Johani 9
9
1UJesu vwu iluta pwu akambona umunu uvi aboswe ukuhuma mwa vańina, 2Pwu vakambutsa avakongi va mwene vakata: Vi mańisi veni atulile inongwa nuju navahotsi va mwene ulwakuva aholilwe mbosu vuvule? 3Akanda UJesu akata: Namwene uju natulili navene avahotsi va mwene navatulili. Mańa aholilwe vuvule-vule ukuta ave va kulolelamwo ukuvomba imbombo tsa mwene Unguluve. 4Uvwe upita tuvombage imbombo tsa uvi asuṅile une vwu muńi vuvule. Mańa jikwitsa ikilo pwu nujyunge nalavombemwo. 5Lino sikutsoni vwu ndili nkilunga umu vwu nene lumuli lwa kilunga. 6Vwu atsovile ili pwu akabeha amati pasi akasuga utudaba namati, pwu utudaba utu akambaka mmiho umbosu. 7Pwu akambula akata: Bihaga vwoge pakisima Siloha (kukuta “nsuṅivwa”). Pwu akabiha akoga. Akatsikwitsa ilola vuvule. 8Avene avabadiṅine nave ukutsenga avambwene sikutsoni ukudova isya kudova vwu vakata: Nda si vi uvi atamaga apa sikutsoni uvi adovaga isya kudova? 9Avange vakata: Vi jujwa, Avange vakata: Bako mańa junge vahwanine vuvule. Umwene akata: Mańa nene. 10Vakambutsa vakata: Amiho gako gadindwike ndeti? 11Umwene akanda akata: Umunu uvi vita vi Jesu vi akasuga utudaba akambaka mmiho akata: Bihaga pakisima Siloha vwoge. Lino vwu ndibye vwu ndogile pwu ndikavona ndilolola. 12Avene vakata: Ali ndaku umwene? Umwene akata: Ńage.
13Pwu vakangega kuvapalisai umunu uvi gaboswe amiho katale. 14Mańa pale pwu pasabati upwu UJesu akasuga utudaba upwu andindulaga amiho. 15Pwu avene avapalisai vakambutsa vakata: Gatengwe ndeti ukudinduka amiho gako? Umwene akuvavula akata: Ambikile utudaba mmiho, ndikoga pwu ndikalola. 16Pwu avange avapalisai vakata: Umunu uju nahumili kwa Nguluve mańa nihala usabati. Avange avajyavo vakata: Angave ali ntulanongwa pwu apelage ndeti isipelwa isi? Pwu vakadadaluka vuvule umwuvavelye. 17Vakavuja vakambutsa umbosu vakata: Uve lino upwu akudindwe amiho pwu vwita veni? Umwene akata: Une ndita nńamalago. 18Avene ava-Juta vwu vakabela ukumwidika ukuta aboswe amiho lino ivuja ilola, pwu vakavilanga avahotsi va uvi gadindwike amiho. 19Vwu vakavavutsa vakata: Uju nda vi nswambińo uvi mwita aholilwe mbosu? Ilola ndeti lino? 20Pwu vakanda avene avahotsi va mwene vakata: Ukummańa kwu tummańile ukuva vi vi nswambitu, tummańile ukuta aholilwe mbosu vuvule. 21Mańa ulwu ilola lino lwu natulumanili. Nuvi andindwe amiho namwene natummańili. Mumbutsage jujwa mańa akulile avavulage ju mwene. 22Tsitsitsi tsu vakatsova avahotsi va mwene ulwakuva vadwadaga kuva-Juta. Mańa ava-Juta vidiṅine vatye: Tungave tumbwene ujyunge umunu uvi ikumwidika ita vi vi Kilisiti vi tumumyage mumpelela. 23Tsu tsitso avahotsi va mwene vakata: Akulile mumbutsage jujwa. 24Pwu vakavuja vakamwilanga ulwavili umunu uvi aboswe amiho vakata: Ukwa unginyage Unguluve. Mańa uvwe tummańile umunu uju ukuta ntulanongwa. 25Umwene akanda akata: Nńage angave ntulanongwa. Ndikamańile kapamato kene, ndilumanile ukuta ndaboswe amiho, ndilumanile ukuta lino lweli pwu ndilola–kwu ndikamańile kene. 26Avene pwu bakavuja vakatengula vakata: Agahile ndeti nuve? Akudindwe ndeti amiho? 27Akanda umwene akata: Mańa ndivavulile ulu longotsi, pwu nuńe namupulika, pwu une mukumbutsa kiki? Evwana nuńe mulonda ukuva vakongi vamwene? 28Pwu vakanduka avene vakata: Uli nkongi va julya najyuve, uvwe tulivakongi va Mose. 29Uvwe tummańile ju Mose ukuta vi atsovile nave Unguluve, uju lweli vi natummańili ukwu ahumile. 30Umwene umunu uju akanda akata: Tsu ndidega vuvule une lweli tsitsitsi upwu mwita natummańili ukwu ahumile vwu andindwe amiho. 31Lola uvwe tummańile Unguluve ukuta avatulanongwa nikuvapulika, bako uvi ikundwada Unguluve ivomba tsitsu anogilwe jujwa vi ikumpulika. 32Upwu kyapelwagwa ikilunga natupuliki lusiku ukuta mwale umunu uvi ikundindula amiho unine uvi ahumile mbosu mwa vańina, 33Namwene umunu uvi nahumili kwa Nguluve ndili nipela kinu. 34Vakanda avene vakata: Vi vwaholilwe mbuvivi vwoni vuvule, veve vwita utuvulage inongwa uvwe? Pwu vakamumya panzi.
35Umwene UJesu akapulika ukuta vamumitse panzi pwu akaganila nave akambutsa akata: Uve nda umwidike Uńamunu? 36Umwene akanda akata: Vi aliku lino nkuludeva ndimwidikage? 37UJesu akambula akata: Nukumbona umbwene mańa uvi ali pakutsova nuve lino vi mwene. 38Umwene akata: Ndikwidika nkuludeva pwu akasana kumwene. 39Pwu UJesu akongeletsa ukutsova akata: Nkilunga umu mwu nditsile nkuvagavanya avanu, uvwu navilola ukuta valolage, avilola ukuta vavetsage vabosu vuvule. 40Tsuvakapulika avange avapalisai avali nave pwu vakambutsa vakata: Nuvwe nda tuboswe amiho? 41Umwene UJesu akata: Ngave mwale vaboswu amiho pwu ndili inongwa nandi natso. Lino lweli ulwakuva mwita twilola pwu inongwa tsikuvabadama natsijaga.
Právě zvoleno:
Johani 9: Kinga
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
New Testament in Kikinga © British and Foreign Bible Society, 1961.
