ၵႂၢမ်း​ၼမ်း
ၶရိၸ်ႈ​ဝၢင်ႇ​ၸဝ်ႈ​ယူဝ်းႁၢၼ်ႇ ​ဢၼ်​လၢတ်ႈ​လွင်ႈ​တြႃး​ၸဝ်ႈ​ ယေႇသူႉ ​ၼႆႉ ၵေႃႉ​တႅမ်ႈ​မၼ်း​ၸိုဝ်ႈ​ ယူဝ်းႁၢၼ်ႇ၊ ​ၵေႃႉ​ပဵၼ်​လုၵ်ႈ​ၸၢႆး​ ၸေႇပေႇတႄး ​လႄႈ​ပဵၼ်​ၼွင်ႉ​ၸၢႆး​ ယႃႇၵုပ်ႈ ​ဢၼ်​ပဵၼ်​ၵူၼ်း​လႃႈ​ၼမ်ႉ​ၼၼ်ႉ​ၵူၺ်း​ဢမ်ႇ​ၵႃး၊ ယင်း​ပဵၼ်​တပႄး​ၸဝ်ႈ​ ယေႇသူႉ ​ၵေႃႉ​ၼိုင်ႈ​ၵႃႈ​ၼႂ်း​သိပ်း​သွင်​ၵေႃႉ​ၼၼ်ႉ​ဢေႃႈ။ မၼ်း​တႅမ်ႈ​မိူဝ်ႈ​ပီႊ​ၸဝ်ႈ​ၶရိၸ်ႈ 85-90 (A.D. 85-90) ၵူၺ်း​ၵႃႈ မိူဝ်ႈ​လဵဝ်​ၼႆႉ​မီး​ၵူၼ်း​ၼမ်​ၼႃႇ​ယုမ်ႇ​ဝႃႈ၊ ၶရိၸ်ႈ​ဝၢင်ႇ​ၸဝ်ႈ​ယူဝ်းႁၢၼ်ႇ ​ၼႆႉ​ၸၢင်ႈ​ပဵၼ်​လႆႈ​ဝႃႈ၊ လႆႈ​တႅမ်ႈ​ယဝ်ႉ​မိူဝ်ႈ​ပီႊ​ၸဝ်ႈ​ၶရိၸ်ႈ 70 (A.D. 70) ဢွၼ်​တၢင်း​ဝဵင်း​ ယေႇရူႉသလႅမ်ႇ ​ဢမ်ႇ​ပႆႇ​လႆႈ​ၶၢမ်ႇ​တၢင်း​ဢၼ်​ယႃႉ​လူႉ​ယႃႉ​လႅဝ်​ၼၼ်ႉ​ဢေႃႈ။ ၵွပ်ႈ​ပိူဝ်ႈ​ဝႃႈ၊ ၵႃႈ​ၼႂ်း​ ၶရိၸ်ႈ​ဝၢင်ႇ​ၸဝ်ႈ​ယူဝ်းႁၢၼ်ႇ ​ၼႆႉ​ဢမ်ႇ​လႆႈ​လၢတ်ႈ​လွင်ႈ​ဢၼ်​ဝဵင်း​ ယေႇရူႉသလႅမ်ႇ ​လႆႈ​ၶၢမ်ႇ​တၢင်း​ဢၼ်​ယႃႉ​လူႉ​ယႃႉ​လႅဝ်​ၼၼ်ႉ​ဢေႃႈ။ ၶရိၸ်ႈ​ဝၢင်ႇ​ၸဝ်ႈ​ယူဝ်းႁၢၼ်ႇ ​ၼႆႉ​လၢတ်ႈ​ၼႄ​လွင်ႈ​ၸဝ်ႈ​ ယေႇသူႉ ပဵၼ်​ထႃႇဝရႃႉ​ၼုၵ်ႈၵပၢတ်ႈ​တြႃး​ၽြႃး​ပဵၼ်​ၸဝ်ႈ​ဢၼ် “​ၶၢမ်ႇ​ပဵၼ်​ၸႃႇ​တီႉ​ၵူၼ်း​သေ​လႄႈ​ယူႇ​လူၺ်ႈ​ၵၼ်​တင်း​ႁဝ်း​” ၼၼ်ႉ​ဢေႃႈ။ ၸွမ်း​ၼင်ႇ​ၶၢဝ်ႇ​တြႃး​သိူဝ်း​ပျေႃႇ​ဝႃႈ​ၸမ်ႉ၊ ၸဝ်ႈ​ ယေႇသူႉ ပဵၼ်​ၵတီႉ​သဵတ်ႈ​ၸႃႇ​ဢၼ်​ၵႄႇ​ၶျွတ်ႈ၊ ပဵၼ်​လုၵ်ႈ​ၽြႃး​ပဵၼ်​ၸဝ်ႈ​လႄႈ​ၶဝ်​ၸိူဝ်း​ဢၼ်​ယုမ်ႇ​မၢတ်ႈ​မၼ်း​ၸဝ်ႈ​တင်း​လၢႆ တၵ်း​လႆႈ​ဢသၢၵ်ႈ​လိပ်း​ဢေႃႈ (20:31)။
ၽိုၼ်​လိၵ်ႈ​တြႃး​ၼႆႉ​တႅမ်ႈ​လွင်ႈ​ထႃႇဝရႃႉ​ၼုၵ်ႈၵပၢတ်ႈ​တြႃး၊ၽြႃး​ပဵၼ်​ၸဝ်ႈ​ဢၼ်​ၸၢပ်ႈ​သႅင်ႇ​ၵၼ်​တင်း​ၸဝ်ႈ​ ယေႇသူႉ ​လႄႈ​ပွတ်း​ႁူဝ်​ၽိုၼ်​လိၵ်ႈ​ၼၼ်ႉ​လၢတ်ႈ​ၼႄ​လွင်ႈ​ၼီႉမိၵ်ႈ​လၢၵ်ႈၶၼႃႇ​ဢၼ်​လီ​ဢၢမ်း​ဢၼ်​ၸဝ်ႈ​ ယေႇသူႉ ​ႁဵတ်း​ၼၼ်ႉ၊ ႁႂ်ႈ​လႆႈ​ပဵၼ်​သၢၵ်ႈ​သေႇ​လွင်ႈ​ၸဝ်ႈ​ ယေႇသူႉ ပဵၼ်​ၸဝ်ႈ​ၵႄႇ​ၶျွတ်ႈ​ဢၼ်​ဝႆႉ​ၵတီႉ​သမ်ႉ​ပဵၼ်​လုၵ်ႈ​ၽြႃး​ပဵၼ်​ၸဝ်ႈ​ၼၼ်ႉ​ဢေႃႈ။ ၵွပ်ႈ​ပိူဝ်ႈ​ၼီႉမိၵ်ႈ​လၢၵ်ႈၶၼႃႇ​ဢၼ်​လီ​ဢၢမ်း​ၸိူဝ်း​ၼၼ်ႉ​လႄႈ​ၵူၼ်း​ၵမ်ႈ​ၽွင်ႈ​ယုမ်ႇ​မၢတ်ႈ​လႄႈ​ၶဝ်ႈ​ပဵၼ်​တပႄး​ၸဝ်ႈ​မႃး​ဢေႃႈ။ ၵူၺ်း​ၵႃႈ ၵမ်ႈ​ၽွင်ႈ​ႁဵတ်း​ၶတ်း​လႄႈ​ယင်း​ဢမ်ႇ​ယုမ်ႇ။ ပွတ်း​ၵၢင်​ၼႂ်း​ဢၶၢၼ်း​လူင် 13-17 ၼၼ်ႉ၊ ပႃး​လွင်ႈ​ၸဝ်ႈ​ ယေႇသူႉ ​ႁဵတ်း​ၵေႃႉ​သေႈ​မိုတ်ႈ​ၵိုဝ်း​ၵၼ်​တင်း​တပႄး​ၸဝ်ႈ​တင်း​လၢႆ ၼႂ်း​ၶမ်ႈ​ဢၼ်​မၼ်း​ၸဝ်ႈ​လႆႈ​ၶၢမ်ႇ​တၢင်း​ဢၼ်​တီႉ​ဢဝ်၊ဢိၵ်ႇ​တင်း​ပၼ်​ဢဵၼ်​ပၼ်​ႁႅင်း​ၶဝ်​ၼႂ်း​ဝၼ်း​ဢွၼ်​တၢင်း​လႆႈ​ၶၢမ်ႇ​တၢင်း​ဢၼ်​တွၵ်ႇ​ဝႆႉ​ၼၼ်ႉ​ဢေႃႈ။ ၼႂ်း​ဢၶၢၼ်း​လူင်​ပွတ်း​ႁၢင်​တင်း​လၢႆ​ၸမ်ႉ၊ ၽုၺ်ႇ​ၼႄ​လွင်ႈ​ၸဝ်ႈ​ ယေႇသူႉ ​လႆႈ​ၶၢမ်ႇ​တၢင်း​ဢၼ်​တီႉ​ဢဝ်၊ တၢင်း​ဢၼ်​ၸႅတ်ႈ​သေး၊​တၢင်း​ဢၼ်​တွၵ်ႇ​တၢႆ​ၵႃႈ​ၼိူဝ်​သဝ်​လၵ်း​ဝႃး​ၵၢပ်ႈ၊ တၢင်း​ဢၼ်​လုၵ်ႉ​ၶိုၼ်း​လိပ်း​မႃး ဢိၵ်ႇ​တင်း​တၢင်း​ဢၼ်​ၼႄ​ပျႃး​တူဝ်​မၼ်း​ၸဝ်ႈ​တီႈ​တပႄး​ၸဝ်ႈ​တင်း​လၢႆ​ၸိူဝ်း​ၼၼ်ႉ​ဢေႃႈ။
တမၢၼ်ႇ​ၸဝ်ႈ​ ယူဝ်းႁၢၼ်ႇ ​ဝႆႉ​ဢယေး​ယႂ်ႇ​သေ​လႄႈ​လၢတ်ႈ​လွင်ႈ​သူႉ​ၵျေး​ၸူး​ထႃႇဝရႃႉ​ဢသၢၵ်ႈ​ဢၼ်​လႆႈ​ၵႃႈ​တီႈ​ၸဝ်ႈ​ၶရိၸ်ႈ၊ သူႉ​ၵျေး​ၸူး​ဢၼ်​တႄႇ​ၸႃႉ​မိူဝ်ႈ​လဵဝ်​လႄႈ​သမ်ႉ​တူၵ်း​ႁွတ်ႈ​တီႈ​ၶဝ်​ၸိူဝ်း​ဢၼ်​ယုမ်ႇ​မၢတ်ႈ​ၸဝ်ႈ​ ယေႇသူႉ ပဵၼ်​သဵၼ်ႈ​တၢင်း​လႄႈ​ပဵၼ်​သမ်ႇမႃႇ​တြႃး၊ ဢိၵ်ႇ​တင်း​ဢသၢၵ်ႈ​ၵေႃႈ​ပဵၼ်​ၼၼ်ႉ​ဢေႃႈ။ တမၢၼ်ႇ​ၸဝ်ႈ​ ယူဝ်းႁၢၼ်ႇ ​ဢဝ်​တင်း​တၢင်း​ဢၼ်​ၵမ်​ၵျၢင်ႉ​ယူႇ​ၵူႈ​မိုဝ်ႉ​ၵူႈ​ဝၼ်း​ၸိူဝ်း​ၼၼ်ႉ၊ တႅၵ်ႈ​တိူင်း​ႁႂ်ႈ​ႁူႉ​ထွမ်ႇ​လွင်ႈ​ဢသၢၵ်ႈ​ဝီႉၺိၺ်ႇ​ဢၼ်​ၸႅတ်ႈ​ၼၼ်ႉ​မိူၼ်​ၼင်ႇ​ၼမ်ႉ၊ ၶဝ်ႈ​မုၼ်း၊ ဢၼ်​လႅင်း၊ ၵူၼ်း​လဵင်ႉ​ထိင်း​သူဝ်း​လႄႈ​ၽုင်​သူဝ်း ဢိၵ်ႇ​တင်း​တူၼ်ႈ​ၶိူဝ်း​မၢၵ်ႇ​ၸပိတ်ႈ​တင်း​မၢၵ်ႇ​မၼ်း​ၸိူဝ်း​ၼၼ်ႉ​ဢေႃႈ။
ႁူဝ်​ၶေႃႈ​ဢၼ်​ၶဝ်ႈ​ပႃး​ၸမ်ႉ
ၼုၵ်ႈၵပၢတ်ႈ​ၸဝ်ႈ​ဢၼ်​ဢသၢၵ်ႈ​လိပ်း 1:1-18
သြႃႇ​ ယူဝ်းႁၢၼ်ႇ ဢိၵ်ႇ​တင်း​တပႄး​ၸဝ်ႈ​ ယေႇသူႉ​ 1:19-51
ၵၢၼ်​သႃႇ​သၼႃႇ​ဢၼ်​ၸဝ်ႈ​ ယေႇသူႉ ​ႁဵတ်း 2:1-12:50
ဝၼ်း​လိုၼ်း​သုတ်း​ၵႃႈ​ၼႂ်း​ဝဵင်း​တင်း​ႁိမ်း​ဝဵင်း​ ယေႇရူႉသလႅမ်ႇ 13:1-19:42
တၢင်း​ဢၼ်​ၸဝ်ႈ​ၽြႃး​လုၵ်ႉ​ၶိုၼ်း​လိပ်း​လႄႈ​ၼႄ​ပျႃး​တူဝ်​ၸဝ်ႈ​ၵဝ်ႇ 20:1-31
တၢင်း​ဢၼ်​ၼႄ​ပျႃး​တူဝ်​ၸဝ်ႈ​ၵဝ်ႇ​ၼႂ်း​မိူင်း​ ၵႃႇလီႉလႄး 21:1-25

Poslouchat ယူဝ်းႁၢၼ်ႇ ၵႂၢမ်း​ၼမ်း

Poslouchat ယူဝ်းႁၢၼ်ႇ ၵႂၢမ်းၼမ်း