KEYUM KERO 14
14
Abramke Lotme Mopítkuname
1Babilon among lokke Amraphel rojake longelo, bí lang Ellasarke roja Ariok, Elamke roja Kedorlaomar lang Goiimke roja Tidal bulu; 2Sodomke roja Bera, Gomorrahke roja Birsha, Admahke roja Shinab, Jeboiimke roja Shemeber delokke Belake roja (dem Joar emlate mandung) bulum takame mimak imínsupe gílento. 3Si roja pilngosi magpépe ibosula supakke Sina Siyéng emkunam Siddim Yiibe delo gídumsuto. 4Bulu Kedorlaomer rojake rumkílo dítak íying kolang annyikope duupala dítak íying kolang angumnanalo bík mirupe gerepto. 5Takying kolang takpinanalo Kedorlaomer bí roja angong magpépe ina kídíem gíbola, Ashteroth Karnaim lokke Rephimme, Ham lokke Jujimme, Kiriathaim yiibe lokke Emimme, 6delokke Edom díítum lokke Horith kídíem mimak ila, ikumla, yépol mooruk among abelo duuna Elparan loope monlíkto. 7Delokrongem bulu gílat sulangkula, Enmishpat emlate mannam Kadeshpe gílangkula, Amelek doolung kídíem mimak ila, ikumla, Hajajon Tamarlo duuna Ammorit ami kídíemte ikumto.
8Delo Sodom, Gomorrah, Admah, Jeboiim delokke Bela lokke roja kídíde buluke maglíngem gíbola Siddim Yiibelo: 9Elam, Goiim, Babilon delokke Ellasar kídíke roja appiem roja pilngode mimak imínsuto. 10Siddim yiibelo alkatarang arung mílí katuai. Edílo Sodom kelang Gomorrahke roja annyide mimak delok dugnyokkupe itodí, arung kídí delo bínyi obung líkkai. Idola abíd roja angumde díítelo dugnyok sanggekai. 11Roja appide Sodom keelang Gomorrah lokke ato-siro tabungem delokke donam-tíínam kídíemte língkutpala enkaku. 12Bulu, Sodomlo duuna Abramke bíro oo Lot melang bíkke ekuserang takamemte bomtak sukaku.
13Idola amikone dugnyok langkula, Amorit ami Mamreke kumpom esing delokke anínlo duuna Hibru ami Abramme legang takamem popabito. Mamre lang bíkke bíro Eskol delokke Aner bulu Abramke magpépe ine. 14Edílo Abram, bíkke bíro uem umbomkai emla tattodí, 15bíkke ekumlo olennam ami kídíem, midum língko angum kolang midum íying kolang píínyiko tomdumsula, yuem mimak iyabomla, bulum ikumla Damaskas línggíng Hobah moolop deloope monlíkto. 16Depe irodem bí bíkke bíro oo Lot melang bíkke ekuserang kídíem delokke mime kídíemlang ami kídíem aasibotoku.
Melkijedekke Abramme Utepooro Kadope Políkname
17Edílo Abrambí Kedorlaomer melang bíkke roja angong kídíem mimaklo ikumpala aatokudí delo Sabhe yiibe delo (dem roja lokke yiibe emlate mantuai) Sodom lokke roja bím kaaríksupe gíríkto. 18Delo Melkijedek, Salem lokke roja pelang Kedon Yalumna Shédíke mirípe inabí, ettíng loklang onggur alanglok bomríkla gíríkto. 19Bí Abramme utepooro agom políkdola poto,
“Among talengem pína,
Kedon yalumna Shédíbí,
bík utepooroem biyar kalangka.
20Delokke nome miru teyolo ikummodope imona,
Kedon yalumna Shédíme yidgedung.”
Delo Abram, bíkke mirulok paalenkunam ekuserang takam delokke íying sanpegem Melkijedekme bisuto.
21Sodomke rojade bím poto, “Ekuserang dem no bomtoka, idola ami kídíem ngom bitokuka.”
22Delo Sodomke rojadem Abram manto, “Among talengem pína Ruutum Kedon yalumna Shédíke amínlok ngo pésula podung, 23nokke enno demangkom leyug rímo delokke ekurang atí bommayé. Demamílo ngomin Abramme mirem motone emla no manyé. 24Ngo agísukepe atí lamayé. Ngok ami kídíe ingkuemdí dotone delo petom ngo irísuyé. Idola ngokke magpéé Aner, Eskol delokke Mamre bulum tarongem laamotoka.”
Právě zvoleno:
KEYUM KERO 14: adiBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.