Yohani 2
2
Uvusendelo mu-Kana
1Pisiku lya vutatu vuhavʼuvusendelo mu-Kana ya muGalilayi. Wopʼunyina wa Yesu ahava pupo. 2Wope nuYesu navasundikwa vakwe vavisite kuvusendelo. 3Ilelo lwe vasovilʼipele lya mampensya pʼunyina wa Yesu ahamuvuzya ahati: Vatali nipele. 4UwenʼuYesu ahamula ahati: Tuli vuli nane nawe, we mwantanda? Shʼahavalilizyo hane hashili. 5Uwenʼunyina ahavalʼukuvavuzyʼavaletaṿintu ahati: Zyenga mwazile akuvavuzya, zye muvombaje. 6Ilelo zyali pupʼinsonta umutanda izya minzi, vavisile pupo izya kutapilʼaminzi aga kwozya, she mwe galʼamiho ga vaYuda. Zimo zyali paṿilinjilo ṿivili, zimo paṿitatu. 7PʼuYesu ahavavuzya ahati: Mwizuzye aminzi munsontʼizi. Pe vahazyizuzya nkani. 8Pʼahavavuzya ahati: Mutape lelo, mumutwalilʼumugavanyaṿintu. Pe vahamutwalila. 9Uwenʼumugavanyaṿintu ahatomʼaminzi ge gayipezilʼukuvʼipele lya mampensya. Uwene nyene atamanyile kwe lifumile (valimanyile ve valetaṿintu ve vatafilʼaminzi). Ahamwitʼumusendamwantanda, 10ahamuvuzya ahati: She vontʼavantu vakutaliha ukuvavishilʼavamwavo ipele lya mampensya lye lyinza, apene lelo penga vahozilwe pe vakuleta ilyolo. Iwe nyene wazyisilʼilyinza, uyinzilʼukuliṿumbula shinishi vovulo. 11She shimanyilo sha kutaliha muṿimanyilo ṿwa Yesu, ahashipela mu-Kana munsi ya mu-Galilayi. Mwʼahalolesyʼuvupiti vwakwe, navasundikwa vakwe vahamwitiha.
12Ulwa pisinda pe vahiha ukuvala mu-Kapelinahumu nawuyo nunyina navanino navasundikwa vakwe, vahadila mumwo amanda mansi vwelele.
Ukuzelufwʼutempeli
13Ilelo wope nuPasa wa vaYuda ali papipi, pʼuYesu ahazuva ukuvala mu-Yelusalemu. 14Mwe mutempeli ahaga nava ve vahakazyaga ninkambaku ningʼonzi ninkunda nava ve vahatananyagʼimpiya. 15Pʼahasendʼamajila, agenʼahapintanya, ihava mfwimbo. Pʼahavashimbizya vonti mwa tempeli, nazye ngʼonzi, nazye nkambaku, navatananyampiya, nimeza zyavo ahazibenula. 16Avene ve vahakazyagʼinkunda, vʼahavavuzya ahati: Simuzisende, mufume nazyo kunzi. Inyumba ya Tata ye ndali ukuyigalula ukuvʼinyumba ya kukalila mumwo. 17Mwe munumu avasundikwa vakwe vahakumbuha izwi lye lisimṿilwe mwa kalata, lye likuti: Uvwahayikungule vwa kunyumba yaho vulindya nzila. 18Ilelo pʼavaYuda vahamwamula vahati: Ukutupelelʼishimanyilo vuli she shikuti uli we wa kuvomba hanaha? 19UwenʼuYesu ahamula ahati: Mumongolʼitempeli ino, pe muliyaga mbomṿilʼamanda gatatu vwelele ukuyizenga nohavili. 20PʼavaYuda lelo vahamuvuzya vahati: Ve vahazengagʼitempeli ino, vazenzilʼamaha amashumi gane namaha umutanda, havili iwe ulivombʼamanda gatatu vwelele ukuyizenga? 21Uwene nyene ahatahagʼitempeli ya muvili wakwe. 22Ulwa pisinda lelo lwʼazyusile kuvafwe, pʼavasundikwa vakwe vahakumbuha ukuti lye lila lyʼahayangaga napala, pʼavene vahitiha nizya mwa kalata, nazyʼayanzilʼuYesu.
23Ilelo lwʼali mu-Yelusalemu pachaka wa Pasa, pe vahalyitiha ve vinji izina lyakwe, lwe vawenyi iṿimanyilo ṿwʼahaṿipela. 24UwenʼuYesu nyene ahasita nukuvitiha avene, shʼuwenʼavamanyile vonti, 25havili atahenyaga kumuntu numo ukuti ahomeshezyaje izya vantu, shʼahavangʼazimanyile wuyo zyenga zili muhati mumuntu.
Právě zvoleno:
Yohani 2: NYi1965
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Nyiha New Testament © British and Foreign Bible Society, 1965.
