Tekang Kbuten 29
29
Kkól Jakub bè gónô mà dien Laban
1Ngang Jakub mógów efet kól bè yóm benwu fi dmata kdaw. 2Bè yó bè yóm gónón hnas, wen kokol tonen ne wen tlu bung ubiha hlilil gu hilolen abay se bè yó gónó le gel hinum kul. Uma kóm wen botu seng le bè bak yóm kokol yó. 3Ke deng le gotu stifun bè yó yó kem dumu bung ubiha, bud gel kó yóm tau mentey kul yóm botu sengen anì hinum le lu bè yó. Ke deng deng khinum le kul, omin le bud hulék yóm botu seng le du. 4Omin Jakub smólók yó kem tau gel mentey ubiha, monen, “Ó kem wè, gónó ye gu lemwót de?”
Bnalà le se, mon le, “Lemwót me bè Haran.”
5Bud snólók Jakub lu monen, “Dilô ye kô Laban, yóm ngà Nahor?”
“El, dilô me,” mon le.
6“Kmoen se kun du?” mon Jakub.
Mon le se, “Hyu se. Myó dé ngaen libun gu ditu, boluyen Rakél. Kem ubiha maen yóm nalaken yóó.”
7Yó mon Jakub mò kul, “Tolo tahà he kdaw, là deng uras ye mit kul mulék he yó kem ubiha ye, mò ye là géhél hinum kul du anì bud hótób ye lu?”
8Mon le se, “Là gbek me mò du myó ke là deng le kól bè ni yóm kdéen bung ubiha ne ke là deng lenkà me du yóm botu seng bè bak yóm kokol. Omin me yó he hinum kul.”
9Yóm igò le tolo stulón, kól bè yó se Rakél, wen kem ubiha nwiten. 10Timbow ton Jakub Rakél ne yó kem ubiha mà dien Laban tódô mógów ebè kokol, lenkaen yóm botu gel seng le du ne hinumen yó kem ubiha nwiten. 11Ominen melek ke Rakél, botong mkik bè yóm tey kligalen. 12Ne yó monen mò du, “Ou se dumu maem, yóm ngà Ribika.” Omin Rakél tódô mlóy mulék nan e tulón ke maen.
13Timbow gungol Laban se kun yóm tulón ngaen libun gbak ebè Jakub, ominen mlóy nan e senlong, tey kekefen du lelen melek du ne nwiten ebè gónóen. Timbow deng gotu tulón Jakub ke Laban yóm kdéen, 14mon Laban se, “Tahu se, hol tahu ngau uu, ssotu litô te.” Botong sbulón Jakub nô bélê le.
Kyehen Jakub ke Rakél ne Liya
15Yó mon Laban mò ke Jakub, “Balù yóm kngau kóm, là móyóe du ke laen dù sukéyem bè yóm kmoem nmò béléu. Tulónem dou ke tedu nóyóem mò sukéyu kóm.”
16Yóm Laban ni, wen lewu ngaen libun. Yó boluy yóm twogu, Liya, ne yóm twoli, Rakél. 17Yóm Liya, là gmefet ketngelen. Bong ke Rakél kun, tilob kmò klówóhen ne knóón libun 18ne du se yóm alì nóyô Jakub, yó gónón mon du mò ke Laban, “Ke hyehenem dou Rakél, hitu halayu mò nmò béléem.”
19Bnalà Laban se, monen, “Mom hyu nawahu ke hyehenu kóm Rakél senta ke hyehenu bè dumu tau. Nahi tódô nô béléu bè ni sen.”
20Tahu se, botong hitu halay Jakub mò nmò bè Laban anì gyehenen Rakél. Bè kegnóm Jakub du yóm hitu halay, lómón ke tek likóten lemwót bè yóm tey óyóen ke Rakél. 21Omin Jakub mon du mò ke Laban, “Ó Mà Dì, deng deng ne yóm kmou nmò béléem. Hyehenem dou ne yóm ngaem.”
22Tahu se, wen ken bong nmò Laban ne gotu tinoken yóm kdéen tau bè yóm benwu yó. 23Okóm bè yóm kifu yó, deng mom Liya yóm hestungô Laban ke Jakub, sundu Rakél du. 24Hyu sù Laban bè Liya yóm libun heseken boluyen Silpa mò gel dóken.
25Yó he ketngón Jakub du Liya yóm deng sentungóen, deng mwas. Ominen mógów ebè Laban ne monen mò du, “Moen de ke ni nmoem béléu? Yó gónóhu mò nmò béléem anì gyehenu Rakél. Moen se ni du ke snukatem ou?”
26Bnalà Laban se, monen, “Là kum adat du dini ke hegna hyehen me yóm twoli bè yóm twogu. 27Nahem na hangat kdeng yóm fedyan kmò tekuy ken ni, ominu yó bud hyehen du kóm Rakél. Okóm bud hitu halayem mò nmò béléu.”
28Tahu se, móyô Jakub. Ne timbow deng yóm mò ken yó, bud hyehen Laban ke Jakub yóm ngaen Rakél. 29Hyu sù Laban bè Rakél yóm libun heseken boluyen Bilha mò gel dóken se kun. 30Bud sentungô Jakub Rakél ne tey kbong nawahen du senta Liya. Ominen yó bud mò nmò bè Laban hitu halay.
Yó kem ngà Jakub
31Timbow ton Dwata yóm là kbong nawa Jakub ke Liya, yó gónón hwen ngaen ne fen laen duen ke Rakél. 32Mlutut Liya ne mngà logi. Yó monen, “Deng ton Dwata yóm gfau ne mlan bè nim ngau ni angat kenbong nawahen ou yóm tuha logihu.” Ne yó boluyen yóm ngaen sut yó, Rubén. 33Bud mlutut bè yó Liya ne bud mngà logi. Yó monen, “Deng tngón Dwata yóm kudì nawa tuha logihu dou, yó gónón bemlay du dou nim ngà ni.” Ne yó boluyen du yóm ngaen sut yó, Simyun. 34Bud mlutut bè yó Liya ne bud mngà logi. Yó monen, “Lemwót bè yóm deng kwen tlu ngau logi, déke mogot nawahen béléu ne yóm tuha logihu.” Ne yó boluyen du yóm ngaen sut yó, Libay. 35Bud mlutut bè yó ne bud mngà logi. Yó monen, “Lemwót bè yóm ngau ni hol gónóhu dmóyón ke Dwata.” Ne yó gónón moluy du Juda. Ominen yó là bud tagad mngà.
Právě zvoleno:
Tekang Kbuten 29: tbl
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2007, Wycliffe Bible Translators, Inc. All rights reserved.