Johani 2
2
1Lino vwu galutile amatsuva gavili palitsuva lya datu pwu kwalekwo ukukwa mu-Kana nkilunga kya mu-Galilai. Na mwene uvańina va Jesu akavapwo. 2Namwene nu-Jesu navakongi va mwene vavilangile kwilya isinu sya pakukwa. 3Vwu avwene uvańina va Jesu ukuta viva pakudumukilwa amasilu pwu akambula UJesu akata: Amasilu gasilile. 4Umwene UJesu akanda akata: Tuli vuki nune nuve vi ndala? Mańa ngale ndimwene. 5Umwene uvańina akavavula avahegeletsasinu akata: Itsu ikuvavula umwene mwidikage vuvule. 6Tsalepwo inzilo tsa magasi ntanato, vavikile baho tsa kunegelela amagasi ga kwoga ulwakuva vwu lwale ulwiho lwa va-Juta, itsinge tsale pasigelelo sivili itsinge tsale pasigelelo sidatu. 7Pwu UJesu akavavula akata: Munegelele amagasi muditse munzilo itsi. Pwu vakanegelela gakadiga. 8Pwu akata: Munege lino mukampe ungavasinu. Pwu vakampa. 9Umwene ungavasinu akańwa akanotsanza amagasi agipelile masilu. Lola umwene nagamańe ukwugahumile, vakagamańa avahegeletsasinu avanegelye amagasi. Pwu ungavasinu akamwilanga untegulandala 10akambula akata mańa voni avanu vitengula ukuvasugila avajyavo amasilu amannonu, mańa vangave vagalile pwu vipyanitsa amavivi. Uve usihile amannonu usakwe lino vuvule-vule vuvule. 11Vwu akatengula vuvule-vule UJesu ukupela isipelwa sya mwene akatengulila mu-Kana nkilunga kya mu-Galilai. Mwu akivonya uvuvaha vwa mwene, navene avakongi vamwene vakamwidika.
12Pambele pwu vakika vakabiha mu-Kapelinaumu, nuvańina navalukololwe navakongi vamwene vakagonapwo padebe. 13Namwene nu-Pasa va va-Juta asike ali mbwipi, pwu UJesu akatoga ukubiha mu-Jelusalemu. 14Pwu akavona vikina mwa Tempeli avagulaga niṅambako niṅolo ningundya navikwananya indalama. 15Pwu akatola indegehe akagujanya kikava kikoti. Pwu akavaswima voni mwa Tempeli niṅolo niṅambako tsa vene, navakwananya indalama akaduda indalama nisitalati sya vene akagwisa. 16Avene avagulaga ingundya vwu akavavula akata: Mpimbe muhume natso panzi. Ińumba jya dada kwu bako ukujipela ukuva ńumba jya ligutsi. 17Pwu avakongi va mwene vakakumbuhitsa ilimeńu ilivigilwe mwa Kalata ilita: Uluvipo lwa kujivipila ińumba jyako lundilye lumalile. 18Pwu ava-Juta vakambutsa vakata: Vukutupelela ikidego kiliku ikya kukumańilamwo ukuta uli vakuvomba tsitsitsi? 19Umwene UJesu akanda akata: Mumamulage ińumba imbalatse iji une pwu ndavona ndivombile amatsuva gadatu vuvule pakuvuja pakujitsusa. 20Pwu ava-Juta vakanda vakata: Avatsengaga ińumba imbalatse iji vwu vatsengile imyaka imilevulo gini nimyaka ntanato (46) pakyańa, lola uve vwita: Ndivombaga amatsuva gadatu vuvule pakujitsusa. 21Lola umwene atsovaga ińumba imbalatse jya mmana gwa mwene. 22Pambele vwu atsukile umwu aswe pwu avakongi va mwene vakakumbuhitsa lyu lilyo atsovile napalya, pwu avene vakatsivona nitsa mwa kalata nitsu atsovile UJesu. 23Lino vwu ali mu-Jelulsalemu palitsiva ilivalatse lya Pasa pwu vakalyidika vongosu ilitavwa lya mwene vwu vasivwene isidego isyu apelaga isya kummańilamwo. 24Mańa umwene UJesu akabela nukuvidika avene ulwakuva umwene nukuvamańa avamańile nukulola nalolage kujyunge uvakumbula avanu ukuta uju vi nongi uju vi nongi. Mańa atsimańile jujwa itsili mwitumbu mmunu.
Právě zvoleno:
Johani 2: Kinga
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
New Testament in Kikinga © British and Foreign Bible Society, 1961.
