Matiu 4
4
Vui Hantai mwa Ḡal Jisas
(Mak 1.12-13; Luk 4.1-13)
1Haḡe Vui Sabuga mwa domuai Jisas vai la vanua vuroi be Vui hantai men lol ron̄oe. 2Jisas nu togo la vanua vuroi huri gubwen̄ n̄avul gaivasi bon̄i mai rani i maro mwa siv gasia. 3Haḡe Vui hantai mwa mai lalainia, mwa bevea be, “Sivora giḡo Nitun God, gos lol vatu kera geki gi bereti.”
4Haḡe Jisas mwa bwaliua be, “Lol Ravrava Sabuga mwa bevea Kungeki be, ‘Atatu si hav rahu tehe n̄an gin bereti, take vi rahu dum gin hava avoana tehe be mwa mwalue nin God.’ ”
5Haḡe Vui hantai mwa lai Jisas vai Jerusalem, vanua sabuga, i mwa daua la ulun ibwirin Imwa Tataro. 6Haḡe mwa bevea lalainia be, “Be giḡo mwasigi Nitun God, gov burere sibomwa vai ataa. Huri be lol Ravrava Sabuga mwa bevea be,
‘God vi tau maira non enjel ba rav gita ḡorogo.
Rav salo luago gin limara
huri be gosav taturai te dum bwalagemwa vwate la vatu.’ ”
7Haḡe Jisas mwa bwaliua be, “Ta mulei Ravrava Sabuga mwa bevea kungeki be, ‘Gosav ḡal te God gabe nom ratahigi.’ ”
8Haḡe Vui hantai mwa laia mulei vai la vusi holomare, i mwa bagahia gin ute ratahigi duluai ata lol ureure mai sarisarira. 9Haḡe mwa bevea lalai Jisas be, “Be gov hivbwaubwau ba ḡogonaiau kekadogaha, ute ratahigi duluai uhu be nam bagahigo ginia nav mahin̄ainira lalainigo.”
10Take Jisas mwa bwaliua be, “Vis dagai niniau, Setan. Huri lol Ravrava Sabuga mwa bevea be, ‘Gov gogonai God gabe nom Ratahigi, i gov lalaḡo lalainia gaituvwa n̄ano.’ ”
11Haḡe Vui hantai mwa siv derainia, haḡe ira enjel ram mai ram ḡitaḡoro Jisas.
Jisas mwa Dau Bwatun non Rovoga Kalili
(Mak 1.14-15; Luk 4.14-15)
12La mahavana be Jisas mwa ron̄ roroi be ram dau Jon Garuhisabuga lol imwa vauvauhi, mwa dabagilu mulei vai Kalili. 13Kadogaha mwa mwalue nin Nasaret, mwa hivo vai Kapanium, lol vanuan Sebulon mai Navtali, ute gea mwa do abena gin numbu gaivua Kalili. 14Ginau uhu mwa lol seserai avoana non atatun vevsera Aesaia be nu vevea tuai be,
15“Vanuan Sebulon, vanuan Navtali,
la matanhalan tahi, haltavalun Jodan,
Kalili vanuara len̄len̄aga!
16Kera gabe ram dogo radu lol ute meto rav gita dum gigita gaivua.
Irahei gabe ram dogo la vanuan mateana,
kera rav gita.”
17Haḡe Jisas mwa dau bwatuna mwa bev lua non avoana, mwa bevea be, “Kimiu duluai giv binihi leahi nin vuromiu, bwatuna be mahavana mwa abena be Ute Lavoa atamare mwa sosori.”
Jisas mwa Uloinira Atatun Ravrav Ige Gaivasi
(Mak 1.16-20; Luk 5.1-11)
18Mahavana Jisas mwa lago mwa hivo hurin numbu gaivua mwa uloinia be numbu ata Kalili, mwa ḡita huhugaituvwa gairua, Saemon, ihana vwate Pita, mai tuana Andru. Pita mai Andru ramuru rav gabe lol numbu huri ige. 19Jisas mwa uloinira mwa bevea be, “Giru mai ba huriau, kimiru giru vi vora noḡu atatu. Nav lol kimiru giru vi lai atatu huriau.” 20Haḡe ramuru derai darihou nora gabe, ramuru huri Jisas.
21Haḡe Jisas mwa dagara vai bano, mwa ḡita huhugaituvwa mulei gairua, Semes mai tuana Jon, kera ira nitun Sebedi. Ira tarua uhu ram lol hurihuri nora gabe lol botu vwate mai tamara Sebedi. Jisas mwa uloinira. 22Haḡe ramuru derai darihou tamara mai nora botu, ramuru huri Jisas.
Jisas mwa Doretore, mwa Bagahi, i mwa Barahu
(Luk 6.17-19)
23Jisas mwa lago vataha vanua ririgi Kalili, mwa bagahi lol imwa tataro duluai, i mwa seserai lua Roroi Tavuha huri ute lavoa non God. I mwa lol atatu be ram haro, i rebehira ram hahantai, ram rahu mulei. 24Haḡe roron Jisas mwa lon̄ahi vanua duluai Siria. Haḡe sinombu ivusi maragai ram datal bilin̄ai ira harova vai abena. Atatu rituai ram haro, rituai rebehira ram ḡagarasira, i rituai vui hantai mwa dogo alolora. Haḡe rituai ram matmateivula, i rituai rebehira ram mate. I Jisas mwa barahu lalan̄an harova duluai gea. 25Sinombu ivusi maragai ram huri Jisas, ram mai nin vanua Kalili i lol ute mwa uloinia be Vanua Han̄vulu i Jerusalem mai Judia i vanua duluai haltavalun wai Jodan.
Právě zvoleno:
Matiu 4: HNB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Society of the South Pacific
