San Lucas 24
24
Jesús iiu phiidʉtarr
(Mt. 28:1-10; Mr. 16:1-8; Jn. 20:1-10)
1Maimua mag jua ʉ̃i kheutarr noram, domighed edpherre agtha khĩkhĩsu nʉwe, ʉʉin wetjierram aajem chi jẽbdi aar oon, amachdeu i kha phuraag jʉ̃gdee wau wai narr dʉi. Mag am wetum dʉi deeum ʉʉinjã am dʉi wetjim aajem. 2Maimua ooimaawai, mokpor pomkhamua chi jẽbdi i ee joothʉ phãar sĩerrta chawag pʉreupʉi thʉnaajim anaabá. 3Magbaawai warag ag ee dubnaa oowai, maach Por Jesús mordam ich aukhertarr ee chukkhu thʉnaajim anaabá. 4Mag amachdeu ooba abaawai, “Keena, ¿jãga abarmta mʉg maadeu oocheba abarma?” anaajim anʉm. Mag nʉm ee oowai, emkhooin numí sĩi khajũa bʉ̃ʉmjo jũa sĩsidʉmta am khĩirphee dʉnʉʉutkhabaichejim anaabá. 5Magbaawai jãphierr ajaugau pod am khĩir eerpaba sĩi eeg ʉ̃thʉ phobaadeewai makhʉʉnau amach garmua amag magjierram anʉm:
—¿Chi monakhamta khanthee pãrau i jʉr wenʉrrʉmma ajierram anʉm, mʉg jẽbdi õor kheraag watarr ee? 6-7I ya iiu phiidʉwia petabahab. Magua mʉig khaba simgui ajim anʉm. Khĩir eyaa abat ajim anʉm, Galilea durr aawaiwe ichdeu pãachig, Emkhooi Iewaa pekau pomkham khʉʉnau i pʉr aunaa pakuls gaai i meerppʉiju jaaujerr; mamʉ khãai thãrjupam ee deeu ich iiu phiidʉju jaautarrjã khĩir eyaa abat ajim anʉm amag.
8Magbaawaita chadcha i iekhatarr khĩir ee dʉnʉisijierram anaabá. 9Magbaa chi jẽbdi aigmua wetwia, chi dʉi wenʉrraajerr once narr khʉʉnag thum amachdeu ootarrjoo jaauwimajierram aajem. Ich mag thum aig narr khʉʉnagjã ich agjo jaaujierram aajem. 10Mag chi ʉʉin ich Jesuu once jʉr autarr khʉʉn aar iek jaauwimarr khʉʉnan, María Magdalena ajim aajem, Juana dʉi, María Santiago ãdpa, mag tag ĩchab tagam ʉʉinpa. 11Mamʉ ʉʉinau nem ĩgkha nʉm chi Jesús khapeenau ũurwai seukha nʉmjoo aawai ʉkhabajierram aajem. 12Mamʉ Pedroou mag ũrbaawai phiidʉbaadewia jẽbdiig khaphigbaadejim anʉm. Maimua ag ee ierr ooimaawai, ãba i pʉreu sĩerr put appaita ooimajim anaabá. Ichdeu mag oobaawai ich diig mamua ich odegpain, “¿Jãga awiata jãg ich aukhertarr ee chukkhu thʉnʉ́ma?” a khĩirjubaadejim anʉm.
Emaús khʉd ee ich oopitarr
(Mr. 16:12-13)
13Maimua ich ag edpai õor numí phobor Emaús anʉmʉg wetjim aajem. Mag Emaús phobor Jerusalenmua once kilómetros sĩejim aajem chi warphag. 14Mag ereubaadewia khʉd ee Jesús igwia, “¿Jãgataa i aukhertarr eejã jãg sĩi khãidu parii thʉnʉ́ma?” a iyʉʉ wetmajim anʉm. 15Mamʉ am mag iyʉʉ jũrr chikham i jũrr jaaupʉpʉig wetumta, amau ig narr Jesuhchata beewia am wetum dʉi maa ajim anʉm. 16Mamʉ amach bigaau mag nʉrrʉmjã pod khaug auba, sĩi deeum khʉʉnpiita naajim anaabá. 17Mag wetumua ich garmuata, —Keena, ¿pãar khandam jaauwaita mʉg iyʉʉ wenʉrrʉ́ma? ¿Jãga jãg pãar okhĩirjuumjo wetmá? ajim anʉm.
18Magbaawai ãb Cleofas aajerrau irig, —Maadeu khan iek agájã amapha simgui ajim anʉm. Thumaam khʉʉnau khakhapdo thʉnʉm, jãgajĩ Jerusalén phobor ee. Pʉjã ĩchab ag phobor ee mʉg nemkhoo dichtarrta, ¿ãba pʉchdeupaita khaugba chirʉ́? ajim anʉm.
19Magbaawai ich Jesuu amag, —¿Khani jãgjierráma ajim anʉm, mʉg nemkhoo ee?
Magbaa amachdeu irig jaaumamua, —Jesús Nazaretpierrma ajierram anʉm, Ẽwandam i jaaumie. Irua Ẽwandam jua theegau nem khĩir pogkhe waaujeejim. Maimua jãga Ẽwandamau maach peerdʉ aaujẽ a jaauwaijã õrau khakhapdo aajeejimgui ajim anʉm, chadcha Ẽwandam iekta jaau sim. 20Mamʉ mag khitarrta phadnaan chi pornaanau chi thethem khʉʉn dʉimua Pilatoog pʉr deebajieb ajim anʉm, jũrr ich soldaaunag pakuls gaai meerphe thõopi jaaumkhĩir. 21Amau i jãgbajupii awia marau khĩirjuawai ichdeuta israelnaan thum Romapien jua eemua por obeer aujupii naajimgui ajim anʉm. Mag khĩirju naajieb mamʉ, viernes i thõotarr ya khãai thãrjup pamgui ajim anʉm, ĩsim khurau i dau aphʉʉ abarm. 22-23Mag nʉm ee warag ʉʉin maarjo i igar ʉkha nʉm khʉʉnau ĩs edaupherre khĩsu nʉwe jẽbdi aar oothurwia maach jʉ̃gderraata jaauchejierramgui ajim anʉm. Am iek khabá mag chi aukhertarr ee ooimaawai, chukkhu, sĩi Ẽwandam chognaanta aig naajim anʉm. Makhʉʉnau amag jaauwai, Jesús iiu sim aajem. 24Mag jaaubaichem ũrwia agjo maach eem khʉʉnaucha chi jẽbdi aar oon weetwai chadcha ʉʉinau jaau narrjo sĩi khãidu parta ooimajierram aajem a ĩgkhamajierram irig.
25-26Magbaawaita jũrr ichdeu amag, —Pãarta khĩirjug chukkhu nʉmá ajim anʉm. Ẽwandam i jaaumienau phãtarr gaai thum ich magta obeberg maju a jaaujierram, cha pãachdeu mʉrʉg jaau nʉmjo; mamʉ pãrau ʉkhamaphata naabahab ajim anʉm. Pãrau khĩirjuawai, ¿í ich Ẽwandamaucha jʉr autarr aawai ich jãg dau aphʉʉ aju aai khaba sĩejĩ? Mag khabamgui ajim anʉm. Ya nawe ich mag phã sĩerr aawai ich mag dau aphʉʉ aju aai sĩebajieb ajim anʉm. Mamʉ ĩchab chi jʉr autarr khʉʉu deeu iiupiwia ichta thumaam khʉʉn Porkhapiju a simjã agjo mag Ẽwandam i jaaumienau jaaubajieb ajim anʉm amag.
27Maimua jũrr ichdeuta warag amag jaaubaadejim anaabá. Nacha Moiseeu phãtarr gaaimua jaaupʉpʉig khĩeb chi Ẽwandam i jaaumienau phã pʉatarr gayam magwe, ich igwia beeju a jaau sĩsidʉm thum ajapha jaaudubjim aajem amag. 28Mag iyʉʉ wetumua phobordam Emaús anʉm ee amach di aar barimajierram aajem. Mamʉ mam pabaimaawai ich Jesuu warag am dakhĩir sĩi dicham ig sĩejim anʉm, juau ich thʉamkhĩirjo. 29Magbaawai amachdeu irig, —Maar aig khãibaje. Ya atcha edau kheeuraa sĩebahab; khʉd pʉ kheujuwai ajierram anʉm.
Magbaawai chadcha am dʉi sĩsijim aajem. 30Mag am dʉi thʉbawia, ãba ohoodo thach khoogpamua pan ich jua ee auwia, Ẽwandamag ʉu ajim anaa, thorreuwia, amag ʉapʉijim aajem, ag na ichdeu aajerrjo. 31Magbaawaita dau eerdʉ phobaademjo warre i khaug athajierram anaabá. Mamʉ mag ich khaug atham ee, dau perbarmjo arrau, am jãrr sĩerrta degolp chukkhu aadejim anʉm. 32Magbaawai amach wir aigpai, —Keen, jãguata mʉch thãar eepain muan ich khãijãa a chirajimgui ajim anʉm ãbmua; maimua ĩchab maach dʉi khʉd ee iyʉʉ urumua Ẽwandam iekpa thumaa ajapha jaaupʉpʉigmam ũrwiajã mua khaugaa aadejimgui ajim anʉm ich khaperag.
33Mag amach ap iyʉʉ naawia ich ag bʉrre deeu beejierram aajem Jerusalén phoborog, amach khapeen narr aar jawaan. Maimua oocheewai, chi Jesús khapeen i dʉi ogdʉba wenʉrraajerr khʉʉn once thumaa ãbam aig podpa thʉnʉm oochejierram aajem, tagam khʉʉn ĩchab Jesús igar ʉkha narr khʉʉnpa ãba. 34Maigjã ũrimaawai amach thumaam khʉʉnau, “Keena, chadchata maach Poron iiu phiidʉbarmwai; ya Simonagjã ich oopibarm” a jaau nʉmta ũrimajierram anaabá. 35Mag amachig jaaubaawai, amachdeujã jũrr warm khʉʉnag maguimajierram aajem:
—Keena, magan maraujã pãrag jaaukhimgui ajierram anʉm, maachdeu i ootarr: Irua khabá maar ẽkha auwia khʉd ee maar i dʉi ãba wetjima ajim anʉm. Mamʉ mag khʉd ee ãba wettarrjã marau pod i khaug auba, sĩi ãba thach kho nʉm aig pan thorreuwia ichdeu ag na jiigjerrjo jigbaadem aigta, marag ich khaugpimjo khaugpibaawai, marau i khaug aujimgui ajierram anʉm jũrr amach khapeenag.
Jesuu ich bʉ dʉii aajerr khʉʉnagcha ich oopitarr
(Mt. 28:16-20; Mr. 16:14-18; Jn. 20:19-23)
36Mag agtha am ich ag iekpai jũrr jaauphoo thʉnʉm ee chi Jesús am jãrr dʉnʉʉuchewia, —¿Jãgpai nʉ keena? Oob jãphierrmiet, mʉ khabahab aichejim anʉm amag.
37Mag sĩi degolp amach jãrr dʉnʉʉubaicheewai jãphierr nʉm iekhau sĩi i akhaarta oo nʉmpii naajim anʉm. 38Mamʉ mag jãphierr nʉm oobaawai ichdeu amag, —¿Khanthee pãrau pãach khĩirjug eepai “mʉʉta akhaar” anʉ́? ajim anʉm. 39Pãar iek mag mʉ akhaar anʉm, pãade oobat mʉ jua maimua mʉ bʉjã agjo. Chadcha mʉch khabahab ajim anʉm. Mʉ gaaicha pʉrbahut, magnaa ajapha oobat ajim anʉm. ¿Pãrau akhaar gaai pʉrju aai nʉ, mʉ gaai pʉr nʉmjo? Akhaar chan mor chukhu sĩerrʉmgui ajim anʉm, woun khaba aawai.
40Magnaa chadcha amag ich juajãjã oopinaa, ich bʉjã oopijim anaabá, chadcha mag gaaimua ichta chikhamnau pakuls gaai meerphe thõotarr ag wounau a khap amkhĩir. 41Mamʉ mag ichcha oo nʉmjã sĩi warag onegnaa dauderraamjo nʉm gaaimua ʉkhaba narr aawai ich Jesús garmuata deeu amag, —¿Keena, pãrau nem inagdam khoog chukhu nʉwi? ajim anʉm.
42Magbaawai amachdeu ãwarrdam wai narr aawai chi phaamdam irig deejierram aajem. 43Mag ichig deebaawai auwia am dakhĩir khopʉijim aajem. 44Mag ãwarrdam kho aaipawiata amag, —Keena, mʉg mʉch õrau thõojuuta mua pãrag jaaujeejimgui ajim anʉm, agtha maach ãba wenʉrraajeewaijã. Moiseeu Ẽwandam iek phãtarr gaai mʉ igwia jaau simjo, ichiita ich jãg mʉch dau aphʉʉ ajujã jaaujeejimgui ajim anʉm, mua pãrag. Maimua Ẽwandam i jaaumienau phãtarr gaaijã jaaunaa Davidau ẽsap Salmos anʉm phãtarr gaaijã mʉ igwia ich mag phã sĩsid aawai, chadcha ichdeu jaautarrjoo thum ag eyaa oberjimgui ajim anʉm amag. 45Maimua mag ichdeu Ẽwandam iek gaai phã sĩsidʉm jaautarr khap amkhĩir, ichdeupai am por opherg apijim anaabá. Magbaawain chadau i igwia Ẽwandam iek gaai phã sĩsidʉmjã thum khaphʉ nʉisijim aajem. 46Magnaa amag magjim aajem ich Jesuupai:
—Ich magta phã sim Ẽwandam iek gaai. Maguata chadcha mʉch chi Cristo ich Ẽwandamaucha jʉr autarr awiajã dau aphʉʉ meeju aai chirajimgui ajim anʉm. Mamʉ ĩchab khãai thãrjupam ee iiu phiidʉju arrjã jaau simgui ajim anʉm. 47Mag mʉch chi Cristo iiu phiidʉbarm ootarr khʉʉnauta amachdeu ootarr nacha Jerusalenpienag jaaunaa ĩchab durrpierram khʉʉnagjã jaaujugui ajim anʉm, jãgata khĩirjug ajapham jʉrbaawai Ẽwandamau amach khaibag chugpaaju aai sim thumaam khʉʉnag khap amkhĩir. 48Mag pãrauta mʉ meewia iiu phiidʉtarrjã pãach daúacha ootarr aawai pãarta chi jaauju khʉʉnaugui ajim anʉm. 49Mag jaaumamua ich Jesuucha amag, Pari magaagan mʉgtarr khur jopcha murua pãar athee pʉijugui ajim anʉm Ẽwandam Akhaar, ich mʉ Ayaucha deeju a jaautarr. Mamʉ mʉig Jerusalén phobor eepai nʉisit ajim anʉm, mag Akhaar bee nʉm ora. Ʉ̃gtharmua ich Ẽwandamau pʉibapʉim edta pãar gaai phẽs sĩeichejugui ajim anʉm, pãachdeu ootarr thumaam khʉʉnag jaau khaphʉ jaau wenʉrramkhĩir.
Jesús ʉ̃gthar matarr
(Mr. 16:19-20)
50Maimua ãbmiecha paawai phobor eemua ich Jesuu am phe arrjim aajem phobor Betania anʉmʉg khʉdau ma sim ee. Mam phobor igaau pabaimaawai ʉ̃gthaag jua ʉanaa Ẽwandamag jeeumamua, —Tata, puata mʉg atagjã mʉkhʉʉn wounaan ich jãg ʉu am phe wai chitajugui ajim anʉm.
51Mag am khĩir onee iekhamamua, am dakhĩraa edjã baug ee ʉ̃gthaa papagmamua, warag oohba pamamua Ẽwandamau ich aar ʉ̃gthar athajim anaabá. 52Mag i ʉ̃gthaag mam oobaawai jẽb gaai kanieu phõbkhanaa irig, —Pʉjom chan wounaan mʉg atagjã marau oobam. Pʉchta chadcha ãba maar Porou ajierram aajem.
Mag jeeu durrawia, deeu Jerusalenag onee wetjim aajem, amachig jaautarrjo. 53Maimua Jerusalén phobor ee pawiajã ich mag ed eepierr Aai i jeeujem deg wetwia jeeu durraajeejim aajem.
Právě zvoleno:
San Lucas 24: noaA
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.
