Mateo 6
6
Yilebwɛ Ɩwɩ Atosunahɛ
1“Mlɩkɩ wanklaan ánɩ́ mlɩmɔ́ɔbwɛ mlɩ yile aha ansɩtɔ. Nɩ mlɔbwɛ mʋ́ alɩ a, mlɩméenya ɩkɔka mlɩ Sɩá ɔbʋ ɔsʋsʋ wa.
2“Mʋ́ sʋ nɩ fɔbwɛ yile ha ohiani a, máda mʋ́ ɔkan fɛ alɩá apinabwɛbi abwɛpʋ bʋtɔbwɛ Yudafɔ ofiakpa pʋ́ dɩnsʋ, mɛnɩ aha bɛ́kanfʋ amʋ́. Ɔnɔkwalɩ ndɛ mlɩ bla mbɛɛ, banya amʋ́ ɩkɔ dodo. 3Tamɛ nɩ fɔbwɛ yile ha ohiani a, máha fʋ bɩna ɔbɩ tɔá gyɔpɩ labwɛ. Bwɛ mʋ́ ŋaintɔ, 4mɛnɩ fʋ Sɩ okluntɔ atɔ owunpʋ amʋ ɔbɛ́ka fʋ ɩkɔ.
Mpaɩbɔ Ɩwɩ Atosunahɛ
(Luka 11:2-4)
5“Nɩ mlɔ́bɔ mpaɩ a, mlɩmábwɛ fɛ apinabwɛbi abwɛpʋ. Amʋ́tekle Yudafɔ ofiakpa pʋ́ dɩnsʋ lɩɩ bɔ mpaɩ, mɛnɩ aha bówun amʋ́. Ɔnɔkwalɩ ndɛ mlɩ bla mbɛɛ, Bulu laka amʋ́ ɩkɔ dodo. 6Tamɛ nɩ fɔ́bɔ mpaɩ a, bitiwie fʋ obutotɔ, afʋfin obu wa ɩwɩ, bɔ mpaɩ ha fʋ Sɩ ŋaintɔ. Fʋ Sɩ ŋaintɔ atɔ owunpʋ amʋ ɔbɛ́ka fʋ ɩkɔ.
7“Nɩ mlɩdɛ mpaɩ bɔ a, mlɩmátsia pla mʋ́tɔ ha mʋ́ ɩwa swɩ fɛ ɔmátɔfɔ. Bʋtosusu bɛɛ, nɩ bɔbɔ mʋ́ ɩwa swɩ asa Bulu obónu mʋ́ ha amʋ́. 8Mlɩmábwɛ fɛ amʋ́, tsufɛ mlɩ Sɩ Bulu yin tɔá ɩdɛ mlɩ hian asa mlɩdɛ mʋ kʋlɩ. 9Mʋ́ sʋ mlɩbɔ mpaɩ mlɩaa,
‘Anɩ Sɩá fʋbʋ ɔsʋsʋ.
Aha bʋbu fʋ ɩda.
10Ba begyi iwie.
Aha bʋbwɛ fʋ apɛ ɔsʋlʋsʋ, fɛ alɩá bʋtɔbwɛ mʋ́ ɔsʋsʋ.
11Ha anɩ atogyihɛá ɩbɔ́fʋn anɩ ndɛ.
12Si anɩ lakpan kie anɩ,
fɛ alɩá anɩtesikie aha ánɩ́ bʋtɔpʋ ɩla gyi anɩ.
13Mákpa anɩ wa ɩsɔkɩtɔ, mboun lɛ anɩ tsu Ɔbʋnsam ɩbɩtɔ.>#6:13 Ɩnɩ bʋ nwʋlʋ dada amʋ akʋtɔ: Tsufɛ fʋbʋ iwiegyi, tumi pʋ́ ɩwɩwankɩ brɛ fɛ́ɛ́tɔ. Amen.
14“Tsufɛ nɩ mlesi aha lakpan kie amʋ́ a, mlɩ Sɩ amʋʋ ɔbʋ ɔsʋsʋ amʋ ɛ obési mlɩ klɛ kie mlɩ. 15Tamɛ nɩ mlɩmesikie aha a, mlɩ Sɩ amʋ ɛ oméesikie mlɩ.
Ɔnɔklɩ Ɩwɩ Atosunahɛ
16“Nɩ mlɩdɛ ɔnɔ klɩ a, mlɩmábwɛ mlɩ ɩwɩ bʋmblaan fɛ alɩá akʋ bʋtepina bwɛ. Alɩá aha bówun ánɩ́ bʋdɛ ɔnɔ klɩ sʋ bʋtɔbwɛ ɩwɩ alɩ. Ɔnɔkwalɩ ndɛ mlɩ bla mbɛɛ, banya amʋ́ ɩkɔ dodo. 17Mboun nɩ mlɩdɛ ɔnɔ klɩ a, mlɩbie ntsu, amlɩfunya nwun, 18mɛnɩ aha bʋmóowun ánɩ́ mlɩdɛ ɔnɔ klɩ. Tamɛ mlɩ Sɩ okluntɔ atɔ owunpʋ amʋ mʋ́ obówun mlɩ, ka mlɩ ɩkɔ.
Atonyahɛ Pʋyaɩ Ɔsʋsʋ
(Luka 12:33-34)
19“Mlɩmákle atɔ yaɩ ɔsʋlʋ anfɩsʋ, ɔtɩnɛ anfɩ atɛplɛ bʋtɔwɩ atɔ, ɩkʋ aná tɔwɩ nkanʋ yinta, awikplu ɛ bʋtobwie wie obuto wi atɔ anfɩ. 20Mboun mlɩkle atɔ yaɩ ɔsʋsʋ. Ɩnʋ mʋ́ a, atɛplɛ bʋtamawɩ atɔ, ɩtamawɩ nkanʋ, awikplu ɛ bʋtamabwie wie obuto wi atɔ. 21Tsufɛ ɔtɩnɛá fʋ siadɩɛ bʋ a, ɩnʋ fʋ agywɩɩn tetsia.
Nyankpʋsa-oyi Ɔkandɩɛ
(Luka 11:34-36)
22“Ansibi igyi ɔkandɩɛ ha nyankpʋsa-oyi. Nɩ fʋ ansibi bʋ alɛ a, fʋ nyankpʋsa-oyi amʋ fɛ́ɛ́ bɔ́wankɩ. 23Tamɛ nɩ fʋ ansibi ma alɛ a, fʋ nyankpʋsa-oyi amʋ fɛ́ɛ́ ɩbʋ okluntɔ. Nɩ ɔkandɩɛ amʋʋ ɩbʋ fʋtɔ amʋ idun a, mʋmʋ fawie oklun kpɔnkpɔɔnkpɔntɩtɔ.
Bulu Mʋa Atonyahɛ Ɩwɩ Atosunahɛ
(Luka 16:13; 12:22-31)
24“Ɔhaa mɛ́ɛtalɩ sum awie anyɔ. Ɔbɔ́dwɛ ɔkʋlɛ, lu ɔkʋlɛ. Ntɛ obóbu ɔkʋlɛ, omóobu ɔkʋlɛ. Fʋmɛ́ɛtalɩ sum Bulu, sum kɔba.
25“Mʋ́ sʋ ndɛ mlɩ bla mbɛɛ, mlɩmáhan ɩwɩ tɔá mlégyi, tɔá mlónun tsia nkpa pʋ́ tɔá mlɛ́dɩda sʋ. Mbɛɛ, nkpa medehian dʋn atogyihɛ? Ntɛ ɔyʋlʋ medehian dʋn atɔ dɩdahɛ? 26Mlɩkɩ mbubwi, bʋtamadu, bʋtamasɩɛtɩ wa ɩdantɔ, tamɛ mlɩ Sɩá ɔbʋ ɔsʋsʋ tɛha amʋ́ atogyihɛ. Mlɩmá labi dʋn amʋ́? 27Mlɩtɔ ma ɔbɛ́talɩ han ɩwɩ, pʋ brɛ kpalobi tsɩa mʋ nkɛtɔ?
28“Ntogyi sʋ mlɩdɛ ɩwɩ han mlɩ atɔ dɩdahɛ sʋ? Mlɩkɩ alɩá pututɔ-oyi ntswɩtswɩ tɛdan. Ɩtamayɔ agyʋma ntɛ lʋ atati. 29Tamɛ ndɛ mlɩ bla mbɛɛ, Owie Salomo, mʋ inya fɛ́ɛ́tɔ a, ɔmɛtalɩ hɩhɩɛ ɩwɩ, wa akɩlɛ fɛ oyi ntswɩtswɩ anfɩtɔ kʋkʋ. 30Nɩ Bulu dɛ ɩfa ánɩ́ ndɛ ɩlɩɩ, ɔkɛ ɩlawu, bawa mʋ́ ogya tati dɩda a, ntogyi sʋ ɔmɛ́ɛtalɩ dɩda mlɩ atati dʋn mʋ́? Mlɩ hogyi mɔtsɔ!
31“Mʋ́ sʋ mlɩmáhan ɩwɩ fɩtɛ mlɩaa, ‘Ntɔ abégyi?> ntɛ ‘Ntɔ abónun?> ntɛ ‘Ntɔ abɛ́dɩda?> 32Ɩnɩ aná ɔmátɔfɔ bʋtɛsrɩ gya nɩ. Mlɩ Sɩ amʋʋ ɔbʋ ɔsʋsʋ amʋ yin ánɩ́ ɩnɩ fɛ́ɛ́ dɛ mlɩ hian. 33Atɔá mlɩgyankpa dunka gyi, Bulu iwiegyi pʋ́ mʋ yilebwɛ; fówun Bulu ɔbɔ́pʋ ɩnɩ fɛ́ɛ́ tsɩa mʋ́tɔ ha mlɩ. 34Mlɩmásusu ɔkɛ ɩwɩ. Ɔkɛtɔ asʋn igyi ɔkɛ klɛ. Ekekegyiɛkɛtɔ asʋn wunhɛ ɩtsɔ ha ɛkɛ amʋ.
Právě zvoleno:
Mateo 6: nko
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
