Matthew 27
27
NAKATA 27
Jesus tuniyauyuk Pilatemun Romanmiut ataningaanun
(Mk. 15:1; Lk. 23:1-2; Jn. 18:28-32)
1Kaulengmanlu angayyuvikpagyuakut ataningit, inuillu atanekpaillu ukakatigiktun Jesuskun tukutumavlugu. 2Kilekhugamitku agitiyaat tunikuvlugu Pilatemun atanengmun.
Judas tukuyuk
3Aahin Judas, Jesusim tunihiyigiyaa, ilihimagamiuk tukutauyukhauman ihumaliukiktainaktuk silvat 30t kaipkakhugit angayyuvikpagyuakunun ataningit inuit ataningingnunlu 4ukakhuni, “Huinekivaktunga inugmik tukutauyakhaungitumik tunihigama.” Ukaktun tapkua, “Tamna humaangitpiaktuk uvaptingnun, ilingnik pigavin.” 5Judasimlu silvat igittugit angayyuvikpagyuam iluanun kimauyuk inminiglu kimituk.
6Angayyuvikpagyuakut ataningilli silvanik tiguhigamik ukaktun, “Angayyuvikpagyuam manikagviata iluanun iliguptigit ihuituk hapkua inum tukuyutikhaitun-ilivlutik.” 7Talva ukakatigikaaktillugit manitigun tapkununa niuvektun utkuhikliuktim nunaanik iluvivikhanun tuyugmianun. 8Talvangaanin tamna nuna taiyauhimavaktuk Nunamik Auktalingmik. 9Taima nalautaiyim Jeremiam ukauhiit ilumuktun ukagiangman
“Tapkua silvanik 30nik pivaktun, inum akia, Israelmiut kitungaita akilektakhautigimayyuk taima, 10niuvegiaktukhugu utkuhiliuktim nunaanik, Atangum pitkumanga.”
Jesus Pilatem tunganiituk
(Mk. 15:2-15; Lk. 23:3-5, 13-25; Jn. 18:33-19:16)
11Jesuslu nangegman atangum tungani tapfuma apegiyaa, “Jewmiunun ataniuvin?” Jesus kiyuk, “Ukakkutin ilvit.” 12Talva ihuigiyaugaluaktillugu angayyuvikpagyuakut ataningingnin, inuit atanekpainin nipliyuituk. 13Talva Pilatem ukallautiyaa, “Tuhaangilatin amihumik ihuigimatin?” 14Jesusim kiungimani imakaagiyaugaluaktillugu agligutaktuk.
15Tapfumani Kangiutivingukagan atanek inugmik itektauhimayumik atauhengmik anipkaivaktuk inungnun utekuvlugu inuit piyumakpayyuk. 16Talvani itektauhimayuk atikaktuk Barabbasmik taikani ituk. 17Inuit tapkua katimalengmata Pilatem apegiyain, “Kimik anipkaikuvihinga Barabbasmik Jesusmiglunin taiyauyumik Christmik?” 18Ilihimayuk tapkua Jesus kagitiyaat inminun tuhugivallaagamitku.
19Aahintauk uktugvium ikhivautakpanganiitillugu Pilate tuhaayuk nuliyamnin ukakhimangman, “Pitailiguk tamna inuk ilumuktuk unuak hinnektugama kuvianaitumik tamna pivlugu.”
20Talva angayyuvikpagyuakut ataningita, inuillu atanekpaitalu tukhiakuyain inuit tapkua Barabbasmik pilluakuvlugit Jesus tukutaukuvlugu. 21Atangum ukautimiyain inuit “Ukuak malguk nalliangnik anipkaikuvihinga ilipfingnun?” Tapkua kiuyaat, “Barabbasmik.” 22Pilatem ukallautiyain, “Talva kanuiliugniakkigu Jesus taiyauyuk Christmik?” Tamangmik ukaktun, “Kikiaktuktauli tamna.” 23Ukaktuk, “Hug kanuk ihuitumik pivakka?” Tapkuali nipikuktuyumik akhun ukaktun “Kikiaktuktauli tamna”. 24Talva Pilate inmi tuhaanainahugigami inuit ningakpallialengmatalunin uagvingmik imelingmik tiguhiyuk algaini uaktain inuit takuangni ukakhuni, “Una tukutauyukhaungitnahugiyagaluagalunin ilipfingnik pihiuk.” 25Inuit tamangmik kiuyun, “Tapfuma tukuyyutaata ihuigiyyavaatigut kingullivutlu.” 26Talva Pilatem anipkaktaa Barabbas, aahin ungulakamiuk Jesus tuniyaa kikiaktuktaukuvlugu.
Jesus kikiaktuktauyuk
(Mk. 15:16-32; Lk. 23:26-43; Jn. 19:17-27)
27Talva atangum anguyaktingita agitiyaat iglukpanganun kaitkuvlugit anguyaktit tamaita tapfumunga. 28Talva tapkua annugangiyaktitaat annugaktitugu aukpayaktumik. 29Aahin, niakutikhamik kakilautilingnik hanayun ilivlugu niakuanun, aiyaupiak ilivlugu algaanun. Talva hitkuvigivlugu mitautigiyaat ukakhutik, “Hallu Jewmiun ataningat.” 30Tivguaktuktaat tigugamitkulu aiyaupiak kektuktaat niakua. 31Aahin mitautigigamitku annugangiyaktaat annugaktitkuvlugu nanminik. Aullautiyaat kikiaktukuvlugu talva.
32Aullagahualektillugit tautuktaat inuk Cyrenemiutak atikaktuk Simonmik, tamna pitkuyaat nangmakuvlugu Jesusim haniagutaa.
33Tikinamik nunamun Golgothamik taiyauyumun (imaatun-ituk Umannagmik) 34waintuktitumainaktaat mamaitumik. Jesusimli uktugamiuk imegumangngitaa.
35Aahin tapkua kikiaktukaaktillugu annugait pigamigit imagiyait. 36Kinguagun ingiyun kungniakuvlugu. 37Niakuata kulaanun tiitigaktun naunaikutagmun imaatun, “Una Jesus Jewmiut ataningat.” 38Tapfumani kukiyuktuk malguk kikiaktuktauyuk atauttikun Jesusmi aipa talekpiata tunganun aipanga haumiata tunganun.
39Inuillu apkuhaaktun ukanilutigiyaat niakulekhutik 40ukaktun, “Ilvit angayyuvikpagyuak imiktiniagangni nappaktikuvlugulu uvluni pingahuni, ilingnik annautiguit. Godim engnigipatin haniagutingnin atkagiagin.” 41Taimatauk angayyuvikpagyuakut ataningit, tiitigaktillu, inuit atanekpaillu tamangmik mitautigiyaat ukakhutik, 42allat annautivaktain inminik annautilimaitugaluak. Atannektuktain Israelmiut tapfuma. Haniagutiminin atkakli uvagut ukpegikuvlugu. 43Ukpegluangman Godmun tamna, Godim annautiliuk nagugigumiuk, ukakhimangman, 'Godim engnigiyanga uvanga'.” 44Kukiyuktuglu kikiaktuktaukatautillugik mitautigiyaak allatun.
Jesus tukuyuk
(Mk. 15:33-41; Lk. 23:44-49; Jn. 19:28-30)
45Aahin uvluk kitkanin 3mungaktinagu nuna taakhivaktuk 463mungagmanlu Jesus nipikuktuyumik ukaktuk “Eli, Eli lama sabach-thani?” imaatun-ituk “Godiga, Godiga hug kimakpakpinga?” 47Nangekatauyun ilait tuhaagamik ukaktun “Tapfuma Elijah kaitkuyaa.” 48Ilangat tayyainak iptekuktuyumik pivaktuk mihuktitugu vinegarmik, talva kapumun ilivlugu waintuktitaa mamaitumik. 49Allata ukallautiyain, “Tayyagu, tautugnaktukhak Elijah kainiamangan annautiyaktuglugu.”
50Talva akhun igialaakami anengnigektuk. 51Ilaa angayyuvikpagyuam talukuyanga aliktuk malguktuni, nunalu ingutaktuk, uyagait kupivakhutik. 52Iluvit ilait angmangmata ukpekatigiktun amihut tukuhimayugaluit makiktitauyun 53iluvemingnin anivlutik akuiyun Jerusalemun iglukagvingmun naguyumun hagyaegvigiyain amihun inuit Jesus makikaktilluga. 54Anguyaktilik, maliktingillu amekhiyun Jesusmik, nuna ingutaktumik tautukamik allaniglu, agligutaktun ukakhutik, “Ilumun Godim engnigiyaa tamna”.
55Angnallu amigaitun, malikpagaat Jesus Galileemin kivgaktukhugu, aahinin kungniaktun. 56Tapkunani Mary Magdalamiutak, Marylu Jamesim Josephimlu angagik, Zebedeem engningata angnangallu.
Jesus iluvektauyuk
(Mk. 15:42-47; Lk. 23:50-56; Jn. 19:38-42)
57Unulengman Arimatheamiutak manigietuk atikaktuk Josephmik kaiyuk, tapfuma maliktagaluanga Jesus. 58Upaktaa Pilate tukhiagvigivlugu Jesusim timaanik. Talva tuniyaukuyaa tapfumunga. 59Josephim timaa pigamiuk uliktaa kalikumik halumayumik 60ilivlugu iluvekhaminun havakhimayumun kaektumi-itumun. Aahin uyagangmik akhaluakhuni ukuagutiyaa aullaktuglu. 61Mary Magdalamiutak, Marylu aipa takananiituk ingivlutik iluvium haniani.
62Akagunguman, Upalungayagvium tugliani, angayyuvikpagyuakut ataningit, Pharisekullu katimayun Pilatem tungani, 63ukakhutik, “Atanek, itkagiyakkut tamna ukpekhektaiyi umatillugu ukangman, 'Pingahun uvlut nungutpata makigniaktunga.' 64Talva ilvit pitkuivaglutin iluvga munagiyaukuvlugu uvluk pingahua tikitinagu, tapfuma maligutaita kukinakhavaat inungnun ukaglutik 'Tamna makiktuk tukungayunin', taima unipkhauta inggaktakhunguyuk hivullengmin.” 65Pilatem ukallautiyain, “Ilipfi anguyaktikaktuhi, takki iluvganik munakhikuyyavahi tapkua.” 66Talva aavungaktun iluvga umittugu uyagangmun munakhikuvlugit anguyaktit.
Právě zvoleno:
Matthew 27: Sperry
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©1972 Canadian Bible Society
