Luka 23

Yesu kogaligwa kwa Pilato

(Matayo 27:1-2, 11-14; Maluko 15:1-5; Yohana 18:28-38)

1Abaho wanhu wose wenuka, wamgala Yesu kwa Pilato, 2wasonga kumulavila vitala, walonga, “Tumvika munhu ino kowagiza wanhu zetu, kowagomesa wanhu sikuwalihe kodi kwa mndewa mkulu wa Lumi na koikema heyo ayo Kilisito Mkombola na koikema Mndewa.”

3Pilato kamuuza, “Gweye ayo Mndewa wa Wayahudi?”

Yesu kamwidika, “Vivo viulonga.”

4Abaho Pilato kawalongela wakulu wa walava nhosa na ulunhu lwa wanhu, “Siyonile mbuli ya kumtagusa munhu ino.”

5Lakini wao wagangamiza ng'hani, walonga, “Kwa mafundizo gake kowading'hula wanhu wose wa mwiisi ya Yudea. Kasongela Galilaya na sambi keza hano.”

Yesu kogaligwa kwa Helode

6Pilato viyahulike avo kauza, “Vino munhu ino mwenekae wa Galilaya?” 7Viyajuwile kamba Yesu kalawa mwiisi ilongozigwa na Helode, kamgala kwa Helode, yakalile Yelusalemu kipindi acho. 8Helode viyamone Yesu kadeng'helela ng'hani, kwavija kahulika mbuli zake na toka mwaka kakala yolonda kumona. Kakala kobetela kona unzonza utendigwa na Yesu. 9Avo Helode kamuuza Yesu mbuli nyingi, lakini hamwidike mbuli. 10Wakulu wa walava nhosa na wafundiza Malagizo ga Musa walawilila kuulongozi wamulavila vitala Yesu vikulu vikulu. 11Helode na wakalizi zake wamzeha Yesu na kumbezeli, abaho wamvaza kiwalo cha undewa wambweza kwa Pilato. 12Kipindi kikija Helode na Pilato wakala mbwiga, kwavija ako umwaka wakala waihile.

Yesu kotagusigwa yafe

(Matayo 27:15-26; Maluko 15:6-15; Yohana 18:39-19:16)

13Pilato kawakema hamoja wakulu wa walava nhosa, vilongozi na wanhu, 14kawalongela, “Mumgala munhu ino kumwangu mulonga kakala kowagiza wanhu. Lelo nimuuza mgameso genu na siyonile mbuli yoyose ihile yumumtagusile. 15Vivija Helode hachonile kiyabanange, lekaavo kambweza kumwetu. Kwavija kuduhu mbuli yoyose yaitendile munhu ino imtende yakomigwe. 16Avo nolagiza yatoigwe mbalati na kumuleka yachole.”

17Chahavikaga kipindi cha Nyimwilinyimwili ya Pasaka, Pilato kalondigwa yamfungulile mfungwa imoja. 18Lunhu lose lukemelela, “Mkome munhu ayo! Tufungulile Balaba!” 19Balaba kakala yagodekigwe mkifungo mbuli ya kuwading'hula wanhu kudibuga, na mbuli ya ukomaji.

20Pilato kalonda kumulekesa Yesu, avo kalulongela ulunhu kabili. 21Lakini wagendelela kukemelela, “Muwambe mumsalaba! Muwambe mumsalaba!”

22Pilato kawalongela mwanza wa kadatu, “Vino, mbuli gani ihile yaitendile munhu ino? Siyonile mbuli yoyose yaitendile munhu ino imtende yakomigwe! Nolagiza yatoigwe mbalati na kumulekesa.”

23Wagendelela kukemelela ng'hani, olonga Yesu yawambigwe mumsalaba, kukimambukizo nyangi zao zihuma. 24Avo Pilato katogola kija kiwalondile kumtendela Yesu. 25Kamfungulila munhu iwamulondile, ija yagodekigwe mbuli ya kuwading'hula wanhu na ukomaji, na kamgela Yesu mmakono gao wamtendele kamba viwalondile.

Yesu kowambigwa mumsalaba

(Matayo 27:32-44; Maluko 15:21-32; Yohana 19:17-27)

26Wakalizi wamulongoza Yesu, viwakalile omgala, wamting'hana munhu imoja kulawa Kilene, twaga jake Simoni, kakala kolawa kumgunda, wamgoga wamdikwa umsalaba, na wamulagiza yaupape hachugu ha Yesu.

27Lunhu mkulu lwa wanhu lumkweleleza, mmwanza awo wakala watwanzi wayagwe wakalile omulilila na kuiyalala. 28Yesu kahinduka kawalongela, “Mweye kina mama wa Yelusalemu! Sikumunililile niye, lakini ililileni wenyego na wanenu. 29Kwavija kipindi chokwiza wanhu olonga, ‘Wamweda watwanzi hawalelile wana na hawakong'heze!’ 30Kipindi acho wanhu ovilongela vigongo, ‘Tulagalile!’ na ovilongela visugulu, ‘Tufiseni!’ 31kwavija kamba wanhu otenda mbuli zino kipindi biki ding'hali bisi, vino yokuwaze kipindi biki dahanyala?”

32Wanhu wabili wayagwe wakalile wabananzi, wagaligwa wakomigwe hamoja na Yesu. 33Viwavikile hanhu hakemigwe, “Fumvu da Pala,” wamuwamba Yesu mumsalaba, hamoja na waja wabananzi wabili, imoja mwambu wa mkono wake wa kudila na iyagwe mwambu wa mkono wake wa kumoso. 34Yesu kalonga, “Tata, gela kumgongo nzambi zao, kwavija hawakijuwa kiwotenda.”

Waigolela viwalo vake kwa kubwanha simbi. 35Wanhu wema aho olola, kuno wakulu wa Wayahudi omzeha Yesu, walonga, “Kawakombola wayagwe, leka yaikombole mwenyego, kamba heyo ayo Kilisito, yasaguligwe na Imulungu!”

36Vivija wakalizi wamzeha, wamcholela wamgwaa divai ya ugwadu, 37kuno olonga, “Kamba gweye kwa Mndewa wa Wayahudi, ikombole mwenyego!”

38Uchanha ya msalaba wake wandika vino, “Ino ayo Mndewa wa Wayahudi.”

39Imoja wa waja wabananzi yawambigwe mumsalaba, kamuliga Yesu, kalonga, “Vino gweye siyo Kilisito Mkombola? Ikombole mwenyego na siye!”

40Lakini ija iyagwe kamkomhokela miyage, kalonga, “Vino, gweye humdumba Imulungu bule? Na gweye kutagusigwa kamba heyo. 41Gweye na niye totagusigwa goya, kwavija tobokela fungu da sang'hano zetu, lakini munhu ino hatendile mbuli yoyose ihile.” 42Abaho munhu ija kamulongela Yesu, “Yesu, ung'humbuke wahengila Muundewa wako!”

43Yesu kamulongela, “Nokulongela ukweli, lelo kokuwa na niye Paladiso.”

Ifa ya Yesu

(Matayo 27:45-56; Maluko 15:33-41; Yohana 19:28-30)

44Ikala saa sita imisi, ziza diigubika isi yose mbaka saa tisa, 45kwavija zuwa dileka kumwemwesa. Panziya da Ng'anda ya Imulungu digola gati da Ng'anda ya Imulungu na hanhu hong'ala ng'hani, didegeka mhande mbili. 46Yesu kalila kwa sauti ng'hulu, “Tata, noika mmakono gako loho yangu!” Viyalongile avo, kafa.

47Mkulu wa wakalizi wa Lumi viyagone gago galawilile, kamgwaa nhogolwa Imulungu, kalonga, “Munhu ino kweli kakala yanogile!”

48Wanhu wose wakalile waiting'hane aho kulola mbuli azo, viwagone gago galawilile, wabwela ukayao, kuno otowa mhambaga zao kwa kunyunyuwala. 49Wanhu wose wamjuwile Yesu na watwanzi wamuwinzile kulawa Galilaya, wema kwa kutali olola mbuli azo.

Yesu kozikigwa

(Matayo 27:57-61; Maluko 15:42-47; Yohana 19:38-42)

50Kukala na munhu imoja twaga jake Yusufu, munhu wa Mkitala, kakala munhu yanogile na kutenda goyolonda Imulungu. 51Keza kulawa Yudea buga da Alimataya na kakala kobeta kwiza kwa Undewa wa Imulungu. Hamoja kakala imoja wa wakulu wa mkitala, hagatogole gaja gawalondile wayage na gaja gawakalile otenda. 52Kachola kwa Pilato, kampula lukuli lwa Yesu. 53Abaho kaluhumulusa hasi ulukuli, kaluzingiliza sitili, kalwika mdipanga disongoligwe mdibwe, dikalile hadinazikiligwa munhu. 54Ikala ijumaa, siku ayo ikala siku ya kuitanda siku ya Kubwihila ikalile behi kusonga.

55Watwanzi waja wamkweleleze Yesu kulawa Galilaya wachola na Yusufu, na wajona dipanga na vija vilwikigwe lukuli lwa Yesu. 56Abaho wabwela ukae, watanda mavuta gonung'hila goya walubake lukuli lwa Yesu.

Mna isiku ya Kubwihila wabwihila kamba Malagizo ga Musa vigalagize.

Právě zvoleno:

Luka 23: King'hutu

Zvýraznění

Sdílet

Kopírovat