Matthieu 3
3
Túnó mé Yʉánɛs Ndubʉr
(Marc 1.1-8; Luc 3.1-9, 15-17; Yʉánɛs 1.19-28)
1Ɨ́ melû maá, Yʉánɛs Ndubʉr nzě pyâl le elɛ́ɛ̌ lɔ́ɔ́ mé Nzyɛ̌m ɨ́ lʉá dí ɨ́ sí Yʉ́da wɨ́. 2Nye á lɨlɛ́ɛ ó: «Túmáá gá mikoo e mebébe mɨ́n. Bɨ̌n a dwírá míléme, ebě, Dâ mû ó kúno etyêl Mpóʼo nyé ɨ́ sɔ́má gá yɨ́ná. 3Mʉr á lwibɔɔ ɨ́ lɔ̌b wé ɨ́ mekaná me ngwíha milɔ̌b mé Nzyɛ̌m Ésayie nyá, á be ó Yʉánɛs waá. Ésayie á boo cɛma ó:
“Twíí, nye lɨ́ etúno ɨ́ tʉ́ŋlʉ̌ lʉá ó:
«Komlaá gá nzɨ̌ mé Dâ Nzyɛ̌m.
Jyɛŋlaá gá nzɨ̌ nyé lɨ́ epélé.»”»
4Kán Yʉánɛs á bubwâr wɨ́, wé á be ó tiá e myě mé chameau. Kaná nyé á tityeele lɨ́ odyɛ́m nyá, á be ó sɛ́á e kʉ́r tír. Nye á dɨde ó, océmebiká le egbɔ́ʼ. 5Nó ó bʉ̂r ó Yerʉ́zalɛm, le baá ó sí Yʉ́da ti e baá ó sí díbé Yɔrdên, bɨ́bɛ̂h, bé á nzě gúmó nyé á be yɨ́, 6bé ntɔ̂ʼ gwîh mísyóm myɔ́ɔ́, Yʉánɛs nzě du bé ɨ́ díbé Yɔrdên.
7Nó ó óFarizyɛ̂n le oSadwisyɛ̂n ɨ́ buo buo bé á nze, ó Yʉánɛs dúʼoo bé ɨ́ díbé yɨ́. Nye nzě lɛ́ɛ e bé ó: «Bɨ̌n bwá ó méjwɨ̂l bâ, nzé á pʉgʉ cɨ̂l bɨ̌n ó, bɨ̌n bé e nkul ekɨ̂ŋ nkpáa mé Nzyɛ̌m ɨ́ jɔʼ nyé ngá lɛ̂ʼle bɨ́n nyǎ yɨ́ ɛ́? 8Gúmáá gá mimpaŋ mi mpúmó mi dí ejala e miléme mû sí dwira mí. 9Ayɨ́ jwɨʼ gá ɨ́ milémé mín ó: “Ɨ́ páʼ gá wɨ́ná, mɨná gá bɨɛ, bé e sɔ́ŋ ó, Abraham,” ebě, mě lɛ́ɛ́ bɨ́n ó, Nzyɛ̌m óbɛ̌m liŋ mékóʼ mâʼ bwá mé Abraham! 10Num nzwɨ́ɨ, wé mû ó ɨ́ cǎr lɨ́ etíʼe míkaalé bílɨ́ nko ménzuʼ. Nye ócwɛ̌l lɨ́ yɨ́yɛ̂h dí agúmo mímpǎŋ mi mpúmó yɨ́, guho yé lɨ́ ebéʼé é siʼe. 11Mɛ̌m du bɨ́n ó e medíbé, lɨ́ elɛ̂ʼle ó, bɨ̌n bɨ́ túmo míkoo e misyóm mín, le edwira míléme. Sâ gwár, mʉr dí ebɔma mé píe koo nyá, nyě e jwɨ́ɨ, laa mê. Mɛm, mé abě tyé mʉ̂r dí ó, me pɛ́ʼɛɛ nye osípah ɨ́ mekʉ̌ nyá. Nyɨɛ, nye ódu bɨ́n ó e Sísǐm mé Nzyɛ̌m le siʼe. 12Nyě e pyɛba ɨ́ mebô. Nyɨ́ gwámle ébɛhɛɛ lé, lwâl mpúmó. Nye ókomo mílɔ́lá ɨ́ nkuna. Sâ gwár, nye ódîʼ mpʉ́n ɨ́ siʼe dí adímedime yɨ́.»
Ndubó mé Yésʉs
(Marc 1.9-11; Luc 3.21-22)
13Nó ó Yésʉs á nkɛ́ɛ ɨ́ sí Galilê, tô díbé Yɔrdên kwá mé Yʉánɛs, lɨ́ esáa ó, Yʉánɛs dúʼoo nye. 14Sâ gwár, Yʉánɛs á si nyɛɛ bene. Nye e né ó: «Yé jala ó, gua dúʼoo me, abe ó, gua ntâʼ ó me dúʼoo go.» 15Yésʉs nzě yala e né ó: «Bírɨ́ɨ, yé syɛ́yɨɨ nó, ebě, yé jala ó, mɨná lóŋlaa bisyɛ́ɛla bi dí ejala le esyɛ́ɛ bí, bíbyɛ̂h.» Yʉánɛs ntɔ̂ʼ kam. 16Mpʉ̌ Yésʉs á sil eduŋɔɔ yɨ́, le nyé á pʉʼa ɨ́ medíbé, lě jʉ́o á bɔ́a. Nye ntɔ̂ʼ beě Sísǐm mé Nzyɛ̌m lɨ́ esulo ɨ́ báaa mpʉ épɨbaa, nzě berwo nyé ɨ́ nyʉ̂l. 17Píe tɨ̂, nyě kǎ jóʼo ó, etyêl nzě duho ɨ́ jʉ́o kʉ́, lɨ́ elɛ́ɛ ó: «Nyâ, nye ó mwân wǎm mé dí ɨ́ buú kpɛl nyá. Sʉhʉʉ yâm yɨ́yɛ̂h, yé e né.»
Právě zvoleno:
Matthieu 3: ozm
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
