Jon 2
2
Jiisasnoŋ apu meŋ letono wain kolooro.
1Jiisasnoŋ Filip ano Natanael oroono weeŋ karooŋ tegoro laligogi moŋnoŋ agomiŋ aoaowaa maraŋ lombaŋ ano ajoroogi. Ii Galili prowinswaa gomaŋ qata Kaana iikanoŋ aŋgi. Jiisaswaa nemuŋanoŋ kanoŋ motooŋ kema ragi. 2Jiisas ano iwaa gowokouruta ii kaaŋagadeeŋ horoŋ oŋoŋgi lombanoŋ motooŋ ragi. 3Iikanoŋ ragi wain apunoŋ qaono Jiisaswaa nemuŋanoŋ meria ijoro, “Yoŋoonoŋ wain apu qaonja.”
4Kaeŋ ijoro kokaeŋ ijoro, “Nemuna, ii nomaeŋ amaŋatiwaajoŋ jejaŋ? Jeŋ kotoŋ nonjaŋ me? Noo aŋgoleto meme kambananoŋ mende kaŋ kuuro laligojeŋ.”
5Kaeŋ jero moma weleŋqeqeuruta kokaeŋ iŋijoro, “Iinoŋ iwoi mombaajoŋ jeŋ kotoŋ oŋombaati, ii mono otaaŋ ambu.”
6Juuda yoŋonoŋ hamo qeŋ aowombaajoŋ Kana qaagia otaaŋ borogia soŋgbama laligoŋkegi. Iikawaa so miri iikanoŋ koworaŋeŋ somata 6 raro. Koworaŋeŋ motomotooŋ ii apu konoŋ 8 me 12 iikanoŋ kemeŋ saa qenagiwaa soga ragi.
7Jiisasnoŋ ii iima kokaeŋ iŋijoro, “Oŋo mono apu kosoŋ kaŋ maagi koworaŋeŋ koi saa qewa.” Kaeŋ jero moma jerotiwaa so aŋgi. 8Koworaŋeŋ ii saa qegi kokaeŋ jeŋ kotoŋ oŋono, “Mono apu qaga kosoŋ meŋ kema lombaŋ galeŋ mubu.” Jeŋ kotoŋ oŋono meŋ keŋgi.
9Kosoŋ keŋgito, galenoŋ apu letoma wain kolooroti, ii neŋ naaŋa moma daeŋkaya meŋ kagiti, ii mende moma asariŋ aaruro. Aaruroto, weleŋqeqe apu kosogiti, iyoŋonoŋ ii moma jegi galenoŋ maraŋ lombaŋ toya oono karo. 10Karo kokaeŋ ijoro, “Maraŋ kambaŋanoŋ kuuya yoŋonoŋ wain apu awaa ii wala meŋ kaŋ oŋomakeju ano ii neŋ eŋkaloloŋ meŋ aogigo wain apu naaŋa qaa ii kanageŋ oŋomakeju. Giinoŋ wain apu awaa ii wala aŋgoŋ koma mende oŋoma ketego koi kambaŋ uuguŋ meŋ kajaŋ. Ii sili morota moŋ anjaŋ.”
11Jiisasnoŋ aŋgoleto mutuya koi ii Galili prowinswaa gomaŋa qata Kaana iikanoŋ mero. Ii meŋ iikanoŋ ku-usuŋa asuganoŋ iŋisaano. Kaeŋ iŋisaano gowokourutanoŋ moma laariŋ mugi.
12 #
Mat 4.13
Jejelombanoŋ laligogi tegoro Jiisaswaa nemuŋkoaaŋa ano gowokouruta yoŋonoŋ gomaŋgianoŋ Kaperneam keŋgi. Iikanoŋ kema somaŋa tosia toroqeŋ laligogi. Kiaŋ.
Jiisasnoŋ jiwowoŋ jigo jeŋ kobooro.
Mat 21.12-13; Maak 11.15-17; Luuk 19.45-46
13 #
Eks 12.1-27
Kambaŋ kanoŋ Juuda nonoonoŋ kiaŋkomu kendoŋ kambaŋa dodowiro. Anutunoŋ wala eeŋanoŋ niniima kobooŋ nunuuguroti,#2.13 Anutunoŋ Iijipt kanoŋ Israel ejemba niniima kobooŋ nunuuguroti, iikawaa korisoroya ii Kooŋ qaanoŋ Pasowa. Eksodus, Mootogo 12.15 iikawaajoŋ aisoowombaajoŋ aŋgi Jiisasnoŋ kaaŋagadeeŋ gomaŋa mesaoŋ Jerusalem sitinoŋ uro. 14Sitinoŋ uma jiwowoŋ jigowaa totoŋ uutanoŋ keuma iwoi kokaeŋ mokolooro: Ejemba bulmakao ejia, lama ano kewo kooŋ ii sewaŋa mewutiwaajoŋ aŋgi ano tosianoŋ moneŋ utekute ambombaajoŋ ragiti, ii iŋiiro.
15Ii iŋiima kasanoŋ tape (qoilomu) miziziiŋ iikanoŋ oŋootiŋ uŋuro. Uŋuŋ ejemba ii kuuya konjoma oŋoma lama bulmakaogiawo jiwowoŋ jigonoŋga oŋotaaro. Utekute ejemba yoŋoonoŋ soojaakota qewagoro kamaaro peragia metama maaro keno. 16Kewo sewaŋgia mewutiwaajoŋ aŋgiti, ejemba ii kokaeŋ jeŋ oŋono, “Iwoi ii mono meŋ togoŋ seleeŋgeŋ kembu. Oŋo noo Maŋnaa jiwowoŋ jigo koi mono naambaajoŋ utegogi koŋkororo miri kaaŋa kolooja?”
17 #
Ond 69.9
Kaeŋ jeŋ oŋono Buŋa qaa moŋ gowoko yoŋoo momogianoŋ kouro romoŋgogi. Qaa ii kokaeŋ oogita eja, “Noo uunanoŋ goonoŋ jigo ii kowoga ewaatiwaajoŋ kaparaŋ kombe iikanoŋ uunanoŋ neqaŋ gere kaaŋa jero majakaka iikanoŋ ji mokolooŋkejeŋ.”
18Ii konjoma oŋono Juuda jotamemeya yoŋonoŋ temboma waama Jiisaswaanoŋ kouma kokaeŋ qisiŋ mugi, “Gii mono naa aŋgoleto moŋ ana ku-usuŋga iiniŋ sokoma nononogo tere kaaŋa anaga?”
19 #
Mat 26.61; 27.40; Maak 14.58; 15.29 Kaeŋ qisiŋ mugi kokaeŋ meleema oŋono, “Oŋonoŋ jiwowoŋ jigo koi kondeeŋgi namonoŋ kamaaro niinoŋ ii weeŋ karoombaa uutanoŋ metaama kuumaŋa.”
20Meleema oŋono kokaeŋ ijogi, “Gbani 46:waa uutanoŋ jiwowoŋ jigo koi meŋ laligoŋ medaborogita nanja ano giinoŋ ii weeŋ karoombaa uutanoŋ mono nomaeŋ ama metaama kuunaga?”
21Kaeŋ ijogito, Jiisasnoŋ jigowaa qaa ii iyaŋaa seliaa sareaga jero. 22Jiisasnoŋ kanageŋ koomunoŋga waaro sareqaa jeroti, ii kambaŋ iikanoŋ gowokouruta yoŋoo roromoŋgogianoŋ kaŋ kono moma asarigi. Ii romoŋgoŋ Jiisasnoŋ qaa jeroti, ii ano Buŋa qaa oogiti, ii kuuya moma laarigi. Kiaŋ.
Jiisasnoŋ ejemba kananana modaboroja.
23Jiisasnoŋ Jerusalem sitinoŋ kiaŋkomu kendombaa kambaŋanoŋ laligoŋ aŋgoleto ku-usuŋawo meroti, ii ejemba mamaganoŋ iima qata moma laariŋ iwaanoŋ rapiŋgogi. 24Rapiŋgogito, Jiisasnoŋ ejemba kuuya yoŋoo kanagia moma kotodabororo. Kawaajoŋ ejemba kuuya mende moma laaridaboroŋ oŋoma qaagiaa baatanoŋ mende kema laligoro. 25Ejemba uugianoŋ qaa iwoi eroti, Jiisas moŋnoŋ ejemba uugiaa kania ii isaama qendeema mubaatiwaa so mende kolooro. Mono aŋo ii moma kotoro. Kiaŋ.
Právě zvoleno:
Jon 2: ksr
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.
