If you have would like a copy of this version please contact info@davaraudiobibles.org

Text: Halbi New Testament, CC-BY-SA-4.0, The Love Fellowship. Audio: Halbi New Testament Audio Biible, CC-BY-SA-4.0, Davar Partners International, The Love Fellowship, 2023

Halbi New Testament

Halbi Bible by The Love Fellowship is licensed under Creative Commons Attribution-ShareAlike 4.0 License.

ईशु ऐ भीड़ के दकुन भाती, डोंगरी थाने चेगलो; आउर जिदलदाय बसलो तेबे हुनचो चेलामन हुनचो लगे ईला। आउर ईशु ऐ बोलुन भाती हुनमन के ऐ उपदेश देऊक मुरयालो:

“धन्य आत हुनमन, जोन मन चो सोज आत, कसनबल्लोने सरग चो राज हुनीमन चो आय।”
“धन्य आत हुनमन, जोन कलपे सोत, कसनबल्लोने हुनमन शान्ति पावदे।”
“धन्य आत हुनमन, जोन सोज आत, कसनबल्लोने हुनमन धरतनी चो अधिकारी होदे।”
“धन्य आत हुनमन, जोन धारमिकता चो भुकाहा आउर प्यासा आत, कसनबल्लोने हुनमन संतुष्ट करा जादे।”
“धन्य आत हुनमन, जोन दया करू आत, कसनबल्लोने हुनमन चो उपरे दया करा जायदे।”
“धन्य आत हुनमन, जोनमन चो मन शुद्ध आय, कसनबल्लोने हुनमन माहापुरू के दकदे।”
“धन्य आत हुनमन, जोन मेल करातो बिता आत, कसनबल्लोने हुनमन माहापुरू चो बेटा बलाया जादे।”
“धन्य आत हुनमन, जोन धारमिकता चो कारन कन्दराया जाऊ आत, कसनबल्लोने सरग चो राज हुनीमन चो आय।”
“धन्य आस तुमी, जिदलदाय माने मोचो कारन तुमचो निन्दा करदे, आउर कन्दरा दे आउर झूठ बोलुन-बोलुन भाती तुमचो बिरूद ने सपाय परकार चो खराप गोठ बलदे। तेबे हरिक आउर उदुम हुआ, कसनबल्लोने तुमचो काजे सरग ने बड़े ईनाम आसे। ऐईकाजे कि हुनमन हुन अगम गिआनीमन के जोन तुमचो ले पयले रवत ऐई रीति ले कन्दराऊ रला।

“तुमी धरतनी चो लोन आस; मान्तर अगर लोन चो सुआद नसुन जाओ, तेबे हुन फेर कोन तीज ले खर करा जायेदे? फेर हुन कोनी काम चो नुआय, मात्र ऐचो कि बाहरे पोकाया जाओ आउर मानेमन चो पाँयमन चो खाले रोमदा जाओ। तुमी जगत चो उजर आस। जोन नंगर डोंगरी थाने बसलोर आसे हुन लुकुक नी सके। आउर लोग दीया जराऊन भाती पयमाना चो खाले नाई मान्तर दिवट थाने संगाऊ आत, तेबे हुनचो ले घर चो सपाय लोगमन के उजर अमरू आय। हुनी परकार तुमचो उजर मानेमन चो पुरे चमको कि हुनमन तुमचो नुकु काममन के दकुन भाती तुमचो बुआ, चो जोन सरग ने आसे, बड़ाई करोत।

“ऐ नी समजा, कि मय मूसा चो नियम नाहले अगम गिआनीमन चो किताबमन के मेटाऊक ईले से, मेटाऊक नाई, मान्तर पुरा करूक ईलेसे। कसनबल्लोने मय तुमचो ले सते बलेंसें, कि जिदलदाय ले बादरी आउर धरतनी खतम नी होये, हुदलदाय ले नियम ले गोटक मात्रा नाहले गोटक बिन्दु बले बिना पुरा होलोर नी खतम होयदे। ऐईकाजे जोन कोनी ऐ नानी ले नानी हुकुममन थानले कोनी गोटक के टुटादे, आउर असने ची लोगमन के सिकायदे, हुन सरग चो राज ने सपाय ले नानी बलाया जायेदे; मान्तर जोन कोनी हुन हुकुममन चो पालन करेदे आउर हुनके सिकायदे, हुनी सरग चो राज ने माहान बलाया जायदे। कसनबल्लोने मय तुमचो ले बलेंसे, कि अगर तुमचो धारमिकता शास्तरीमन आउर फरीसीमन चो धारमिकता ले बडुन भाती नी होओ, तेबे तुमी सरग चो राज ने केबे ओलुक नी सकासे।

“तुमी सुनुन चुकलासास, कि मूसा चो नियम ने आगजुग चो लोगमन ले बोला जाऊ रली कि ‘हत्या नी करा’, आउर ‘जोन कोनी हत्या करेदे हुन कचरी ने डण्ड चो लायक होयेदे।’ मान्तर मय तुमचो ले ऐ बलेंसें कि जोन कोनी आपलो भाई उपरे रीस करेदे, हुन कचरी ने डण्ड चो लायक होयेदे, आउर जोन कोनी आपलो भाई के ठग बलेदे हुन बड़े सभा ने डण्ड लायक होयदे; आउर जोन कोनी बलेदे ‘अरे मुरक’ हुन नरक चो आईग चो डण्ड चो लायक होयेदे। ऐईकाजे अगर तुय आपलो भेट बेदी थाने आनसे, आउर हुता तुय सुरता करसे, कि तुचो भाई चो मन ने तुचो काजे काई बिरूद आसे, तेबे आपलो भेट हुताय बेदी चो पुरे छांडुन देस, आउर जाऊन भाती पयले आपलो भाई ले मिला-मिसा कर आउर तेबे ऐऊन भाती आपलो भेट चेगाव। जिदलदाय ले तुय आपलो बयरी चो संगे बाट ने आसीत, हुनचो ले झटा-झट मिला मिसा कर काहांय असन नी होओ कि बयरी तुके हाकिम के सोपुन देओ, आउर हाकिम तुके पलटनमन के सोपुन देओ, आउर तुय जयलघर ने डालुन दिया जासे। मय तुमचो ले सते बलेंसें कि जिदलदाय ले तुय पाई-पाई भरून नी दे से हुदलदाय ले हुता ले छुटुक नी सकसे।

“तुमी सुनुन चुकलासास कि मूसा चो नियम ने बोला जाऊ रली, ‘बेबीचार नी करा।’” मान्तर मय तुमके ऐ बलेंसे, कि जोन कोनी-कोनी बायले लेकी उपरे खराप नजर डालेदे हुन आपलो मन ने हुनचो ले बेबीचार करून चुकलो। अगर तुचो उजा आँईक तुके ठोकरना खुआयदे, तेबे हुनके निकराऊन भाती पकाऊन देस; कसनबल्लोने तुचो काजे ऐ अच्छा आय कि तुचो अंगमन थानले गोटक नष्ट होओ आउर तुचो पुईतराय देंह नरक ने नी डाला जाओ। अगर तुचो उजा हाथ तुके ठोकरना खुआयदे, तेबे हुनके गोंदुन भाती पोकाऊन देस; कसनबल्लोने तुचो काजे ऐ अच्छा आय कि तुचो अंगमन थानले गोटक नष्ट होओ आउर तुचो पुईतराय देंह नरक ने नी डाला जाओ।

“ऐ बले मूसा चो नियम ने बोला जाऊ रली, ‘जोन कोनी आपलो बायले के छाडपतर देऊक चाहाओ, तेबे हुनके छाड़पतर देओ।’ मान्तर मय तुमचो ले ऐ बलेंसे कि जोन कोनी आपलो बायले के बेबीचार चो अलावा कोनी आउर कारन ले छाड़पतर देयेदे, तेबे हुन हुनचो ले बेबीचार कराऊ आय; आउर जोन कोनी हुन छांडलो बिती ले बिहा होयदे, हुन बेबीचार करू आय।

“फेर तुमी सुनुन चुकलासास कि मूसा चो नियम ने आगजुग चो लोगमन ले बोला जाऊ रली, ‘झूठा किरिया नी खाआ, मान्तर परबु चो काजे आपलो किरिया के पुरा करा।’ मान्तर मय तुमचो ले ऐ बलेंसे कि केबीई किरिया नी खाआ; ना तो सरग चो, कसनबल्लोने हुन माहापुरू चो सिंघासन आय; ना धरतनी चो, कसनबल्लोने हुन हुनचो पाँयमन चो चौंकी आय; ना यरूशलेम चो, कसनबल्लोने हुन माहाराजा चो नंगर आय। आपलो मुण्ड चो बले किरिया नी खाआ कसनबल्लोने तुय गोटक केश के बले ना पंडरा, ना करया करूक सकीस। मान्तर तुमचो गोठ ‘हव’ चो ‘हव,’ नाहले ‘नाई’ चो ‘नाई’ होओ; कसनबल्लोने जोन काई ऐचोले आगर होऊ आय हुन खराप ले होऊ आय।

“तुमी सुनुन चुकलासास कि मूसा चो नियम ने बोला जाऊन रली, ‘आँईक चो पलटा आँईक, आउर दात चो बदला दात।’ मान्तर मय तुमचो ले ऐ बलेंसे कि खराप माने चो सामना नी करा; मान्तर जोन कोनी तुचो उजा गाल थाने थापड़ मारेदे, हुनचो बाटे दुसर बले फेरून देस। अगर कोनी तुचो उपरे दोष लगान तुचो कुड़ता धरूक चाहाले, तेबे हुनके अन्गोची बले धरूक लाय देस। जोन कोनी तुके कोस भर बेकार ने धरून जायदे, तेबे हुनचो संगे दुय कोस जाते जा। जोन कोनी तुचो ले मांगो, हुनके देस, आउर जोन तुचो ले उदार धरूक चाहाओ हुनचो ले मुंह नी मोड़।
“तुमी सुनुन चुकलासास कि मूसा चो नियम ने बोला जाऊन रली, ‘आपलो अड़स-पड़स चो लोग ले मया संगावा, आउर आपलो बयरी ले बईर।’” मान्तर ऐबे मय तुमचो ले ऐ बलेंसे कि आपलो बयरीमन ले मया संगावा आउर आपलो कन्दरातो बितामन चो काजे पारथना करा, जेचो ले तुमी आपलो सरग चो बुआ चो पिलामन ठेबा से कसनबल्लोने हुन अच्छा आउर खराप दुनो थाने आपलो बेर उदाऊ आय, आउर धरमी आउर अधरमी दुनो उपरे बरसा घसराऊ आय। कसनबल्लोने अगर तुमी आपलो मया संगातो बितामन ची संगे मया संगाआ से, तेबे तुमचो काजे काय फल होयदे? काय कर धरू बिता बले असने नी करू आत?
“अगर तुमी मात्र आपलो भाईमन ची के जुहार करा, तेबे कोन सा बड़े काम करेसास? काय दुसर जाति बले असन नी करोत? ऐईकाजे जरूरी आय कि तुमी सिद्ध बना, जसन तुमचो सरग चो बुआ सिद्ध आय।”

Poslouchat मत्ती 5