang jyel. 15Unai wa far ro ta kyel i maɗufal nin ta ashwai, yis maɗufali tukus ta kyel ima nggish ames si ta, ɓa u fayus cwa. 16Far ɓa u cu cwa i nggishi ta wet, ɗeng fas kwa fweng.
17“Ɗak ambe' ames humkyel ta lo' ndere, unai ni, ‘Wa', som i ro i deen ta wur sima gwishil ti cwa, ɗak ima wa mot ti hwem nati! 18I wa honti kyel mai i wa kyel i deen i nyus, A dee, i mas DeeƁwe mafwashi, i masai hwak. 19I ndok ɓa si hum laisun ii al ama kwa. Kina na ɓa i te fota andek na saa ti som i ro ama.’ 20Unai lang ka' fisel wa kyel i dees.
“Myan ima yis ɗiri ta maleng dees ɗingus, ɗing shum ames, unai lang ti tital wa vupus ti jakak.
21“Unai ali nyus, ‘A dee, i mas DeeƁwe mafwashi i masai hwak. I ndok ɓa si hum laisun ii al ama kwa.’
22“Unai dees lai yarai ames ni, ‘Yehun kang ti fagin muɗesi hu ru'us si, hu kinus shitam ti foti ra, hu ru'us kpakasak. 23Ka' hun randong maɗesi malo' ani hu lef, ka ɗi got ka jakak. 24Ɓurti al amen mai ai motus, u mai pwet, ai fotus, u mai humkyel.’ Unai si fur ɗiti gotti.
25“Si myani, al mambai ames yis ta yang. Humkyel ru ta nggas ti wur, unai hali sin cut ti agwir ta lang ti adori. 26Unai lai andek ta saa ti yaraiyi, lulus ami ma wa na wuri ya. 27Yerei matussi ni, ‘A nusa mavaati humkyel, unai dya kin si lef randong maɗesi malo' ani, ɓurti nusa humkyel na wur cala ɗyokokok.’
28“Unai al mambaiyi mas futut fwet nggwes i mulang ta wuri. Unai dees lang ya, fwalus ɓa u ka agung u lang ta wuri. 29Unai lak dees ni, ‘Ɗingai, shak wilyal ima yin masa ro fota yere, kaciwa' i nggwen ti ro nin ima ha kinun masi. Shak ta andi ha fan foti shiken nin ɓa i lef i ɗiti got hu myayun kwa. 30Shak ta andi, myan ima al ama mai humkyel, yis ima wa cu sufat ama ya ta kyel i afwar hu arof fe i se, ha lefus randong maɗesi malo' ani!’
31“Unai dees nyus, ‘A al amen, ha ma akul hu yin ngang, shak aɗeng ima i mati, ama. 32Ɗat ka jakak, ɓurti nusa mai ai motus mwashi pwet, ai fotus mwashi humkyel.’ ”
Právě zvoleno:
Luka 15: AlisIRonNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Wycliffe Bible Translators, Inc. and © The Nigeria Bible Translation Trust 2018
