Mateo 6
6
Kjuako Jesús nkexrín chrókꞌuejó chojni
1 #
Mt. 23:5. *’Chrókjuáko̱xínhñara nkojín nkehe jína jehó kixin tsꞌikon chojni ó. Ti xi̱kaha tsjáko̱xinra, la Itꞌéni itjen nkaya nka̱jní la ninkehó tsotjáhyara chꞌan. 2Ti kjuínki̱tsara nkojín nkexro nóa la ninkexró chróchenkahyara. Chꞌehyara éxi ichꞌe ti chojni nkojinxónhña tjenka̱yáxin, xrichronka sin ti nkehe kjuíchꞌe sin nkaxehen ni̱nko la ko nkátja nti̱a kixin chrókuihin kaín chojni ndá chrókjuikosáyehe ti jehe sin. Janhan ndáxrja̱n kixin ti chojni xi̱kaha ichꞌe la ó kjuixin kꞌuáyéhe̱ sin ti nkehe tsjacha sin. 3Méxra̱ jahara ti tsjínki̱tsara nkojín nkexro nóa la ninkexró chenkahyara, kjónté nkojín nkexro imá tꞌitonra. 4Ti tsjájonra ichrén nkehe la ninkexró tso̱noehña, a̱ndá Itꞌéni itjen nkaya nka̱jní tsꞌikon xi̱kaha la tsotjáhara chꞌan ti nkehe jína tsjachara.
Jesús kjuako nkexrín tsonixje̱he̱ni Díos
(Lc. 11:2-4)
5 #
Lc. 18:10-14. *’Ti ó tsonixjehéra Díos la chrókjui̱chꞌehyara éxi ichꞌe ti chojni nkojinxónhña tjenka̱yáxin, kixin jehe sin la tóxríhi̱n sin tsꞌejóxin to̱té sin nkaxehen ni̱nko la ko tsꞌejó sin ndasin kixin tsꞌikon kaín chojni kixin tjejónixje̱he̱ sin Díos. Chaxín ndáxrja̱n kixin jehe sin la ó kjuixin kꞌuáyéhe̱ sin ti nkehe tsjacha sin. 6Méxra̱ jahara ti ó tsonixjehéra Díos la tꞌixe̱hénra ndo̱ara la tékjehéra ti puerta la nixjehéra Itꞌéni Díos, a̱ndá jehe chꞌan, ti nkexro tꞌikonhñani, la tihin chꞌan ti nkehe noxínhña tjánchíára, la tsjajon chꞌan tíha.
7’Ti ó tsonixjehéra Díos, la jehya itsjé nkehe chrókja̱te̱e chrónixjara, éxi ichꞌe ti chojni chónhña Díos kixin jehe sin la tjenka̱yáxin sin kixin ti nchónhña tsonixja sin la tsihin Díos. 8Chrokꞌónahñara éxi ti jehe sin, kixin Itꞌéni Díos la ó nohe chꞌan nkehe tsichánxi̱hanra kjónté na̱xa̱ tjáncháhyara. 9Méxra̱ ti ó tsonixjehéra Itꞌéni Díos itjen nkaya nka̱jní, la xi̱kihi chróndáchrora:
Itꞌéni Díos, itjen nkaya nka̱jní, jaha ijnko nkexro imá tjóá.
10Chrokui ti kjuachaxin kuèntá.
La chrókjui̱nchexiteyá ti nkehe tóxríhan ntihi chjasintajni éxi tjechꞌe nkaya nka̱jní.
11Tjánjua ti nio̱tja̱ ticháxi̱hini nkojnko ña̱o.
12Tꞌitjáñaha ti ijie̱ chóntani kixin jeheni kja̱xin tsꞌitjáñeheni ti nkehe jínahña kjuíchꞌehe chojni ti jeheni.
13Ti̱toéhya kixin chrókjuasini ijie̱. Nchekaáni kixin ninkehó nkehe jínahña chrókóheni,
kixin jaha mé chonta kaín kjuachaxin la této̱an nkochríxín. Mé xi̱kaha tso̱hen.
14 #
Mr. 11:25, 26. *’Ti jahara tsꞌitjáñahanra ti ijie̱ kjuásihanra nkojín nkexro, la kja̱xin Itꞌéni itjen nkaya nka̱jní tsꞌóxika chꞌan ti ijie̱ kjuásinra. 15A̱ndá ti tsꞌitjáñahñara ti ijie̱ kjuásihanra nkojín nkexro, la kja̱xin Itꞌéni itjen nkaya nka̱jní tsꞌóxikahya chꞌan ti ijie̱ chontara.
Chrokꞌóxroanhña chojni kuènté ti siniehña sin
16’A̱ndá ti ña̱o sintehyara kixin tjinkáonra tsonixjehéra Díos, la jehya chrókꞌuejora éxi tꞌavára éxi ichꞌe ti chojni nkojinxónhña tjenka̱yáxin. Kixin jehe sin la xi̱kaha tja̱ko̱xi̱n sin kixin tjinkaon sin tsꞌikon chojni kixin kjoniehña sin. A̱ndá janhan ndáxrja̱n kixin jehe sin la ó kjuixin kꞌuáyéhe̱ sin ti nkehe tsjacha sin. 17A̱ndá jahara, ti ó sintehyara kixin tjinkáonra tsonixjehéra Díos, la tꞌontira ikonra la tjéntoára ikjára, 18kixin tso̱noehña chojni kixin kjontehyara. A̱ndá Itꞌéni Díos, ti nkexro nohe kaín nkehe, mé tsꞌikon chꞌan xi̱kaha la tsjajon chꞌan ti nkehe jína tsꞌayéhéra.
Ti nkehe tjete siín nkaya nka̱jní
(Lc. 12:33-34)
19 #
Stg. 5:2, 3. *’Chrokjuásitonhñara nkehe tjete ntihi chjasintajni, kixin ntihi la itsꞌín ikué la tso̱chji̱sen la ko tsꞌitjáña kaín o̱ tsꞌixehen xíche̱e ndo̱ara la tseé. 20Ícha jína tjásitonra kaín ti nkehe tjete nkaya nka̱jní kixin ntiha la kohya iko sinchekꞌitjáña la ko tso̱chjisenhña, la kohya xíche̱e tsꞌixehen tseé. 21Kixin ti nkaya nka̱jní tsochontara kaín ti nkehe tjete la kja̱xin ntiha tsjakꞌe a̱sánra.
Ti xrohi tꞌinkaséñexín ti cuerpo
(Lc. 11:34-36)
22’Ti xrohi tꞌinkaséñexín ti cuerpo kuèntára mé ti ikonra. Méxra̱ ti jína ti ikonra la kuenté ti cuerpo kuèntára la tsochónta xrohi. 23A̱ndá ti jehya jína ti ikonra la kuenté ti cuerpo kuèntára la sítie itjen. A̱ndá ti kohya ti xrohi la a̱ntsí sítie tsꞌejora.
Ti chichaon
(Lc. 16:13)
24’Ninkexró xrokjuahya sichꞌehe ixra̱ yaá lamo. Ti náhí la tso̱nínkakohen ti ijnko lamo landá tso̱tjue̱he ti íjnko, o̱ a̱ntsí tsitekakohen ti ijnko lamo, landá kanhñó tsitekakohen ti íjnko. Méxra̱ xrokjuahya sichꞌeheni ixra̱ Díos ti tjinkaoni tsochóntani itsjé chichaon.
Díos mé tꞌayakohen ti xje̱en
(Lc. 12:22-31)
25’Méxra̱ ndáxrja̱n kixin chrókóxakuanhñara nkehe chrókjontera o̱ nkehe chrókꞌuira o̱ ti ika chrókꞌuítsa̱ra. ¿Á jehya a̱ntsí sínkí ti kjuachón chróchontara, ke ti nkehe sintera, la á jehya a̱ntsí sínkí ti cuerpo kuèntára, ke ti ika tsꞌítsa̱ra ní? 26Tsjehéra ti koxroxe xritjaká. Jehe va la tꞌe̱nka̱hya va la ko tjáhya va la chóntahya va nketí tsꞌenka̱chjinañá va noa, kjánchó Itꞌéni itjen nkaya nka̱jní la tjajon chꞌan nkehe sinie va. A̱ndá jahara, ¿á jehya a̱ntsí sínkíra ke ti koxroxe ní? 27¿Xá nkojinra tjénka̱yáxinra kixin ti a̱ntsí chrókóxakohanra ndá chrókjuachara chrókꞌuankíra itꞌo̱ metro ní?
28’A̱ndá, ¿nkekuènté imá tóxakohanra ti ika tsꞌítsa̱ra? Tsjehéra nkexrín tꞌánkí ti katsjo siín nte̱je̱. Ti itsjo la chꞌehya ixra̱ la ko tjo̱nhña. 29#1Rs. 10:4-7; 2Cr. 9:3-6.*La tjo̱nka̱ra kixin kjónté ti rey Salomón kꞌuéchónta itsjé ika imá náxrjón la kjuíncheyóe̱hya éxi tsjehe ti itsjo. 30A̱ndá ti xi̱kaha nchekꞌitsá Díos ti kayoa siín nte̱je̱, kjónté ijie ó siín la ndóye tsoche nkaxehen itja̱ la, ¿á jehya a̱ntsí jína chrókjuintakꞌitsara chꞌan ní? ¿Ndá nkekuènté titekákonhñara? 31Méxra̱ chrókóxakuanhñara chróndáchrora: “¿Nkehe chrókjonieni o̱ nkehe chrókꞌuini o̱ nkehe chrókꞌuítsani?” 32Kixin ti chojni chónhña Díos la xi̱kaha tóxakohen sin. A̱ndá Itꞌéni Díos itjen nkaya nka̱jní la ó nohe chꞌan kaín ti nkehe tsicháxi̱nhanra. 33Méxra̱ sa̱o chrókjuéyára ti kjuachaxin kuènté Díos la chrókjui̱nchexiteyára ti nkehe tjinkaon chꞌan, ndá jehe chꞌan tsjajon chꞌan kaín ti nkehe tsicháxi̱nhanra. 34Méxra̱ chrókóxakuanhñara ti nkehe tso̱hen ndóye kixin ndóye la íjnko ña̱o tíha, la nkojnko ña̱o ti̱ka̱o ti kjuaxikaon kuènté.
Právě zvoleno:
Mateo 6: poeNTplus
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2016, Wycliffe Bible Translators, Inc. All rights reserved.
