เตเฮ๊เบ่ เหร่อ เด๊อ เง
ลี เตซิครือมีลา ยอห์น เออต๊าบ่า หม่า อา เฮ๊โล เร๊อ เหย่ซู่ครี๊ หม่า จอแปแหร่ อาลาอาโหง่ ตูจูเพร เตเพร. “อา แฮ ทวา เพรลู เห่ขุพู๊ เร๊อ อา แฮ โอ่เซอเพร เด๊อ เปเกล.” (๑:๑๔) ฮู๊ ลี เออต๊าบ่า เฮ๊ หนิดื่อ เนอ, อู ราโอ่ ลีเออต๊าบ่า หม่า แซ่ฮู๊ เพรแด๊ลี เต๊เห่ เก่ หยื่อเอ่ เร๊อ เหย่ซู่ หม่า เพรเมแลเปล๊กา อู เด๊อ จอแปแหร่ อ๊อแล เนอ อา เก่ แฮ ปา เออเนอ เตเพร. โท๊โต่ อา หม่า จอแปแหร่ อาพู๊คู เตเพร, เร๊อ เด๊อ เหย่ซี หยื่อเอ่ ลู อาขว่าอาคยา, เร๊อ อา เก่ พย๊าหนิ แลแค ซิปล่อเซอเพร ปา, อู ราโอ่ เป่ เหย่ซี ฮู๊เนอ. (๒๐:๓๑)
เบ๊อะลีเออต๊าบ่า เฮ๊โปลเหร่อ เป่ โทเฮ๊อ เร๊อ เหย่ซู่ หม่า จอแปแหร่ อาลาอาโหง่ ตูจูเพร เตเพร เฮ๊อ โทเนอ, อา เฮ๊ โล เหร่อเล๊อเก่ เตเม เตเมโค๊ตีกลี๊ เมวเจอะ เอ๊ลา เร๊อ เตเมโค๊ตีกลี๊ เออเนอ อา เด๊อะโล เร๊อ เหย่ซู่ หม่า เพรเม แลเปล๊กา อู เตเพร เฮ๊อ. โท๊โต่ อา หม่า จอแปแหร่ อาพู๊คู เตเพร เฮ๊อ. โทเร๊อ อา เฮ๊โลโปล เป่ เตเมโค๊ตีกลี๊ เต๊เห่ อาโหง่แลช๊า. แกแย เต๊เห่เห่ เนอ, อา หยื่อเอ่แหน่, เหย่ซู่ ฮู๊เต, เร๊อ อู ครวา ลูคยา ฮู๊เต อาหรี่อาแกเนอ, อา แด๊โฉ่โล เป่ เบ๊อะลีเออต๊าบ่า อากู. โทเร๊อ อา ราโล เป่ โป่ เน๊อ อู ซิเถ่ เหย่ซู่ เร๊อ อู เท๊แตแอฉื่อ ลู เต๊เห่ อาหรี่อาแก.
เบ๊อะอู ปื่อ แต่ล๋าย แบ่เจ่ เหย่ซู่ โต่ เนอเตเซ เนอ. อู มือเซอแถ่ แต่ล๋าย ลู โต่ เนอเตอโร อาหรี่อาแก เออเนอ, อู ราม๊าราแด โอ่เอ๊ลา เบ๊อะอามาดุ ๑๓-๑๗ อากู เออเนอ. โท๊โต่ อา เร๊อ อา โคเป๊เจ่ เต๊เห่ อา เตแบ๊ซว๊าแบ๊โคหนิ ลู, อา เตตี๊หรี่แตแร หนื่ออื่อ เต๊เห่ เร๊อ อา เด๊อะอ๊าเด๊อะเหร่ หนิ เหย่ซี เต๊เห่ อาหรี่อาแก เออเนอ, อู ราม๊าราแด โอ่ เกอดื่อ เบ๊อะเนอ. อามาดุ เด๊อ คยาเล๊อ เต๊เห่เนอ อา แด๊โฉ่โล เป่ เร๊อ อู ปื่อ เหย่ซู่ เร๊อ คุ๊ยปีลาต แด๊เฮอเจแม๊ ลู อาหรี่อาแก. อู มือเซอแถ่ ลู อาหรี่อาแก เน๊อ, อาเตเซอ ก๊อถ่อเซอเพร กาคยา อาหรี่อาแก เน๊อ, อา เซอก๊อถ่อ กาคยา โท เนอ, อา เด๊อะโล เป่ อาเหน่ เร๊อ อา โคเป๊เจ่ เต๊เห่ อาหรี่อาแก.
คูยอห์น แด่ดุ ราดื่อ เป พย๊าหนิ แฮเง เตเซอเพร ตูจูเพร อาเชหยู่ หนิครา เออ เนอ เด๊อ ครี๊ อา โอ่ อาหรี่อาแก. แกแย เด๊อ อา หยื่อเอ่ เร๊อ เหย่ซู่ หม่า แกล๊, เตหมะเตจ๊อ, เร๊อ เตเซอเพร เต๊เห่เนอ, ซิปล่อเซอเพร อาเชหยู่เออ อา เก่ ทวาเฮ๊อ ลูเต เป๊อแถ่ กู๊แหน่เออ ตาเป่แฮ ตูจูเพร เฮ๊อ. คูยอห์น อา เตเด๊อะโลโปล แร๊ เต๊อเจ่อหม่า หม่าเฮ๊อ เบ๊อะอา ซิหยื่อ ยูโล เป่ อู เน๊อ เด๊อ แหย่โยตาคยา อาหรี่อาแก เต๊เห่ เบ๊อะเนอ, อา นอเอ่ โต๊โหล่แม๊ เป่ อู เร๊อ ตาเต เด๊อ อู เหล่โกล นอเอ่ อา เหมาะเฮ๊หม่อลี เต๊เห่. เฮ๊โก๊เหร่อ, อา นอเอ่ เป่ อู เร๊อ เทอ, ค๊อมู, เตลี, เพรเกซิหมิ, ซิหมิ เต๊เห่, แท๊ทือหม่อ, เร๊อ แท๊ทือเส่ เต๊เห่.
เตเฮ๊เบ่ โต๊โต่ เร๊อ โต๊โต่
เตเฮ๊เบ่ เหร่อ เด๊อ เง ๑:๑-๑๘
เจเทอ คูยอห์น เร๊อ แบ่เจ่ เหย่ซู่ อา โคเป๊เจ่ อาเหร่อเล๊อ เต๊เห่ ๑:๑๙-๕๑
เหย่ซู่ อา เตเอ่เตแร ๒:๑-๑๒:๕๐
เด๊อ คยาเล๊อ เตเกล๊ เบ๊อะวี เยรูซาเล็ม อากู เน๊อ อาแก่ชอแก่ช๊า เต๊เห่ ๑๓:๑-๑๙:๕๑
แบ่เจ่ เหย่ซู่ เซอก๊อถ่อ กาคยา, เด๊อะโลคยา, อู เร๊อ อาเหน่, เร๊อ อา ก๊อแถ่คยา เด๊อ ม๊อขุ อาหรี่อาแก ๒๐:๑-๓๑
เหย่ซู่ เด๊อะโล เป่ คยาแซ๊ อาเหน่ เร๊อ อู เด๊อ กาลิลีเก่ ๒๑:๒-๒๕

Poslouchat ยอห์น เตเฮ๊เบ่ เหร่อ เด๊อ เง