Matthew 15
15
Sivuliighaat Apeghtuusiit
1Taagken ilangi Pharisees‑etlu, apeghtughikayugetlu Liilightuusaneng Jerusalem‑emeng tagiluteng aaptekaat Jesus, 2“Sangameng maligsaaghteten qaatkusigatat sivunemta apeghtuusiitnun? Neghnaqneghmeggni uughtiigatut elqughulluteng apeghtuusiitnun.”
3Jesus‑em aaptekii, “Sangan elpesi qaatkigataqestiki Kiyaghneghem qelghusii maliggnaluki elpesi katam apeghtuusasi? 4Kiyaghneghem qelghusaqaa, ‘Quulvaghlukek atanllu naanllu’. Whatenllu pikaaguq, ‘Kitum alngunak atani, nalighmeng naani seghlepestaatun akuzitkegkumigu, tuqusaghqaaguq’. 5,6Iwernga elpesi apeghtughiiqusi, ‘Yugem quulvanghisaghngaagu atani nalighmeng naani whaten pikagu,’ Kayusiisaghqalguunga elpenun, iwernga tuunaanghitaqa qayughllak akequsaqegkaqaqa tuunelleqniluku Kiyaghneghmun. Tawaten pilleghpesigun pakigaqasi Kiyaghneghem Liilightuusii apalluqluki elpesi katam apeghtuusasi. 7Ukughsi piniiyugneghni! Elqughllusi whaten Isaiah‑m uuknaliqutkegkaqiisi!
8Kiyaghneq piiq, ‘Ukut yuget akuzitmegteggun quulvaghaqaatnga, nakaan ilumeggneng.
9Temngi manigughaqaatnga qayughllak apeghtuusaqaqiit liilightuusangllaqateng,
katam whanga Liilightuusaqepiglleghhiistun.’”
Yugem Nukeggnaghqusii
10Taagken Jesus‑em yulghutet tagsighluki pikii, “Nagallunga liigikitek! 11Yugem sangwaa qaneghminun kanaghtekaa nukeggnaghqingigatuq, iwernga yugem qaanghaneng aanegkaq nukeggnaghqikayuguuq.”
12Taagken maligsaaghtengita takuluku aaptekaat, “Liisimakenghisiguu Pharisees‑et anagteketen tawaten pilleghpegun?”
13Jesus‑em kiimsiqii, “Nunivagseghaq qamaglluku Atama qilagmelnguum piitesighaamangilkanga nusugyaghqaaguq. 14Avelghaqiinaghluki Pharisees‑et! Ayaakastun maghyaghqughiiqut. Yugem ayaakam ilanga ayaakaq tasluqumigu, laagwaaghmun kalefkagtaallequk.”
15Peter‑em aaptekaa, “Ungipaataghtikut, sameng pisiigwa ungipaghaaten yuget nukeggnaghqiganniketen neghegkamegteggun?”
16Jesus‑em pikii, “Elpesillu salin liigikigatsii? 17Liisimakenghisteggu sangwaa alngunak yugem qaneghminun kanaghtekaa aqsaqghwanun piiquq, taagken aanaquq yugusiineng? 18Iwernga sangwaa qamaken aanegkaq qaneghqun nukeggnaghqikayuguuq yugmeng. 19Qayughllak yugem ilunganeng seghleq sumeghtaghalleq pikaayuguuq, yugtaq, gelgaghniiq, allaniiq, teglegniiq, iqlengiqutki, seghlequuq yugneng. 20Tamaakusta nukeggnaghqikayuget yugneng, iwernga uughtughpenani neghellghem nukeggnaghqennaanghitaa yuuk.”
Aghnam Ugpeqillgha
21Taagken Jesus aghulaqegkaq tamaaken nunameng tungegkenun Tyre‑enkuk Sidon‑enkuk. 22Taawanguq Canaan‑eghmii aghnaq. Jesus takukaa akilghuumaghmi, “Kaay Ataneq, Ighnegha David‑em, nangllegyaguteqeghtinga! Panika tughneghaam iitghumaa, seghleghwaaghuuq.”
23Iwernga Jesus‑em avelghaqiinaqaa. Maligsaaghtengita takuluku kayagtaghwaaqaat, “Iqitesqigu! Maligsaaghumaamta akilghuuguq!”
24Taagken Jesus‑em pikii, “Kiyaghneghem kayagtekaqaanga Israel‑eghmiinginaghhaghnun, penniighestun iflakastun ayuqelghiinun.”
25Iwernga aghnaq tagiluni Jesus‑em sivungakun qungughtutkelluku pikaq, “Ataneq, kayusiitaghtinga!”
26Jesus‑em pikaa, “Anaggutngaaq taghnughhaat neqngit tuguluki qikminun miluuskumeng.”
27Aghnam pikaa, “Aa‑a, Ataneq, talwa yugem qikmii ifkaghqellghaneng neghaqut.”
28Taagken Jesus‑em pikaa, “Aghnaq elpek, ugpeqilleghtupigtuten! Apeghiighli piyukelleghpetun.” Tawaninginaq paniga naallghutkaq.
Jesus‑em Naallghuskanga Yuuk Uglalghii
29Taagken Jesus aghulaqegkaq tamaaken nunameng, esnengakun Naayvam Galilee‑m. Qemimun mayughluni aqumegkaq. 30Yulghuteghllaget takulaghaatkaat, tagisimiita Jesus‑em sivunganun piyugpagningilnguut, aqnightekat, ayaakat, akuzingigalnguut, ilangillu qinuyulghiit. Enkaam naallghuquqii. 31Yulghuteghllaget saghiighayukat esghapagluki akuzingigalnguut akuziyagullghiit, aqnightekat naallghullghiit, piyugpagningilnguut piyugyagullghiit, ayaakatlu esghaasagullghiit. Enkaam usuqegkaat Kiyaghnegha Israel‑em.
Jesus‑em Neghestellgha 4,000 Siipngalghiineng Yugneng
32Taagken Jesus‑em maligsaaghteni tagsighluki pikii, “Maakut nangllegyagutepigtanka qayughllak whangamnitut pingayut aghneghet, talwa neghyaghqiitut. Neghestegpenaki aghulaqesunghitanka, luuraq tumangani kayaalinayukata.”
33Maligsaaghtengita aaptekaat, “Maani kilgaani naken neqengnaqesta naamayaghqameng yulghuteghllagnun?”
34Jesus‑em aaptekii, “Naten uglaghqakaan neqekrangllalgutsi?” Kiimsiqaat, “Maaghraghvinleguut, qafsinatlu iqalluggaat.”
35Enkaam Jesus‑em yulghuteghllaget qelqii aqumuutesqelluki nunakun. 36Taagken tuguluki maaghraghvinlek neqekrangllat iqallugetlu, Kiyaghneq iqamsiqayugvikegkaa. Aavgughluki tuunegkii maligsaaghteminun enkaam uyegtekiit yulghuteghllagnun. 37Qamaglluteng neghuutkat kepsuulluteng. Taagken maligsaaghtet siipneq qerngughlluku maaghraghvinlek pasketet imiiqiit esleqaghaghluki. 38Uglaghtalangit neghuutkat yuget 4,000‑nguftut, kesutkegpenaki aghnatlu taghnughhaatlu.
39Taagken Jesus‑em yulghuteghllaget aglaghtuutesluki ellngitnun ellnga angyamun uuglluni uvitanganun Magadan‑em aglaqaq.
Právě zvoleno:
Matthew 15: ess
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.
