Matthew 8
8
Jisu'n Mi mindam
(Mk 1:40-45; Luk 5:12-16)
1Jisu'n chingnga inphut ajuochum pha, mipui katamtak in ama nuk inleijui. 2Halli enru, takbangri karoon mi inkhat in ama koolla ahongnga chubei thoa ati, “Ocha, nang in nanazootpi inchu, keihi nanaminthiang mator.”” #8:2. Kei naminthiang ro: hiwa rirai kana mi hi inthiang mak ah in-ngaidon
3Jisu'n akut aheisoonna ama kha akatook ah ati, “Kei'n kazootjei,”” “Nang kadam etaro!”” Khawaphatak takbangri kha inthiangjei.
4Halli Jisu'n ama diang ati, “Rangairo! nang tu-inkhat diang rilpimaro, takkha siro, thiampu diang napumtak juominmuro, halli inmani diang nang nadam jei tina sakhi inpenasik; Moses chongpeii dungjuiya pesik doiphur kha juopero.”” Levi 14:1-32
Jisu'n Roman Lamkakeipa Suok Mindamna
(Luk 7:1-10)
5Halli Jisu'n Capernaum aluut pha, Roman raalmi rajakhat lamkakei inkhat in ama diang hongnga, nasanro ahongti: 6“Ocha, kasuokpa kha apang kaangkhat kathi kana khan kapoongtak ah ana ah sithei mak ah inna azaalla omjei.””
7Jisu'n amadiang ati, “Kei'n sikata halli ama kamindamsik eii,””
8“Emak ocha,””Raalmi rajakhat lamkakeipa khan aheimasang, nang in ka-inna nahongsik hi “Kei rahoi suokmong, takkha chongbit kha pero kasuok kanapa kha damte. 9Ajarchu Kei kapumtak um, ranak kanei mi inkhat nuoiya kaom ka-eii, halli kanuoiya raalmi in-om, halli hiwa mipa diang, “‘Siro!’’ katili ama asi; mikhat diang, “‘Heiwaro!’’ katili aheiwa; halli kasuokpa diang, “‘Hi thoro katili’’ ama'n atho.””
10Jisu'n hiwahi ajet pha, angak ah anuk kajui mipui ngaidiang ati, “Kei'n nangni diang inthiangnga karil, Kei'n Israel ngai karra hituk ngamna kanei miring inkhat um lamumong.
11Kei'n nangnidiang karil, nisuo tiang li niluutna tiangnga inphut mikatam khat hong-inta marwaan rengramma bubakna khan Abraham, Isaac khat-um Jacob ngaile in in-ong suomsik eii. Luk 13:29
12Takkha Rengramma kaom sik ngai khan mi ngaikha rengram makheiya aziingna munkhan indiangjuon sik eii, khawamun khan inmani chapna li hakarialna esik eii.”” Matt 22:13; 25:30; Luk 13:28
13Khawasuoli Jisu'n raalmi rajakhat lamkakeipa diang aheiti, “Na-inna siro, na-inngamna angnga nangsik intho rase.””
Halli khawa phatak khan asuokpa kha adamjei.
Jisu'n Mikatamtak Amindam
(Mk 1:29-34; Luk 4:38-41)
14Jisu'n Peter inna aheiwa pha, Peter tarpi ritun ana ah zaalmunna izaalkha aleimu. 15Ama'n akut akatook pha ritun khan amathaanjei; halli ama intheiya ama kha sepa aphut jei.
16Kholei aheitung pha, mipui in Jisu diang raikhuo kaluut angjet inheiruoi. Jisu'n kana rakip aleimindam khat-um chongnga ratha inthiangmak ngaikha aleipuutsuok.
17Pathian chongkachoi Isaiah diangnga ileiminril, “Ama apumtak in eini nana ngai kha anakhaipi khat-um niri nirai ngai anaroonpi”” ti pui tungnasik eii. Isa 53:4
Jisu Nukkajui sik
(Luk 9:57-62)
18Jisu ama mipui ngai'n inhei-um amu pha, tuidiil khamkhat tiang rakaannasik asiamruoi ngaidiang chong aleipeii. 19Dan ocha inkhat ama diang aleihongnga ahongti. “Ocha,”” “Kei nasina rakip nanuk kajuisik ka-insuuk suojei.””
20Khawapha Jisu'n amadiang aleiti, “Ram-ui ngai'n inkhur innei, halli lairalak ah wa ngai'n rabu innei, takkha Miring Sapa alu danasik munchu ommak.””
21Siamruoi karra inkhat in ati, “Ocha, kapa kaphuum kasisik hi ma-insakhet ah nazootpidiro.””
22Takkha Jisu'n ama diang aleimasang, “Kanuk najuiro,”” “Halli akathi ngaikhan inmani intheinuo ah inphuum rasu.””
Jisu'n Thipui Mindai
(Mk 4:35-41; Luk 8:22-25)
23Jisu'n rakuong inkhat suungnga aleiluut pha, asiamruoi ngai ama nuk inleijui. 24Halli enru, jetlei-theileiya tuidiil chungnga akangartak thipui inkhat ahongraangnga, rakuong kha tuithisiip in aheimakhujei; takkha Jisu chu aleizaalla alei-om. 25Khawakhan siamruoi ngai'n insia ama injuokeitheili inti, “Pumi, nasanro!”” “Keini kinthisik ejei!””
26Halli Jisu'n aleimasang, “E ngamna kasiin ngai, angsikme khatuk ningchi?”” Halli ama'n intheiya thikaraang khat-um tuithisiip kha chong apeli akhaapjei; halli pumdai ajuodaijei.
27Halli mi ngaikhan inngak ah inti, “Thikaraang li tuithisiip ngai innum achong injui, hiwahi ang mi chat me?””
Raikhuo iruoi Mi Imindam
(Mk 5:1-20; Luk 8:26-39)
28Jisu'n Gadara tuidiil ram raalkhat tiang ahongpha, ranak kanei thaanna inphut heikasuok raikhuo iruoi miring inni alei-intongpui. Inmani kha chikaomthei in ejarra, khawa lam khan tu inkhat um leisi matormu. 29Halli enru, inmani'n inkheekli inti, “E Pathian Sapa, angme nang in keini diangnga nimanuom? apha heitungmaklai nang in keini naminpoong sik niheiwabe?””
30Inmani makheiya kalaakdet ah wok rahooi katamtak inbak ah inlei-om. 31Halli raikhuo ngaikhan Jisu diang inti, “Keini nanapuut suoksik e-inchu, wok rahooi ngai suungnga keini natirro.””
32Jisu'n “Siru,”” inmani diang ati; halli inmani'n inheisuok ah wok ngai suungnga inleiluut jei. Enru, Wok rahooi rakip ngaikha insuk tuidiil pangtiang sumpalingkhang inthoa tuiya intali inthijei.
33Khawapha wok kakhaal ngaikhan intaanna khuopuiya inluut ah, akasuok thurchi rakip khat-um raikhuo in iruoi mi ngai jarra inleirilpi jei. 34Khawa jarra khuopui makheiya miring rakip in Jisu inmupui nasik inheisuokjei; khat-um inmani'n ama inmupha, inmani ram makheiya mathaan nasik inleiti.
Právě zvoleno:
Matthew 8: KHMNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
The New Testament in Kharam © The Word for the World International and NECTAR, 2021.
