Matthew 14
14
NAKATA 14
John Baptaiektim tukuyyuta
(Mk. 6:14-29; Lk. 9:7-9)
1Tapfumani Herod atanek tuhaalihaktainaktuk Jesuskun aiyuitpiangman. 2Kivgaminunlu ukaktuk, “Tamna John Baptaiektiuyunakhiyuk tukungayunin makinami hapengnaktunik havakpaktuk.”
3Hivungani Herodim John pihimayaa kilekhugamiuk itektauvigmungaktitugulu Herodiasim, nukami Philipim nuliyangata, pitkumagu. 4John ukakhimangman Herodmun, “Nuliagigangni tamna ihuitpiaktuk”. 5Talva Herodim John tukutumainaktaa inuilli ekhigiyagaluangit tapkua nalautaiyiunahugimayyuk 6Herodim inuviata uvlua tikinman, Herodiasim pania numekpaktuk pulaakatigiktuni tapkunani, kuviahuktimani Herod 7ukagiaktuk angiyumik aitugumavlugu piyumayanganik kuyagingnagluni. 8Talva angnaminin tukhiakuyaugami ukaktuk, “John Baptaiektim niakuanik tuniviginga akiutagmun ililugu.” 9Ataneglu kapiahukpiaktuk ukagiakhimagamili negikatain nalautillugit tapfuminga tunihiviukuyaa. 10Pitkuimanlu John niakuektitauyuk itektauvigmiitillugu. 11Niakualu akiutagmun iliyaugami kaitaulektuk tuniyauvluni angnaguhegmun, tapfuma angnani tuniya tapfuminga. 12Johnimli maligutaita kaigamik timaa tiguyaat iluvegiaktukhugu, talva uniutiyaat Jesus tamainik.
Inuit 5000guyun negipkaktauyun
(Mk. 6:30-44; Lk. 9:10-17; Jn. 6:1-13)
13Jesusimlu tamna tuhaagamiuk talvanga kimauyuk aullakhuni umiakun inuilgumun kihimgiukhuni. Inuilli tuhaagamitku aullangman maliktaat pihukhutik iglukagvingnin. 14Jesuslu tikinami inuit amigaitun takugamigit nagligiyain naguhipkakhugit aaniaktun. 15Unulengmanlu maligutaita upaktaat ukakhutik, “Hamani iglukpaiilgumiinapta, unulektillugu, inuit hapkua aullakulugit iglukagvingnun nekihamingnik niuvegiaktukuvlugit ingmingnik.” 16Jesus ukaktuk, “Aullaktukhaungitugaluit ilipfi negipkakhigit.” 17Tapkua kiuyaat, “Hamani mukpauyagliuyugut talimanik, ikaluliuyugullu malguinangnik kihimi.” 18Ukaktuk, “Kagitihigit uvamnun.” 19Ivingnunlu tapfuma inuit ingikuyain; aahin mukpauyait taliman, ikaluglu malguk tigugamigit aagluktuk kilangmun kuyahukhuni. Talva mukpauyait avgukamigit tapkuninga tuniyain maligutini, tapkuatauk tunipkaiyun inungnun. 20Inuillu tamangmik negiyun akiatukhutik. Maligutaillu ilakuit avgukhimayun katigamitigit tigumiaktit 12guyun tatattain. 21Tapkua negivaktun 5000guyun angutainain, angnat nutakallu kitikataungitgaluakhutik.
Jesus imam kangagun pihuktuk
(Mk. 6:45-52; Jn. 6:16-21)
22Talva Jesusim maligutini umiagmun ikipkaktain hivullegiyumagamigit inmi aullaktikuvlugit inuit aahinun. 23Inuillu aullaktitkaaktillugit Jesus manilgulmun maiyugaktuk kihimgiukhuni kengagumagami. Unulengmanlu avaliektuk. 24Tapfumani umiak tahium kitkanilektuk algugamilu nangialektuk malikhiukhuni. 25Uvlaamilu kaulgaktinagu Jesusim tikilektain imam kangagun pihukhuni. 26Maligutaitalu takugamitku imam kangagun pihuktillugu kuglukpiaktun ukakhutik, “Anengnek tamayya!”, kukuakpiakhutik ekhitakamik. 27Tayyainagli Jesusim ukautiyain ukakhuni, “Ekhiuktailuhi kuviahugittili uvangaugama.” 28Peterm kiuyaa, “Atanek ilviuguvin kaitkulunga ilingnun imam kangagun.” 29Ukaktuk, “Kailegin”. Peterlu umiagmin atkagami imam kangagun pihuktuk Jesus upagahualekhugu. 30Malgilli takugamigit kuglukpiaktuk, kivilegamilu kukuaktuk akhun, “Atanek annautinga.” 31Jesuslu tayyainak ihakami tiguyaa ukakhuni, “Inuk ukpegnekukituk, hug ukpengngitpin?” 32Umiagmun ikinmanik anugaektuk. 33Umiagmiitunlu Jesus angayyuvigiyaat ukakhutik, “Ilumun Godim engnigiyaatin ilvin.”
Gennesaretmi Jesus naguhipkaiyuk
(Mk. 6:53-56)
34Ikaakamiglu nunamun Gennesaretmik taiyauyumun tikittun. 35Takanani nunaum inungita ilitagigamitku tiliyun aahinun kagitikuvlugit aaniaktun, 36ilangita Jesus tukhiakvigiyaat annugaata hinaa aktuinakuvlugulunin, aktuinaktunlu tapfuminga naguhipkaktauyun.
Právě zvoleno:
Matthew 14: Sperry
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©1972 Canadian Bible Society
