San Lucas 18
18
Nem pʉaba Ẽwandamagta warag jeeu nʉʉ aju aai nʉm
1Ĩchab Jesuu ich khapeenag mʉg nem ĩgkhaadam jaaujim aajem, mag jaaubarm gaaimua amachdeu nem ig nʉm Ẽwandamau da deeba awiajã warag pʉaba irig jeeuju aai nʉm a khap amkhĩir. 2Mag jaaumamua magjim anʉm:
—Woun ãb chi thethem sĩejim aajem, phobor ee. Magua bʉ̃ʉrjã ich khapeen ogkhaba ni Ẽwandamjã igba sĩerrajim anʉm. 3Ich ag phobor eepai ĩchab sĩejeejim aajem, khoopaa ũan ãb. Mag ũanau beewia irig, “Mʉ ap ʉrrʉm mʉ khaigperbá” aajeejim anʉm, “mʉ kha ukhurm khʉʉnau mʉ dʉi atcha jãgam ugua.” 4Mag khoopaa ũan dau aphʉʉ ich aig udkhʉrrkhakhakhamjã bʉ̃ʉrjã i iek asekasmapha sĩi awia khãai ãb magjim aajem: “Mua chadcha Ẽwandam igbanaa mʉch khapeenjã ogkhaba chitab mamʉ, 5jãg khoopaa ũan tag mʉch aig bebee am ugua, mua chadcha i khaigperjugui” ajim anʉm. “Magba akhiin, irua ideu mʉ khajap chirbajugui” ajim anʉm, “ich ag iekpai phʉʉrba jajaau aawai.”
6Mag ĩgkha dichwia, ich Jesuupai jũrr amag, —Pãrau ũrjierramgui ajim anʉm, khan a iekhajĩ mag woun chi thethem nem khaibag sĩerrau. 7¿Pãrau oowai ich aig bebee nʉʉ paawai khoopaa ũan irua khaigperbajĩ? Ẽwandamaujã ich chaainau ichig edaram magwe jeeu nʉʉ akhiin, irua makhʉʉnjã eeg oob khaba oojugui ajim anʉm. 8Magnaa, Mua pãrag jaaukhimgui ajim anʉm. Ẽwandamagta pãrau mag jeeu nʉmʉn, pãar khaigperm edjã warre irua pãachdeu khõsi nʉmjo aju pãar dʉi. ¿Mamʉ pãrau khĩirjuawai mag mʉch chi Emkhooi Iewaa beeju ed õor chadcha mag amach thãraucha Ẽwandamag jeeu durrum khʉʉn agtha naaju khai? ajim anʉm.
Wounaan numí Aai i jeeujem deg oraa narr
9Maimua amachdeupai amachta thumaam khʉʉn khãyaujã ajap pekau chukhu khitheem awia jũrr amach khapeen khaibag pheejem khʉʉnag Jesuu mʉg nem ĩgkhaadam jaaujim aajem. 10Chi nem ĩgkhaadam mʉg ajim aajem:
—Wounaan numí Aai i jeeujem deg Ẽwandamag jewaan wetjim aajem. Ãb fariseo ajim anʉm, Moiseeg Ẽwandamau ich iek phãpitarr ajapcha ʉʉrkhaajem aajem khʉʉn eem, maagwai ãbakhai gobiernoog õrau debpaar paraa nʉm jeeujem ajim aajem. 11Chi ajapcha Moiseeu phã pʉatarr iek ʉʉrkhaajemua bʉjãaupai oo dʉnʉmua, Ẽwandamag jeeu nʉm anʉmta, ichpai tho iekhamamua magmajim aajem: “Ẽwandam, pʉrʉg ʉu ajim a chirʉm, ʉuta jãg mʉ chikhamnaanjo khaba chitʉm. Mʉ amjo nem jĩignemjã khaba, pekau pomjã khaba, ni deeum ʉʉinjã wauba chitʉmgui” ajim anʉm. “Mʉ chan gobiernoog õrau debpaar paraa nʉm khʉʉnag jeeujem ar achum simjojã khaba chitʉm” a iekhamajim anʉm, ichdeupai ich ajaug thowia. 12Maimua warag mag jaaupʉpʉigmamua magjim aajem: “Ẽwandam, mʉʉn semanpierr khãai numí thach khoba sʉrkha chiraajem, pʉrʉg jewaag. Mag nʉm dʉi ĩchab mʉch phatkhondam oopierr ag eem deeb khaba pʉrʉg dee khitaajemgui” ajim anʉm. 13Maagwai jũrr chi gobiernoog paar nʉm khʉʉnag jeeujemdam ich appai ag warphaa oothẽu kherʉmua agjo Ẽwandamag jeeu sĩejim aajem. Mamʉ maan, jũrr ichdeupaijã ich pekau pom khitʉm khaphʉ sĩerr aawai, gaai machgau warag eeg ʉ̃thʉnaa por jõjõikhamuata maagjeejim anʉm Ẽwandamag: “Ẽwandam, mʉch chadcha pekau pom chitʉm khap, pʉrʉg jeeu chirʉm; mʉ ap chitʉm mʉ eeg oobá” aajeejim anʉm.
14Mag numí Ẽwandamag jeeu narr khʉʉn jaau dichwia, chi aig ich iek ũr narr khʉʉnag magjim aajem: —Ichdeupai Ẽwandamag ichta chi ajapham a chirarr khãyau, ich dau aug khaugpi jeeutarr wounta jũrr Ẽwandam dau na ag najã ich mag bʉ̃ʉrjã khaibag chukhu aajerrjoo sĩebahab ajim anʉm. Mamʉ ar amach thowia chikham dʉi athuucha aajem khʉʉn, jũrr mʉg atag paawai am Ẽwandamag chaigpa oo sĩsidʉ abarjugui ajim anʉm. Maimua ar mag amach dʉi athuu nʉm khʉʉn ichaaurjã magʉm aba sĩi warag serbiibamjo aajerr khʉʉnta, jũrr mʉg atag paawai, Ẽwandamau warm khʉʉn khãyaujã ʉ̃rpai apiju a jaaumajim aajem.
Chaain denjo Ẽwandam iek ʉkhakharrso ʉkhaju aai nʉm
(Mt. 19:13-15; Mr. 10:13-16)
15Biek ãb mag jũrram khʉʉnau aaunaan Jesús sim aig wai bee nʉm ee, chaainpa chi dennaanau aibee naajim aajem, am gaai pʉrnaa Ẽwandamag am kõit jeeumkhĩir.
Mamʉ mag jũrram khʉʉnau chaain aibebeekham oowia jũrr chi Jesús dʉi ogdʉba wenʉrraajerr khʉʉnauta mag chi aibee nʉm khʉʉnag meeurrau sĩujierram aajem, tag aibeepimaaugau. 16Mamʉ amau mag nʉm ee, warag Jesuu chi chaaindam thʉ̃rkhanaa jũrr ich khapeenagta, —Ideu chaain mʉ aig beepibat ajim anʉm. ¿Khanthee pãrau amag beepiba jaau nʉ? Chi jooin awiajã chamʉ khʉʉn chaainjo mʉ iek ʉkhakharrso ʉkha nʉm khʉʉnta mʉg jẽb gaaijã ʉu wenʉrrawia, ʉ̃gtharjã onee wenʉrrajugui ajim anʉm. 17Mamʉ chi ʉ̃gthar oberju khĩirju nʉm khʉʉnaujã mʉkhʉʉn chaain denjo ʉkhabam chan pod oberbamgui ajim anʉm. Mua pãrag mag jaau chirʉmʉn chadcharam iekta jaau chirʉmgui ajim anʉm.
Woun ãb phatkhon paraam Jesús dʉi iyʉʉ athurtarr
(Mt. 19:16-30; Mr. 10:17-31)
18Biek ãb Jesús sim aig woun ãb chi thethem beejim aajem, phatkhon paraam. Mag wounau irig, —Maestro, pʉʉta chadcha Maestro ajapham aawai pʉrʉg jewaan beejim: ¿Mua khani jãgju aai chirʉ́, ʉ̃gthar oberaag? Mʉrʉg jaaubá aichejim anʉm.
19Magbaawai Jesuu irig, —¿Khanthee pua mʉrʉg “chi ajapham” a sĩ? Õor ajapham chan chukhumgui ajim anʉm. Ajaphamʉn ãba Ẽwandamta ich appai ajapha sĩerrʉm. 20¿Pua khaphʉ sĩebá ajim anʉm, Ẽwandamau Moiseeg ich iek phãpitarr gaai: “Oob dich õor khabam dʉi khapes am; oob õor thõom; oob nem jĩgkham; oob chikham eugarjã seukha nem ĩgkham; maimua pʉch aai jãsenkhanaa pʉch ãdjã jãsene abá” a sim?
21Magbaawai chi woun phatkhon paraamua, —Mag pua jaau sim thum mua mʉch bʉ̃rʉʉwe ʉʉrkha chitabahab ajim anʉm.
22Jesuu i mag iekha sim ũrbaawai irig, —Mamʉ agtha khĩir ãb pua waaur wai sĩebahab ajim anʉm. Pʉch nem thum perkhʉʉipʉiwia chi phatkhon aphʉʉ khitheem khʉʉnag jigbapʉi. Maimuan chadau mʉ ẽudee pidú ajim anʉm, mʉ dʉi chitam khõsi chirʉm khai. Pua magmʉn, ʉ̃gthar pawiajã bʉ̃ʉrjã augcheba, phatkhon khãaijã nem ajapham pomta wai chirsijugui ajim anʉm irig.
23Mamʉ Jesuu ichig mag nem thum perkhʉʉiwia chi phatkhon jigpi jaaubaawai, warre chi woun okhĩirjuu aadejim anaabá, chadcha phatkhon paraam arr aawai. 24Jesuu oowai mag ichdeu nem jaaubarm gaaimua atcha okhĩirjug pom aadem oowi, —Phatkhon paraam khʉʉnta Ẽwandam chi Porkha sim aar oberaagan chadcha thethe simgui ajim anʉm, amach phatkhonagta ʉ̃rcha ee naawai. 25Phatkhonpanta ʉ̃gthar Ẽwandam chi Porkha sim aar oberju khãyau, camello pom jãg maach wounaan khãaijã ʉ̃rpai sĩerrʉmta phithurg chukhu nobeeu kachdam ee thoogar ober dichjugui ajim anʉm.
26Jesuu mag iekhabarm ũrbaawai aig chi ũr narr khʉʉnau, —Mag khai, magan ¿khaita peerdʉagáwa? ajierram anʉm.
27Magbaawai Jesuu amag magjim aajem:
—Õragan chadcha phithurgma mag ũurwai, mamʉ Ẽwandamag chan bʉ̃ʉrjã phithurg chukhu simgui ajim anʉm.
28Magbaawai Pedroou irig, —Maraun chad pʉ dʉi wenʉrram khõchgau maach nem wai narrjã ewag khĩirjuba, sĩi thum phepʉawi pʉ dʉi ogdʉba wenʉrrabma ajim anʉm.
29Magbaa ich Jesuu magjim aajem:
—Chadcha ar thum chi mʉ gaaimua wa mʉ iek jaaum khõchgau khãijã amach di pʉawia, amach dennaanjã pʉanaa, amach khodnaan, amach ʉʉin wa amach chaain khãijã khaugba khũchpaim athee phepʉpʉakham khʉʉnagan chadau, 30mʉg jẽb gaai agtha nʉwejã mag amach nem okhoomarr khãaijã ʉ̃r ag atcha deewi mʉg atagjã mʉch dʉita ich mag wenʉrramkhĩir mʉch aarcha phe aujugui ajim anʉm.
Õrau ich thõoju Jesuu jaautarr
(Mt. 20:17-19; Mr. 10:32-34)
31Maimua ich dʉi doce ogdʉba wenʉrraajerr khʉʉn chaaur khĩet phe arrwia amag magjim aajem:
—Pãrag khap amkhĩir mua warre jaaukhimgui ajim anʉm: Pãrau khaphʉ nʉm, ya maach Jerusalenag wetum. Jerusalén barbaimaawai warrgarwe Ẽwandam i jaaumienau mʉch chi Emkhooi Iewaa igwia phãtarrjo thum ag eyaa oberjugui ajim anʉm. 32Magbaawai makhʉʉnau maach meeun khabam khʉʉnag mʉ pʉr deejugui ajim anʉm. Magbaawai makhʉʉnau mʉ wau iekhamam dʉi mʉ khĩir iekhanaa mʉ gaai ichopa thumaju. 33Magnaa mʉ wʉ wai nʉʉ awia amau mʉ thõopʉijugui ajim anʉm. Mamʉ khãai thãrjupam ee deeu mʉ iiu phiidʉju a jaaujim aajem.
34Mamʉ i mag iekhabarm amachdeu bʉ̃ʉrjã khaugba, ich mag nʉisijim aajem. Amau ũurwai, Jesuu sĩi parhooba ichdeu iekha simjã khaugbata iekhabapʉimjo ũrpʉijierram aajem.
Phobor Jericó anʉm ee woun ãb dau khĩsu khitarr
(Mt. 20:29-34; Mr. 10:46-52)
35Jesús ich khapeen dʉi mag mamua phobor Jericó anʉm dakha paaukhabaimaawai woun ãb dau khĩsu khitʉm khʉd igaau oo kherʉm ooimajierram aajem, õor ereu dich thʉnʉm khʉʉnag nem jeeuwai. 36Mag dau khĩsu khitʉmua õor pom ich aig ereu dich thʉnʉm khaug athaawai jeeujim aajem, khan jãgwiata mag thʉnʉm khai a khap aag. 37Magbaawai ãbmua irig, —Jesús, Nazaretpierrta dich nʉrraawai khabahab mʉg õor pom sereu wetum ajim anʉm.
38Magbarm bʉrre chi dau khĩsu khitʉmua thet ähäakhamua Jesuug, —¡Jesús, pʉʉta rey David khachitarr ag chaain ewagam khʉʉn Iewaau marau nʉ narr! Mʉ ap chitʉm mʉ dau ee aug khaugbahur aajeejim anʉm, ich dau monawaan beemkhĩir.
39Magbaawai chi na wetmaa arr khʉʉnau irig meeurrarrau aajeejim anaabá, khĩupamkhĩir. Mamʉ magbaawai chará waragta, —¡Jesús, pʉʉta rey David khararr ag chaain ewagam khʉʉn Iewaau marau nʉ narr! Mʉ ap chitʉm mʉ dau aug khaugbahur aajeejim anʉm, thet khĩesirnaa.
40Mag ähäakham ich Jesuu ũr athaawai dʉnʉisiwia awaan mapijim aajem, ich aigcha aibeemkhĩir. Mag ich aigcha aipierrwai irig, 41—¿Khani pua mʉrʉg pʉch dʉi apim khõsi chirʉ́? ajim anʉm.
Magbaawai chi dau khĩsu khitʉmua, —Señor, muan pʉrʉg mʉch dauta monaaupim khõsi chirʉmgui ajim anʉm.
42Magbaa Jesuu irig, —Magan dau eerdʉbaad ajim anʉm. Chadcha muata pʉch monaaupʉiju khĩirjutarr gaaimua, ʉu pʉ peerdʉwia monaaujã monaau chirsimgui ajim anʉm.
43Jesuu magbarm bʉrre chadcha dau eerdʉ sĩsiwia ich bi eem daujo daujã ajaug sĩsijim anaabá. Magbaawai warag i dʉi mamua onee Ẽwandamag jeeumamua, —Ẽwandam, ĩsin chadau pua mʉ ʉuta abarm. Pʉjo jua theegkham chan mʉg jẽb gaai chukhum a ijẽjẽbag majim aajem.
Jesuu mag woun dau monaaubarm oobaawai ĩchab mag õor khapan thʉnarr khʉʉnaujã Ẽwandamag jeeumamua irig “Ʉu ajim” ajierram aajem.
Právě zvoleno:
San Lucas 18: noaA
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.
