KEYUM KERO 9
9
Shédíke Noah kíng Daapong Ibosuname
1Delo Noah melang bík oo kídídem Shédíbí utepooro ruulíkdola poto, “Otíng-oyin kalangka delokke parlangka delokke among sime bííbom langka. 2Nolume, simon-sili tabunge, kebung-pettang kídíe, engo kídíe eggoona ato-siro kídíe pesoyé, kapeila bulum noluke alaglo melíkbito. 3Turna ato-siro tabude noluke dopenampe iyé. Nolum kapekísa yayina nesi-neyangem bitudí, dekepe takamem ngo nolum bidung. 4Idola nolu iyyi kadupe adíneme domapeka, kapeila iyyilo turname kadung. 5Kapeila tani iyyiem lanadem, ngo edo rayé delokke ingkona simon-silie tani mokayédí, demte ngo edo rayé. 6Taniem Shédíme gesudope píto, depeila séko amiko mokayédí, bímkom amikone mokayéku. 7Delokke nolu amongso bojérupe otíng-oyin kalangkula parlangkuka.”
8Delo Shédíbí Noah melang bík oo kídíem sipe potoku, 9“Kaatola, nolum lang noluke otíng-oyin lope sim daapong sim ibosudung, 10delokke teyolo etkung delok nolukíng lenmín gekuna turna ato-siro tabung loope emnamde pei-pettang simon-sili ato-siro sim ibomla podung. 11Sim daapong sim nolukíng ibosudola podung: Ngo edílokom turna ato-siroeme, puumulok nyokku momayé delokke amosime edílokom puumulok nyokku momayé.” 12Delokke Shédíbí poto, “Nolum lang nolukíng yémín gena simon-sili tabung delokke angkupena tani siirum yédong keela ngokke pénsamlo, ngokke daapong ibosunam iyode sikepe iyé: 13Doomuglo ngokke muréem garlíkyé, de ngokke lang tani amosokke daapong iyode. 14Edílo ngo doomugem among teyongso bomala, doomug aralo muréem gardope kaayédí, 15delo ngokkelang turna ato-siro tabung solang noluke pénsamlo daapong dobosunam sim, ngo míípasuyé, delokke asie edílokom puumupe ila turna tabungem nyokmo yimayé. 16Edílo muréem doomuglo ngo kaayédí, amoso turna takamlo Shédíke turyarna daapong ibosunamem ngo míípasuyaryé.” 17Noahme Shédíbí poto, “Simoko ngokkelang amoso turna takam kídíke pénsamlo daapong ibosunam iyode.”
Noahlang Bík Oo Kídíe
18Etkung delokke lenkuna Noahke oo kídíe Shem, Ham delokke Japheth. Hambí Kanaanke abue. 19De oo angumde Noahke, delokke bulu kelok ila amoso tanie bííbom kaku. 20Noahbí kerayalumpe arík igene. Bí onggur esing aríkko ito. 21Bí onggur alangem tííla tíngírsula amíl araape, tombu aradelo ketto. 22Kanaanke abu Hambí abu delokke araape inamem kaala bík bíro annyidem luyudelo popato. 23Dem tatla Shem lang Japheth gordulo ege bomla, méélamdanpe gíkutsula abu delokke amíl araape inamdem pokapla, bínyik amige abulokke amíl araangem kaasumape ito. 24Edílo Noahbí tíngír delok ailangkula dartokudí, aníyang lokke agér inamdem kénla,
25bí sikepe poto, “Kanaanme podung,
bí bíkke bíro kídíke abílpe iyé.”
26“Ruutum Shemke Shédíme yidgedung,
Kanaanbí Shemke abílpe iyé.”
27“Japhethme bojémolangka,
delokke bíme Shemke tombu ekumlo duumolangka,
delokke Kanaanbí bíkke abílpe ilangka.”
28Puumu irongem, Noahbí dítak língko angum kolang takying pilngoko turto. 29Noahke yéname dítak língko konang kolang takying pilngoko irongem bí sikai.
Právě zvoleno:
KEYUM KERO 9: adiBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.