Text: © Alliance Biblique du Cameroun, 2002 Audio: ℗ 2011 Hosanna

Ghomala - 2002 Edition (NT) Drama

Nouveau Testament Ghomala © Bible Society of Cameroon, 2002.

A lə́ pɑ jak tyɛ'dzʉ nthɔ̌k tə́ a pɑ tyɛ' Paska, Yeso ŋwak Betanya, tsʉ' yə Lazaro yə e lə yam é nə vʉ̌ a lə́ bɑ nə a. Pu ghə ŋwɛnyə nə thə́ e: Marta pɑ́ gap ywətsʉ, Lazaro pɑ cəcɑ̌ mghʉɔ. Maria lɑ dúŋ mwɑ damnyəlamnyə, mwɑ tʉɔdə̀ŋ, nə jwɔ' mkwə Yeso, dɑ nəŋ thə́ e nə shi'. Zhwyə mwɑ bɔ ló Dyə̌. A pɑ po'o, Yuda Iskariɔt, mu' mo nə́ pɑkhʉ̌ pyə́, mo yə e lə bɑ gɔ la' hɑ́ e á ghɔm gɑ: Nwə kɑ̀ bɑ pú ka fiŋ mwɑ damnyəlamnyə mə́ nə́ bɛ ŋkhap ŋkhətá, hɑ bi mpə̌ŋ? E la tə́ gɔm po'o bɑ nwə mpə́ŋ nə nthəŋ e pɑ́. E lə́ gɔm po'o nə pa' e lə́ bɑ shúŋ, pétə́ pɑ m̀ bi é. E pɑ́ jʉ ywə́ yə pu lə́ nyəŋ nthʉm o a. A pɑ́ po'o Yeso ghɔm gɑ: tak e nə́ŋ; ywə yə e gə a bɑ nə́ nə nthəŋ a. Po a mpə̌ŋ nə gɔ pɑ pɑ́ guŋ mcwə awɛ; tə́ sɔ' m nə m̀, pɑ́ lə ghɔ pɑ́ pɑ́ guŋ mcwə awɛ.
A lə́ nə pɑ̌ po'o bɑ kwa' vəŋ pɑ Yudea yu' gɑ Yeso tsʉ'u, sɔ̌', po'o tə da' nə Yeso pɑ, sɔ' ba nə yɔ Lazaro yə́ e lə́ yǎm é nə vʉ̌ a. Mkamsi gwyəgwyə nyəŋ gɑ wap gɔ zhwə ba Lazaro yə́, nə pa' a lə bɑwə shyə́ pɑ nə e tə pɑ Yudea tə jɔm pɑwə nthəm nə pú, biŋ bíŋ Yeso.


Dzʉ̌ lə́ lɔ̌, vəŋ pɔ pyə́ wap lə sɔ' nə ŋwɛnyə á yu' gɑ́ Yeso wə́ sɔ' m Yerusalɛm; wap lə lɑ̌ mcɛ́ yɛ bɛ nə nthəm tisuŋ gɑ pu a pu yu'tə, wap lə bɑwə jwɔp gɑ:
Hozana, byanyə pɑ́ bi mo yə ě wə sɔ' a,
shyə m nə́ tsǒ Cyəpɔ,
fo pɑ Israɛl.
Yeso lə́ yɔ mu jakasi, shwə́ dəm e, dəŋdəŋ pa' a ba pu lě bvə gɑ:
Kɑ́ pwɔk, gò Sion:
Yɔ fo o yəŋ bɑwə sɔ̌',
bɑ ě kwɔ' dəm mu jakasi.
Pɑkhʉ̌ pyə́ lə ləŋdzə la' wap yu' kwa' ywə yə ǎ wə shyətə a, da' gɑ́ pu lə cwə̌ tə gu'tə Yeso, wap kamtə́ gɑ́ a lə́ bɑ́ pu lě bvə nə e po'o, a pɑ ywə bɔ tə́ pu lə́ bɑwə gə nə e. A lə́ bɑ po'o, vəŋ pɔ pyə́ pu a pu lə́ bɑ́ cwə yə́ é lə́ kě Lazaro nthʉm sì, jám é nə vʉ̌ a pɑwə ŋkwinthɛ̌ e. Nə pa' a lə́ shyə m pa' wap lə yǔ' gɑ e ghə mtiŋ msya bɔ a, tə́ wap ghɔ gɑ́ pu a pu yu'tə. A lə́ pɑ̌ po'o pɑ Farisai pɑ́ gɔm cəcɑ̌ pu gɑ: Po yɔ, po ka ku' nə ghə sɔmywə: Ǎ yɑ́ gùŋ pɔ̀ awɛ pɑwə jap jʉ̀m e.

Shɑ́ pɑ Grikia lə́ bɑ wap pʉ̀ɔ yap Yerusalɛm nə ŋwɛnyə paska nə́ nə ghamtə̀ Si. Wap lə ghɔm bi Filipo yə e bɑ yə́ Betsaida m Galilea á gɔm gɑ: Cyəpɔ, pyə wə́ shəŋ nə yɔ Yeso. Filipo lə́ ghɔ gɔm bi Andreya, pu e pəmtə gɔm bi Yeso.
Yeso pa' bi pu gɑ: Cwə yə pu gɔ ghu'tə mú mo a ku'. Kwa' nyənyɔ nyənyɔ, gɑ̌ siŋ wɔ gɑ́ tɔ̌m msɛ́ ko si bɑ tə́ pfʉ, bɑ a gɔ pɑ́ pɑ do e; da' gɑ a pfʉ bɑ a gɔ ghə nthɔm tə́ a yɔm. Mo yə ě kuŋ vɔk e a, gɔ pi vɔk e bɔ, tə́ mo yə e ka kuŋ vɔk é bɔ nthʉm yəŋ dzʉ̌ a, gɔ sɔ' lwɔ' vɔk e bɔ nə vɔk mama. Mo pɑ gɔ fá' bəm, e yap jʉ̌m m̀, nə pa' tsʉ' yə gɑ̌ gɔ pɑ́ nə a, gɛfa' a gɔ pɑ́ tsʉ'u. Mo fa' bəm bɑ Ta a gɔ sɔ' ghə mku' myə́.
Cwəlɔ lam tsɑ̌ wə sɔ́; gɑ̌ gɔ piŋ ghɔm gɑ́ kɑ̀? Ta vɔk a cwəlɔ̀ lə? Da' gɑ ŋ də́ sɔ' pɑ kwa' nə cwə dzʉ yə̌ŋ. Ta ghu'tə tso tsǔ. A lə pɑ̌ po'o gi mò fɑ kɛbəŋ gɔm gɑ:
Gɑ̌ ghu'tə tsá, biŋ gɔ kwi' pɑ ghu'tə tsá.
Vəŋ pɔ pyə wap lə̌ tsʉ'u a lə nə yǔ' gɔm gɑ́: a m̀ hɛbəŋ; pyə́ shɑ pɔ pɑ gɔm yap m gɑ aŋgəle nə́ gɔmnwə bi e. Yeso piŋ dɑ́ ghɔm gɔm gɑ: Gi yəŋ tə́ gi po' m bəm pɑ̀; a gi m bi po. Cwəlɔ pu gɔ fyɛ' yəŋ dzʉ̌; cwəlɔ pu gɔ zhəŋ fò yəŋ dzʉ̌ cya e pé. Tə́ sɔ' m nə m̀, cwə yə pu gɔ sɔ' ka' á thə́ á, gɑ gɔ fəŋ guŋ pɔ awɛ wap sɔ' bəŋ m̀. Yeso lə shyə m nə́ mghɔm mɔ gɑ bɑ da'tə nthi vʉ̌ tsyə e lə bɑ gɔ pfʉ́ tsa a. Pɔmnəŋ lə pa' bi e gɑ: Pyə lə yu' nə mcò' gɑ́ Kristo gɔ la' cwə pɑ mama. Tə a biŋ shyə́ m gɑ̀ kɑ o ghɔm gɑ́ pu gɔ ká' Mú mo thə́? Mú mo bɔ bɑ́ wɑ? Yeso pa' bi pu gɑ: Ŋkha' jɑ̀ cəcɑ̌ po nə muywə cwə dzʉ̌. Po ghiŋ nə cwə yə ŋkha' yɑ̌ bi po a, po'o gɑ dzʉ̌ jʉ̌m kɑ́ lɑ wɔ, nə pa' mo yə e giŋ nthʉm jʉ̀m a tə́ jyə́ tsʉ' yə e gɔ m nə a pɑ. Cwə yə́ ŋkha' yɑ̌ bi po a, po piŋ ŋkha' po' gɑ po zhi pó ŋkha'. Yeso lə́ ghɔm bi pú po'o, fɑ cəcɑ̌ pú nthəm gɔ dʉmnyə.

Ba tə́ pa' Yeso lə́ ghə mtiŋ msya cəcɑ̌ pu tə' a, wap la tə piŋ é; po'o tə́ ghɔm tsyə́ gɔm ghɔm Si Esaya lə́ ghɔm a pəmtə gɑ:
Cyəpɔ, wɑ̌ piŋ nwə yə pu lə yu' pa' pú gɔm a?
Si bɑ e lě da'tə gʉ' e bi wɑ?
Kwa' yʉ Esaya lə ghɔm ywə yə a lə́ gə tə́ bi a pɑ́ wap lə piŋ a, gɑ:
Si bɑ ě ma' fʉ̀ mnyə pú,
biŋ gə tʉm tsap sɔk,
po'o gɑ́ wap kɑ lɑ mnyə map jɔ,
tʉm tsap kɑ yu' sɔmywə,
wap kɑ nə̌ŋ bʉɔ tʉm tsap,
gə gɑ jɛ́ wap!
Esaya lə́ gɔm po'o nə pa' a lə́ bɑ́ bɑ e yɔ nə ghu' Yeso, bɑ gɔm po'o nə.
Ba tə po'o, ba m cəcɑ̌ pɑ cya, bo'gwyə pɔ lə bɑ wap piŋ e; da' gɑ a cyə m nə pa' wap lə́ bɑwə bwɔk gɑ́ pɑ Farisai kɑ té wap sinagogə a, wap lə piŋ e sɔsɔ̌. Nə pa' wap lə bɑwə ŋkhuŋ ghu'tə yə a fɑ m bi pɔmnəŋ a shyə́ yə a fɑ bi Si a.
A nə́ pɑ̌ po'o bɑ Yeso lə ghɔm gɑ: Mo yə e piŋ á, bɑ́ e tə́ biŋ pɑ myə̀ pɑ̀, bɑ e biŋ mo yə e nthəm a, ba mo yə́ e yɔ a, bɑ́ e yɔ mo yə e nthəm a. Myə̀ yə gɑ̌ bɑ ŋkha' a, gɑ̌ sɔ' nthʉm dzʉ́ po'o gɑ mo yə e piŋ a kɑ́ cwə̌ nthʉm jʉ́m. A pɑ́ gɑ́ mo yu' mghɔm mə̌, la' e kyəp, bɑ tə́ myə̀ nə gɔ fyɛ' e pɑ́: Nə pa' da tə́ sɔ' m nə fyɛ' dzʉ̌ pɑ́, ŋ də sɔ' m nə vɔk dzʉ̌. Mo yə́ e wa' a, la' e kwi mghɔm mə̌ a, bɑ e ghə gɛ fyɛ' e: Mghɔm myə gɑ gɔm a gɔ sɔ' fyɛ' e nə jʉɔjʉ̀m tyɛ'dzʉ. Ŋ da tə́ gɔmnwə m nə yɑ thə́ pɑ́; Tá yə e nthəm a nə bvə ywə yə gɑ̌ gɔ ghɔm a. Bɑ gɑ̌ nəŋ jyə́ gɑ́ mco' myə́ bɑ́ vɔk mama. Ywə yə gɑ̌ gɔm a, gɑ̌ gɔm pa' Tá ghɔm bəm a.

Poslouchat YOHANE 12