Oblíbené biblické verše z Iruka 12

Sdílet

Uito areineꞌen Wuatꞌi Miitꞌin Eꞌykeꞌet wo. Ariot wyti aru mesuwat yi kape maꞌato mekewat uhuut hap eꞌat pe yt uwe mikuap mo i e. Waku uhekatup haria wo eweikupteꞌen katupono sereꞌok hat ewy uhuut hap eꞌat turan e.

Yt atikyꞌesat i eipe mesuwarotiaria wanetup hap ewy eweikupteꞌen. Maꞌato atikyꞌesat eweikat kahato aikotã waku miitꞌin muꞌe Tupana etiat hamuat hap kape aikotã Tupana topyhuꞌat Wuatꞌi Ywania Porekuat nuat hap kape are e.

Mio tã toꞌe hawyi tohenoi yne itotiaria pe -Eiweꞌeg wo o meimuẽwat ehekareꞌen iwato kahato kyꞌe kahato hap pupi e. Uhekat kahato teran eweikyꞌesat maꞌato eheineꞌen hap sese yt eweikat hin i hawyi yt eweipuẽti i wyti aru ehekat wuatꞌi eꞌat piat hap e.

Ehekareꞌen atipy pe pote iꞌewyte eiwanetup hap aipyꞌa piat iꞌewyte tukupteꞌen itote maꞌato ehekareꞌen mesuwarotiat yn tukupteꞌen pote iꞌewyte eikyꞌe hap eiwanetup hap eipyꞌa piat toineꞌen wy mesuwarotiat koꞌi ete yn e Iesui iꞌatuepe.

Taꞌi pywo ti yt eitypore i pote yt kan hamo i eweiwanetup koꞌi koꞌi katupono eweiwanetup koꞌi koꞌi haty wo pykai eipiit motypore hap yt kat i toineꞌen e.

Miꞌi hawyi Iesui henoi i raꞌyn topotmuꞌeria pe -Uiwyriaꞌin e yt naku i eweiwanetup yn eimiꞌu mesuwarotiat kape e. Yt naku i eipiit piat ehesokpe koꞌi kape yn eweiwanetup e.

Yt eweikenꞌẽ teiꞌo uiwyriaꞌin katupono eipe ti poꞌog kahato weitaria kai eikyꞌe Tupana e. Taꞌi toikuap yne ahetiat e. Karania eꞌasap koꞌi etiat toikuap yne e Iesui.

Miꞌi hawyi Iesui toꞌe tomohey haria pe -Uihũria koꞌi ewywuat no eipe are e. Yt typyꞌi kahato i eipe maꞌato yt eweikenꞌẽ teiꞌo katupono Tupana einug neran morekuaria wo karãpe Tupana topyhuꞌat Wuatꞌi Miitꞌin Morekuat nuat hap eꞌat pe e.

Eiwehaꞌat ro weitaria koꞌi kape e. Yt teꞌeruwemiꞌu koi kuap i wen maꞌato Tupana tiꞌatupoi kahato weitaria koꞌi are e. Iꞌewyte yt taꞌatuereko i iꞌatumiꞌu koꞌi eiperia ewy maꞌato Tupana tiꞌatupoi kahato weitaria koꞌi yne eꞌat pe. Pyno eiperia ti poꞌog poꞌog Tupana miꞌatukyꞌe koꞌi torannia weitaria koꞌi kai are.

Miꞌi tupono yt naku i eweiwanetup koꞌi koꞌi yt kat i Tupana mohey hap wywo. Yt naku i eimiꞌu etiat ehesokpe etiat eweiwanetup aat kaꞌap.

Wuatꞌi eꞌat pe gaꞌapy piat koꞌi Tupana minug sokpe puo e. Mukiꞌite ipohyt koꞌi topap taꞌyn. Miꞌi hawyi igag hawyi eheꞌaria wo iꞌyp koꞌi ewetunug e. Taꞌi Tupana tikuap kahato ahesokpe nug hap aipainug hap e. Yt eweikuap i te apo aikotã eiperia poꞌog Tupana mikyꞌe koꞌi gaꞌapy pohyt koꞌi kai hap e.

Iꞌewyte yne huwy piat ewywuat iꞌatuminug koꞌi migꞌi wo iꞌatumiꞌapyhik koꞌi meiũran aru Tupana tiꞌatumoherep wuatꞌi ehamo e. Meiũran ti aru heremo kahato iꞌatuminug saꞌag migꞌi wo topyhuꞌat wuatꞌi mikuap mo are e.