Yohani 17
17
Uluputo lwa Yesu
1Lwʼayanzile zinizʼuYesu, pʼahinulʼaminso gakwe, ahenya kumwanya, ahati: We Tata, hinzilʼahavalilizyo. Umupanjʼuvupiti uMwana waho, wope nuMwana waho pʼakupanjʼuvupiti nawe. 2Shʼumupiyʼavantu vonti ukutʼavanje mwenesho, vontʼava vʼumupiye ukuti avapanjʼuvulanzi vwa shimashima, unʼuvwakwe unʼuvwakwe. 3Uvwene nyenʼuvulanzi vwa shimashima vwe vunuvu inga vakumanyile we Mulungu wa nalyoli wenewe weka, nuno wʼumutumilʼuYesu Chilisiti. 4Ine nkupiyʼuvupiti munsʼumu, imazilʼimbombo yʼumpiye iwe utili uvombaje. 5Shinishi lelo we Tata, nawʼumpanje nanʼuvupiti vwane kukwaho kunukwo, vwe nali navwo kukwaho kunukwo lwʼishili nukuva insi yonti. 6Mbakupuliyʼizina lyaho avantu vʼumpiye munsʼumu. Vali vaho, ilelo umpiyʼine, avenʼizwi lyaho valivisile mumoyo. 7Shinishi pe vamanyile ukuti zyonti zyʼumpiyʼiwe zifumile kukwaho. 8Shʼinongwa zyʼumpiyʼine zye mbapiye vuvo, avene vaziposheleye, vawenyi nalyoli ukuti mfumile kukwaho, ilelo pe vitisile izya kuti untumile wenewe.
9Ve nkuvataha vuvo ine lwe nkuputa, ntakuyitaha insi yonti ndali, nkuvataha vuvo vʼumpiyʼiwe, she vaho wenewe, 10She ṿwontʼiṿwane ṿwe ṿwaho wenewe, ṿwontʼiṿwaho ṿwe ṿwane nenene, ilelʼine ndi nuvupiti mwe mumwavo, 11Ilelʼine kwe kuva mfumile munsʼumu shinishi, avene nyene vashili vali munsʼumu. Ine nkwinza kukwaho. We Tata mufinjile, uvasunjilile mwe mwizina lyaho lyʼumpiyʼine, vope ukuti vavanje woka mwene vonti, inza she naswe tuli woka. 12Lwe nali navo munsʼumu, pe nkavasunjilila mwizina lyaho lyʼumpiyʼine. Ava vʼumpiye iwe ve mbuvatiye, atatezile numo mwe vavaliye, we mwana wa lunanjiho weka, wʼatezile ukuti zilunjihaje zizyo zye zisimṿilwe mwa kalata. 13Shinishʼine nkwinza kukwaho, ilelo zinizi nkuyanga munsʼumu, she nkuti uluseshelo lwane vavanje nalwo vope ulwa vwila muhati zyavo. 14Ine mbapiyʼizwi lyaho, mwe mumwo insi yihavapata, she vate va munsʼumʼavene, inza she nane nte ne wa munsʼumu. 15She nkulambilizya kukwaho, pe ntakuti uyefwe munsʼumu ndali, nkuti uvasunjilile kumuvivi. 16Vate va munsʼumʼavene, inza she nane nte ne wa munsʼumu. 17Uvapelaje ukuva ve vafinjile muvwanalyoli, shʼizwi lyaho vwe vwanalyoli. 18Inza shʼuntumile munsʼumu iwe, she nkonzizye nane nkuvatuma munsi. 19Nkuyifinjila pazyavo she nkuti imbe ne mputile yavo nene, vope ukuti vayipelajʼukuva ve vafinjile muvwanalyoli.
20Ilelo ntakuvalavila vuvo veka ndali, nkuvalavila navuvo venga vakwinza ukunitiha ine pizwi lyavo vuvo, 21vontʼukuti vavanje woka mwene, inza she nawe we Tata, uli mumwanʼine, nane ndi mumwaho iwe. Vope vavanje mumwitʼiswe, ilelo mwe mumwʼinsi yijende ukwitiha ukuti untumilʼiwe. 22Vwope nuvupiti vwe wamampiyʼiwe vwe mbapiye vuvo ine, ukuti vope vavanje woka mwene, inza she naswe tuli woka mwene. 23Ine mumwavo vuvo, havilʼiwe mumwanʼine, pe pakuti vavanje ve va vwila ukuva woka mwene, yope ninsi yimanyinsanye ukuti untumile wenewe, ukuti uvakunzitʼavene inza shʼunkunzite nane.
24We Tata, avene vonti vʼumpiyʼiwe, ve nkasime ukuti vope vavanje mwonti mwe ndi ine, ukuti venyʼuvupiti vwane vwʼumpiyʼiwe, shʼunkunzite he itali lwʼishilʼinsi ukwalwa. 25We Tata mugolosu, ninsi yitakumanyile, nkandʼine ne nkumanyile, vope navanava vamanyile ukuti untumile wenewe. 26Mbalanganizizyʼizina lyaho, havili nkuvalanganizya, pe vope vavanje nasho muhati zyavo ishikunzi shisho shʼukunzitʼiwe, nane ukuti mbe mwe mumwavo.
Právě zvoleno:
Yohani 17: NYi1965
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Nyiha New Testament © British and Foreign Bible Society, 1965.
