WƖAA DƖ-SUOMUŊ 12
12
Wɩa yɩrɛ Abɩram
1La TƖƖNA fa bʋla pɩ Abɩram: “Lɩɩ ŋ tinteeŋ lɛ, a leŋ ŋ doho nɩaa arɩ ŋ dɩa nɩaa kala aŋ mʋ tintee-la mɩ sɩ jaŋ dagɩŋ.
2Mɩ jaŋ leŋ dɩ ŋ doho nɩaa pʋŋ,
a ŋaa tintee-bal.
Mɩ jaŋ pɛ ŋ lɛ, a leŋ dɩ ŋ yɩrɩŋ yɩrɛ,
a to ŋ lɛ a pɛ nɩaa lɛ.
3Mɩ jaŋ pɛ nɩalɩŋ kala sɩ pɛ ŋ lɛ,
aŋ ŋmɩɛsa hɛ nɩalɩŋ ma sɩ ŋmɩɛsa hɛ ŋ lɛ,
aŋ to ŋ lɛ a pɛ dʋnɩa nɩaa kala lɛ.”
4Ŋɩɩ nɛ Abɩram lɩɩ Haraŋ lɛ arɩ Wɩa sɩ bʋl ŋɩɩ pʋ. Lɔt lɩɩ to ʋ harɩŋ. Bʋa-la lɛ dɩ Abɩram ŋaa jɩsɩŋ mahɩŋ batori arɩ fii arɩ banɔŋ. 5Abɩram kɛŋ ʋ haala Saraɩ arɩ ʋ ŋaana bie Lɔt, nɩalɩŋ arɩ kɩalɩŋ kala ba sɩ dʋa Haraŋ lɛ, a lɩɩ a mʋmʋ Kɛnaŋ tinteeŋ a mʋ yi nɩmɛ.
6Abɩram vɛŋ Kɛnaŋ tinteeŋ lɛ ŋɩɩ nɛ a mʋ yi tɩɩ-bal kʋbala baa yɩrɛ More a hɛ lee-la ba sɩɩ yɩrɛ Sɛkɛm. Bʋa-la lɛ dɩ Kɛnaŋ tɩŋŋaa nɛ fa hɛ tintee-la lɛ. 7Ŋɩɩ nɛ La TƖƖNA kɛŋ ʋ tɩtɩa dagɛ Abɩram, aŋ bʋla pʋ, “Mɩ jaŋ joŋ tinteeŋ deeŋ a pɩ ŋ dɩ ŋ doho nɩaa.” Ŋɩɩ nɛ Abɩram saa Wɩɩsʋllɩ koruŋ a pɩ La TƖƖNA, lee-la ʋ sɩ kɛŋ ʋ tɩtɩa dagʋ.
8Ʋ lɩɩ nɩmɛ a mʋ peel-la sɩ hɛ Bɛtɛl wɩɩpɔsʋŋ, a hɛ ʋ lɛbɩŋ Bɛtɛl wɩɩjʋʋlʋŋ dɩɩrɩŋ, ka Aɩ ma hɛ wɩɩpɔsʋŋ dɩɩrɩŋ. Nɩmɛ nɛ ʋ saa Wɩɩsʋllɩ koruŋ a pɩ La TƖƖNA a yɩrɛ ʋ yɩrɩŋ. 9Ŋɩɩ nɛ Abɩram sii nɩmɛ a mʋmʋ Nɛgɛf dɩɩrɩŋ. Nɛgɛf hɛ wɩɩpɔsʋŋ nagʋa dɩɩrɩŋ nɛ.
Abɩram arɩ Saraɩ hɛ Ijipiti tinteeŋ lɛ
10Bʋa-la lɛ losuŋ fa jʋʋ Kɛnaŋ tinteeŋ nɛ. Losuŋ sɩ faasa jʋʋ ŋɩɩ, Abɩram arɩ ʋ haala lɩɩ nɩmɛ a mʋ Ijipiti tinteeŋ dɩ ba hɔŋ nɩmɛ. 11Ʋ sɩ mʋ kpagɛ Ijipiti tinteeŋ, ŋɩɩ nɛ Abɩram bʋla pɩ ʋ haala Saraɩ, “Mɩ jɩma ŋ ŋaa hazɔŋ nɛ woruŋ. 12Dɩ Ijipiti tɩŋŋaa nɛ naŋ, ba jaŋ bʋl, ‘Na ʋ haala nɛ ŋ-la.’ Ba jaŋ kpʋmɛ aŋ leŋ dɩ ŋ dɩ ba hɔŋ. 13Bʋl ŋ ŋaa mɩ dɩhaal nɛ. Dɩ ŋ nɛ bʋl ŋɩɩ, ba jaŋ kɛmmɛ woruŋ a tɩŋ ŋ wɩaa, ba bɩ jaŋ kpʋmɛ.”
14Ba sɩ kʋ jʋʋ Ijipiti tinteeŋ, Ijipiti tɩŋŋaa na dɩ Saraɩ ŋaa hazɔŋ nɛ. 15Ijipiti kuoro nanzɔɔba sɩ na Saraɩ, ba bʋl ʋ zɔmʋŋ wɩaa a pɩ ba kuoro aŋ kɛnʋ kaa jʋʋ ʋ dɩa. 16Ijipiti kuoro kɛŋ Abɩram woruŋ a tɩŋ Saraɩ wɩaa a pʋ piesee, nɛsɩŋ, kaku-belliŋ arɩ nɩɩnɩŋ, aŋ pʋ tɩntɩnnaa (baalaa arɩ haalaa) arɩ bʋntaŋŋaba.
17Ama a tɩŋ Saraɩ wɩaa La TƖƖNA joŋ nyanyal bɔŋŋɔɔ hɛ Ijipiti kuoro arɩ ʋ dɩa nɩaa lɛ. 18Ŋɩɩ nɛ Ijipiti kuoro yɩrɛ Abɩram a pɩɛsʋ: “Bɛɛ nɛ tɩɩ ŋ ŋaa ŋ-la? Bɛɛ nɛ tɩɩ ŋ bɩ bʋla pɩmɛ arɩ ʋ ŋaa ŋ haala nɛ? 19Bɛɛ nɛ tɩɩ ŋ bʋl arɩ ʋ ŋaa ŋ dɩhaal nɛ, a leŋ mɩ kɛnʋ mʋ ŋaa mɩ haal? Laa ŋ haala kaa viiri.” 20Ŋɩɩ nɛ Ijipiti kuoro leŋ ʋ nɩaa kɛŋ Abɩram arɩ ʋ haala arɩ ba kɩaa kala a kaa lɩɩ hɛ wombiiŋ lɛ dɩ ba viiri.
Právě zvoleno:
WƖAA DƖ-SUOMUŊ 12: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014