Matthew 5
5
Jisu'n Chingnga Iminchu
1Jisu'n mipui ngaikha amuli chingtiang khan akaljei, halli in-ongnga ompha, Ama siamruoi ngai'n akoolla inlei-inchun, 2halli ama'n inmani kha kaminchu aphut jei:
Rawaan Katha ngai
(Luk 6:20-23)
3“Ratha ah kasuol kin-eii ti kajet ngaikha rawaan intha;
ajarchu Marwaan Rengram hi inmanita eii.””
4“Malung kapoong ngaikha rawaan intha;
ajarchu Pathian in inmani alaminhoi sik eii.”” Isa 61:2
5“Malung kadai ngaikha rawaan intha;
ajarchu nuoipilchung hi inmanita esik asuok.”” Minpkla 37:11
6“Chuon katuun sikbit ah wonchaam tuikaraal ngaikha rawaan intha;
ajarchu Pathian in inmani kha alaminkhop sik eii.”” Isa 55:1,2
7“Minriang kajet ngaikha rawaan intha;
ajarchu Pathian in inmani diang aminriang sik eii.””
8“Malung inthiang ngaikha rawaan intha;
ajarchu inmani'n Pathian kha inlamusik eii.”” Minpkla 24:3,4
9“Hoina daina sik ah chuonkatho ngaikha rawaan intha;
ajarchu inmani kha Pathian sangai tia akoisik eii.””
10“Chuonkatuun jarra inrachaak ngaikha rawaan intha;
ajarchu Marwaan Rengram hi inmanita eii.”” 1 Pet 3:14
11“Kei jarra mi ngai'n nangni innaran khat-um innarachaak, halli nangni chungnga kathamak rakip innanoon jei inchu nangni ningrawaan atha.”” 1 Pet 4:14
12Hoiru khat-um rokru, ajarchu marwaanna nangnisik chuonthoman kalok kha inda, ajarchu nangni matiangnga leikaom Pathian chongkachoi ngaikha hinthoa inleirachaak. 2 Khang 36:16; Chuon 7:52
Machi khat-um War
(Mk 9:50; Luk 14:34,35)
13“Nangnichu nuoipilchung machi kha ning eii. Takkha machi khan al makjei inchu, khawa kha angtho-thoa nimin-al sik me? khawakha kalekjuonna mi ngai keiiya intou eleiya iteii um anemna ommakjei.”” Mk 9:50; Luk 14:34,35
14“Nangnichu nuoipilchung pumpui war kha ning eii. Chingnga insak khuopui kha thup thamak.”” Jn 8:12; 9:5
15Mi ngai'n sariakmei kha inminkaili kok nuoiya damu; khawa rathuulla sariakmei kechungnga indali, innsuungnga kaom mirakip munasik inminwar. Mk 4:21; Luk 8:16; 11:33
16Kha angnga mi ngai'n nangni chountho katha kha inmuwa marwaanna kaom ning Pa kha minpaak nasik nangni war kha mi ngai maikuungnga warrase. 1 Pet 2:12
Dan jarra Minchuna
17“Kei'n Moses Dan khat-um Pathian chongkachoi ngai chongkha kaminmang sik kijuo eii tia ngaidonmaru, keichu kaminmang kijuo emong, takkha khawa ngai huui kamintung kijuo eii.””
18Ajarchu kei'n nangni diang inthiangnga kiril hi eii. Marwaan li nuoipil ahek maklaiseng, Dan chongramol kasiin khet emakli wiarkhat bit um hiwarakip atungmaklaiseng inmangnuni.#5:18. Hiwarakip atungmaklaiseng; emakli hiwa minchuna rakip hi pui lahongtung sik eii Luk 16:17
19Khawa jarra, tuka-ang inkhat in chongpeii karra akasiin khet inkhat kha amakoiya mi ngaidiang khajek kha thoru tia aminchu inchu marwaan Rengramma akasiin khet esik eii, Inkhattiang, tuka-ang inkhat in Dan kha ajuiya mi ngaidiang aminchu inchu, amakha marwaan Rengramma akalok khet esik eii. 20Ajarchu kei'n nangni diang kiril hi eii, nangni chuontho katuun kha Dan ocha ngai khat-um Pharisee ngai neek ah kheella ningthomak inchu, nangni marwaan Rengram supluut luut nutun.
Akaraang jarra Minchuna
21“Mi ngai'n matiang khan inleiril kha nangni'n ningjetjei, “‘Mi thatmaru; tuka-ang inkhat in mi athat inchu achungnga chongtan kangar kha omsik eii.’’ Suok 20:13; Innidan 5:17
22Takkha tuun kei'n nangni diang kati: tuka-ang inkhat in ama unai ngaidiang araang inchu#5:22. araang inchu; manuscript lekkhat achu ajar omleiya naraang inchu chongtan kangar amusik eii, halli tuka-ang inkhat in a-u anai ngaikha “‘Anemna kaboi nang!’’ tia akoi inchu ama kha Katar ngai maikuungnga inkeisuosik eii, halli tuka-ang inkhat in ka-am anemna kaboi nang atia akoi inchu chikaom meikhurra achulsik eii. 23Khawa jarra nang in Pathian diang maichaam khan kutchoi nape siktiang na-u nanai ngai'n nachungnga angmekhat hoimakna kaom kha nahong ngaidon inchu, 24nakutchoi kha maichaam ma-khan da-inlang, woikhat kirnook inlang na-u nanai ngai khale juo-inzoot naru, halli heikir inlang Pathian diang nakutchoi kha jopero.””
25“Nang inhalpui mi inkhat in nang chungnga zootmak ah chongtanna munna anaruoi inchu, lamma ningsi lai innot ah inzootnaru, kha emak inchu ni-inhalpui ama'n nangkha chongkatanpa diang khan napeta, halli chongkatanpa in nangkha mikhumna kangaak ngaidiang napeta nang mikhumna khan nadasik eii.”” 26Kei'n nang diang inthiangnga karil, nang in ahekna napesik kasuok sial kha nape maklaiseng khawa munna inphut heisuok thanunijei.
Zool-inthai jarra Minchuna
27“Zool-inthai emaru, “‘inleiti kha nangni'n ningjetjei.’’ Suok 20:14; Innidan 5:18
28Takkha tuun kei'n nangni diang kati, numeisa inkhat kha taksa manuom nakhan ka-en mi rakip in ama malungnga ama khale inruoiya zool-inthai kha ejei.””
29Halli namit changtiang khan nangkha manu ah anamachul sik e-inchu, kel-inlang kalekjuonro! ajarchu napumtak kha meikhurra kaminluut sikneek ah nataksa saram inkhat kamang khan nang sik ah athawiai. Matt 18:9; Mk 9:47
30Nakut changtiang khan nangkha manu ah anamachulsik e-inchu, tan-inlang kalekjuonro! ajarchu napumtak kha meikhurra kaluutsik neek ah nataksa saram inkhat kamang khan nangsik ah athawiai. Matt 18:8; Mk 9:43
Sangram Inthenna jarra Minchuna
(Matt 19:9; Mk 10:11,12; Luk 16:18)
31“Hiwahi inleiril jei, “‘tuka-ang in anumei inthenpui inchu, inthenpuina chongmajia kha numeisanu diangkhan perase.’’ ”” Levi 19:12; Teelna 30:2; Innidan 23:21
32Takkha tuun kei'n nangni diang kati: zool-inthai jarra elekleiya, mi inkhat in anumei inthenpui ngai asuok ah halli anumei khan inn aneinook inchu ama'n anumei kha zool-inthai amin ejei, halli numeisanu kaneinook mi kha um zool-inthai amin ejei. Matt 19:9; Mk 10:11,12; Luk 16:18; 1 Cor 7:10,11
Chongkhomaak jarra Minchuna
33“Nangni'n, matiangnga mi ngai'n inleiril kha nangni'n ningjetjei, khachu “‘Nangni chong inkhitna kha makoi maru, takkha angme chongkhomaak ni-insaam kha Pumi diang khan thoro.’’ Levi 19:12; Teelna 30:2; Innidan 23:21
34Takkha kei'n nangni diang karil: Chong ning inkhit pha chongkhomaak insaam maru, marwaan rakook inlang khomaak insaam maru, ajarchu hiwahi Pathian in-ongna eii, Jam 5:12; Isa 66:1; Matt 23:22
35emakli nuoipil rakook inlang-um khomaak insaam maru, ajarchu ama ke dana kha eii; emakli Jerusalem rakook inlang-um khomaak insaam maru, ajarchu akalok Reng khuopui kha eii. Isa 66:1; Minpkla 48:2
36Nalu ma-ou inlang khomaak insaam maro, ajarchu nang in samramol inkhat bit um minbang kate emakli minwom kate nimator emak. 37Hintiro “‘Oh’’ natili “‘Oh’’ tiro emakli “‘Ngang’’ natili “‘Ngang’’ tiro. hiwa chungtiang heikasuok ngaisengchu Kathamak Mipa makheiya aheikasuok eii.””
Phaphu luok jarra Minchuna
(Luk 6:29,30)
38“Hinna inleiti kha nangni'n ningjet, “‘Mit inkhat sik ah mit inkhat, ha inkhat sik ah ha inkhat.’’ ”” Suok 21:24; Levi 24:20; Innidan 19:21
39Takkha kei'n nangni diang kati, nangni'n akathamak mi kha phaphu luok maru. Tuka-ang inkhat in nangem changtiang kabeen inchu, nangem kaangkhat tiang um doupiro. 40Halli tuka-ang inkhat in nang kha chongtanna khan anaruoiya nasongkol aleizoot ah chongkal inchu, ama diang khan napuonsil kha um leirase. 41Khat-um tuka-ang rup inkhat in aphur kha nazootmak pumma mile inkhat naminchoi inchu, mile inni choipiro. 42Tuka-ang inkhat in nang diang phur khat anani pha, ama diang khan pero, halli tuka-ang inkhat in phur khat apuukzoot pha, ama diang khan minpuuk ro.
Ni-inhalpui ngai Minriang sik
(Luk 6:27,28,32-36)
43“Hinna inleiti kha nangni'n ningjet, “‘Na-indiang na-inwaipui ngaikha minriangro, ni-inhalpui ngaikha matirro.’’ ”” 44Takkha tuun nangni diang kei'n kati: nangni inhalpui ngaikha minriangro, khat-um nangni kanaminpoong ngai sikbit ah nina neipiru, 45Kha angnga marwaanna kaom ning Pa sangai kha ning esik eii, ajarchu ama'n akase li akatha ngai chungnga in-angnga ama'n kani aminsuok, halli mi katha li mi kathamak ngai sik um ruo aminsur. 46Ajarchu nangni'n nangni kanaminriang mi ngaibit ningminriang inchu Pathian in nangni diang angtho-thoa thoman anapesik me? rampar kakhoom ngai innum khan intho emak abe! 47Khat-um nangni'n ning-u ningnai ngaidiang bit khoya ningtho inchu, mi ngai diangnga nangni'n ang kakheel ningthome? zaatlop ngai innum khan intho emak abe!
48Khawa jarra Marwaanna kaom ning Pa in pui itung angnga Nangni um puikatung kha eru. Levi 19:2; Innidan 18:13
Právě zvoleno:
Matthew 5: KHMNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
The New Testament in Kharam © The Word for the World International and NECTAR, 2021.
