Sam 1
1
Lomomo Ruturun
1Luvukat mo ik lok tinedi di raba arulu lavapaase axasep at limixin kapmek la dixo mumu asu lampoovo at limixin di lok laxakapmek, kopla dinak lok esogo minedi di paase aksaksa ri ne Moroa. 2Ketla, di suma ka lomomo atla di mumu asu Lenavolo at Leeme Silok, la dim doma mumu amisix i at levenaleng kangking la at levenaleng kanimin bok. 3Di lok ngan larauna di suusu ro at lisigege dan, la di pisik akmokso levempeven at levengaaling pipisik at laxampeeve, la levenang atdi kopmen nak mada si, la na mamang. Mo limixin di ngasang kobot at levempanga axap di lox i.
4Ketla limixin kapmek dixok lok kuren; di lok ngan mun levempusuvus at levenbeo, lamanman it mas kepe i. 5At laaleng ne Moroa na viila mumu loklok at limixin axap, ni naba lok li lumumuat mavana at limixin kapmek, la naba riki pes di basinge limixin akmokso ren. 6Limixin manmanton dit pas keneng at loklok tatao at Leeme Silok, ne Moroa, ketla nedi di mumu asu langas kapmek, dinaba seeve.
Právě zvoleno:
Sam 1: mmx
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.