Yʉanɨ 5

Yeso u꞉hiiso mombi akʉ yapuu yɨ Betesaida

1Mbise ɔngɔ, Yeso ambʉsa anʉ Yelusalɛma akʉ ʉmbɔ wʉ Ɓayuda. 2Amati ʉ gʉlʉ ngiinanɨ wʉ Yelusalɛma, tinene nʉ umongu ngua ɓi꞉nye usoko ɓɔ umongu wʉ Ɓakɔndɔlɔ, yi꞉nye nʉ yapuu mɨngana iya ɓi꞉nye soko nʉ ʉɗaɗa wʉ ɓaɨbalanɨa ɓɔ Betesaida. Yapuu ngiinanɨ yi꞉nye nʉ ɓabasa ɓɔkɔ. 3Ɓombi ɓʉ ɓakwisikiso ɓaja ɓi꞉nye ɓukweikie amati ʉ ɓabasa ngiɓʉnanɨ. Yi꞉nye ɓombi ɓɔɔ ɓuchwie mesu, ɓombi ɓʉ mɨdɛɛ nʉ ɓajakɛsɨ. [Ɛɓɔ kʉ ɓuɓomu ɓi꞉nye kyɨa kusiɓo ɓɔ mepo kudimba, 4jʉ malaika wʉ Makʉʉɓɨɨ mungono wi꞉nye ijo amati ʉ yapuu ngiinanɨ kʉ gomu, kudimbiso mepo. Iya mepo ki꞉nye dimba, mombi ʉ kweso ngia i꞉nye kpanga ijo, abana ndʉ i꞉nye kyɨa nʉ kweso tɨmanɨ kititi, i꞉nye hɨa tʉkʉ hɨaa.]

5Ati ʉ ɓombi ɓʉ ɓakwisikiso ngiɓʉnanɨ, yi꞉nye nʉ gue mʉngana iya i꞉nye nʉ kweso amati ʉ mugo makumi kaatʉ nʉ ʉɓagɨna. 6Iya Yeso a꞉mʉna nayɔ 'ʉkwaɨ, nʉ kupimiso ɓɔ anʉ kweso amati ʉ mugo maja, ambumuɓukuo ɓɔ: « Ajʉ wakʉkʉnda kʉhɨa ɓiɛ? » 7Mombi ʉ kweso ngiinanɨ ambumutisio ɓɔ: « Makʉʉɓɨɨ, ɛmɛ mambʉkɔmʉ nʉ mombi ngia anano amati ʉ yapuu ati ngia mepo kaadimba sa‑ɔɔ. Iya maakanyo‑sa ɓɔ mʉsa kununio amati ʉ yapuu, tʉkʉ mombi ngakɔmɔ aanatɨnganɨa‑sa pɛɛ. »

8Yeso ambumusigio ɓɔ: « Maa! Chɨka ɓʉkwaɨ ngiɓʉsɔɔ wambufaniso kɨndaka. »

9Tʉkʉ nɨma ngiinanɨ, mombi ngiinanɨ ambʉhɨa, ambʉchɨka ɓʉkwaɨ ngiɓangɔ ambufaniso kɨndaka.

Isiinanɨ yi꞉nye ɓisi ɓʉ humuo ngiɓa ɓʉ Ɓayuda, 10kʉ ɓwanɨ, Ɓayuda ɓambʉɓɨa mombi ngia i꞉nye ʉ꞉hɨeni ɓɔ: « Ɓʉɓʉnɨ ya ɓisi ɓʉ humuo ngiɓʉndɛsʉ Ɓayuda, nʉ kʉkpatanakɨa nʉ ʉpanʉ nguʉndɛsʉ, wʉ꞉kwananakɔmʉ piɛ kufuɓuo ɓʉkwaɨ ngiɓʉsɔɔ ɓʉɓʉnɨ. »

11Ambuɓutisio ɓɔ: « Mombi ngia u꞉nahiiso, kʉ ɛyɔ kʉ u꞉nasigio ɓɔ mʉchɨka ɓʉkwaɨ ngiɓʉsɛmɛ mambʉkɨndaka. »

12Ɓambumuɓukuo ɓata ɓɔ, « Anɨ‑zʉ iya u꞉nasigio ɓɔ chɨka ɓʉkwaɨ ngiɓʉsɔɔ wambʉkɨndaka? »

13Ɨkyɛmɨngana, mombi ngiinanɨ a꞉hɨa a꞉mbɨakɔmʉ ɓɔ anɨ pɛpɛ‑zʉ ɓʉ kpɛ a꞉muhiiso, jʉ Yeso i꞉nye uimbeni ati ʉ ungbutu wʉ ɓombi ngiɓa ɓi꞉nye ananɨ.

14Mbise ʉ wati ɗɛkɛkɛ, kija Yeso a꞉gbʉka mombi ngiinanɨ amati ʉ ɨkáa yɨ Asʉɓɨɨ, ambumusigio ɓɔ: « Ʉna‑zʉ, ɨtakɨ‑takɨ ngiakɛ wʉ꞉hɨa hɨaa. Kʉ ɓwanɨ, wɔɔkyɨa tii ɓata ɓʉɓɨɓɨ ambʉ moni kɔɔ ɓʉkaɨ kʉɓaa ikakɛ kɔɔnakyɨakɔmʉ ɓata. » 15Mombi ngiinanɨ ambʉsa kʉɓɨa ɓangama ɓʉ Ɓayuda ɓɔ kʉ Yeso u꞉muhiisoo.

Ɓʉ꞉napɨa Yeso nʉ 'ʉkɔmbɔ

16Kija Ɓayuda ɓa꞉faniso hataka Yeso nʉ lɨngbaa lʉ moni, jʉ u꞉hiiso mombi akʉ ɓisi ɓʉ humuo ngiɓʉndaɓʉ. 17Yeso ambuɓutisio ɓɔ: « Tidoo ngiasɛmɛ aakyɨa kuu wati kʉ uɓomu, iikwa ɛmɛ makʉkyɨa engo kʉ ɓwanɨ. »

18Aka ekoo moni ngika Yeso a꞉ɓusigio, Ɓayuda ɓi꞉nye tiga kʉhata nʉ angu ɓɔ ɓʉmʉwa tʉkʉ wanɨ, chʉkɔmʉ tʉkʉ jʉ uɓundo ʉpanʉ wʉ ɓisi ɓʉ humuo, ɨkyɛmɨngana jʉ i꞉nye usigeni ɓɔ Asʉɓɨɨ a Ɨsɛ, nʉ kʉnana ndʉ gʉ a ngbanga nʉ Asʉɓɨɨ.

Mwana ʉ Mombi anʉ ʉpanʉ kʉtɨna 'ʉkɔmbɔ

19Kija Yeso a꞉ɓutisio ɓɔ: « Tʉkʉ kingono maninu kusigio ɓɔ: Mwana ambakakyɨa ɨkyɛmɛ gʉkʉ mɨngana tʉkʉ nʉ itungwio ngiangɔ makʉɔngɔ, ɨkyɛmɨngana aakyɨa tʉkʉ ɨkyɛmɛ ngia aana ɨsɛ kʉkyɨa engo. Nʉ ɨkyɛmɛ kʉ iɓomu ngia Ɨsɛ ʉ Mwana aakyɨa, iikwa Mwana aakyɨa.

20Jʉ Ɨsɛ ʉ Mwana aakʉnda Mwana angɔ kʉndanɨ, ambʉmʉpana ɨkyɛmɛ kʉ iɓomu ngia ɛyɔ makʉɔngɔ aakyɨa. Nʉ a꞊mʉpana sina tiga kuu ɨja nadɨndɨ kʉɓaa iyakɛ, aka ekoo ngia ɓɔ yɨ꞊nɨmbangia mbangɨaa. 21Jʉ ngbanga kʉndʉ iya Tidoo aajʉkaniso‑ɔɔ ɓombi akʉ ingyo naɓɔ kutuiso ʉɓɨɨ kʉtɔ, Mwana aanzo ɓombi ʉɓɨɨ ngbanga kʉ ɓwanɨ, akʉ ɓiga ngiɓa aakʉnda naɓɔ kunzo engo. 22Nʉ nadɨndɨ, yakusigo ɓɔ Tidoo ambakatɨna 'ʉkɔmbɔ wʉ mombi gʉkʉ mʉngana, ɨkyɛmɨngana a꞉nzo Mwana angɔ ʉpanʉ kʉ uɓomu wɔɔ tɨnɛ 'ʉkɔmbɔ wʉ ɓombi, 23aka ekoo ngia ɓɔ ɓombi kʉ ɓuɓomu ɓunzo Mwana ɨbɨba ngbanga kʉndʉ iya ɓaanzo‑ɔɔ Tidoo. Gwa ngia ambakanzo Mwana ɨbɨba, ambakanzo Tidoo ngia a꞉mʉtʉma ɨbɨba kʉ ɓwanɨ. 24Tʉkʉ kingono, maninu kusigio ɓɔ mombi ngia aakɔ moni ngikʉsɛmɛ nʉ kʉbaya mombi ngia a꞉natʉma, a꞊nyɨa nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá. Mombi ngiinanɨ ɓambʉkʉtɨna tii 'ʉkɔmbɔ nguangɔ, ɨkyɛmɨngana ʉɓwanaka akʉ ingyo ambʉnyɨa tiga nʉ ʉɓɨɨ. 25Tʉkʉ kingono, maninu kusigio ɓɔ wati wakʉka, nʉ ɨtakɨ‑takɨ ngiakɛ wati wɔngɔ wa tiga kʉ ʉndanɛ, ɓombi ngiɓa ɓa꞉dʉka ɓa꞊kɔ sina iyo ngia yɨ Mwana ʉ Asʉɓɨɨ, nʉ ɓombi ngiɓa ɓa꞊ɨkɔ ɓaɓio sina kʉkʉʉ. 26Kʉ ɓwanɨ, kʉndʉ iya Tidoo a‑ɔɔ nʉ ʉɓɨɨ amati angɔ, ɛyɔ Tidoo a꞉nzo tiga Mwana ʉɓɨɨ amati angɔ ngbanga kʉ ɓwanɨ. 27A꞉nzo Mwana ʉpanʉ wɔɔ tɨnɛ 'ʉkɔmbɔ wʉ ɓombi, jʉ ɛyɔ a Mwana ngia ʉ Mombi. 28Moni ngikʉnanɨ kɔɔnɨmbangɨakɔmʉ, jʉ yaɓio sina nʉ wati mungono, uwa ɓombi ngiɓa ɓa꞉dʉka kʉ ɓuɓomu iɓa ɓa amati ʉ manzaʉ, ɓa꞊kɔ sina‑ɔɔ iyo ngiangɔ, 29kija ɓa꞊ɓʉa akʉ manzaʉ ngikʉndaɓʉ. Ɓombi ngiɓa ɓa꞉kyɨa ɓuɗo ɓa꞊jʉkana akʉ ingyo, ɓambʉnyɨa tiga nʉ ʉɓɨɨ, ɨkyɛmɨngana ɓiga ngiɓa ɓa꞉kyɨa ɓʉɓɨɓɨ, ɓa꞊jʉkana akʉ ingyo ɓambʉfanɨa tiga akʉ 'ʉkɔmbɔ. »

Tʉkʉ Yeso kʉ nangana aakyɨa ɓʉkʉnda ngiɓa ɓʉ Ɨsɛ

30Ɛmɛ mambʉkʉkwanana kʉkyɨa ɨkyɛmɛ gʉkʉ mɨngana nʉ itungwio ngiisɛmɛ makʉɔngɔ. Maatɨna 'ʉkɔmbɔ kʉkpatanakɨa tʉkʉ nʉ moni ngika Asʉɓɨɨ aanasigio, nʉ 'ʉkɔmbɔ nguʉsɛmɛ wa ngbingbii. Jʉ mambakakyɨa ɓʉkʉnda ngiɓʉsɛmɛ makʉɔngɔ, ɨkyɛmɨngana maakyɨa tʉkʉ ɓʉkʉnda ɓʉ mombi ngia a꞉natʉma.

Ɓʉɓʉɨya Yeso ɓʉtɛmʉ

31Ndʉ kʉ ɛmɛ maɓio kʉɓʉana ɓʉtɛmʉ ɓʉ moni ngikʉsɛmɛ makʉɔngɔ, ɓʉtɛmʉ ɓɔngɔ ɓa tʉkʉ ɓʉ yakanaka. 32Ɨkyɛmɨngana, yanʉ mombi nga kɔmɔ iya anɛmɛ kʉɓʉɨya ɓʉtɛmʉ, nʉ makʉmbɨa ɓɔ ɓʉtɛmʉ ɓɔngɔ ɓa ɓingono. 33Inu na꞉tʉmɨa Yʉanɨ ɓombi, ambʉngaka ɨsaʉ ekoo ʉ ingono. 34Akʉ ɛmɛ, chʉkɔmʉ mombi ʉ ɨtaka a꞊naɓʉɨya ɛmɛ ɓʉtɛmʉ, ɨkyɛmɨngana makʉyaka moni ngikakɛ tʉkʉ aka ekoo ngia ɓɔ inu nyɨeni nʉ ɓʉhɨa. 35Yʉanɨ i꞉nye ngbanga ndʉ wanga ngua waaɗɨtɨa nʉ pʉya mʉa, kija inu na꞉kwa ɨgyagya ekoo ɔngɔ kʉ kwanɨ akʉ wati ɗɛkɛkɛ. 36Ɨkyɛmɨngana, ɓʉtɛmʉ ngiɓʉsɛmɛ ɓa ɓaja nadɨndɨ kʉɓaa iɓa ɓʉ Yʉanɨ. Jʉ kuu ngia ɛmɛ makʉkyɨa engo, kʉ Tidoo a꞉natitio ɓɔ mʉ꞉ɨndaniso. Nʉ kuu ngiinanɨ ya kʉ kʉpananiso ɓɔ tʉkʉ Tidoo a꞉natʉma. 37Tidoo ngia a꞉natʉma anɛmɛ kʉ kʉɓʉya ɓʉtɛmʉ. Inu nambʉkɔkɔmʉ sina iyo ngiangɔ, nʉ nambʉmʉnakɔmʉ sina ɓɔ a ndʉtʉ tanɨ. 38Ɨsaʉ ngiangɔ yambʉkɔmʉ amati ʉndɛnʉ jʉ inu nambʉkɔmʉ kʉbaya mombi ngia ɛyɔ a꞉mʉtʉma. 39Inu naakpɨngba Mubio kʉ Asʉɓɨɨ makwaa kʉ muɓomu jʉ itungwio ngiindɛnʉ ya ɓɔ nɨngbaa ngiinanɨ na꞊nyɨa nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá. Ʉna tɔ, tʉkʉ kʉ Mubio mʉngana ngikʉnanɨ kanɛmɛ kʉɓʉɨya ɓʉtɛmʉ. 40Ɨkyɛmɨngana, inu nambʉkɔmʉ kʉkʉnda kʉka andɛmɛ aka ekoo nyɨa nʉ ʉɓɨɨ gbagba.

41Mambakahata ɨbɨba kʉʉngwa ɔɔ ɓombi. 42Ɨkyɛmɛ ngia mʉna amati ʉndɛnʉ ya ɓɔ, nambʉkɔmʉ nʉ ɓʉkʉnda akʉ Asʉɓɨɨ amati ʉ mɨtʉma ngiindɛnʉ. 43Ɛmɛ ma꞉ka akʉ ino yɨ Tidoo ngiasɛmɛ, nambʉyaa nɛmɛ kʉjananɨa. Ɨkyɛmɨngana, ndʉ mombi nga kɔmɔ aka akʉ ino yangɔ makʉɔngɔ, inu namʉjananɨa tʉkʉ jananɨaa. 44Inu nakʉkʉnda kʉnyɨa nʉ ɨbɨba tʉkʉ ati ʉndɛnʉ, ɨkyɛmɨngana nambakahata kʉnyɨa nʉ ɨbɨba ngia yaaʉngwa ɔɔ Asʉɓɨɨ, ɛyɔ ngia a kʉ nangana. Na꞊baya‑zʉ tiga ɨkyɨkyɨɓʉmʉ tanɨ? 45Tɔ, nɔɔyokɔmʉ ɓɔ ɛmɛ ma꞊nɨchʉngɨa apɛɛ ʉ Tidoo ngiasɛmɛ. Mombi ngia a꞊nɨchʉngɨa ya tʉkʉ Mʉsa ngia inu na꞉napɨa itungwio ekoo angɔ. 46Nʉ꞉bayeni jɛnɛ Mʉsa ambʉ́ na꞉nabaya ɛmɛ kʉ bayanɨ, jʉ ɛyɔ a꞉tɨndakɨa ɨsaʉ ekoo asɛmɛ. 47Ɨkyɛmɨngana, ndʉ nambʉkʉbaya‑zʉ Mubio ngika kʉ Mʉsa, na꞊baya tiga moni ngikʉsɛmɛ ɨkyɨkyɨɓʉmʉ tanɨ?

Právě zvoleno:

Yʉanɨ 5: BudKoya

Zvýraznění

Sdílet

Kopírovat