Jwon 2
2
Kunggo ta Kana i Galili
1Mwen mutaat si mas got i kunggo ta Kana i Galili. Nasus ti Yeso yit ta kyel i gotti. 2Si lai Yeso hu fe i ro ames wa gotti hwak. 3Myan ima ham i manggɓu'i mbitus, unai nati Yeso ti nyus, “Ham i manggɓu' i som mii mbitus.”
4Unai Yeso nyut, “A naa, ami kin shi dulsun na aɗeng mai ya? Myan amen tuu ndok kwa.”
5Unai nati Yeso ti lak yaraiyi ti ni, “Mas hun shak aɗeng ima laku.” 6Ta anggasi ɗya i afyai i ham taan, sin ta ima Ju si saa ti haisus ya ngang ɓa si ha' asum i DeeƁwe fit sin ta kyeli, andek ti cwai ɗya hure apil yes hure ataat. 7Unai Yeso lak yaraiyi ni, “Hya hun shweret mii ti ham,” unai si hyai ti ham kyalak.
8Unai nyus, “Dya' hun hu kol dee magoti.” Unai si dya' si kolus. 9Hami hatus ii ham i manggɓu', unai dee magoti hal ham ima hatus ii ham i manggɓu'i. Shang kyel ima si yes ti ham i manggɓu'i ta kwa (sin ima si nang hami si shangi). Unai lai ima si got amesi si ɓwaiyi, 10ɗak nyus, “Ɗufal si twaang dya' ti ham i manggɓu' ima ɓin mimyat, mwalmwat si woya, ɗak si yes ti ima toikyel na takfai. Unai ha ha fot ti ham i manggɓu' maɗesii ya yes mwashi!”
11A ɗama i shok na fo i bya' ima Yeso masi nai, masi ta Kana i Galili kof mbaitat ames, fe i ro ames si fa mwawei wa kyel ames.
12Takfai ti andi ɗor ta Kapanahum, yis hu nasus hu shunus muryai hu fe i ro ames. Si mas mukonan ndyong ta kyeli.
Yeso Sapa Wur i DeeƁwe ya
13Myan i Got i Pissihai i som Ju kat ndyong, Yeso ɗuya ta Yerushalima. 14Ta taya i Wur i DeeƁwe wis ɗufal sin juwil ti randwang ya, hu tutwai, hu boɓwob, hu som i shen ti cefaf hwak sin amunan si kikyal i mute ames. 15Unai lom ucwereng ti mwinggi', ɗak nggaas ya shak ta Wur i DeeƁwe, ta tutwaiyi hu randwangi. Ɓaas ti cefi ya, ɗak gu'ti tebur amesi ya. 16Unai Yeso lak som ima si juwil ti boɓwob ya nyus, “Rang hun ti mii ya nanati! Ka hu hat ti wur i Deen i kyel i juwil kwa!”
17Ti ɗing ti mai aɗengi, fe i ro i Yeso si mbe' ti findel ima si worong ta kaada i DeeƁwe nyai, “Matɓwet i maas ti wur a mai ma wa cwaisun fota man.”#2:17 Ɗing huni hwak: Nak 69:9.
18Unai mbayai i Ju si lul ta Yeso si ni, “Anggi ɗama i shok na fo ha wa masi, ɓa u kof nin nyai ha ndok si ɗamam ima ha masi mii ya?”
19Unai Yeso humuskyel ti findel ni, “Nggul hun Wur i DeeƁwe mai ya, i wa ha'i fit takfai ti mukon ataat.”
20Unai mbayai i Ju si lulus si ni, “Si mas wilyal hure ɓaras tau taani sin ta' ti Wur i DeeƁwe mai! Ɗak ha ha nyai ha wa ha'i fit takfai ti mukonan ataat haa?” 21Wur i DeeƁwe ima Yeso findel ii hai a lo' ames. 22Takfai tima Yeso lukus fit ta fiyai, fe i ro ames si mbe' aɗeng ima ai lak, si fa mwawei si worong ima mata kaada i DeeƁwe, hu aɗeng ima Yeso lak.
23Myan ima Yeso yis ta Yerushalima si mukonan i Got i Pissihai, ɗufal hyang si fa mwawei si yis hai ɓurti si ɗing ɗamam i shok na fo ima masi. 24Shak ta andi, Yeso fa haisus ta rai ɗufali kwa, ɓurti shang ɗufali ya shak. 25Ma far ti shang ti ngga' ima maɗufal mata kyel i ɗeng kwa, ɓurti shang aɗeng ima mata mulut i ɗufal shak.
Právě zvoleno:
Jwon 2: AlisIRonNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Wycliffe Bible Translators, Inc. and © The Nigeria Bible Translation Trust 2018
